كفاية عك

فيه عك ... وعك فيه 

لما الكلام يبقي متحاش في زورك ومش عارف تتكلم .. بيبقي لسان حالك .. "كفاية عك"

العك لما بيبقي اسلوب حياة بتبقي دايما النتائج والتوابع فوق الحد الاقصي للمسموح والمقبول والمنطوق والمسموع

لما يبقي عادي انك تموت علي ايد بلطجي .. او رصاصة داخليه .. او تحت تريلاا ... او تتفرم جوا قطر
والناس تنسي وتعدي يبقي ده عك
لما تقول تمرد ،، وترجع تتمرد علي الي اتمردوا دي يبقي عك
لما تبقي ضد الاخوان ولما تدخل العسكر ترجع تقف مع الاخوان ده يبقي عك
لما تفتكر عسكر شتيمه .. ده اصلا عك
لما تسلم الايادي تتغني في الافراح دي يبقي عك
لما تسكت علي حكومه المسنين والوفيات ده يبقي عك
لما كنا قاعدين نعد الزباله في الشوارع وناسيين بلاوي البنزين والكهرباء واللقمه ده عك
لما يبقي فيه سنه في عمر مصر كلها عك في عك في عك
لما ازمة سد اثيوبيا ما بتبقاش فجاأة ازمة وبقت بتحمل الخير لمصر ده عك
لما مبارك لسه مامتش سريريا لحد دلوقتي ده يبقي عك
لما ٧٤ بني ادم يموتوا في ماتش وما حدش اتحاسب ده يبقي عك
لما تبقي فاكر ان القضاء الشامخ لسه شامخ ده يبقي عك
لما لحد دلوقتي الناس بتسال عمر سليمان ده عايش ولا ميت ده عك
لما تبقي لسه فاكر ان مرسي راجع ده عك
لما احساسك ببرنامج البرنامج يبقي شويه قرفان وشويه مبسوط ده يبقي عك
لما حمدين صباحي لسه عايز يترشح للرئاسه ده في ذات اصله عك
لما تكون ما سمعتش شريط شرين الجديد لحد دلوقتي ده يبقي عك
لما الطرحه السبانش تتقلب كوفرته علي الدماغ ده يبقي عك
لما تعمل شير لبوست علي الفيس لشهيد وتكتب "اضغط لايك" وقول الله يرحمه .. ده عك
لما الاعلام يبقي مصري .. ده عك
لما الحياة سينما لسه بتقولك الافلام كلها حصري .. ده عك
لما مش عارفين المدارس راجعه ولا فيه وباء ومش راجعه .. يبقي ده عك
لما المشوار تاخده في ساعتين وربع بدل من ربع بس ده يبقي عك
لما تحزن ومش قادر تقول ده يبقي عك
لما تبقي فاكر ان مصر هتبقي احسن بلد في الدووونيا .. ده يبقي عك

كفايه عك وارحمي نفسك يا اختي 

... الي مصر الي كانت ... اتحدث وافش غلي ...

كله يوسع

وحشني بلوجي 

وقررت العوده 

ببساطه لا متناهيه

ساقوم بجوله علي اصدقائي القدامي القي التحيه والسلامات

عملت نيو لوك لزوم العوده المجيده 

عايزه اكتب كتير 

من وقت وسط البلد ما كانت وسط البلد .. لحد ما بقت وسط اللمة
بحب البلوج

بحب الرغي

وما بحبش العك

واحد صورماتى ... لو سمحت

الشعوب العربية تهنئ الرئيس الامريكي جورج بوش على الجزمة الجديدة (الفردتين مش فردة واحدة) وبنقولوا كلنا .. مبروك على الأرض يا سيدى

الفنانة عبلة كامل تهدى مطلع اغنية الفيلم الجديد للرئيس بوش وبتقوله

يا سعده يا حظة ............ الى يجيلة كووووووتشى

بدل من كسر قله او زير ... الوطن العربي يودع الرئيس بوش فى نهاية فترته الرئاسية ... بلطشه فى خلقته بالجزمة الى اكيد كانت قديمة

مسؤول عربي يتقدم بطلب احاطه لجامعة الدول العربية بمنع الصحفيين من ارتداء اى احذية اثناء انعقاد المؤتمرات الصحفية للرؤساء وكبار المسؤولين .. مش علشان حاجة لا سمح الله .. بس لافتقار الرؤساء والمسؤولين العرب لرشاقة بوش فى تفادى الاحذية الطائرة

بما ان القرعة بتتباهى بشعر بنت اختها ... فا بمنتهى الفخر والاألاطة اعلن .. لو لم اكن مصريا لوددت ان اكون منتظرا زيديا

ينتظر الفن العربي الفنان السياسى المخضرم شعبان عبد الرحيم بالغناء لحذاء منتظر .. بس يا رب يلاقيه

نحمد الله ان هذا المؤتمر الصحفى لم يكن فى مصر .. والا ماكنش اتبقى من (منتظر) الا حذاؤه

مراسلكم من القناة الاخبارية 44 جوز بنى لميع

اللــــــــــه أكـــــــــرم

كل سنة وانتوا طيبين يا بشرررررررر

وحبينا ننوه ان دار الافتاء اعلنت
ان فيه رمضان بيجي فى الصيف وفيه رمضان بيجي فى الشتا .. على ان رمضان هذا العام هيجي وراه العيد على طول

لذلك حبينا نهنيكم بقدوم عيد الفطر المبارك

:)

فيـــــــــــلم بوهيمــــــــــي

"قضت محكمة جنح الخليفة فى جلستها المنعقدة السبت بحبس الدكتور سعد الدين ابراهيم رئيس مركز ابن خلدون للدراسات الانمائية سنتين مع الشغل وكفالة 10 الاف جنيه لايقاف التنفيذ مع إحالة الدعوى المدنية للمحكمة المدنية المختصة ، فى قضية الادعاء الكاذب وتشويه سمعة مصر المقامة ضده"

الطريف فى هذا الخبر انه جه فى نفس ذاتية الوقت الذى تنعم فيه المدعوءة هاله سرحان بالراحة فى بيت زوجها بامريكا

مع انها شوهت سمعة مصر ودلقت عليها جركنين مية نار على بنزين من ابو 2 جنية ونص .. لما اجرتلها كام بنت فى البرنامج المعتوه بتاعها وطلعونا ولمؤاخذة كلنا تراباتاتيت رجالة وستات وحكومة :)

ولحد دلوقتى ولا عارفين الموززة حكموا عليها باية ولا القضية وصلت لحد فين ؟؟

وصباح الفراولة بتاع الفراولة

والاطرف والانكت انه فى نفس ذاتية الوقت برضة الذى ينعم فيه المدعوء منودح سماعين بالاستجمام والعلاج من الاكتئاب يا عين امه فى لوندون وهو طالع براءة فولالى ... مع انه السبب فى مقتل 1200 صخس على الاقل من حثالة البشر الى ما تسواش ولا تستاهل بعيد عنكوا ..

مع ان القضية هنا تعتبر قتل بييــن واداة الجريمة موجودة وفى سبب مادى وضحايا وجثث على شوية مخطوفين

لكن دكهوما ما اتشطروش غير على الراجل الى راح كاتبله كام مقالة فى صحف اجنبية زى ما بيقولوا .. وقال الى قاله .. وانتقد السياسية الداخلية .. وقالوا ان مقالاته هى سبب زرع الفتنة الطائفية .. وبقى هو السبب فى تشويه سمعه مصر

فاصل من الضوحك والنبي

واتنش الراجل سنتين غيابي

بينما ما قدروش يحكموا ولو بتلات ساعات ولو بايقاف التنفيذ حتى ضد منودح سماعين

بغض النظر عن مين سعد الدين ابراهيم واتفاقى معاه او اعتراضى .. فليس هنا المحل المنوط به ذكر تفاصيل قضيته هو راخر .. علشان مش ناقصينه .. ان شاء الله يعدموه شنقا بالرصاص فى ميدان عام

القضية فى الناس الى بيتشطروا على الحمير الى هو احنا ولمؤاخذة وسايبين الديناصورات الى هما هما ..
واحد كتب كلمتين اتنش سنتين .. وواحد قتل 1000 وشوية واخد براءه ... طب بأى منطق ... أو واحدة زى هللوووله هانم .. طلعتنا ولمواخذة .... ولمؤاخذة ..... وخرجت بره وما حدش برضه قربلها .. طب سبونا من الى اتنيل وقتل .. وهى هالولة ما شوهتش سمعه مصر برضة؟؟

طب بلاش .. ولا هو الى يقرب من السياسة الداخلية وزعزعة امن البلاد والاستقرار الداخلى للسلطة والحكومة .. هو بس الى يتدعء بجاز .. لكن اى حاجة تخص الشعب ولاد الكلب دول ان شاء الله يولعوا فى بعض

طب ولما قالوا ان امريكا بتصدرلنا المساجين من بره علشان يجيوا يقضوا عندنا السمر والويك اند فى منتجعات وزارة الداخلية السياحية .. ده ما كنش تشويه لسمعه مصر .. ؟؟

افلام السنيما زى الكباريهات وصالات الدعارة والخمارات والقمار .. ده مش تشويه لسمعه مصر

فندق حياة ريجينسى لما يتقفل سنتين وتنزل نجومه لنجمتين بدل من 5 علشان صاحبه رفض يقدم فيه خمور .. ووزارة السياحة تجبره على تقديمها علشان سمعه البلاد وسمعه السياحة والعملة الاجنبية وووو .. ده مش تشويه لسمعه مصر

لما الشعب بقى بيتخانق ويقتل فى بعضة علشان رغيف العيش .. وهو ده مش تشويه لسمعه مصر ؟؟

هنقول ايه بس ولا ايه

فكرتونى بالشاعرالثورى لما قال

رب قوم ذهبوا الى قوم

فلما القوم الاولانين ذهبوا للقوم التانين ما لقهومشى

اخدوا تاكسى ورجعوا تانى

وبس خلاص

الشكارة فى العبـّــــارة

الشكارة فى العبـّــــارة

العبارة طلعت فولالى .. ومطابقة لجميع المواصفات الفنية وذلك طبقا لتقرير اللجنة الفنية التى اعدتها النيابة العامة - ودى غير لجنة تقصى الحقائق بتاعة مجلس الشعب الى مطلعة تقرير تانى خاااااالص -

الباشا ممدوح اسماعيل طلع صاحب أجانس عربيات .. ومالوش دعوة بالسواق الى طلع بالعربية وراح داسله 3 تنفار وغار فى داهية معاهم .. يبقى صاحب الاجانس فى السليم لان مافيش منطق يقول انه يتحبس علشان كان مشغل عنده سواق حمار البعيد واعمى القلب والبصيرة راح داس الى داسهم وغار فى داهية

طلع ممدوح اسماعيل فى راى المحامى الاول على قناة فضائية انه بيتعالج فى الخارج وفور اكتمال شفاءه هيرجع بالسلامة لاراضى الوطن .. مع ان المحامى التانى على قناة فضائية تانية خالص . قال انه هربان فى لندن بيعانى من الاكتئاب يا عين امه .. وخايف يرجع لاهالى الضحايا يقتلوه
فاصل من الضحك والنبى

وفى الاخر طلع ولاد الكلب الى كانوا راكبين العبارة هما السبب .. لانهم لو ماكنوش ركبوها اكيد ما كنوش ماتوا .. وايه الى يخليهم يتنيلوا يركبوها من اساسه .. ماركبوش طيارة وكانت ولعت بيهم ليه وكان البيه كمل نوم عادى

الناس بقى المكلوبة والمكلومة وكلام الجرايد الخايب ده .. وجع قلب وتهيؤات خير اللهم اجعله خير وطلع اثارة للراى العام على الفاضى ... والناس الكوبرات مش ناقصيين وجع قلب ..

والقضية برضة طالعة فلللة بسم الله ما شاء الله عليهم من غير مذنب واحد وكله براءة كده فى عين العدو .. ومتهم واحد بس واخد 6 شهور ومع ايقاف التنفيذ كمان

تذكرت بالامس لما قال الدكاترة الافاضل على قناتين منفصلتين فى برنامجين منفصليين وهما بيدعوا ان لو عندك سواق وراح خبط واحد تتحبس انت مكانه .. باى منطق نقول كده .. تذكرت مقولة سيدنا عمر بن الخطاب

لو تعثرت بغلة في العراق لسئلت عنها ياعمر لم لم تمهد لها الطريق

وعايزين يقابلوا ربنا .. لا خليكوا هنا مخللليين احسن ..
واهو رمضان جاى والعيد جاى
وفات تلات سنين والناس هتنسى
زى ما نسينا الطيارة المصرية وزى ما نسينا قطر الصعيد
وزى ما نسينا مسرح بنى سويف
وزى ما نسينا التوريث .. وزى ما نسينا روحنا

بس الحمد لله الحمد لله رب العالمين ..
ان الاهلى اخد السوبر فى الاخر

ولا عاقبة عندكم لا فى السرات ولا فى الضرات
شعب مقشف صحيح
وجتنا نيلة فى حظنا الاهبب من الهباب

لما عنيا بتشووووووووفه

لما عنيا بتشوووووووووووفه

لما بشوفه واعدى من قصاده ... بحس ان يومي النهاردة اكيد هيكون مختلف

لما بشوفه .. بنسى كل مشاكلى وهمومى

لما بشوفه .. بتحول لشاعر ورسام وفنان
لما بشوفه .. بحس انى فى احلى مكان واحلى لحظة فى الدنيا
وخصوصا لما بشوفه الساعة 7 الصبح قبل الزحمة وقبل الحر

واعذرنى يا حياتى .. ما هو اصل انت اساسا مش فى طريقي

ولو كان بايدى كنت فضلت جنبك ع طول

بس هجيبلك 5 او 6 مليون جنية منين

كفاية عليك جنية ونص تمن قرطاس الترمس

أو الـ3 دقايق الى بشوفك فيها مرة فى الاسبوع او حتى كل اسبوعين

وصدقنى بشتقالك .. وصدقنى بحبك

بس يعنى ما اهو انت موجود .. ووقت ما احتجالك اكيد هجيلك

بس اصل انت بتبقى احلى لما بتظهر فى حياتى من غير معاد

ومن بعيد لبعيد يا نجم فى سما حياتى علشان بتبقى اجمل

لانى لما بقرب منك بتبقى ريحتك لا تطاق ومنظرك يقرف الكلب الجربان

وكفاية عليك كده بقى النهاردة

---------------------------------------

خواطر واحدة راكبة تاكسى معدى على كورنيش النيل
---------------------------------------

تحديـــــــث

16-07-08

تحديـــــــث
27-07-08

الثـــانوية ... وأبو رجل مسلوووخة ؟؟

الثـــانوية ... وأبو رجل مسلوووخة ؟؟؟؟

المشهد الاول

الثانوية .. حلم عمر تجسد فى وجدان كل شاب وفيتاة ..
الثانوية .. التحدى والمذاكرة واكل الكتب اكل ليل ونهار ...
الثانوية .. احجز للدروس فى كل المواد فى كل السناتر وعند احسن المدرسين فى اى مواعيد وطول النهار وطول الليل لو امكن ...

الثانوية ...تصوير كل الملازم والمذكرات والمراجع من كل منطقة فيكي فى مصر ...
الثانوية ... حل جميع الامتحانات والكتب الخارجية وكتب المدرسة والنماذج ...
الثانوية .. تثبيت الاهالى .. يا بابا لازم احجز فى كل الدروس وانا مش هجيب اقل من 93% السنة دى ..
الثانوية ... السراب الى بنزود بيه الهم همين واتنين وتلاتة على مدار سنتين من العذاب المتواصل كما فى سجون ابو غريب و جوانتناموا

المشهد الثاني

ماما .. انا نازل الدرس الفيزياء .. هاتى خمسين جنية علشان هصور ورق وادفع تمن الحصة .. واكل حاجة قبل ما اطلع على درس التفاضل ودرس العربي

بابا عايز فلوس الشهر بتاعة درس الاحصاء والانجليزى والفرنساوى والفلسفة والجولوجيا وهات كمان
مصروفى بالمرة

يا ابنى قوووم ذااااااااكر وافتحلك كتاب ...
ذاكرت الى اخدته فى الدرس الصبح وخلصت واجب درس بعد الظهر ... وراجعت لامتحان الدرس بتاع بليل؟؟

ماما ... يوووووه بقى انا لسه راجع من درسين ونازل كمان شوية المراجعة
سبيينى اريح دماغي شوية

المستر مش جاى النهاردة ... طب قشطة يالا ناكل حاجة وندخل سنيما على ما يجي معاد الدرس التانى

الووو .. ايوا يا ابنى .. فاتح كل الكتب قصادى اهو ومش فاهم حاجة .. انا زهقت .. بقولك انا هقوم العب جيم فيفا وبعد كده ارجع اكمل .. يمكن افهم حاجة

فاضل نص ساعة على ما انزل .. ايه ده صحيح ده كان فيه واجب ... طب هقعد اضربه على السريع قبل ما انزل

بابا .. ما تنساش النهاردة معاد الدرس الساعة 12 بليل فى طريق مصر الاسماعيلية .. وهخلص الساعة 2 ... علشان بس تعمل حسابك تستنانى

يا حبيبى فاضل شهر على الامتحان ...
دروس وما قصرناش .. وملازم وكتب خارجية ومتاخرناش .. هااه ايه النظام نطمن ؟؟
!!! اطمن يا بابا مش اقل من 90%

او غيرهم الى بيبقى قاعد بيحرت فى الكتب حرت .. من الجلدة للجلدة ... زى ما يكون هيألف نظرية جديدة .. وهو فى الاخر المسكين حافظ مش فاهم

المشهد الثالث

امام لجان الامتحانات

الامتحان ززفت زفت ززززززززززززفت

عاااااااااااااااااااااااااا عااااااااااااااااااااااااااااااا

حسبي الله ونعم الوكيل ... الى حاطط الامتحان ده اكيد ابوه وامه مجانين رسمي

هاااااه يا ابنى عملت ايه ... ؟؟
ماحدش يسالنى عملت ايه .. انا عملت الى عليا

لجنة مقرفة وامتحان زبالة و فوق مستوى الطالب الفائق
(هى مصر فيها طلبة فائقين اصلاا ؟؟!!)

عرفت تحل السؤال C فى السؤال الرابع ..
ايه ده انا مش شفتش السؤال ده ........ ده كان فى انهو حتة

انا سمعت انهم سربوا الامتحان والواد حموءة كان معاه نسخة منه والامتحان بيتباع
بـ300 جنية ... عالم ظلمة .. منهم لله .. منهم لله

المشهد الرابع

وحيـــــاة قلبي وافراحة وهناه فى مساه
وصبااااحه

الحمد لله حمادة جاب 92% و 7 من عشرة .. (قال يعنى)

ارفعى يا سها سماعة التليفون .. مش عايزين حد يشمت فينا .. كفاية الى الواحد فيه

الاب: يا خسارة الفلوس والمرمطة الى ضاعت على الدروس ... وانت عيل بهيمه ما تسواش

ايوا يا حبيبتى .. انا بتصل بيكي علشان اقولك ان فوفا جابت 98% الا هى جيجي عملت ايه (طبعا جيجي منهارة تحت البطانية) ؟؟؟؟

انت كنت بتستخفلنى يا ابن الـ ..... تاخد فلوس الدروس وتروح تقعد بيها على القهوة وتاكل كنتاكى

المشهد الخامس

نتائج مكتب التنسيق

كلية الطب 98,8%
كلية الصيدلة 98,7%
كلية العلاج الطبيعي 98,3%
كلية الهندسة 96,8%
كلية حاسبات ومعلومات 96,9%
كلية التجارة 93%
كلية الحقوق 89%
كلية التربية 90%
سياسة واقتصاد 96%
اعلام 97%


ولا عزاء لمن دون ذلك .. هش يا واد منك له علشان
الدبان

عيطنا .. واتخربت بيوتنا ... وباظت اعصابنا .. واسودت ايامنا .. وجالنا قلب وسكر من المدعوءة الثانوية وامتحانتها

زعلانين ليه .. علشان ما عرفتش تدخل طب .. الى فيها الـ 45 بنى ادم حوالين جثة فى معمل .. ولا 7 سنين الطالب يتنفخ فيهم .. ولا تكليف فى الارياف ولا مجاهل الصعيد .. ولا تترمى فى عربية اسعاف .. ولا فى مستشفى حكومى واخرك 120 جنية

زعلان علشان ما دخلتش الهندسة .. الى بتدفع تقلك دروس وادوات .. وفى الاخر الدكتور ينجح الى على مزاجه ويسقط على مزاجه ومناهج عقيمة ومعامل متكهنة .. وفى الاخر هتقعد على القهوة برضة لان العشرة منكوا بقوا بقرش

زعلان على السياسة والاقتصاد ولا كليه الاعلام الى ما لحقتهاش .. ليه يا عين والدك ووالدتك .. كنت متخيل هيشغلوك سفير فى الخارجية ولا يمسوك السلك الدبلوماسى .. ولا هتخرج تشتغل فى القنوات الفضائية

زعلان على ايــه !! ولا ايه... ؟؟ وهى الجامعة هتفرق عن الى انت فيه دلوقتى فى ايه .. ؟؟

الحكومة ريحتكوا .. مش كل واحد عايز شهادة يتمنظر بيها على خلق الله .. ولا تزعل نفسك يا معلم .. بس ابقى قابلنى لو عرفت تحط رجلك فى حتة .. ولا قابلنى اذا كانت شهادتك هتسوى قرش صاغ بعد كده .. ولا اساسا هتخرج من الجامعة فاهم حاجة وتسوى حاجة

ماله التعليم الصناعى والفنى .. على الاقل هتبقى كسيب والعشرة منكوا يتاقلوا بالدهب لانهم مش موجودين .. فرحت بالشهادة العليا وانت قاعد فى الكوفى شوب او لسه بتاخد المصروف من ابوك

كله محصل بعضه .. والتعليم من ساعة ما كنت فى اللفة يا ضنايا لحد ما تتخرج من الجامعة .. ده اذا شفت تخرج .. واذا شفت شهادة وهو قطعية واحدة ومخك هيتحول ولمؤاخذة لحزمة البرسيم

فعلا صعبان عليا الاهالى وصعبان عليا العيال الى كل لحظة تعيط وتنهار ويغمي عليها و تتحرق فى دمها .. على اييه .. ؟؟ اذا كنت طالب خايب ولا طالب شاطر ده مش ذنبك ... طالب بتذاكر ولا طالب بتلعب ده مش ذنبك .. لا انت عملت فى نفسك كده ولا اهلك عملوا فيك كده .. الواحد كان ضحية من اول يوم تخطى رجليه فيها التعليم المصري .. ما ينفعش نلومه ونستنى نجنى ثمار تعليمه وقت الثانوية
ونرمي عبء كل السنين الى فاتت على كتفه هو لوحده .. لا نقدر نلوم دماغه ولا تربيته ولا ثقافته ولا فهمه ولا بيئته ولا شكل مدرسته

اكيييد ما كنش ذنبه انه يكون ضحيه لمؤامرات من ايام ما كان العجل فى بطن امه ...

لا مش ذنبـــــــــــــــــــــــه

بس هو يعنى مش من حق الطالب يحلم ... مش من حق اهله يفرحوا بيه .. مش من حقه يكون بنى ادم محترم فى نظر المجتمع ... مش من حقه يعمل زى غيره ويلاقى فايدة

من حقك .. من حقك

بس اكيييد مش فى بلد زى بلدنا

ارتحتى يا حكوومة .. خليتى الناس تكلم روحها .. خرجتولنا طلبة فاشلة من نظام تعليم فااااشل .. خليتى الناس تجرى ورا السراب .. طلعوا كل الى فى جيبوهم علشان خاطر الاكذوبة الى اسمها الثانوية .. مرمتطى الناس على الدروس والمدرسين والسناتر
لهيتى الناس فى الامتحانات الى بتتسرب ولا تنسيق الجامعة ولا المجموع الى
هيساوى ولا مش هيساوى

اطمنوا يا شعب ... اطمنى يا حكومة
ويا هلا بالاحتكار ويا هلا بالضرايب ويا هلا بالتوريث

وهشتكنا وبشتكنا يا ريس ... ده انت زعيم والنعمة كويس

الجنازة حارة ... والميت ولمؤاخذة كلب

من حوالى اسبوعين بعد ما ابتديت اتعالج من فقر دم والرعاش من القنوات الارضية المصرية (المنيلة على عينها)
وانا صامده ومستحملة .............
مستحملة ............
مستحمـــــــــلة ...............


فى النهاية طقيت واستسلمت واضطريت اضطرارا مضطرا
انى ادخل الدش (المنيل على عينه) بيتى

فى البداية كان احساس رائع انى احول بين مئات القنوات وأأنتخ واختار الى يعجبنى .. واتحسر على ايام ما كنت احول بالريموت بين 10 قنوات كلهم ما يفرقوش عن بعض اسيب القناة الاولى على حالة حوار .. الاقى التانية على تامر امين .. والتالتة على حاجة غريبة .. والنايل تى فى الى دايما واقفة على نشرة الاخبار الى بالفرنساوى .. ولا مسلسل خالتى صفية والدير على الدراما .. او شريف مدكور على الاسرة والطفل .. يا لهوووي ياابــا ... لا ما يغركوش المنظر .. العبدة لله استحملت كتيير برضة .. كان مافيش مفر بعد ما حوشت القرشين غير انى اشترى الدش وامرى لله

بس بعد ما حالة الانبهار راحت .. ابتدت تتملكنى حالة القرف واحساس مستمر بالقيئ

فى الاول قلت يمكن برد فى المعدة ولا حاجة

وبعد كده اكتشفت انه الاكذوبة الكبيرة الى اسمها القنوات الفضائية

طبعا بعد يوم طويل من الشغل ووجع القلب ... راسى بتبقى عاملة زى الصفيحة المخرومة .. ما عنديش استعداد اركز فى حاجة ولاحتى اقري ترجمة .. فا مفيش حاجة بتلبي رغباتى واحتياجاتى غير قنوات الافلام الى بتعرض الافلام التيك اواي .. الى وشها بيبقى زى قفاها مش فارق اولها من اخرها .. مجرد حاجة بتساعد مخى البشري الضعيف انه يخرج من حالة التركيز والعصبية والتنشنة لحالة من البلاهة والعبط .. الى بتكون مررريييحة جدا بعد يوم طويل من التلطيش

وابتديت اتابع غصب واقتدار اعلانات افلام موسم الصيف السنة دى .. والمنافسه الحااارة بين الافلام والمنتجين على تربع عرش شبابيك وبلكونات الايرادات

ولقيت مخى مش مفرق بين كل الافلام الزبالة المعروضة غير انهم بتركز على مضمون واحد ... على انها مبدئيا كلها مصنفه لتكون افلام للكبار فقط .. وركزت قضاياها على الجنس والدعارة والقمار او الشرشحة والصياعة

واعذرونى على الفاظى .. فانا بحاول اختار الفاظ مؤدبة عن التى تعرض لحظيا على شاشات هذه الفضائيات على مراى ومسمع من الاطفال والشباب والبنات والامهات والاباء والكهول

ولو مسكناهم كده لكشة واحدة

ونبتدى بافلام المعلم الكبير ... منتج البهايم والجواميس

الى نازل مكتسح بفيلم الموسم (كباريــــــــــــــــــة)

يا لهوى يا خالتى ... كبارية .. وده بيناقش ايه ده ان شاء الله

واذا كان ده اسمه وده اعلانه .. امال هو من جوا شكل امه ايه

وطالعة الاخت فى الاعلان تقول كان "جايبلي تلاتة صحابة يناموا معايا "

والله المعبود ده من الاعلان مش من عندى

لما المحروس ابنك كده وهو قاعد جمبك ويسالك يعنى ايه يا بابا .. هترد تقول ايه !!!!

فيلم تانى للبتاع حسن حسنى
وبطولة واحدة متهيالى من بتوع ...... احم احم ..... الكليبات .. وجايبين طفلة ومطلعينها رقاصة وشرشوحة ... الى هو المفروض دى كوميدية ساخرة ودمها خفيف ... ومفروض احنا نقتنع بيها ونحبها بقى ولا ايه ...؟؟
والسؤال محيرنى من ايام المدعوءه خالتى فرنسا ... هى ايه علاقة الشرشحة بالكوميديا !!!!

وبرضة المحروسة بنتك لما تقلد الننوسة بطلة الفيلم وتكلمك زى العوالم .. مفروض تعمل معاها ايه ؟؟؟

اعلان تانى لفيلم مصطفى قمر ..

الاخ ابو اتب الى طالع بستظرف ويقول كلام مش مفهوم على اساس انها فهلوة وخفة دم وهى فى الحقيقة شغل صياعة ومقاطيع برضة

وطالع فى مشهد يقول (لادوارد) يا حبوء ... والتانى واقف جمبه زى صفيحة الجبنة البراميلي يقوله يعنى ايه حبوء .. يقوله يعنى حبووء .. والتانى ينهق ويقول اااااااااااااااااااه

حبوء ايه يا ابن الحبوء انت وهو

هو احنا ناقصييييييييييين اشكالكوا انتوا كمان

ولا فيلم سيدة الشاشة الفضية ليلي علوي
(من ايام الابيض والاسود يعنى) ..

وعن الفيلم ده الحقيقة انا مش عارفة اقول ايه ... يعنى برضة خلاص !!! انحصرت مشاكلنا فى مضمون المشاهد الى عرضها الاعلان الى بحاول حتى هذه اللحظة افهم ايه علاقتها بالراجل الى بيلف بالتنورة ودماغ امه هربانة منه

مش كفاية بقى انها عجزت على الادوار دى ... ولا ايه الى انتوا عايزين توصلوه من قصة الفيلم ولا ايه علاقة اسم الفيلم بابطالة ومشاهده

ده باعتبار ان خلاص الاباحة بقت عادى اليومين دول

ويجي الى بعده .. فيلم خالد يوسف ...
والى جت كملت بصالة قمار ... يعنى كبارية وصالة قمار ... وقال بنت بتجرى على امها الى طالعة فى الفيلم اصلا سيكو بيكو .. وبتقولها
"ما تخافيش يا ماما ما عرفش يعمل معايا حاجة .. انا لسه بنت زى ما انا"

الاهي يخرب بيتكوا والبيوت الى جمب بيتكوا

و(ليلة البيبي دول) ..
حرب وفلسطين ولبنان وماساة 60 عام من الحروب ومش عارفة كام مليون من ضحايا المش عارفة ايه برضة ..

وفى نفس الوقت لا يخلوا الفيلم فيه من البوكسر الاحمر وكام مشهد ساخن على اسم تجارى للاستهلاك المحلي ...

على اساس ان هى دى بقت هى دى تعريفة الدخول لجيب المواطن

الافيشات الساخنة على المشاهد المولعة

على كام منظر رقاصة وداعرة على كام سكران ومسطول وما يضرش نحط طفلة شرشوحة برضة لجذب المشاهدين

زى ما تكون الاباحة والدعارة هى سمة الشعب المصري وانه بقى شئ عادى اننا نسمع الكلام ده قدام عيالنا واهالينا كل لحظة وكل ثانية

هى العالم دى مش عارفة ان الافلام القذرة دى كل العالم العربي بيشوفها

مش عارفين ان الافلام دى هى انعكاس لصورة المجتمع المصري

مش عارفين العرب والخليجيين للاسف بيبصوا لمصر والمجتمع المصري ازاى

ونيجي نلاقى واحد طالع زى الـ ....... (تيـــــــــــت) ...
ويقول حرية التعبير عن الراى والجراة فى مناقشة قضايانا
وده بدل ما ندفن راسنا فى التراب

تراب يتاويهم نفر نفر ان شاء الله

خلاص انتهت كل قضايا الفساد بقى مش ناقص غير اننا نناقش فساد الكباريهات وصالات القمار

خلاص اختذلنا مشاكلنا اليومية فى عيشة الشراشيح والصيع وقاع المجتمع

وحتى الافلام العائلية التى تعرض ... لا تخلو من التلميحات القذرة والملابس الساخنة والمايوهات البكيني

ما هو صيف بقى والدنيا حرر !!!!!!

هو ده الى احنا عايزينه ؟ ... هو ده الى محتاجة الجمهور ؟

هو ده الى احنا محتاجين نغرق فيه شبابنا

الشهوات والنزوات زى الحيوانات

سعار الشوارع والتحرش الجماعي

الادمان والبلاوي الزرقا

الانحلال وانعدام الاخلاق عند اطفالنا

ما حد ربع عاقل يرد علينا .. ويقول الناس دى عايزة مننا ومن عيالنا ايه ؟؟؟؟

دعوة وجهتها منذ عام

دعوة لمقاطعة قلة القيمة

ارجوكـــــــــــــــــــــــــــــم قاطعووووووووهم

وبعد هذه الحرب الشرسة فى الاعلانات

تذكرت المثل الى قال

صحيح الجنازة حااااااااارة

والميت ولمؤاخذة فى الأخر طلع كلب جربان واعور وحزين على عمره

ريـــــــــــــــــــا وسكينـــــــــــــــــــة

خرجت علينا بالامس ..

ريـــــــــــــــــــا وسكينـــــــــــــــــــة ..

فى وسط اندهاش واذبهلال الجميع الذي قد يصل الى حد الشلل التام امام جميع المحافل الاعلامية والتليفزيونية

معلنين امام الجميع

وبمنتهى البجاحة والجرأة

مكممين افواه الجميع بفوطة متغرقة مية مبلولة

لحد ما الكل قطع النفس

ومع موسيقى تصويرية تجرى فى الخلفية

(يا اختى عليها يا اختى عليها .... يا اختى عليهاااااااااااااااا ...

ما جت رجليها ما جت رجليها ما جت رجلييييييهااااااا )

معلنيــــــــــــــــــــــــــن

زيادة موارد الغرزة بزيادة اسعار البنزين

( ...... ما جت رجليها ما جت رجليها ما جت رجلييييييهااااااا ...... )

وذلك بعد ان اعلن عبد العال اهداء جميع العمال بالغرزة علاوة 30% ...

مما جعل كل من المعلمة ريا والمعلمة سكينة يصوتولوا فى وشه ..

منيـــــــــن يا عبـــــ عاااااااااااال ؟؟؟

ما انت عارف الى فيها يا سيد المعلميييييين ؟؟

( .... الدورر الدوورر الدوووررر الدووووورررر ... موعودة يااالللى عليييكي الدورررر ...... )

عليكوا وعلى حسب الله عزو يا اختى انتى وهي ...

هو انا كل حاجة هقلوكوا تجيبوها منين ...!!!!!!!

ما تعرفوش تعملولكوا سبوبـــــــــة ولا ايه ؟

انما انا كلمتى ما تنزلش الارض ابداااااااااااا قدام الرجـــــــالة ...

( .... يا اختى عليـــــــهـــااااااااا .... ما جت رجلييييييهااااااا ...... )

مما اضطر كل من ريا وسكينة اللجوء للعقل الجهبز حسب الله بيه عزو ومجموعة من معاونيه مما اشار عليهم بحل المشكلة فى لمح البصر وجمع الاموال المطلوبة وزيادة, من نفس العمال (هما هما نفر نفر) وده حتى قبل ما يشموا ريحة علاوة عبـــــ عـــــــــــــاال


( .... يا حسرة عليها .. يا اختى.... يا حسرة عليهاااااا...... )

و بس خــــــــــــــــــــــــلاص

------------------------------------------------------------------

ردود فعل بعض العاملين بعد سماع الخبر

البنزين غلي

يعنى ولامؤاخذة التواليت الى بنعمله هيبقى بفلوووس

------------------

يعنى دلوقتى يوم ما نفكر نولع فى الى جاب ابووهم

هنفكر مليون مرة

لانهم ما بقووش يسووا تمن لتر البنزين

أو بمعنى اصح مش هنلاقى فى جيبنا تمن لتر البنزين

------------------

وهو عبـــــــ عال بيتفشخر علينا من جيب الى خلفونا ..
ما بناقصها علاوة ولا زفت

------------------

خلاص بلاااها بقى المارلبوررور .. ومن هنا ورايح نقضيها كيلوباترا فررررط

------------------

شعب صحيح فقرى ومش وش نعمه
الاهى يحرقكوا بجاز .... ده ان ما كنش غلي هو راخر

------------------

منقوووووووووول

من موقع اخبارى صيــــــــــــني او هندي

من غير كلام .. ولا سلام

من غير كلام ولا سلام ...

اسراء رمز الحرية ... باعت القضية

طبعا البونية لازم تبيع القضية وتبيع الى خلفوها كمان .. وتطلع فى كل الدنيا وقصاد التخين تقول انها كانت بتتعامل احسن معاملة وان ما حدش لمس طرطوفة من جزمتها...

ووجههت الشكر للواء فلان والعميد علان والمامور ترتان ..

كما وجهت الشكر لماما مش عارفة مين والست منين والدكتورة عين .. الى كانوا مشرفيين معاها فى التخشيبة ريزورت Resort

طبعا انا شخصيا لو مكانها هعمل كده وزيادة .. مش بعيد اجيب جزمة البيه الباشا اللواء الوزير ونبوسها ادام الشاشة

وتقدم الشكر للوزير كمان ورئيس الحي على الاستضافة والاقامة الرائعة التى قضت فيها النزهة الاستجمامية بعيد عن النت والشات والفيس بووك والياهو والـICQ ودياولوا فى قرية لومان طرة ولا منتجع القناطر السياحي

البت اتخطفت فى يوم وليله

وراحت اتنفخت وطلع عين الى خلفوها

وشافت العين الحمرا وابو رجل مسلوخة وام سحلول

وفى الاخر غصبن عن عين الى جابوها

لازم تنادى

فالتحيا الديموقراطية ... ولتحيا الحرية ... ولتحيا النزاهة والشفافية

وليسقط الانترنت ... وليسقط الفيس بووك

وليسقط الاستقلال

وانا من موقعى هذا

انقل كامل تقديري واحترامى

لكل من ساند اسراء من اللواءات ومامورى السجن وحتى نزلاء التخشيبة

الى ارجعوها الى رشدها والى صوابها

وصصحوا اى مفهوم خاطئ لديها عن الحرية والتعبير عن الراي

وهو فى حد ذاته كفر وفسوق عن فروض الولاء والطاعة

والاهى يحرق اى حد بيطلع اشاعات مغرضة

ولا بيحرض على اضراب ولا بينادى باعتصام حتى لو كان للصم والبكم

انا لا اقصد باى شكل من الاشكال اطلاقا مطلقا انعدام الوطنية عند اى حد فينا ... ولا لان
نسكت عن المنادة بالحرية .. ولا عن التصدى للفساد ...

بس طول ما انا اشجب واندد واشتم سلسفين الى مطلعين عنيينا

وانا تحت البطانية ... ولا وانا مأنتخة قصاد التليفزيون ... ولا مع احلى دماغ متسلطنة على القهوة

وانا احب الحرية

واحب امشى فى شواريعها واشرب من نيلها

واموت فى تراب مجاريها

لكن اقرب من مظاهرة .. ولا اعرض نفسى للضرب والاهانة .. ولا انام لنص ساعة على البورش .. طبعا فكرة اى حاجة زى كده فى ثقافة اى حد فينا ...

اروع من ما يحدث فى سجن ابو غريب ولا جوانتناموا

ويكون اى منا على استعداد لبيع اهله كلهم من اول قلم

وطبعا ضربوا المربوط .. فخاف اسمه ايه ده البعيد .. السايب

فلتحيا سياسة الحرية ...

فلتحيا صفحات الانترنت الى عملت من كل واحد فينا مصطفى كامل واحمد عرابي وسعد زغلول

فليحيا العيش المدعوم ومش موجود ..

فلتحيا الكهرباء والمياه المقطوعة

فلتحيا المواصلات

ولتحيا الاجور والمرتبات

ولتحيا وزارة الصحة والمستشفيات

فلتحيا الساقية والطاحونة والجاموسة والحمار

وفليحيا حسن شحاتة والمنتخب الوطنى

وليعيش ابو تريكة

ومنك لله يا حضري

من غير عنوان

ظهرت براءة الناب هانى سرور وكل المتهمين فى الاتهامات الموجهه اليهم

وان خير اللهم اجعله خير

مابقاش فيه قضية من اساسه

لاسمه ايه ده بعد الشر

اكياس دم ملوثة

فى نفس الوقت الى حكم عسكريا على بعض رجال الاعمال

والى اطلقوه عليهم اسم (اخوان) بالسجن

من 10 الى 3 سنوات

خير اللهم اجعله خير برضة

.........................

خلاص عايزين ايه تانى

ما هو طلع لا فيه اكياس دم ملوثة

ولا طلع فيه دم اساسااااا

واحد ميكروباص وحياتك - 3

واحد ميكروباص وحياتك - 3

واحد اجتماعيات:

عانس هو لقب قاسى تحصل عليه كل امرأة لم يشأ لها الله بالزواج والمطلقة هو اللقب الذى تحاول العانس الا تأخذه اذا حدث وتزوجت وقارنت حياتها قبل الزواج وبعده

واحد مطب صناعى:

صرح خبراء ان الماساة الانسانية اليومية فى الطرق والمواصلات يرجع لسير اكثر من مليونى سيارة فى الشوارع التى لا تتحمل سوي 450 الف سيارة فقط .. وزاد اندهاشى وسالت نفسى وقلت امال الناس مش لاقيه العيش ليـــــــــــــــــــــه ؟؟

واحد فوووول اتوماتيك:

كثير ما اتمنى لو تمكنت من عمل الامر Undo للاطباق والحلل عند اتساخها فى المطبخ ..او اذا جرحت اصبعي بسكينة .. او اذا ارتديت ملابسى بالمشقلب .. او اذا اغلقت الباب ونسيت المفتاح بالداخل

واحد رغيف عيش:

بسبب ازمة احتكار حديد التسليح واشتعال اسعار كل مواد البناء من اسمنت ورمل وزلط وتراب .. حدثت أزمة رغيف العيش .... مش علشان مش لاقيين العيش .. لان من بعد رغيف العيش .. مش هنلاقى زلط ناكله ولا تراب نسفه

واحد رابطة مشجعى سيون:

تداعت ازمة الحضري مع تداعيات ازمة ارتفاع الاسعار والسولار والبنزين وانعدام الرغيف ... والحقيقة مش عارفة حظ الحضري هو الى نحس لانه ماكنش وقتك اساساا ... ولا احنا الى شعب فقرى وحتى الحضري كنا ناقصيينه

واحد سياسية:

تطالب الحكومة المصرية الاتحاد الافريقي لكرة القدم لجعل بطولة الامم الافريقية كل شهرين وذلك حتى يتسنى لها رفع الاسعار من غير ما حد ياخد باله بينما الشعب بيرقص فى الشارع

واحد ميكروباص وحياتك - 2

واحد ميكروباص وحياتك - 2

واحد ابو تريكة:

قرر الاتحاد المصري لكرة القدم
استبدال
النشيد الوطنى بلادي بلادي

لفنان الشعب

سيد درويش

وذلك بأغنية انت مصري

لفنانة الشبــــــــــاب

نانسى عجرم

وذلك فى كل المباريات والبطولات الدولية للمنتخب

تحالف قوى الشعب من الترزية

تحالف قوى الشعب من الترزية

اجتمع عم سعيد باترون كبير الترزية فى المنطشقة بمجموعة من الاسطوات من نفس الكار لمناقشة موضوع وقضية هامة تخص جميع انفاس الشِعب .. وكان الاجتماع فى احد غرف العمليات السرية والى مايعرفش مكانها ولا الجن الازرق والاحمر

يبدا عم سعيد الجلسة وله صوت اجش نقدر نقول زى صوت اللمبي .. موجها كلامة للرجالة:

عم سعيد باترون:

بصوا بقى يا اسطوات ... الى احنا فيه كل يوم ده مش حل .. ولا هينفع كده نبقى ملطشة . وناخد على قفانا ونسكت كل يوم ونصهين .. الناس الغلابة ذنبها ايه ... والناس الى ملهاش حتة تقويها وتلمها .. نسيبهم يتمرمطوا وما نعملش عـــاجة .. ؟؟ لازم تشوفوا عــــل وناخد موقَف وسريع .... !!!! (موقف بفتح القاف)


يرد الاسطى خميس زراير : موقَف ايه يا اسطى .. نروح نحتل يعنى عبد المنعم رياض ولا عبود .. ؟؟


سعيد باترون: انت اتسطلت يا اسطى ولا ايه .. موقَف ايه الى هنروح نحتله ... هو احنا كمسرية وعايزين علاوة .. بقول موقف يعنى نعمل عــــاجة .. ونتخذ قرار حكيـــــــــم

يرد الاسطى شعبان عراوي:
هههههههه .. حكيم ده عنده نبتشيه ... عاعا عاعا .. هي هي هييي هيي

سعيد باترون:

ما هو اصلنا مش خالصين النهاردة ... ومش فاضيين غير للخفة واللطافة بتاعة .. امثالكوا ... وانا وقتى ثمين ... وبضيعوا معاكوا

شعبان عراوي:

خلاص يا عمنا حقك علي رقبتى انا ... وقولنا ايه المشكلة دلوقتى .. يعنى انا مش فاهم بالظبط هى ايه المشكلة فى حد ذات نفسيتها .. ؟؟

سعيد باترون:

خلاص كل واحد يحط لسانة جوا جزمتة واسمعوووووووووواوواوااااعععوووونى .. علشان نعرف نقول الكلمتين المنعششين فى نافوخنا قبل ما يصوصـــــوا

يكمل سعيد باترون حديثة وباقى الاسطوات بيحاولوا التركيز فيما يقول:

طبعا احنا كلنا شايفين الجو والى عامله فينا الجو .. الساقع والمتلج الهافف علينا من كل انحاء البلاد .. بقينا ملطشة من اورومــــبما وامريــــكا .. الى عاملين يحدفوا علينا الجو الممهبب ده .. واحنا غلابة وشعبنا واهل حتتنا غلابة .. فلازم نشوف صرفة فى الموضوع ده وناخد موقف ... وانا من منصبي هذااااااااااا ... اناشدكم يا اهل حتتى ودايرتى .. انكم تساعدونى وتحطوا اديكوا فى اديا

وهنا يتدخل صوت محسن مكوك: يا عم الاسطوات وجعت دماغنا من صباح ربنا يا ريت تنجز فى الوينجز وقلنا هنعمل ايه .. هو فى استنخابات قريب يا ريس ولا ايه ؟

يستكمل سعيد باترون:

اتهلي على عينك واقعد ساكت ولا هقوم اغزززك ... احمم احمم ... احنا دلوقتى اكيد سمعنا عن سؤب الاوزون والاستحباس الحراري .. انا متاكد ان هما دهووولا السبب فى الى احنا فيه ... علشان كده انتو اول ناس جيتوا فى بالي يا اسطوات .. لان السؤب ده لعبتنا لو رحنا عند السؤب وسدناه .. اكيدد هترتاح كل الشعب.. وبالنسبة للاستحباس .... هنشوف برضة الاسطوات الى شغالين فى الاستحباس وهنديهم المهمة دى .. بس لازم نبتدى بنفسيتنا .. ولما هنعمل كده ..اكيد اكيد اى حد هنكلمه هيتشجع علشان يخدم بلده واهل حتته .. مش كده ولا ايه يا رجالة

الرجالة فى صوت واحد فخيم : صح يا معلم .. براووة عليك يا اسطي سعيد وتسلم الدماغ المتكلفة

يكمل سعيد: طبعا يا رجالة احنا هنعتمد على التبرعات ... علشان نقدر ننجز مهمتنا الوطنية والنزيهة وبمنتهى الشفافية

يقطاعه صوت محسن مكوك: احممم احمم ... كلمنا عربي إحيــــات ابووووووك يا عمنا

يكمل سعيد باترون:

ما تهمد يـــــــــاض هقوم اعلمك على خلقتك وما يبانلكش وش من قفا ... شكلك هتودينا فى داهية ... ما احنا لازم نتكلم بالسيم ياااض علشان ماحدش يفهمنا ... ونبقى فى السليم .. لان لو حد شملنا ريحه .. هيتقبض علينا .. ومش بعيد يتهمونا بالجاسوسية ... ولا التخابر لصالح استخبارات دولية وشعبية

والكلام ده انا عرفته من استاذ الاانون (القانون) الاستاذ عبد الباسط القانونجى .. حاجب المحكمة الابتدشائى

شعبان عراوي: خلاص يا عمنا حقك على الى خلفونا ... كمل يا استطنا وقسم وسن مقصك وسمعنا

يكمل سعيد باترون:

كنا بنقول ياغجر هنعتمد على التبرعات .. يعنى مجموعة من اهل الحتة يتبرعوا باجرة الميكروباص للواد عبده سرفيس الى هينقلنا بربطة المعلم إشـــاء الله على السؤب .. وعايزين تبرعات تانية تمن السلم الى هنطلع بيه للسؤب وتمن الابر والخيط

هتقولوا وهنعرف مقاس السؤب اد ايه ازاى ؟؟؟ .. احنا هنروح تحت السؤب ......... ونبص عليه بعدسة مكبره .. علشان نقدر نعرف بالظبط مقاس الرقعة الى هنطلع بيها ونسد بيها السؤب

يقاطعه عرفة المكوجي .. وهنبص على السؤب الى فى السما ازاى يا ريس ... ده الشمس تحرق عنينا ؟؟

سعيد باترون والشرر يتاطير من ...... من عينه ..: انت ايه الى جابك هنا يا مكوجى ... احنا مش قلنا الاجتماع ده لاسطوات الترزية

عرفة: ايه يا عم الحج .. المكان ده مكانى وانتوا الى نزلتوا عليا بالبارشوت من طيارة هيلويكتر

سعيد: خلاص خلاص انت هتذل (انفاسنا) ... على العموم برضة رايك سديد وفى محله ... وعلشان نفسك الحلو معانا .. هنحدد معاد الخطة تكون بعد العصاري .. على ما نوصل هناك تكون الشمس غابت ونلحق تبص على السؤب قبل الضلمة

وقبل ان يكمل سعيد حديثه .. سمع صوت كركبه ودوشة خارج باب غرفة الاجتماعات ...

"اجرى يــــالا "

"ارمى الى فى جيبك يااض"

"ايوا ايوا من هنا ..""

"كبســــــــــــــــــــــــــــة يا رجالـــــــــــــــــــــــــــــــــة"

وهنا دخلت افراد من قوات الامن والشرطة .. والقت القبض على كل من المتهمين ..
سعيد باترون
وخميش زراير
وشعبان عراوى

ومحسن مكوك
وعرفة المكوجى
وعبده سرفيس سواق الميكروباص

وذلك بتهمة التعاطــــــــــــــي

واحد ميكروباص وحياتك

واحد ميكروباص وحياتك

واحد ميكروباص وحياتك

باب جديد فيه خواطر بسيطة اشاركها معكم ليس لاى غرض الا للشهرة وكسب الاموال الطائلة واستنهاز الفرص واستغلال الشعب العامل

منتهى الحب والتقدير والتواضع من معالي شخصي الجليل

منكم واليكم ... واحد ميكروباص وحياتك

واحد اجتماعيات:
العروسة .. هى الفتاة الوحيدة التى اختارها العريس من بين صديقاتها لترتدى الفستان الأبيض استعدادا للعمل كخادمة بمنزله

واحد مطب صناعي:
اذا كنت تمشى فى الشارع صباحا وسمعت صوت دق للطبول والزغاريت والافراح لا تستعجب اذا اكتشفت انه لا يوجد فرح ولا يحزنون على صباح ربنا وان هذا الصوت فقط خارج من توك توك

واحد سجل مدني:
دائما ما نحتار فى اختيار اسم جديد للمولود .. وتزداد الحيرة عندما نبحث على اسم دلع لهذا الاسم


واحد أشغال شاقة قسم احفر فى الجبل:
كابتن ... هو كل يوم شغل شغل ... هو مافيش شتيمه ولا ايه ؟؟؟


واحد عباسية نفسية:
كلما كانت الاجازة السنوية طويلة ومريحة كلما كانت سبب اكثر المعاناة فى العالم اذا ما تذكرنا ما سوف نعود اليه


واحد تكنولوبيا وزبادى فى المايكروييف:
كثير ما اتمنى ان امتلك محرك البحث جوجل او ياهوو داخل ادراج ودواليب المنزل والمطبخ


واحد سياسية:
الحزب الوطنى الديموؤراطي .... يا انبل يا اكرم يا اجمل يا اسعد يا اشرف يا محمد يا جمال يا عزمي يا اسماعيل بس اسماعيل مين ؟؟

مئوية اسم النبي حارسها .... جامعة القاهرة

مئوية اسم النبى حارسها - جامعة القاهرة

تحتفل جامعة القاهرة اليومين دول بالمئوية .. يعنى ان مر على انشائها 100 سنة بالصلاة على النبي ... من سنة 1908 لسنة 2008

وطبعا لا يخفى على احد اليفط والاعلانات والتهانى الى مغرقة ابواب كليات جامعة القاهرة من اول كلية الهندسة لحد كليه الزراعة

طبعا هو حدث عظيم .. 100 سنة برضة دول مش شوية .. وهو الواحد يعنى عمره فيه كام 100 سنة علشان يحضر احتفاليه زى دى .. بس طبعا خطر على بالى خواطر كتيير جدااا وانا اعايش هذا الاحتفال الكبير

من اهمها سؤال فرض نفسه وهو يا ترى جامعة القاهرة والقائمين على جامعة القاهرة .. بيحتفلوا باية بالظبط بعد مرور 100 عام ... ؟؟ هل مجرد مرور 100 عام على انشاء مبانى وقبة وساعة ومدرجات الجامعة يستحق هذه الاحتفالية .. ؟؟؟ ام هناك انجازات اخرى تدخل فى هذه الاحتفالية ... ؟؟

وطبعا تبادر لذهنى فى الاول ان صاحبه هذه الإحتفالية هى وزارة الثقافة .. او الهئية العليا للاثار ... وذلك لمرور 100 عام على مبانى الجامعة وبالتالى تدخل فى عهده هيئة الاثار وانها ممكن تكون مزار سياحي ... متناسيين ان فى حاجات تانية برضة المفروض تتكهن وتدخل فى عهده قطاع المتاحف باعتبارها تحف (وذلك طبعا مع كامل احترامى للدكاترة والعمداء ورؤساء اقسام الكليات)

لكن بعد كده اكتشفت ان الفيلم ده طلع يخص وزارة التعليم العالي (ولا اعلم حتى الان لاى موصوف تنتسب الصفة (عالى) ؟؟

ومن هنا تبدا الوكسة التقيلة ... موجهه كلامى لما تسمى بجامعة القاهرة ووزارة التعليم المقبول .. لانها ما حصلتش تكون مرتفع حتى... يا ترى يا هل ترى .. ايه بقى تحديدا الى بنحتفل بيه بعد 100 سنة تعليم جامعي ؟؟

هل نحتفل بكم الانجازات العلمية والبحثية الى اكتشفتها و حققتها الجامعة فى اخر 50 سنة وتقدمنا بيها ما بين الدول الاوروبية والامريكية ولا حتى الصومالية ؟؟؟

هل نحتفل بكم الكوادر العلمية الى اتخرجوا من الجامعة وتبنتهم علميا وثقافيا ومعرفيا ... وافادوا البلد فى اخر 40 سنة وصدرنا خبراتهم واكتشافتهم للدول الأجنبية والعربية والرواندوتشيكية ؟؟؟

هل بنحتفل بكم الاكتشافات والابحاث الى تبنتها الجامعة وصرفت عليها واستثمرتها فى اخر 30 سنة واشتريتها اى دولة افريقية حتى .. ؟؟؟

هل بنحتفل بالترتيب العالمي الفائق الى حصلت عليه الجامعة ما بين جامعات العالم الى ما حصلوش يمكن ربع عمرها وتصدرنا بيه قائمة احسن جامعة فى العالم ؟؟؟ ... وهنا تذكرت التلميذ الخايب الى كان ممكن يكون الاول لولا وجود الاخريين ؟؟؟

هل بنحتفل فى المئوية بامتلاك احدث المعامل والمختبارات والاجهزة الطبية والعلمية ومراكز التدريب ومراكز البحوث التى تستقبل الوفود من الباحثين والطلاب للعلم والتعلم ؟؟ (وفود الطلاب من نجع حمادى .. علشان بس ماحدش يفهمنا غلط)

يا ترى الجامعة بتحتفل فى مئويتها بانها خرجت كام جاهل من حملة البكالريوس والليسانس الى بيكتبوا اساميهم بالعافيه والى مناظرهم واشكالهم لا تصلح غير للعرض فى فاترينه متر x متر على رصيف الازبكية ؟؟

يا ترى الجامعة بتحتفل بكام عاطل تخرج منها ولسه قاعدين على القهاوى واقصى طموح اى حد فيهم انه بشتريله توك توك ولا كشك سجاير ولا يشتغل باليومية مع سواق ميكروباص .. ولا يروح يركبله القطر ويبقى كسيب .. واهله داعينله ان القطر ما يولعش بيه ولا يتقلب فى اول مزلقان

يا ترى الجامعة بتحتفل بالانجازات العظيمة الى حققتها فى المستوى التعليمي الراقي للطلاب وتكافؤ الفرص بين المتفوقين (من ابناء الدكاترة بس طبعا) فى الحصول على مصطبة فى هيئة التدريس ؟؟

ولا الجامعة بتحتفل بالمراجع والكتب العلمية لجهابذة الدكاترة فى الكليات ... الى بتتباع فى مكتبات شارع بين السرايات .. والى لما الطالب بيشتريها بيعلموا على اسمه .. والقائمة تروح للدكتور علشان يبقى معروف مبدئيا مين ناجح ومين ساقط فى المادة قبل حتى ما يكتب اسمه فى ورق الامتحان ... ؟؟؟

ولا يمكن بتحتفل بعدد الاكشاك والموزعين الهائل لسجاير البانجو ولفائف الحشيش داخل الحرم الجامعي .. وما خفى كان اعظم ... ؟؟؟

يا ترى فى 2008 جامعة القاهرة بتحتفل بايه ولا ايه .. ؟؟
بالتقدم الهايل الى حصل فى ال100 سنة الى فاتوا .. ؟؟؟
فى الطلبة بتوع زمان والطلبة بتوع دلوقتى .. ؟؟
فى الدكاترة بتوع زمان وبتوع دلوقتى ... ؟؟؟
فى مناهج زمان ومناهج دلوقتى .. ؟؟؟
فى خريجين زمان وخريجين دلوقتى .. ؟؟؟

يا اختى ادارى على جمب ...
وغطى على خيبتك التقيلة ... واتلمي هنا جنب الحيط
هى طالباها جوراس وفضايح
ما احنا عارفين الى فيها و لفينوا سوا
(الكلام هنا موجهه لبنت اختى)