اول الكلام

سؤال يلح عليا باستمرار ودايما بسأل نفسى ..
هو ليه الشباب بتاعنا وبتاع اليومين دول تعبان كده ؟
كفى الله الشر مش تعبان صحيا .. اسم الله عليهم كلهم محروسين من العين . اقصد تعبانين فى مخهم
وماحدش يفهم كلامى برضة غلط وانهم مجانين لا سمح الله .. بس شباب تعبان .. مخهم تعبان .. ما بيتصدروش غير فى الهايفة وحالهم ما يسرش غير العدو بعيد عنكوا
فين الوعى وفين الثقافة .. فين المبادئ .. فين الاخلاق ,, ؟
ايه الى وكسهم الوكسه السودة دى ..؟

الواحد والله وهو ماشى فى الشارع بيشوف مناظر تحزن .. شباب طول بعرض سواء صبيان ولا حتى بنات .. يسدوا عين (السمس) زى ما بيقولوا .. وواقفين على النواصى .. يعاكسوا ويعلقوا فى بعض .. وكل شاب من دول فاكر نفسة لما يضرب (الجيل) فى شعره ويلبسه بنطلون - شوية شوية هتوطى ترفعهوله - يبقى كده واد اخر روشنة وهيجنن بنات بولاق والزاوية والوراق والسكاكينى الى هو متلقح على قهوتها ليل ونهار .. وان ما كنش على القهوة يبقى على باب المعهد التعبان الى دخله بالعافيه وهيخرج منه زى ما دخله بس زاد عليه حزمة برسيم

ولا البنات الا مشمرين البنطلونات زى صيادين الكلاب على راى ماما .. ومشمرة البنطلون علشان الجزمة البوت الجديدة تبان حتى لو كنا فى عز الصيف .. ,والفول ميك اب على صباح ربنا .. الى هو انتى بتصحى امتى تحطى ده كله .. وممكن فى الاخر تلاقى عنيها معمصة علشان نسيت تغسل وشها
ولا الكارثة فى المحجبات الكاسيات العاريات .. الى تلاقيها لافة الطرحة مغطية قورتها ودقنها زى ما تكون محروقة ولافين دماغها بشاش .. ومن تحت ربنا هو الستار

ولو جيت كلمتهم كلمتين ما تفهمش اى حاجة فى اى حاجة .. يا ابنى اهتمامتك ايه ؟ طموحك ايه ؟ نفسك تعمل ايه ..؟ عملت ايه لمستقبلك من دلوقتى .. ؟
لا الشهادة لوحدها هتنفع .. ولا طريقتك دى هتنفع ..؟ هتعيش عالة على اهلك وعلى نفسك لحد امتى ؟ لما تلاقى بقى عندك 30 سنة وانت لسه لا رحت ولا جيت .. هتيجي منين يا عين امك ما انت لسه ضارب الجيل فى شعرك وواقف على باب المعهد برضة .. بعد ما مسكوك البوابة لاقدميتك فى المكان وده لانك هتكون لسه ما اتخرجتش

ولا البنات الى هتبقى مستنية العدل وهى فى بيت ابوها .. عدل منين يا اختى هو بقى فى حد عدل اليومين دول .. هتبقى ام ازاى وهو ده شكلها وهى دى اهتمامتها .. ؟ هتعلمي عيالك ايه ..؟ ولا انتى عايزة تفضلى كده حلوة وصغنتوتة وتتعاكسى طول ما انتى ماشية فى الشارع من ابن عم عبدة صاحب الكشك على ناصية الشارع .. ؟ ولا من الكمسرى الى بتكربي معاه الاتوبيس كل يوم .. او يمكن سواق الميكروباص .. الى بيستناها كل يوم علشنت تركب معاه وياخدها لفتين عتبة - جيزة

والله العظيم ده واقع .. وشريحة كبيرة من شبابنا شكلهم كده .. واهتمامتهم كده .. ومش عايزين اكتر من كده فى الدنيا .. النسب بتختلف طبعا على حسب الطبقات الاجتماعية والشرائح العمرية .. بس دول لو ما حدش لحقهم .. قولوا على بلدنا السلامة كمان 20 سنة .. لما العيال دول يبقوا رجالة والبنات دول يبقوا ستات ..

كفاية كده ونكمل بعدين ...