Monday, February 26, 2007

جابولى ورقة وقلم



جابولى ورقة

وقالولى ارسملنا مصر


رديت وقلت مصر مرة واحدة .. قالولى ايوا مصر مرة واحدة .. ما ينفعش مصر مرتين


مع الورقة كان فيه قلم رصاص .. سألت مافيش الوان ؟ ... قالولى دلوقتى لأ .. ممكن بعدين نلون الصورة .. لكن دلوقتى مستحيل .. الصورة دلوقتى ابيض واسود وبس


قلت مش مهم .. الصورة انا هشوفها بقلبى ملونة .. مالهاش لازمة الوان مش محسوسة ولا درجات الوان بهتانة .. انا هرسم بالقلم الرصاص والونها جوايا بالألوان الى أحب اشوفها بعيني


مسكت القلم وخطيت فى الورقة خط قسمها نصين .. قلت نص الورقة التحتانى هيبقى النيل .. انا شايفة الوانه مزهزة .. بس انا لسه برسم بالقلم الرصاص .. ما قلنا مش مشكلة انا شايفاه ملون ولونه ازرق كمان .. انا شايفه لون الطمي من سطح النيل الشفاف .. وشايفة كمان ضوء الشمس وهو بيرسم لمعات بتلمع زى النجوم الذهب بترقرق على سطح النيل وقت الشروق


ورسمت كمان مركب ليها شراع ابيض طويل وجواها مراكبى بيجدف باديه الاتنين .. المراكبى كان معاه شبكة صيد كبيرة وراميها فى وسط النيل .. المراكبى كانت بشرته سمره وسماره جميل .. سمار لون النيل


رسمت شط للنيل ... على الشط كان شجر وأزهار ومشاتل ونخيل .. النخل كان طالع فوق للسما ورطبه منوراه زى ما تكون قندايل


رسمت السما فى النص التانى .. رسمتها صافية وبسحب منورة .. اشعة الشمس مختراقها راسمة صورة لشط البحر فى السما .. فعلا منظر بديع ... الوان اشعة الشروق المشمشى سايحة على بعضها .. وفكرتنى ببيرم وسومة فى شمس الأصيل


شمس الأصيل دهبّت
خوص النخيل يا نيل
تحفة ومتصورة
في صفحتك يا جميل
والناي على الشط غنى
والقدود بتميل
على هبوب الهوا
لما يمر عليل


رسمت طير طاير فى العلالي .. زئزئته طالعه بتلالى .. زى ما يكون بيغنى فى صباح كل يوم جديد

رسمت على الشط برضة اهراماتنا ورسمت برج الجزيرة .. رسمت بيوت صغيرة وفوق بعضها ورسمت برج للحمام يطير حواليه ويميل .. وكله شاهد عليه النيل وكان فى مسجد ومأذنة .. وكمان كنيسة ودير .. الاتنين جنب بعضهم .. صوت الأذان والجرس .. يوم الجمعة وصلاة العيد


رسمت على الشط ارض خضرا واسعة وكبيرة مش شايفة اخرها .. دى واصله لحد السما .. رسمت جواها ساقية يتدور وتلف وحواليها ناس بتلف معاها .. بتلف وتدور ومش عارفين هتقف امتى .. لو الساقية وقفت الارض هتموت من العطش ... انا شايفة الناس لسه برضة بتلف لونهم سمار النيل .. شاكلهم تعبان من اللف والدوران .. مش هيرتاحوا .. ويشوفوا المنظر الجميل


رسمت بنوتة صغيرة وولد صغير ماسكين ايدين بعض رايحيين المدرسة .. ومعاهم زمزمية وشنطة وبيشتروا بسكويت


رسمت عربيات وكبارى وزحمة ... واتوبيسات و ميكروباصات .. وناس بتجرى وراها علشان توصلها وتلحق تركبها


رسمت القهوة والشيشة والطاولة وراديو قديم على رف عالي بتغنى فيه ام كلثوم

رسمت مصر فى الصبحية و ساندوتشات الفول والطعمية من على العربية .. وجرنان مطبق سواء كان اهرام اخبار او جمهورية ..

صباح مصر ... اطفال فى مدارس وشباب فى جامعات وموظفين فى كل حتة من اول مصر لاخرها .. كلوا لسه بيلف ويدور والساقية ما وقفتش لسه عن الدوران


رسمت كلاب سكك بتنهش فينا .. وبتاكل اكلنا .. وتموت الى ينطق فينا .. سلعوا وانفلونزا للفراخ والبط وسرطان بيهرس فى كلاوينا


الصورة بتضيع الوانها ...
كانت ملونة وجميلة ...
خلاص كفاية
مش هقول ولا كلمة زيادة
الكلام متشال فى قلبى وكاتماه
اكيد حاسيناه
وكمان خلاص
القلم خلص والورقة خلصت
بس الكلام ما انتهاش



Monday, February 19, 2007

مستقبلى رسمته بالصدفة


مستقبلى رسمته بالصدفة ..

أهدى هذا البوست الى عزيزتى (أميرة البلطجية) كما وعدتها , لانها كانت ملهم رئيسي لهذا البوست وذلك بعد قراءاتى لبوست خاص بها عنوانه (الأسطورة) والى كان جميل فعلااا .. وانصح جميع من يقرأ سطورى الأن ان يقرأ هذا البوست الخطيير والذى يمس ويحكي واقع وتجربة كلنا مرينا وبنمر بيها

انا مش هاحكى عن البوست بتاعها .. علشان تروحوا كلكوا تقرووه :)

بس الحكاية ان ازاى كل واحد يخلق من نفسه اسطورة ويكون راضى عنها .. اسطورة عن الصورة الى ترضى كل واحد فينا عن شكل شخصيته و حياته وشغله ومستقبله

وكان خلاصة الكلام ان اغلبنا بيتفرض عليه واقع دراسته وشغله وممكن يكون مش لاقى نفسه فى المجال الذي يعمل فيه او الدراسة التى يقوم بدراستها وذلك بسبب واقعنا الأليم والشبح المخيف والذى يسمى (الثانوية العامة ومكتب التنسيق) فنجد كل منا مسير لا مخير فى اتجاه والنهاية الحتمية اننا بنكون ناقميين ومش مبسوطيين بحالنا ولا بشغلنا ولا احنا نفسنا كأشخاص بقينا ايه او هنبقى ايه .. وكل المستقبل والطموح بقى حالة مكلكعه ومعقدة من الاكتئاب والاحباط واللا امل واللا حياة وتتحول العيشة لعيشة والسلام

فالنقطة بقت هى ازاى اخلق لنفسى الفرصة علشان اعمل الى انا بحبه وحتى لو اتفرض عليا واقع ازاى احوله لحاجة انا بحبها علشان اوصل للمكان او للاسطورة الى نفسى اكون فيها

مش هطول عليكوا اكتر من كده واحكيلكوا عن تجربتى الشخصية .. والى الحمد لله رب العالمين قدرت احول فيها مجالى للحاجة الى انا بحبها ومتفوقة فيها وبشتغلها وانا بعشقها .. وكله كان بتوفيق من الله سبحانه وتعالى

بتبدأ الحكاية من وانا فى مرحلة الابتدائى والاعدادى وتليها الثانوى كنت بعشق حاجة اسمها العلوم والبيولوجى (علم الأحياء) ومن وانا عيلة صغيرة وانا متفوقة فى المادة دى وبحبها وبحب مدريسنها وكنت فاشلة وبليدة وشبه معاقة ذهنيا فى المادة الى بكرها لحد دلوقتى وهى مادة (الرياضيات) بكل اشكالها وانواعها والى يعرفوها وطبعا فى المرحلة الثانوى كان تخصصى لازما وحتما يكون علمي علوم .. ومشيت سنة تانية كويس بس جت الفيزياء بنت الكلاب والقطط عملتها فيا فى سنة تالتة وده لانها كلها زفت رياضة ومسائل .. وانا فى الحاجات دى بتحول لمخلوق انوى له اذنان طويلتان من كوكب فضائى مجهول الهوية

فالحمد لله رب العالمين عدينا من الهبابة الى اسمها الثانوية بمجموع مكسح 89% .. وأهدانا مكتب التنسيق لكلية (العلوم) جامعة القاهرة .. فى نفس التوقيت سمعت بالصدفة ولاول مرة فى حياتى عن ما يسمى (بأكاديمة السادات للعلوم الادارية) - كليتى حبيبتى- وكان ليها تنسيق خاص بعيد عن مكتب التنسيق .. والناس والمعارف كلهم شكروا فيها وقدمت فيها ودخلت اختبارات القبول على التوازى مع اجراءات مكتب التنسيق .. والحمد لله نجحت باقتدار فى اخبارات الاكاديمة وفى نفس الوقت كان قدامى علوم .. فكرت الاول فى كلية العلوم قلت برضة جامعة القاهرة والقبة وجرس الجامعة و الساعة والجناين والعيال صحابى والهلمة دى كلها اسيبها كده بالساهل واروح اتحدف فى المعادى علشان ادرس مواد ادارية وتجارة .. ولقيت ان اعدل قسم فى كلية العلوم كان تخصص علوم الحاسب الألى وعلشان ادخله لازم اتخصص الاول فى قسم رياضة بحتة .. قلت تولع العلوم على الى خلفوها .. ومالها التجارة والعلوم الادارية .. بسسك على اكاديمة السادات

ودخلت اكاديمة السادات وانا مش طايقه امها بدرس اقتصاد على محاسبة وعلوم سلوكية على رياضة برضة على حاجات غريبة اول مرة اسمع عنها فى حياتي وفي هذه الأثناء بدأت اتعرف على ما يسمى بالحاسب الألى او الكمبيوتر وده بالنسبالى كان اختراع مجهول ولا عمرى كنت بفكر اعرف شكله ايه ولا كنت بعرف الماوس من الكيبورد .. واخدت اول كورس فى حياتى وانا فى سنة اولى وكان كورس انترنت وده قبل ما اخد الويندوز والاوفيس وكان بداية تعلقى بهذا الاختراع الرائع .. وكان لازم اخد الكورس ده لانه كان دايما بيتطلب مننا ابحاث و White Papers فى السكاشن فكان لازم استعمل الانترنت واكيد الكمبيوتر فى هذه الابحاث وفى تقديم هذه الاوراق

ومن هنا بدأ عشقى لهذا العالم الرائع وخاصة الانترنت وتعلقى بصفحات الانترنت وازاى الحاجات دى بتتعمل وبتتصمم ازاى وانا ممكن اعمل صفحة موجودة على الى اسمه الانترنت ده وكل الناس تشوفها ؟؟ والحمد لله ربنا رزقنى بمسؤول معمل الكلية والى ادين له بالفضل طول عمرى ولحد ما اموت .. عرف يصطادنى من التوهان الى انا كنت فيه .. وابتدين اعرف ان فى حاجة اسمها web و web design وgraphic design واخدت فعلا معاه كورسات كتير فى تصميم المواقع واتعرفت على الكثير من البرامج المجانية الخفيفة واكتشفت ان انا ذوقى حلو واختيارى للالوان جميل وممكن اعمل حاجات حلوة ولقيت نفسى بحب المجال ده .. الويب ودنيا الويب والانترنت وتخصصت فى سنة تالتة فى الكلية حيث كانت تبدأ سنوات التخصص فى مجال الcomputer science ودرست برمجة وقواعد بيانات وتحليل نظم وشبكات وذلك بجانب المواد الادارية من محاسبة واقتصاد وادارة افراد .. وطول الفترة دى فضل عشق الويب بتملك قلبى وازداد تلهفى على هذا المجال الفظيع .. واخدت كورسات وذاكرت وجبت كتب وفضلت وراها لحد ما عملت مشروع تخرجى.

مع مرور هذه السنوات كنت بحس انى بتقدم خطوة فى الطريق الى انا بحبه والى انا بحلم بيه طول عمرى .. ما اقدرش اقول اسطورة .. لكن انا بحب الى انا بعمله .. فا انا كده ماشية صح .. فى فترة الدراسة استطعنا انا ومجموعة من زمايلنا اننا نعمل كورسات مجانية لبعضنا البعض وكنا بنتجمع فى بيت اى حد فينا .. الى يعرف تصميم على الى يعرف برمجة على الى يعرف برنامج جديد وكله بيفيد بعضة وبنسلم بعض وقدرنا نعمل مجموعة كبيرة على مختلف سنين الجامعة الى اكبر منى والى فى دفعتى والى اصغر منى .. والحمد لله اكتشفت ان انا موهوبة فى موضوع التدريس برضة وتوصيل المعلومة ومن اكتر الحاجات الى بعشقها فى حياتى انى ادرس جمب تصميم الويب طبعا

وبعد التخرج .. والاصطدام بالواقع وبلاد تشيلنى وبلاد تحطنى ومرة يتنصب عليا ومرة يتسرق شغلى فضلت متمسكة بمجالى .. علشان انا اكتشفته وبحبه .. لحد ما ربنا وقفنى فى المكان الذى اعمل فيه الان منذ 4 سنوات تقريبا حيث اعمل باحدى المؤسسات الصحفية القومية

وفى الاول بعد ما كنت بتنازل علشان يبقى ليا ولو صورة من تصميمى على الانترنت دلوقتى ولله الحمد بقى ليا رصيد اكتر من 45 موقع اونلاين على الانترنت غير انى بفضل الله قمت بالتدريس فى 4 مراكز للتدريب مختلفة غير المشاركة فى اكثر من مشروع سواء داخل الجريدة او خارجها .. ولسه حلمى ما انتهاش (حلمي مين ..؟) ولا خلص ولا طموحي انتهى لحد هنا انا نفسى احقق كتير.

واى حد فينا يقدر يحقق الكتير جدا لو استغل الفرص صح وفهم وعرف نفسه صح وطور من نفسه ولم يتقيد بالظروف الى اتحط فيها ولا بالكلية الى اتفرضت عليه

انا كتير بقول لو كنت دخلت طب ولا صيدله لو كنت جبت مجموع كبير فى الثانوية كان زمانى دلوقتى دكتور حمارة ولا صيدلانية بهيمة

انا بحب شغلي اوى وبحب نفسى كده , ممكن انا مش مبسوطة فى المكان الى انا فيه وده حالنا جميعا لاننا بشر وده لا بنقص من قدر المكان شيئا ولا الى اتعلمته فيه .. ولكن علشان انا نفسى اكون فى مكان تانى احسن واخد فلوس اكتر .. او بقية طموحى الى نفسى احققه مش هنا هقدر اعمله واكيد هلاقى الى نفسى فيه فى مكان تانى

ودلوقتى انا باخد كورسات فى تنمية المهارت البشرية وبحاول اقرا زيادة عن الادارة والتعامل مع الافراد والتعرف على سلوك الافراد ... نسيت اقولكوا انا حبيت المواد الادارية جدااا وانا فى الكلية

عزيزتى (اميرة البلطجية) الكل بيتفرض عليه واقع مش بيحبه ويفتكر انه نهاية الكون والمستقبل .. لكن انا ممكن اعمل اسطورة لو اقتنعت بينى وبين نفسى بامكانياتى وبالى انا باحبه والى ممكن اعمله وابرع فيه .. وانا هاهديلك البوست الجاى ايضا والى هعرض فيه فكرة جديدة عايزة اتكلم عنها من زمان ومترددة .. بس شجعتينى اتكلم عنها .. قريبا ان شاء الله

وارجوا كل من يقرأ سطورى وراى في نفسه تجربة اتحولت لتجربة ايجابية برغم الظروف الى كان فيها .. انه يكلمنا عنها لعلها تبقى قصة تفيد غيرنا وتكون شعله تضي طريق مظلم لمكتئب او بائس

والكلمة الى اقدر اقولها فى الاخر من غير سحر ولا شعوذة ولا فلسفة كدابة ... ابحث عن ذاتك وعن احلامك وعن طموحك حتى تصل الى ما تطمح اليه وان تكون ما تحب ان تكون
واكيييييييييد السعادة مش فى المال لكن فى تحقيق الذات واكيد معاها شوية فلوس :)
ربنا يوعدنا


Monday, February 12, 2007

اشمعنى وسط البلد ..؟؟


اشمعنى وسط البلد ..؟؟

إشمعني وسط البلد إلى اخترتها .. أولا لاني أتولدت وكبرت وعيشت في وسط البلد .. ولو لم أكن من وسط البلد لوددت فعلا أن أكون من وسط البلد ..

بس برضة إشمعني وسط البلد .. وده علشان وسط البلد هي روح وقلب البلد .. علشان وسط البلد كل شارع وعمارة وميدان فيها شاهد على تاريخها وعلى أحداثها

لما أقول وسط البلد تبقى وقت لمة الصحاب لما يحبوا يتمشوا ويتفسحوا يقولوا ننزل وسط البلد .. وسط البلد إلى تحسها حتة منك وأهلها هما جزء منك .. لا تقولي مدينة نصر ولا سيتى ستارز على جنينة مول إلى تلاقى ناسها مدهون ووشوشها بوية

وسط البلد يعنى السينمات إلى تشوف إعلاناتهم وأنوار أفيشاتهم من وأنت واقف في أي شارع من شوارع وسط البلد سينما اوديون وميامى ومترو وريقولى أو سينما كريم وكوزموس في عماد الدين

وسط البلد يعنى محلات الملابس والأحذية المرصوصة على الجنبين .. وأنوار محلاتهم إلى منورة الشوارع زى ما تكون منصوبة لاستقبال زفة أحلى عروسة

وسط البلد يعنى شارع سليمان باشا أو شارع طلعت حرب وشارع فؤاد وشريف وقصر النيل ومحمد فريد والبستان والتحرير

وسط البلد يعنى فلفة وجاد والشبراوى والتابعى الدمياطي وبابا عبده بتاع المكرونة و العبد وقويدر والأمريكيين والاكسلسيور

وسط البلد يعنى البازارات ومحلات الفضة .. ده غير فرشة الراجل الى بيبع الكتب والقصص الأجنبية القديمة بربع تمنها في شارع سليمان باشا

وسط البلد يعنى ميدان طلعت حرب يعنى حرب الغد .. وميدان مصطفى كامل وميدان الأوبرا وميدان التحرير وميدان عبد المنعم رياض وميدان التوفيقية

ميدان التوفيقية يعنى اخر ساعة وقهوة ام كلثوم وقهوة العندليب .. ميدان التوفيقية يعنى شارع عماد الدين والمسارح والسنيمات والتياتروهات

وميدان الاوبرا يعني تمثال ابراهيم باشا (ابو اصبع) وهو راكب على خيله في شموخ في وسط الميدان مشيرا بإصبعه على ما وصل إليه حالانا من هوان .. شاهدا على عصرنا وما وصل إليه من ذل وامتهان وهو ما زال شامخا مهما مر عليه الأوان

من ميدان الأوبرا نشوف العتبة وشارع عبد العزيز .. شارع عبد العزيز إلى أصبح الآن مسخ لحرامية الموبيلات .. شارع عبد العزبز والعتبة يعنى البياعين إلى فارشين على الرصيف وفي الشارع يبيعوا الجزم والشنط وإكسسوارات الموبيلات والشرابات على ملابس الأطفال

وسط البلد يعنى قصر عابدين وياااااااااااااااااااه على قصر عابدين .. و الساحة إلى قصاد قصر عابدين إلى بقت كلها عيال بتلعب كورة وجنينة يتقابل فيها الحبيبة .. الميدان إلى وقف فيه عرابي في يوم من الأيام في وجه الظلم والعدوان .. فصر عابدين الصورة التي أراها دوما في مخيلتي والتي أطير معها بخيالي واراني من أصحاب زمن هذا القصر الجميل

وسط البلد .. يعنى العمارات البلجيكية التي بنيت من الخمسينيات ذات القباب والأبواب والشبابيك العالية .. عمارات وسط البلد ذات الزخارف والفن المعماري الأصيل

وسط البلد يعنى شباب الجامعة الأمريكية ,, العيال الملونة وملفوفة بورق سوليفان

وسط البلد يعنى القهاوي إلى يتجمع عليها الأصحاب للاستمتاع بمعزوفات الأهلي والزمالك و كأنهم منصتين للست في زمن الفن الجميل

وسط البلد يعني محلات البارات العتيقة والقديمة ذات الأبواب الخشبية غامقة اللون ..

وسط البلد يعنى محلات بيع البيرة والخمور للخواجات ... والتي ترص فيها الزجاجات في الفاترينات وكأنها زجاجات لأفخم أنواع العطور

وسط البلد صورة من الماضى الجميل .. .. وسط البلد فى بعض اهلها من الأرمان والأجانب إلى بنلاقيهم ماشيين مكحكحين في الشارع في ملابس الخمسينيات والستينيات

وسط البلد يعنى صورة من عربيات الكاديلاك والبويك وبعض عربيات الأربعينيات والخمسينيات إلى لسه مركونة عند أبواب بعض العمارات

وسط البلد ما هي إلا صورة .. صورة من قلب كل واحد فينا .. وسط البلد حالة .. حالة من إلى إحنا بقينا فيه .. وسط البلد هي احدي صفحات تاريخنا ..

وسط البلد صورة حلوة من شعب جميل يبلف ويدور في الزحمة بس مهما تاه هيرجع تاني ويعرف طريقة ... شوارعها محفورة فينا .. شوارعها ذكرياتنا ..

وللاسف مع الأيام تحولت هذه الصورة الجميلة إلي صورة مكسورة فيها عسكر وعربيات امن مركزي .. وسط البلد إلى بقى فيها سحل وضرب وإهانة لأشرف أبناء مصر من قضاة ومحاميين وصحفيين .. وسط البلد يعنى سعار يهتك عرض كل واحد فينا .. وسط البلد يعنى وكر البلطجية والصيع خدامين النظام الحاكم

وسط البلد .. مافيش كلام كفاية يقدر يوصف وسط البلد بس وسط البلد لسه برضة جميلة وهتفضل جميلة والعيب مش فيها العيب فى الى بيجي ويحط عليها .. هتفضلى زى ما انتى يا وسط البلد .. وسط البلد


Sunday, February 4, 2007

لبست فى الحيطة



اهدى هذه المدونة الى الزميل الفاضل قاسم افندى .. والى ادخلنى رغما عن انف الى قاعدين جنبى فى لعبة طريفة .. ومطلوب منى فى هذه اللعبة سرد وبالتفصيل الممل خمس مواقف حدثت فى حياتي ولا يعلمها احد غيري .. بسم الله .. احم اححممم .. المايك شغال عندك يا عبده .. مين عبده .. ؟؟
طب كوباية ينسون من البوفيه ..؟؟ طب سانودتش فول من على العربية ؟؟
مافيش فوول ...؟؟؟
طب علشان الناس الى مستنية نستفتح ونقول السلام عليكم

الاول:
بابا تاااااه


كنا بنتفسح مع بابا وماما واختى الى اصغر منى بسنة فى احدى المراكز التجارية فى جدة .. حيث اقمنا فى فترة طفولتى فى السعودية وتحديدا فى جدة حيث كان يعمل ابى .. ورحنا نتفسح فى مركز جدة الدولى وده من اشهر المراكز التجارية التى توجد فى العاصمة فى ذلك الوقت فى اواخر الثمانينيات .. وقعدت العب انا واختى ونروح عند بركة كده فى وسط المركز فيها سلاحف وبعد ما خلصنا وقررنا نرجع لبابا وماما .. دخلنا فى ممر غلط غير الى كان قاعد عنده ابويا وامى .. واحنا طبعا كنا ابيض احنا الاتنين وقعدنا نعيط ونئواؤ ان بابا وماما تااهواا مننا .. والحظ الحمد لله ان احنا كنا بنعيط جنب احد مسؤلئ الامن فى المركز .. فقال ايش فيكم ... فقلتلوا وانا بتشحتف بابا تاااااه .. عاااااا
فسالنى الراجل بابا اسمه ايه .. فقلتلوا على اسم ابويا وراح منادى فى المايك على فلان الفلانى الحضور الى المكان الفلانى .. مافيش ثوانى وكان بابا قدامنا .. وهو فطسان على روحه من الضحك .. لانه تقريبا كان فى الممر الى ورانا على طول .. ده غير ان احنا جرسناه فى المركز كله .. اصل صوت العياط كان واصل للمركز كله تقريبا .. ودى كانت اول مرة بابا يتووه فيها ؟؟ :)


الثانى:
مكسور


وانا صغيرة برضة وفترة ما كنا فى السعودية .. كنت لابسة خاتم دهب وفى وقت الخاتم ضاق على صباعى وبقيت مش عارفة حتى اخلعه .. فرحنا عند محل دهب علشان الراجل يكسر الخاتم من على صباعى وفعلا كسره .. واتشال الخاتم من صباعى .. واحنا خارججين الخاتم كان معايا .. واول زبالة شفتها قمت رميت الخاتم فيها .. وبعد ما روحنا البيت ماما بتسالنى فين الخاتم .. قلتلها رميته
قالتلى وهى مبرئه . رمتيه فيين .. ؟؟ قلتلها فى الزبالة ؟؟ قالتلى والدم هيفور من وشها .. زبالة ايه .. قلتلها الزبالة الى عند الراجل ..؟؟ قامت ردت وكادت تفتك باحشائى ورمتيه لييييييييييييه .. ؟؟ قلتلها مش مكسوووور .. يبقى نرمييييه
ومش فاكرة ساعتها حصل ايه بصراحة .. :)


الثالث:
بطاقتى الشخصية


فى فترة الثانوى .. وافتكر ان فترة الثانوى دى تتسم بكل مظاهر الهمجية وبداية التمرد والاستقلال وكل الكلام المجعلص بتاع العيال بتوع ثانوى دول ..وماما كانت بتخاف اضعف واقيم اى علاقات مشبوهه من اى نوع وخصوصا ان دى كانت سمة كل العيال فى المدرسة سواء بنات ولا صبيان .. انا اصلا كنت بستهيف طريقة تفكير العيال والحمد لله رب العالمين كانت نشاتى فى بيئة محافظة ومتدينه ليها مبادى واخلاق كل ده كان ليه تاثير كبير على شخصيتى .. وفى يوم قررت اعمل فيه بطاقتى الشخصية ما كانتش لسه ظهرت بطاقة الرقم القومي .. فكان لازم البطاقة تتختم بختم النسر .. والختم ما كنش موجود فى مدرستى ولا المدارس الى جنبينا وكان فى مدرسة فى منطقة بعيدة وكان فى واحد زميلنا .. والدته كانت مديره فى المدرسة دى .. فساعتها اديتله ورق بطاقتى علشان والدته تمضيهالى من مدرستها .. وطبعا ما قلتش لامى انا مضيت الورق منين وفهمتها ان خال واحدة صاحبتى هو الى مضهوولى من شغله .. علشان لو كنت قلتلها مين كانت عملتلى ميت سين وجيم وطينت عليا عيشتى طول فترة الهباب الى اسمها ثانوى .. وقررت انى هقولها فى يوم من الايام وفضلت فاكرة اقولها اول ما دخلت الجامعة .. قلت لا بعدين قلت لما اتخرج او يوم ما اتجوز او يوم ما اموت هقولها يا ماما انا خبيت عليكي انى الى مضالى ورق البطاقة هى ام محروس مش خال سارة .. بس مع مرور الوقت وبعد ما اصبحت ليا زمالات من الكلية وفى الشغل .. حسيت ان الموضوع بقى عبيط فعلاا .. وهتقولى انتى هايفة يا بت انتى
ولحد دلوقتى ماما ما تعرفش .. تفتكروا اقولها ........ ؟؟؟؟؟؟

الرابع:
استوديو عبدة الشيطان


ليا واحدة صاحبتى فى اول سنين الجامعة اتعرفت على مجموعة شباب غريبة .. من الناس الى بتطول شعرها ويلبسوا اسود فى اسود ويسمعوا اغانى الميتال .. واتاثرت بيهم جداا .. لدرجة انها كانت بتشترى الشرايط بتاعة الاغانى المهببة دى وبقت بتلبس اسود فى اسود وحالتها كانت نيلة .. مع انها مفروض كانت ملتزمة وبتصلى ومحجبة .. والى كان متزعم الجماعة دى واحد اسمه (رافت) وكان سورى الجنسية وبيدرس فى مصر .. وانا مرة رحتلها الجامعة واتعرفت عليهم بس ما كنتش مقتنعة باى حال من الاحوال بالقرف الى كانوا بيعملوه وطريقتهم فى الكلام عن الحرية والصحوبية وغيرها .. والاغانى الميتال كان كلها كلام عن الحرية والالوهية والجنس .. حاجة قرف قرف يعنى .. المهم صاحبنا قالها مش هتيجي تتفرجي علينا واحنا بنتدرب فى الاستوديو .. انا بتجمع انا وصحابى ونقعد نعزف ونتمرن as just for Fun .. واتفقوا هما وكام واحد زميلهم من الجامعة ويروحوا يتفرجوا عليهم فى الاستوديو ... وطبعا العبده لله الى هو انا رحت مع صاحبتشى حبيبتشى .. المكان كان عبارة عن مغارة فى المنيل .. عارفين بيت العفاريت بتاع الملاهى كان حاجة كده ... مكان مافيش اى اضاءه غير اضاءه حمرا .. الى قاعدين كلهم من ابو شعر طويل ولابسين اسود فى اسود الحيطان متبطنة بسفنج سميك كاتم للصوت .. وابتدى الزار اقصد الحفلة .. ناس بتخبط وناس بتصوت وناس بتهز فى راسها وناس تتنفض فى مكانها والغريب فى الموضوع ان صاحبتشى كانت مستمتعة جدا بالى بيقولوه
انا بقى طول القاعدة لا همنى الزار ولا العيال المجانين الى احنا قاعدين معاهم وبقيت بدرب نفسى ميت صرمة قديمة وكل ما الباب يفتح افتكر انه ابويا داخل علينا او امن الدولة علشان يلموا العيال بتوع عبده الشيطان دول
والحمد لله الموضوع عدى بس مش على خير وقعدت شهر مش عارفة انام وطبعا ما فيش حد على وجه الكون يعرف انى رحت المكان المهبب ده لحد دلوقتى .. واوعوا علشان خاطرى تقولوا لحدددددد ؟؟؟؟؟؟

الخامس:
كوفى شوب فندق سفير

من حوالى 4 سنين تقريبا .. بعد ما رمضان خلص واول يوم العيد .. ليا واحدة صاحبتشى (غير صاحبتشى الاولانية) افتت علينا وقالت فيه كوفى شوب فى فندق سفير عامل offer للبنات لحد الساعة 6 التذكرة ب10 جنية والصبيان تذكرتهم ب20 حنية وتعالوا نتجمع كلنا ونروح هناك نتفسح فى اول يوم العيد .. طبعا قلت يا حالوولى offer للبنات ونسيبه .. فلتحيا التاء المربوطة ونون النسوة .. وكلمت البنات صحباتشى من ايام الجامعة وقلنا نروح الكوفى شوب بتاع فندق سفير .. على ما اتجمعنا وروحنا كانت عدت الساعة 6 .. المهم صاحبتشى صاحبه المشورة بميه لسان قعدت تتحايل على الراجل لحد ما رضى ندخل ب10 جنية .. دخلنا اذ بى افاجئ ان احنا داخل ديسكو تك .. قلتللها تعالى هنا هو ده الكوفى شوب .. قالتلى ما انا مش عارفة دى رانيا بنت عمتى هى الى قالتلى عليه .. قلتلها الله يخرب بيتك على بيت عمتك شخصيا .. منظرى ايه فى وش الجيش الى انا جايباه معايا .. وطبعا كنا لسه كاعيين ال10 ججنية فقعدنا زى الجزم وبقت طول القعدة صعبان علينا - غير العشرة جنية طبعا - صيام رمضان والختمة والقران وبقت هى دى كل كلامنا طول الزفت القاعدة والناحية التانية من الديسكو شباب فى دنيا تانية خالص .. زى ما يكونوا مش فى مصر .. رقص واحضان ومسخرة .. وكل شوية كنت بابص على الباب برضة فاكرة ان ابويا هيدخل علينا ويقفشنا فى ام الخمارة الى احنا فيها .. او بوليس الاداب ويلم كل الزبالة الى جوا
ااااه .. نسيت اقولكوا .. المكان كان فى drink .. والله صعب عليا رمضان
ورااااااااحت العشرة جنية وراااااح رمضان
حسبى الله ونعم الوكيل
برضة لحددلوقتى ابوويا وامى عارفين ان انا كنت فى كوفى شوب فى فندق سفير .. اوعوا حد يفتن عليا ؟؟؟؟؟؟؟


مطلوب منى الان انى اوقع خمسة من اصحابى فى اللعبه دى .. كان نفسى فى قاسم باشا بس طلعت منى اوت واهديها الى:
1-
لميمو المفروسة
2- علا عثمان فى وشوشات
3-
الحصان الأسود
4- رجل من الصحراء
5-
اكتب بالرصاص