Saturday, January 27, 2007

ممكن اعرف انا بكلم مين ؟؟


ممكن اعرف انا بكلم مين ؟؟
هو فى الحقيقة موضوع شاغل بالى بقاله كتير .. بس مش عارفة انا بس الى كده ولا فى حد تانى معايا كده ..؟؟
بداية احب اوضح ان انا مش بحب اتلقى اى موضوع مطروح للنقاش او اسمع اى راى من اى حد مجهول انا مش عارفة هو مين .. ؟؟ ببساطة الا هو انت ابن مين فى مصر ..؟؟ او انتى بنت مين فى مصر ..؟؟ علشان اسمع رايكوا ببساطة او اقتنع بيه .. او اخد منكوا فكرة اخذنها فى عقلى الباطن وفى اللاوعي بتاعى علشان استرجعها فى اى وقت من الاوقات وقت ما اتزنق فى حوار او موقف تانى واقول اصل عرفت من فلان او فلانة كذا .. ؟؟
او ان راى الناس فى الموضوع الفلانى كذا ..؟؟
واعتقد ده من حق اى حد فينا .. انه يتاكد من مصدر اخباره ومعلوماته وهل هى موثوق منها ولا لأ .؟؟
وذلك يولد ثقة ما بين القارئ والكاتب .. واى كاتب يهمه قارئه بالدرجة الاولى .. فهو يكتب للقارئ ومن اجل القارئ ..
وبياكل عيشه من قرائه القارئ لما يكتبه .. واذا كان لا يكسب عيشه من الكتابه .. فأن الواحد يكتب لنفسه ده شيء مميت .. زى الواحد الى قاعد بيكلم نفسه .. ؟؟ مش كده ولا ايه
كما ان ردود افعال القراء مع الكاتب هى الى بتديله الدافع انه يقرب منهم اكتر ويحاول يعرض رايه ووجهات نظره وفكره ليهم .. واذا تولدت الثقة .. تولد الاحساس لدى القراء بالقرب من هذا الكاتب ومن اراؤه .. وحتى لو الكاتب بيقول اى كلام ..او ريان يا خيار ... بمجرد ثقة القارئ فيما يقول .. هيقتنع بما اثاره فى كتاباته .. وذاك لانها عمليه نفسيه بحته ..؟؟
ازاى عملية نفسية بحته .. فمثلاا عندما يذكر امر الاهي يخص امور الدنيا او الاخرة .. وذكرت بجانبه الاية القرأنية التى تؤكد هذا المعنى .. يتلاقاها المتلقى وكله قلب خاشع واذان صاغيه وعقل مصدق .. وذلك لانها من الله سبحانه وتعالى ... فلا تقبل النقاش .. فتقبل كما هى ... وذلك بسبب الثقة من المصدر .. ولله المثل الاعلى طبعاا .. والتى يعضضها طبعا الايمان بالله تعالى
واذا ذكر حديث عن الرسول عليه افضل الصلاة والسلام وذكر اسناده .. اصبح ايضا مؤكد المصدر .. فنتقبل كل ما ذكر فى نص هذا الحديث بدون نقاش وبدون اى مجال للشك فى صحته ونعمل على ما ذكر فيه
بينما اذا ذكر الحديث بدون اسناد .. فهنا نعمل على اعمال العقل واذا كان نص هذا الحديث صحيح او غير صحيح .. مغلوط او ضعيف او مشكوك فيه وما الى ذلك من تصنيف اسناد الاحاديث
اذاً فذكر المصدر شيء هام جداا لائ قارئ .. الى هو ممكن اعرف انا بكلم مين ..؟؟
والى اوحالى بكده زياراتى وسرمحتى على مدونات غيري .. ناس اعجب بكلامهم .. ناس كلامهم نص نص .. ناس كلامهم فارغ .. ناس ما ازورش مدوناتهم تانى .. بس ولله الحق اغلب من زرتهم .. استحقوا بجدارة ان يكونوا أصحاب لقب مدونين محترمين وترددت عليهم اكتر من مرة .. ومازالت وسازال اذا احيانا الكريم بأذن الله
وعندما حدثت هذه المودة بينى وبينهم .. مش بينهم شخصاا .. ولكن بين كتاباتهم وافكاراهم وارائهم وكأن كل منهم له مدرسته او جامعته التى يلقى فيها محاضراته ووجهاته لمتلقييه, تولد لدى شعور بالبحث عن من هو الكاتب ؟؟
انا بكلم مييين .. ؟؟ انت او انتى ولاد مين فى مصر المحروسة ..؟؟
هل ده يعتبر بحثا منى عن المصدر وذلك للتاكيد على موضوع الثقة الى قلنا عليه خاصة بعد ما وجدت راحتى فى مدوناتهم .؟؟
ولا مجرد فضول وحب استطلاع علشان اعرف مين الى كاتب الكلام ده .. ؟؟ ولا يمكن يطلع شخص مشهور واقعد اجعص فى قعاداتى مع صحباتى واقول ده انا اعرف الفلان الفلاني ..؟؟
ليه دايما اول حاجة اعملها قبل ما ادخل على اى بلوج افتح البروفايل profile بتاع صاحب المدونة .. اعرف اسمه .. عمره .. عمله .. دراسته ؟
طبعا هذه المعلومات بتعطى القارئ الثقة الى كنا اتكلمنا عنها .. لان هذه المعلومات بتعكس ثقافة الكاتب والتى اكيد بتنعكس على كتاباته .. على الاقل اعرف انا بخاطب اى شريحة من المجتمع ..؟ لاى فئه ينتمى الكاتب .. للسياسيين ..؟ المثقفيين ؟؟ اكاديميين ..؟ طلاب ؟؟ فنييين ..؟ ارستوقراطيين ؟؟ ولا ناس عادية زينا كده ؟؟
وده الى انا دايما بدور عليه لما ادخل اى بلوج او اى موقع .. او حتى عندما اقرا اى مقالة .. انا بكلم مين ؟؟
اقتنعتوا معايا ده حقى ولا لأ ؟؟؟
اذا اقتنعتوا معايا نكمل ...
السمة الى لاحظتها فى كل المدونات ان ما حدش على كده كاتب بياناته كاملة :)
والملاحظ ان مافيش حد كاتب اسمه والمعظم مش ذاكر عمره .. والاغلب مش ذاكر وظيفته او دراسته
هحط نفسى دلوقتى مكان الكاتب .. ليه الغموض .؟؟ هل ده هيعطى دافع اكتر للقارئ انه يتابع ما اكتب فيمكن يتعرف عليا اكتر من خلال مفاتيح كتاباتى ؟؟ او لانى انسان غامض واعمل على نطاق الافلام البوليسية الغامضة فاعطى نفسى طابع بوليسي واجد متعة ولذة فى كده ؟؟ ولا لانى باعتبرها معلومات شخصيه بحته ومش كل من هب ودب يعرف انا مين ويعمل على اقتحام خصوصياتى وعالمي الخاص خارج اطار صفحات مدونتى ؟؟
ولا علشان احنا فى وطن ديموئراطى وما الغموض الا لدواعى امنيه بحته .. وعلشان اعمل الى نفسى فيه واقول الى انا عايزة وما حدش يعرفلى قرار .. واكتشف ان حد لابدلى فى الدرة واروح فى خبر كان واخواتها ؟؟
وفى الحقيقة انا ارجح ان الاخير هو السبب العاام للأغلب .. لان هو ده سبب غموضى انا شخصيا :)
بس انا وضعت نفسى مكان القارئ .. وقررت اكسر حاجز هذا الغموض واقول انا مين ؟؟
انا ...
انا .....
انا .........
انا .......................
انا بساطة ابقى .................................
وشش وشوو وش وش وش وش .. ترااك .. ترك .. طراااخ ....
نعتذر عن انفطاع الارسال بسبب عطل فنى فى الماوس .. ونواصل تقديم البرنامج فى وقت لاحق بعد نزوح القطة ورجوع الماوس الى قواعده سالما غانما
هاتشوووووووووووووووووووووووووو وعليكم السلام ورحمة الله وبركاته


Tuesday, January 16, 2007

مواطن ديموئراطى فى بلد ديموئراطى


الحقيقة ... - والحقيقة دايما مررررة - كل يوم والواحد ماشى فى الشارع الديموئراطي بيشوف المواطنين الديمؤراطيين بيمارسوا حقوقهم الديموئراطية بمنتهى الديموئراطية والشفافية
ومش عارفة مين الى قال ان احنا مش فى بلد ديموئراطي .. امال الى احنا بنشوفه كل يوم ده اسمه ايه
والحقيقة (تانى الحقيقة) الى استفزنى انى اكتب عن كده لما شفت النهاردة الصبح كل معالم الديموئراطية في شارع من الشوراع الفرعية الى بخرم منها علشان اوصل شغلى الصبح .. شارع جانبي يعنى شارع ضيق ومليان بياعيين على الجنبين وترابيزات البياعين نازلة لحد قلب الشارع .. لدرجة ان مافيش مكان الى ماشى على رجله يمشى فيه .. وبرغم من ان الشارع ضيق الا انه طويل ومهم جدا .. بيبدأ نصه الاولانى ببياعين الخضار والفاكهة من عند شارع 26 يوليو وبينتهى نصة التانى ببياعين قطع غيار السيارات واللذى منه وذلك عند التقاءوه بشارع امتداد رمسيس .. يعنى اصلا شارع على بعضه .. بالتالى ملئ بكل معالم الديموئراطيه
ما بين بياعين قاعدين لحد نص الشارع وعربيات نقل بتنزل بضاعة سواء عند الفاكهانية اوالخضرية الى فى اول الشارع او بضاعة نازلة عند التجاربتوع قطع الغيار .. وفى نص الطريق جراج كبير بتطلع وتنزل منه وفيه عربيات ولوريات .. غير ان كمان فى مطاعم وجزاريين .. يعنى من الاخر كل معالم الديموئراطية اتفقت واتجمعت فى هذا المكان والذى لا يتعدى عرضه 3 متر .. فيها كل ما سبق ذكره
وفى وسط الهلمة دى كلها .. يطلع راجل ديموئراطي راكب عربية وراكن فى نص الشارع .. ومهدى بالعربية لا تعرف ده ماشى ولا راكن ولا تعرف ده مستنى حد ولا ناوى يعمل ايه ... وقاعد متنح جوا العربية وكل الى فى الشارع بيبصولوله انت هتتهبب تعمل ايه .. هتمشى علشان الناس الى ماشية على رجليها تستنى لحد ما تعدى وتكمل هى ... ولا هتتنيل تقف فالناس تعدى على رجليها وتخلص من يومها الى بانت ملامحه من اول ما هليت بعربيتك على الشارع
وفضل الراجل الديموئراطى زى ما هو بيسحف بعربيته فى الشارع والناس بقى ابتدت تتصرف - ما كله ضارب الفول على الصبح ومش طالباها تشغيل مخ - الى نط من على جنب العربية والى طلع فوق طلرابيزة بياع والى بيتشعلق فى كتف واحد ماشى .. انا شخصيا استنيت لما واحد ديموئراطي عدى من جنبى واتحشرت فى كتفه وعبرت بنجاح للجنب التانى
وبعد ما خرجت من الشارع عنيا مزغلله طبعا من كتر الديموئراطية الى مارسها الشعب فى الزنقة الى فاتت .. عديت شارع امتداد رمسيس بمنتهى الديمؤراطية قدام كل العربيات والاتوبيسات والموتسيكلات الى نازلة من كوبرى اكتوبر
والى استنتجته ان الراجل ده زى ما مارس ديموئراطيته بمنتهى الحرية .. كل الناس الى فى الشارع بتمارس ديمئراطيتها بمنتهى الحرية برضة وفى نفس الوقت .. فلكم ان تتخيلوا كمية الديموئراطية الى بتبعبع من الشارع ..والشارع ده شكله عامل ازاى طول النهار وطول الليل
والشارع بتاعى ما هو الى مثال صغيرللديموئراطية .. فالناس بتمارس ديموئراطيتها فى المصالح والشوارع والمدارس والجامعات والمواصلات والاشغال والسجون واقسام الشرطة (واتكلى على اقسام الشرطة دى ودقلى سلامين وحتة زيادة من عندى ووصى على كوباية زبادى فى الخلاط للبيه الباشا الظااااااابطش)
فاصبحت الديموئراطيه .. هى انك تعمل الى انت عايزة فى اى وقت انت عايزة فى المكان الى انت عايزة فى وش اى تخين انت عايزة .. وزى ما انت ليك الحق انك تمارس الديموئراطيه بتاعتك .. التخين الى فى وشك بيمارس ديموئراطيته بنفس القدر وبالتالى ... صبحنا قشطة .. وصبحلى على النظام وكمان صباح على الديموئراطية
وطبعا كل ده فى اطار الديموئراطية الى راسمهالنا ابو عزم شديد والقوة حديد (مع اعتذارى لاقتباس شعار وزارة النقل) الديموئراطى الكبير اوى اوى اوى ومن بعده الديموئراطى الصغنتون بس مش اوى اوى يعنى
يبقى من الاخر .. احنا فى بلد ديموئرااطى ولا مش فى بلد ديمؤرااااطي ....... ؟؟؟ يا شعب ديموئرااااطى ما يملاش عينه الا ... ...............
تمت
-------------------------------------
فين ساندوتش الفووووووووووووووووووووووووول ...؟؟؟!!!

Saturday, January 13, 2007

بشاعة التعبير وحقارة فى الاداء

احنا ناس لا بتوع سياسة ولا دياوله
ولا بنفهمها ولا عايزين نفهم فى امها
وسايبنها لناسها واصحابها من بتوع الامبريالية
والعلمنه واليساريه والشمالية
على الشرق الاوسط الكبير على القرن الافريقي الأكبر منه
وصبح صبح يا عم الحج
بس لما الواحد يشوف صورة زى دى
صعب يعديها كده بالساهل
صباح الاستفزاز على مساء الى اسمه ايه
يعنى الواحد ممكن يكون بيتكلم عن ايه علشان يبقى منظر امه بالشكل ده
غير انه بيوصف دوره فى بطوله فيلم رعب
عن فعص الفلسطنين ودعك العراقيين
ومص دم اللبنانين
وقرقشة عضام السوريين
وتقطيع مصاريين الليبين
على سحل الصوماليين
وخزوئة المصريين في دكرورالبلاليق (والحدق يفهم)
بس لو شوية دم كده عند بقها .. وكانت تبقى نجمة شباك للمرضى النفسيين
------------------------------
انا عايزة سندوتش فول وازازة كاكولا
وانا اروح من هنا

Tuesday, January 2, 2007

سنة فاتت وسنة جاية


وقفت كتير قصاد النوتة بتاعتى
بدور على كلام جديد اقوله غير الى احنا كلنا عارفينه .. قلت خلاص استنى شوية يمكن لما اقرالى كام حاجة جديدة واخلص الحتة الى فى ايدى (الـtask) الى معايا يمكن اعرف الاقى كلام مرتب اقوله...

بعد ما خلصت الحتة الى في ايدى قلت الف شوية على مدونات غيرى يمكن الاقى حاجة تستفزنى اكتب عنها اى كلام .. وفى الحقيقة ده لخبطتنى زيادة ...


لقيت افكار واخبار واراء ولخابيط قصاد عينى نعكشتلى دماغى اكتر .. شوفت ناس كتير من ورا سطورهم .. حسيت ان احنا قاعدين سوا فى صالة بيتنا مربيعين .. وكل واحد عمال يرغى ويقول اى كلام وعلى فكرة كل واحد كان ماسك كوباية شاى - مع انى مش بشرب الشاى - بس اصل الشاى عندنا ليه معنى الرغى والسمر والحكاوى والقهاوى وبرد الشتا الى بندفيه لما بنشرب الشاى وقت الرواقة ساعة مغربية .. مش عصرية علشان بنبقى نايمين ..

والى زى حالاتى مش بيشرب شاى بنقضيها سحلب بقى او كاكاو .. المهم ما علينا ونرجع لموضوعنا

اكتب تانى عن ايه ... ؟؟ - وهو انا كنت كتبت اولانى - ما علينا برضة

اكتب عن العيد الى هل علينا وعدى زى الريح .. ولا اكتب عن السنة الى عدت والى مليانا احزان ومشاكل وملخبطة على شوية افراح وحاجات حلوة .. ونعمل كده حساب لنفسينا عملنا ايه وعلينا ايه ولينا ايه

ولا نفكر فى السنة الجديدة .. ونفكر فى الى هيحصل فينا والى حصل زيه قبل كده .. ويا ترى نخاف منها ولا نستناها واحنا متفائلين .. ؟ ولا ننتظرها واحنا مرعوبين .. ؟؟

ورسى المرسى على حكاية سنة فاتت وسنة جاية

سنة فاتت .. يا لهوي .. دى مش سنة .. دول سنين .. يعنى كل سنة بتعدى .. بتتحط فى دفتر وتتشال فى ارشيف حياة كل واحد فينا .. السنة دى 2006 زاد على ارشيف حياتى وذكرياتى
2006 على 2005 على 2004 على 2003 .. يا نهار ابيض 2003 .. وارجع لورا كده شوية نلاقى 1999 .. 1998 ... يا جماعة 99 ده ما كنش بعيد .. ده كان قريب اوى .. ونرجع شوية 92 وزلزال وبتاع .. ده برضة كان قريب اوى ... يا نهاار ابوونا الوان .. انا بتكلم على 14 سنة .. بس اقف عندك وارررررررربط

هو الواحد فى عمره كام 14 سنة .. ؟؟ ويا ترى الـ 14 سنة الى فاتوا دول هنعيش زيهم تانى ..؟؟ ولو ربنا اراد وعشنا زيهم تانى .. يعنى انا كمان 14 سنة يكون عندى 38 سنة مثلااا .. طب هكون فين وبعمل ايه وشكلى ايه ؟ .. طب جدودى راحوا فين .. ؟؟ لو رجعنا 60 سنة لورا . يا ترى جدى ده كان شكله ايه وعايش ازاى ..؟؟ ما هو كان طفل برضة وشاب .. كانت احلامه عاملة ازاى .. طموحه كان شكله ايه .. بيحس زينا كده .. يا ترى كمان 60 سنة من دلوقتى انا هكون فين .. ... ؟؟ هيجي علينا اليوم الى احنا كمان نكون فيه ذكريات ؟؟ و يا ترى الى بعدينا هيفتكرونا احنا كمان ..؟؟ هيفتكروا يدعولنا بالرحمة ولا لا .. ؟؟

يا نهاار الواان غامقة .. طب بلاش نفكر فى الى جاى قدام .. خلينا فى دقولتى .. عملت ايه انا جديد غير انى اكون شخص عادى ..؟؟ عملت ايه يفتكروه الناس من بعدى .. ؟؟ ويا ترى هيبقوا عايزين يتفكرونى ولا يقولوا اهى غارت ونظام اذكروا محاسن موتاكم وكل سنة وانتوا طيبين ...؟؟؟

الموضوع لا هو رساله دينية ولا سياسية ولا بتنجانية .. الموضوع انسانى بحت يا اخوانا .. انا ممكن الحق اعمل حاجة فى دنيتى تخلد ذكرياتى .. ولا هروح زى ما جيت وكانك يا ابو زيد ما غزيت .. والباب الى يجيلك منه الريح يا تلبس هدوم تقيله علشان البرد او تعزل وتروح مكان تانى وقفل على الموضوع ومش ناقصين .. كفاية الى احنا فيه .. وما تقلبوش علينا المواجع ... وبس خلاص

والسلام عليكم ورحمة الله وبركاته
وااااااااااااااه يا بطنى