الدنيا واخدة مصر لفين ...؟؟
سالت نفسى هى مصر فعلا شعبها غلبان ومظلوم .. ؟؟ هو احنا فعلا
شعب مغلوب على امره ومقهور .. ؟؟
ليا عمة دايما تقولى ان شعب مصر ده غلبان وداخل الجنة حدف من غير
حساب .. والحقيقة الست ليها وجهة نظر منطقية برضة فى الموضوع
قالت يغلوا ويولعوا فى الأسعار واحنا ساكتين .. يحطوا سم وسرطان فى
الأكل واحنا طافحين ...يحطوا سيراميك وبودرة العفريت فى اللبن واحنا
سافين
الأكل واحنا طافحين ...يحطوا سيراميك وبودرة العفريت فى اللبن واحنا
سافين
يحطوا صرف صحي فى المية وبرضة بالعيين .. نقع فى بلاعات ونولع فى
مسارح وقطورات واحنا مخروسيين
تلوث وفساد فى المستشفيات ندخلها سولام نخرج ميتيين واحنا صابرين
تذاكر موصلات تغلى اضعاف سواء مترو ولا مينى باصات ولا حتى
ميكروباصات واحنا مطنشيين
كيلو البصل ب4 جنية والليمون ب7جنية وحاطين الطين فوق راسنا
ونايميين
تعليم ودراسة زفت صحة ونظافة زفتين واحنا برضة راضيين
انابيب تولع فى وشوشنا .. واحطين الجزم فوق رؤوسنا وماشيين
يزوروا في دساتير وانتخابات وبرلمانات واحنا بالاجماع موافقين
هيورثونا لعيالهم وعيال عيالهم واحنا مؤيديين
أسرانا تتقتل بدم بارد واحنا مسلتحيين
جنودنا يتدبحوا على الحدود برصاص صهيوني خاطئ واحنا مأنتخيين
بالذمة فى كده فى بلاد المسلمين هو ده شعب اخرس ده ولا ايه ... !!!!يبقى بالذمة حسابنا هيكون ازاى يوم الدين
امال مين بقى الى بيسرق بيحرق وبيقتل كل يوم . مش احنا ؟مين الى بيعاكس فى البنات والستات بأقذر الالفاظ والحركات .. مش احنا ..؟؟
؟مين الى بيغتصب وبينتهك وينهش الى نقدر نطوله من غيرنا .. مش احنا
؟مين الى ساكت على الدعارة الى دخلت كل بيوتنا من الفضائيات
والكليبات والافلام الزبالة .. مش احنا ؟
مين الى ساكت على سياحة الدعارة وبيسهلها ومستحل فلوسها ....
وخلى كل بنات وستات مصر ولامؤاخذة ... ورجالة مصر ... ولامؤاخذتين
؟؟ مس احنـــــــــــــــــــــــــــــــــــــــــــا ؟؟
مين الى عمل من بلاد الازهر هوليود للشرف ومرتع للمسخرة والفن
والفنانين ... مش احنا ..؟؟
مين الى خلى البنات والستات فى الشوارع بقت بالمناظر المقرفة الى
بنشوفها فى الشوارع كل يوم ... مش احنا ؟؟
مين اصحاب العربيات الاخر موديل الى فى الشوارع ليل ونهار وعيال
المدارس الى بقوا ماسيكين الموبيلات ام 3 الاف جنية ... مش احنا .. ؟؟؟
مين الى مالى محلات السوبر ماركت الضخمة فى مصر زى هيبر وكارفور
وسبينيز وغيرهم وغيرهم ليل ونهار والناس بتشترى كل ما لذ و طاب من
اكل وشرب مستورد .. مش احنا ؟؟؟
احنا لا هنقول حقد طبقى ولا حقد حللي .. كلوا حر فى حياته .. بس ما
نقلش بقى ان احنا شعب غلبان ومش لاقى ياكل
امال مين الناس الى احنا بنشوفها كل يوم .. ؟؟ والغريب بقى اشوف فى
تحيقيق السبت لعزت السعدنى ان 50% من شعب مصر بيعانوا من الفقر
.. !!!!
لما 50% بيعانوا من الفقر .. امال الى بنشوفهم فى الشوارع دول النص
التانى ... والباقى راح فين .. ؟؟؟؟ تحت الارض .. ؟؟؟
يبقى من الاخر احنا شعب يستاهل الجنة ولا نستاهل نولع فى اسفل
سافلين
والحكم للموجودين ..؟
الدنيا واخدة مصر وشعبها لحد فين .. ؟؟؟؟؟؟؟؟؟؟
26 comments:
ايوة نص مصر بيعانى من الفقر
ماهى مصر بقت فرقين,, فريق الهاى كلاس و الى انت بتشوفيهم دول و الفريق التانى الى مش لاقى ياكل
اما الشوية الى كانوا فى النص فدول بيختفوا نتيجة للنظام الرائع بتاع الخصخصة
اسكتى يا اختشتى مش سمعت خبر غريب احتمال تبقوا عارفينه بس بما انى بعانى من حاله اكتئاب فاانا عرفته بالصدفة
بيقولوا قال ايه قال هيبيعوا الاهرامات و ابو الهول لشركات استثمارية
مش الاهرامات نفسها يعنى الحته الواسعة الجميله الى كنا نتفسح و نركب الحصان فيها
هتتباع فى مزاد
الله اعلم بقى صح و لا غلط
ايه دة؟
انا بعدت عن الموضوع صح؟
بس يلا اهو كله فى مصر
احنا اكيد فى مصر يا قمر
تحياتى
مصر فعلا يا إيناس بقت طبقتين.. طبقة غنية غنا فاحش و طبقة فقيرة فقر مدقع.. الطبقة المتوسطة دي تكاد تختفي مع مرور كام سنة كده. متهيألي ان الثورة الميمونة قامت عشان الفروق العالية بين الطبقات مش كده؟ طيب يا جماعة.. حد ييجي يزعق لنا على الملك احمد فؤاد ييجي يسترد عرشه الله يكرمكوا.
أسفل سافلين عشان احنا وحشين فى قلب بعض
بنوتة
انا كاتب ابوست قريب شوية من ده انا بسأل سؤال يعنى ايه مصر
بصى يا ستى الناس اللى ماليه هايبر وكارفور دول برده مصريين زى الفقرا ما هما مصريين بس انتى عارفة ايه المشكلة ان احنا بقينا شعب بلا هوية الغلابة يبصوا على الاغنياء ويبقوا نفسهم يعملوا زيهم فى كل حاجة من مصايف وعربيات وموبيلات وكل حاجة
يبقى ايه الحل انهم يسرقوا ويرتشوا وطبعا السرقة فى مصر منتشرة على كل المستويات فتلاقى الفقير بقى غنى يجى الفقير التانى يعمل زيه ويسرق هوا كمان وتلاقيهم بيصرفوا بهبل عايزين يعوضوا ايام زمان ويحاولوا باى طريقة انهم يتبروا من ماضيهم الفقير
مع انه شرف ليهم انهم يفضلوا فقرا لكن شرفاء
لكن المشكلة ان محدش بيفكر بالطريقة ديه دلوقتى
عرفتى يا ستى 50% اللى انتى بتشوفيهم طلعوا منيين وطبعا فى اغنياء كتير لكن فلوسهم حلال وفى فقرا ولسه شرفاء بس دول مش كتير
عمار يا مصر
شوفي يا ستي الموضوع أصله ابتدي من قاعده الهرم من من قمته ومن أعمالكم سلط عليكم وعلي رأي المثل
أبوك البصل وأمك الثوم منين تجيب الريحة الحلوة يا مشموم
ودستور يا سيادنا
المشكلة عندي كمان مش في كده انا ممكن احلل معاكي الوضع لتفاصيل أعمق من كده في تربيتنا وثقافتنا وموروثتنا الأجتماعية والأخلاقية لكن الأهم عندي حقيقا ايه الحل العملي ولو علي مستوي كل واحد فينا في بيته واسرته والمحيط بتاعه بلاش حتي علي مستواه الشخصي عشان الواحد لما يقف قدام ربنا يعرف يرد
انا هكون ايجابي واحكلمك
يوم الثلاثاء قبل الماضي الموافق 10/4/2007 كنت اتابع برنامج البيت بيتك في اعادته ليلا علي الفضائية المصرية حيث حديث الدكتور / علي جمعه (مفتي الجمهورية) الذي أحبه واتصلت علي الهواء سيدة من الإسكندرية ببالبرنامج وطلبت من سعادته أن يفتي لها في جواز بيع أحد أعضاء جسدها لتستطيع الإنفاق والعيش والسرف علي بناتها وتزويجهم نظرا لفقر زوجها وضيق ذات اليد حقيقا انا بكيت وثار الدكتور علي جمعه غاضبا كيف لمصر المليئة بالأغنياء والأموال والخير تخرج منها امرأة تريد بيع جسدها لتعيش وناشد أهل المال والمخرجي الزكوات الذين يدعون أنهم لا يجدوا مخرجا يخرجوا فيه صدقات أموالهم.
المهم
أمس الثلاثاء 17/4/2007 أتابع كعادتي كل ثلاثاء فاذا بالأستاذ تامر يقول في فقرة فضيلة المفتي هناك مفاجأة وسوف يكون مع سعادته معالي وزير الصحة.
المفاجأة بجد فرحت قلبي الي هي ايه ؟؟؟؟؟؟؟؟؟؟؟؟
اتفقا علي اقامة صندوق اسمه الصندوق الخيري الأهلي للإنفاق علي علاج ورعاية الفقراء والغير قادرين ومستهدف أن يبدأ المشروع بمبلغ 5 مليار جنيه.
اتصل في ذات الوقت الفنان محمد صبحي وزكي المشروع وفرح وتبرع ب 50000 جنيه وبإيراد افتتاح مسرحيته الجديدة
اتصل مهندس مصري وتبرع بدعم المشروع تقنيا وانشاء الموقع الإلكتروني والنظام الكامل للمشروع واداراته
اتصل دكتور صيدلي مصري وفرح جدا بالمشروع وتبرع ب 50000 جنيه وبأي خدمات طبية
اتصل رجل بسيط من اسيوط وتبرع ب 5000 جنيه
اتصلت ام لطفلة صغيرة قالت ان ابنتها تبرعت ب 5 جنيهات من مصروفها الشخصي
بجد حسيت وقتها ان الإصلاح مش شرط يكون في اتجاه سياسي وبس
وان في أمل وممكن نعمل حاجه لا حاجات
ممكن نصلح من غير صدام
ممكن نغير من غير خناق
بجد نرتقي بمجتمعنا ونساعد وطنا عشان ينهض ويرتقي
تخيلوا معايا المشروع ده لو كل الشعب المصري اتبرع شهريا لمدة 10 شهور ب 5 جنيهات بس زي الطفلة الي اتبرعت تخيلوا هنجمع 350 مليار جنيه
نهضة امتنا وخدمة بلدنا واصلاح مجتمعنا في ايدنا
للعلم في حساب هيتفتح وهيعلن من بكرة للي عاي يساهم أو يتبرع للمشروع
الصدقة تطفيء الخطينة كما تطفي الماء النار أو كما قال صلي الله عليه وسلم
انا خلصت
هو فقط الفقير اللي بيسرق علشان يقلد الغني؟ مصر هى أمى أنا عايز اسألك سؤال واحد؟ هم الحراميه في المحروسة من الفقراء فقط؟
هي دي نظريه جديده متوازيه مع نظريه المؤامرة؟؟؟؟
Rania:
عزيزتى الغالية
ما هو سؤالى .. ان كل مظاهر الثراء بقت باينة على شعب مصر ولما نيجي نكلم الحكومة كلمة يقولك امال مين الى راكب العربيات ومين الى عنده الموبيلات ومين الى بيركبوله شبكة جيل ثالث ومين الى استهلاكة ومصروفاته ونفقاتة على السلع الغذائية مش عارفة بكام ؟؟
وكمبيوتروانترنت لكل بيت ووووووو
يبقى الغلابة فييييييييييييين ؟؟
واذا كان على الهرم هو انتى ما تعرفيش ان احنا شخصيا اتبعنا من زمااااان
بالشفا ان شاء الله
:)
علا:
يا حبيبتى انتى وحشتيينى
وع فكرة انا مش ايناس :)
ولعلمك بقى المعيار دلوقتى فى مصر ما بقاش مين الى بياكل ومين الى مش لاقى ياكل
المعيار مين الى معاه موبايل خط مش موبايل كارت :)
افتكرتينى بقى ولا لسه :)
Mohammed a. Ghaffar:
اسفل سافلين .. الله يطمنك
احنا شعب فستكونيا .. عايزين عدد سنين اد الى فاتوا علشان تعرفلنا ملة ودين
واحنا مين وعايزين ايه ؟
مصر هى امى:
لا يا محمد .. انا مش متفقة معاك فى حكاية ان الفقرا علشان يقلدوا الاغنياء بيسرقوا
عمر الفقر ما كان داقع للجريمة ابدا
ده انت كده يا عم طلعت يجي 70% من شعب مصر حرامية وولاد حرامية
المشكلة مش كده .. عارف المشكلة فين .. ان الفقير عايز يقلد الغنى .. فتلاقية ما ياكلش ويستلف بس علشان يجيبلهه مثلا تليفون محمول مش علشان يكلم حد .. بس علشان يبقى واد روش وشايل المتشال
وكرر ده مع اى حاجة فى حياتنا
فهمتنى ؟؟
النظرية ان احنا بقينا بنستغنى عن الاساسيات ونرهق روحنا اكتر لارضاء حالة المظاهر
وفى الاخر بنلاقينا فعلا مش لاقيين ناكل ..بس عنده دش وموبايل
فهمت الفولة ؟؟؟؟؟؟؟؟؟
:)
ert3ashat:
عظمة يا ســــــــــت :)
Horas:
محمد باشا .. انت منورنى
انا سعيدة جدا بما ذكرته .. والحقيقة فعلا ان احنا تشوهت ثقافتنا وموروثتنا مع الايام .. زمان كانت الناس بتكتفى باحتياجتها الاسياسية اكل وشرب ولبس وماوى .. وتسال الناس عن حالها يقولك بمنتهى الرضا مستورة
اسال واحد دلوقتى دخله 20 الف جنية فى الشهر .. هيشتكيلك لاسبوع قدام من الغلا وارتفاع الاسعار والعيشة الضنك
ولعلمك هو مش بيغزى العين ولا حاجة .. هو فعلا تعبان لان رغباته وشهواته لا تنتهى
وقيس على كده حالة البسطاء
وذلك لان ثقافتنا دلوقتى اختذلت قيمة الانسان فيما يمكله وليس فيما يكونه
فهمتنى ؟؟ :)
وانا سعيدة جدا بهذا المشروع وسمعت كمان عن منتدى الخير الذى يرعاه رجال الاعمال .. يا مسههههههههل
Iskandrani:
استاذى الغالى
اتفق معك فيما ذكرت
وانا وضحت وجهة نظرى لمحمد .. مصر هى امى
للأسف احنا شعب كسلان وجاهل مش غلبان ولا مظلوم
الناس اللي عملوا البلاوي اللي بتتكلمي عليها وسرطنوا الأكل وغشوا اللبن وبيسرقونا دول كلهم مننا فينا .. للأسف الفساد سمة غالبة في الموظف الصغير قبل الكبير .. يعني موظف صغير مرتشي لما يترقى ويكبر تفتكري هيطلع أيه غير واحد من دول؟
خلاص عليه العوض
ويؤسفني أقولك اني مش من المتفائلين خالص وفي انتظار ثورة دموية علي غرار الثورة الفرنسية
كان نفسي أطلب شانوشت الفول بس للأسف الموضوع سد نفسي
تحياتي واعتزازي بقلمك الجميل .. ده بيك ولا فرنساوي؟
قاسم أفندى:
والله يا باشا الفساد فعلا منتشر فى كل مكان ... والمشكلة ان الرشاوى دى بقت كلها شئ عادي فى حياتنا اليومية والى بنمسميها تفتح دماغ وبقششة وكل سنة وانتوا طيبيين
اصل الناس فاهمة ان الرشوة يعنى شنطة سامسونايت سودة كبيرة ومليانة اساتك وفلوس
والثورة الدموية ما افتكرش ... ده احنا بقالنا 25 سنة بناخد على قفانا .. تفتكر الناس هتفوء دلوقتى وتقول أاى
صباح الفل
وبالنسبة للقلم .. ده قلم حبر اسود ماركة شاى العروسة
تحياتي ليكي يا بنوته وربنا يسعدك اوقاتك
علي فكرة انا منتظر البوست الجديد
:)))))))
وكمان الطلب الي طلبته وطنشتيه
لا مش ممكن انت حسبتيها ازاى؟؟
اعتقد انك نسيتى ان فيه الربع كمان تحت خط الحساب لانه ببساطة ما عندوش مكان ممكن نرجعله فيه علشان نعده
يبقى كدة بقينا ٧٥٪ من الشعب فاضل كدة ٢٥٪ راحوا فين؟
تعرفى هم فين
ببساطة برضة منهم ١٠٪ يعنى نقدر نقول عليهم هم اللى فى السجون ودول فى جميع الاحوال حالهم افضل بكتير من اى حد فينا على الاقل بيلاقى لقمة ونومة
كل سنه ونحن جميعا مبسوطين زى كل يوم
مساء الخير سيدتي العزيزة,
آأسف إني رديت عل "مصر هي أمي" في مدونة حضرتك فهذه ليست بعادتي أن أتداخل برأيي علي تعليق فهذا حق مُطلق لصاحب / لصاحبة المدونه
تحيات إسكندراني في بلاد الله الواسعة
بنوتة
معلش انا لسه شايف ردك عليا وبالصدفة شفت تعليق اسكندرانى لانى مش متعود ابص على الكومنتات التانية بتاعت اى بوست
المهم للاسف حضرتك مفهمتيش انا قصدى ايه بالكومنت او ممكن انا اكون موضحتش وجهة نظرى كويس
المهم انا مقولتش ان الفقرا حرامية ولا مرتشيين وارجعى للكومنت بتاعى وانتى تلاقينى كاتب ان فى فقرا ولسه شرفاء
انا فى الكومنت بتاعى عممتش السرقة على الفقرا بس لكن قلت ان احنا مشكلتنا التقليد ان الغنى عنده مثلا موبيل بكاميرا تلاقى واحد فقير امنية حياته يعمل المستحيل علشان يجيب زيه وبتكون حالته المادية مش متيسرة فيلجا للرشوة اللى احنا بنسميها يوميا اكرامية روحتى اى مصلحة حكومية روحى اى ادارة مرور روحى فى اى حتة هتلاقى اغبية السعاة والموظفين الصغيريين وبقول اغلبية مش بقول كلهم علشان محدش يطلع يقولى انت بتعمم هتلاقى الناس ديه معاهم موبيلات غالية جدا وتلاقيهم بيشكولك الحياة صعبة طب جبتوا فلوس الموبيل منيين تفتكرى لو واحد حياته صعبة هيدفع الفين ولا تلاتة فى جهاز موبيل هيستحرم يدفعهم
انا قلت ان مشكلتنا فى التقليد كل واحد عايز يعمل زى واحد تانى اغنى منه مع احترامى فى ناس مبقتش تفرق معاها مصدر دخلهم حلال ولا حرام كل اللى بياخدوا اكرامية بيعتبروها حلال لكن هى فى الاصل حرام
انا قلت احنا شعب بلا هوية الفقير بيحب يعمل زى الغنى
والغنى عايز يعمل زى الاغنى منه وهكذا ومحدش بيفكر ان تقليده ده بيخليه يسرق
وده والله ما هوا تعميم بس انتى لو بصيتى على اى احصائية هتلاقى مصر من اكتر دول العالم اللى الرشوة منتشرة فيها
سواء للغنى او للفقير
ارجوا انى اكون وضحت وجهة نظرى وانا اسف انى لسه شايف ردك على الكومنت بتاعى دلوقتى
horas:
انا متشكرة اوى لاهتمامك
وحضرتك تنورنا فى اى وقت
واذا كان على الطلب احنا ما طنشناش ولا حاجة
بس الطلب بيجهز فى البوفيه
Sokomonce:
انت عندك حق ,,, وده الى اكتشفته مؤخرا ان فيه طبقات من الناس ما بينا .. احنا مش شايفنهم خاااالص .. عارف ليه .. علشان احنا دايما بنبص للاعلى وعايزين نبقى زيه ومش بنبص ولا عايزين نعرف الاقل الى ليه حق علينا اكتر من نفسنا
Iskandrani:
يا فندم حضرتك ما تقولش كده .. دى مدونتك قبل ماتكون مدونتى .. وهى ساحة للحوار ومكفولة للجميع وبمنتهى الحرية والديموقراطية
بمناسبة الديموقراطية ... فين ساندوتشات الفول والطعمية والاربع شلينات :) ؟؟
مصر هى أمي:
اولا الف حمد الله على السلامة :)
ثانيا نبقى احنا كده متفقين ومش مختلفين .. وزى ما قلت لقاسم افندى ان الحاجات البسيطة الى احنا بنشوفها زى اكراميات وتفتيح مخ وتشغيل دماغ وكل سنة وانتوا طيبيبن بقت روتين فى حياتنا اليومية وهى كلها مظاهر من مظاهرالرشوة
ودى طبعا الى نقدر نقول عليها سبب من اسباب قلة البركة فى البيوت وكل البلاوى الى احنا بنشوفها فى حياتنا كل يوم
ودى حقيقة ومنتشرة جدا جدا بينا وماحدش يقدر ينكرها
والسبب الاول ان احنا بقينا شعب فقرى .. مش لاقى ياكل وبيحب المظاهر .. واصبح الحكم بينا على الأشخاص انت شايل عدة تليفون موديل كام ... ولا عندك فيديو ودش فى البيت ولا لا ؟؟ ولا ولا ولا .....
والى ضميره نزيه ومش بيرضى يرتشى .. تلاقيه بيشيل اللقمة من بقه ويحوش تمنها علشان يواكب كل ما يحدث حوله
احنا فعلا محتاجين نظرتنا لكل حاجة تتغير وكفايانا فساد بقى ,, والا نستاهل الى بيحصل فينا بجد
اعتذر جدا للاطالة ونورتنى
اعتذر جدا للاطالة .. وانت منورنى
هههههههههه
بجد انت تحفه
عموما انا حسيت كده برده لان الطلب مينفعش يتقدم الا لما يجهز ونتأكد انه جهز كويس
:))))))))))
عمرك ما ضاقت بلدُ بأهلها..ولكن بأحلام الرجال تضيق
Horas:
:))))))))
Van gogh:
عندك حق
100 100
ويا ريت احلامنا ليهم قيمة..
لكن للاسف كلوا فى الكلتش
عارف الكلتش :)
انا سعيدة جدا جدا بزيارتك
أخبار البوست الجديد
لو فية مشكلة في تعريف يعني اية مصر فأكيد علاشان احنا شعب عمرة طويل جداااا عشناة بالطول و العرض في كل القرون و الازمنة
ولو المشكلة احنا لية بقينا كدة فأكيد دة علاشان احنا كتيير جداااا والاكيد ان التفاحة المعطوبة مبهدلة بقيت القفص دا لو لسة عندنا تفاح.
ونظرية ان الاحسن هو الي بتحط على وش القفص مش مظبوطة و العكس هو الصحيح في مصر المحروسة
فكهاني بحب مصر
تحياتي
الفقر موجود في كل مكان... لكن اعتقد ان في مصر النسبة عادت للارتفاع مؤخرا بعد ان كانت بدأت تتراجع من سنوات ( حسب تقرير البنك الدولي ) .
و للعلم حوالي من 20 الي 30 شخص في مصر هم علي قمة هرم الاثرياء....
اللهم اغننا بحلالك عن حرامك و بطاعتك عن معصيتك و بفضلك عمن سواك.
تحياتي
احنا شعب غلبان
بس المفروض مش نبقى مستسلمين
و ببرضه نستاهل
تعرفي مقدرش ادخل يوم من غير ما امر عليكي
ادمان بعيد عنك
اتأخرتي يا رب تكوني بخير
Horas:
يا فندم انت منورننا
والبيت بيتك
مش بيت الى بالى بالك
:)
والتاخير غصبن عنى وسيتضح فى البوست الى جااى فى السكة
ان شاء الله
اسكندرانى فى الغربة:
ربنا يرجعك بالف سلامة يا باشا
وبعدين ايه التفاح ده ؟؟
ده دوا عندكوا بره فى الغربة ؟؟
:)
احنا اتغيرنا كتيير مش علشان احنا كتير .. طب ما الصين تلت سكان العالم
المشكلة مش فى ان احنا كتير المشكلة ان احنا مستهدفين ثقافيا وعقائديا
من سنين طويييلة
وهو ده الى خلانا فى الى احنا فيه
فاهمنى ؟؟؟؟؟؟
منورنى
الربان:
انا سعيدة فعلا بالزيارة الغالية
والحقيقة وبعيد عن الاحصائيات الى بتاكد كل يوم الفجوة العميقة الى بتحصل بين طبقات المجتمع المصري
احنا معايرنا ونظرتنا للامور هى الى بقت فقيرة وضحلة وسطحية
احنا عايزين ثورة فكرية وتربوية
يعنى من الاخر
عايزين نتربى من اول وجديد
Esmeralda:
اسمك جميل .. ؟ مش ده اسم كرتون
برضة ؟؟
:)
ما هى المأساة فى كده .. احنا فعلا شعب غلبان ولا نستاهل ..؟؟
Post a Comment