محمد الجميل .. وكراسى السفرة

محمد الجميل وكراسي السفرة

يوم النطق بالحبس والغرامة على مرتضى منصور فى القضية المعقودة ضده وذلك كما عرفت لاحقا, كنت فى المهندسين وفي طريق عودتى الى مقر عملي بالدقى, وانتظرت لاستقل تاكسي يرحمنى من حرارة جو الصيف

ووجدت ضالتي ووقف صاحب تاكسى ابن حلال ووافق على اصطحابي الى وجهتى وحينها دار بيننا هذا الحوار

هو (السائق): هما حكموا النهاردة على مرتضى منصور ؟؟

بنوتة: بصراحة مش عارفة, اشمعنا ؟

هو: اصل في قلبان ودوشة عند فيلا مرتضى منصور وعربيات امن مركزى وعسكر سادين الشارع, دول عسكر ما كانوش موجودين يوم الاستفتاء على تعديلات الدستور

بنوتة: والله ماعندي فكرة .. يمكن !!!

هو: والله هو يستاهل, الله يكون فى عون الزملاكاوية .. المهم حضرتك اهلاوية ولا زملاكاوية . هيهيهيهيييي !!!

بنوتة: يا سيدى وهى فارقة يعنى اهى اى بلطجة ودوشة وخلاص

هو: تعرفي حضرتك انا يوم التعديلات على الدستور كان فى زبون ركب معايا وسألته حضرتك مش هتروح تستفى علشان التعديلات على الدستور .. قالي ولا لو ما رحناش هتفرق معانا فى ايه يعنى .. ؟؟ طب وهو حضرتك عارف هما هيعدلوا ايه بالظيط وليه؟ اصلا اغلب المواد الى اتعدلت اتغير فيها حاجات اصلا مش هتفرق فى حاجة ... والناس مش فاهمة ؟ والغريبة بقى ان حضرت تلاقى فى الاخر ان الموافقة بالاجماع

بنوتة: مبتسمة, معلش ما هو احنا الى غلطانين علشان ما عرفناش صح

ومن هنا بدا الحوار يتجه شوية نحو الغلاء والاسعار وطبعا زى ما كلنا عارفين هو ده الحديث المعهود بين اى اتنين مصريين او غير مصريين عايزين يتكلموا فى السياسة , حيث اختذلنا السياسة والمفهومية كلها فى النظريات الاقتصادية والعيشة الكرب ووكسة العملة القوية


ومش عارفة ايه الى حصل اللهم اجعله خير ولقينا روحنا احنا الاتنين متفقين على ان الحكام فقدوا معنى وقيمة العملة الوطنية, واتفقنا برضة على ان مافيش حاكم دولة عربية شايل محفظة فى جيبة من اساسة واشترى اى حاجة فى اى حاجة عن ما لايقل عن 26 سنة مثلا .. يبقى لما يقولوا علاوة سنوية للموظفين 20 كاشو في السنة بحد اقصى 30 كاشو يبقى ساعتها نعذرهم وهما هيعرفوا منين الكاشو دلوقتى بقى بيتباع على الرصيف بكام ؟؟؟؟؟؟؟؟؟؟؟؟؟؟

(الكاشو = اسم عملة احدى الدول العربية)


ووجدت السائق سارح بخياله متخيلا يوم من ايام حياة رئيس احدى الدول العربية وكيف يقضيها وممكن يكون بيصرف فى ايه وشكل محفظتة دى ممكن تكون ايه .. ؟ وتكلم بمننتهى البساطة وكانة بيتكلم على يوم فى حياة عبد الهادي افندى جوز اختى


هو: فعلا, تخيلي حضرتك ان الرئيس ده مثلا يصحى من النوم علشان يلبس ويروح مكتبه ... اكيد مش هيروح يجيب العيش والفول الصبح علشان ساندوتشات الفطار ولا هيركب مواصلات علشان يدفع تمنها ولا هيدفع حتى تمن البنزين بتاع عربيتة, ده لو دخل اى بنزينة مين ده الى يقدر ياخد منه فلوس !!!! وبعد ما وصل المكتب هيشرب شاى او قهوة اكيد الواد بتاع البوفيه مش هياخد برضة تمن المشاريب ..؟؟؟ ده الواد كان يتشل لسانة قبل ما يقوله على تمنهم


وده مثلا لو عايز يخرج بليل يقابل صحابه ولا يروح مطعم بليل ولا حاجة, ده ممكن الواد الى على الكاشير ياخد تمن الطلبات ؟ ده يقوله تنقطع ايدى قبل ما اكتب على الكاشير تمن الحاجة


ولا لو عايز يقعد فى فندق ,ولا فى الصيف لو عايز يصيف, او يتعالج عند دكتور او فى مستشفى .. ممكن اى حد منهم هياخد تمن الفلوس ... يبقى عندك حق, الناس ده اكيد مش شايلة محفظة اصلاا ,, طب تفتكرى الرئيس ده شايل معاه بطاقة ؟؟؟ ده مين الى يقدر يقوله طلع بطاقتك وريهانى ؟؟!!!! لا لا اكيد برضة مش شايل بطاقة ولا رخصة عربية

طب سمعتى حضرتك عن جواز ابنه بيقوله ده قفل مدينة بحالها ورحل العاملين فيها علشان جواز ابنه, يا ترى مين الى هيدفع تمن الفرح هو ولا اهل العروسة ؟؟؟!!! ده اكيد جايبين بقى كل المطربيين والفنانيين الى فى الدنيا

بنوتة: ده اكييد طبعا, ومش بعيد الاكل جاى من بره كمان تفكتر ؟؟؟!!!!!!!!!!!!

هو (السواق ماهو مافيش غيره) : انا هاحكى لحضرتك على حكاية انا حمايا اسمه محمد الجميل وده راجل كان وحيد امه وعلى نياتة ومراته ماتت من زمان , انا بقى متجوز بنته الكبيرة ولما جيت اشتريت العفش بتاعى جبت سفرة تمن كراسى وكتبت القايمة بالسفرة ام تمن كراسى, لما اتقدم لاخت مراتى الصغيرة عريس وده اسمه الدكتور محمد, جه ساعة كتابة القايمة محمد الجميل قالى لازم تحضر يا احمد معايا, المهم ده كان قبل الفرح بيوم والدكتور محمد عديلي كان جايب سفرة ست كراسى ومحمد الجميل كان عايز يكتب فى القايمة ان السفرة تمن كراسى زى ما انا كتبت فى قايمتي وقفلت مع محمد الجميل الا ان السفرة لازم تتكتب فى القايمة تمن كراسى مع ان التانى شاريها 6 بس, فبعد خناق ومناهدة قلت للدكتور محمد يا عم اكتبها 8 كراسى وليك عليا يا عم لما تيجي تتطلق هديك كرسيين سفرة من بتاعتى مع قسيمة الطلاق .. هيهيهيهيهيهيهيهيهييييي

هو: تفتكرى حضرتك الرئيس ده هيكتب كام كرسي سفرة فى القايمة .. اكيد مش اقل من 24 او 36 .......؟؟؟؟؟؟

بنوتة: كراسي سفرة مين بقى اكيد هيكتبلها فى القايمة (كوشكا) مثلا,
(كوشكا = اسم مدينة فى هذا البلد العربي)

هو: هيهيهيهيهيهي, على رايك صحيح .. ده يكتبلها الجردلة ولا الشويخ باسمها, ماهى تحتار مدن سياحية بقى وعلى البحر علشان الحر.
(الجردلة والشويخ = مدن ساحليةسياحية فى هذه الدولة العربية)

بنوتة: وماله يا سيدى .. تنقى وتختار مش حاجتها وهى حرة فيها

هو: مش تقوليلي محمد الجميل الى كان هيطلق بنته علشان كرسيين سفرة ...

حضرتك قلتى نازلة معايا قسم الدقى برضة
مش كده ؟؟؟!!!!!!!!!!!!!!!!!!!!!!!!!