الغش والغلا
الأكل والشرب فى إيد اللومنجية
والطماعين اللى غلوا الملح والمية
والغشاشين اللى فاقو ع الحرامية
الشاى بالمفتشر مخلوط ملوخية
والبن فيه الشعير تسعين فى المية
والعيش برمله وطينه يا مناخليه
واللحم معروض بدون أختام رسمية
والمية هى اللبن ولا اللبن هيه
افاعى متسيبه من غير رفاعية
ودنيا مترتبة ترتيب فلاتيه
"بيرم التونسى - 1976"
-------------------------------------------------------------
فييييينك يا بيرم تشوف الى جرا .. ؟؟؟
ده الى جرى لا ينشاف ولا ينقرا
الشاى خلطوه بنشارة الخشب
والشعير بقى اغلى من البن
العيش يا ريته كان برمله
ده الى يشوفه ما يقولش ده طالع من فرن
اللحمة ربنا حماها بالقلاعية
وحصلتها بالزكام كل الفراخ والبط
واللبن يا ريته كان ميه .. ده خلطوه بالزفت و الاسفلت
والافاعى هى الافاعى ومتسيبه زى ما هى
ما قدرش عليهم ولا حتى مغاربة الرفاعية
انا بنوتة ... 2007
34 comments:
هو الشاي يبقى شاي من غير نشارة خشب
و لا اللحمة تتاكل من غير امراض
و الانفلونزا بتاعه الفراخ بتضيع مع الغايان
احنا احسن بكتير من غيرنا
باين عليكي مش عارفة كيلو النشارة بكام
بالهنا و الشفا
من الاخر
اسم على مسمى
كلام خلاصة
تسلم ايدك
حلوة اوي
بعد السلام عليكم
وحياتك أنتي العيش مبقاش برمله بس ، ده برمله و زلطه و أسمنته
وفاضل بس الحديد المسلح عشان يبقي الواحد بدل ما يأكل رغيفين يبقي بياكله أودتين ، دورين ، عمارتين
علي رأيك فينك ياعم بيرم دلوقتي تشوف التجديدات
تحياتي
وكل سنةوأنتي طيبة
كل الحاجات اللى قولتيها مظبوطة
بس زودها على حاجه
انهم رفعوا سعرها
يمكن علشان فى اضافات يبقا لازم السعر يترفع
يلا أهي دنيا هنعيشها هنعيشها
وربنا الحافظ
كل سنة وحضرتك طيبة
Mohamed Sobhy:
هو فعلا ده الى فاتنى .. يا ترى النشارة بكام .. والنشارة درجة اولى ولا النشارة هى كمان فيها عفريت ؟
انا اساسا مش بشرب شاى :)
منورنى ورمضان كريم
ihapoof:
الله يهنييك يا خويا ... وشايلالك رغيفين واحد لحمة والتانية فراخ وغير كوباية الشاى على النار
مستنينك على الفطار
غمض عينيك:
الله يكرمك ويبارك فيك .. وزيارتك احلى
abo salah:
وعليكم السلام ورحمة الله وبركاته
ايوا يا فندم ما هى دى سياسة التسليح
... ويجعله عامر
وانت طيب وبالف صحة وسلامة
Desert Cat:
قطقوطة ... يعنى انتى عايزة تشربي نشارة وتاكلى رمل وزفت واسفلت من غير ما سعرهم يرتفع .. ؟؟؟
انت تعرفى شكارة الرمل ولا الاسمنت بكام دلوقتى .؟؟
ومش بعيد فى يوم نقرا فى الجرايد ان وزارة الاسكان بتدعم رغيف العيش :)
الأستاذ:
وحضرتك طيب يا فندم و بالف سلامة .. وفى الاخر اهى دنيا .. وتعددت الاسباب والموت واحدون
منورنى بزيارتك الغالية
تحياتى والله اكرم
لو بتحبي علي الحجار هاتعرفي الكلمات دي، ولو كنتي بتحبي سيد حجاب أكيد أكيد أكيييد هاتعرفيها
يا مصري ليه دنياك لخابيط و الغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفاياك تبليط
صعبة الحياة والحل بسيط ... حبة تخطيط
فتحت باب استيرادك
وصرفت فوق ضعف إيرادك
حِلي للخواجة استكرادك
سابك بتقرا في أورادك
وده قشّطك ونزل تشفيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
وليه بترشي وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
سهل وساهي وغبي وعبيط
يا مصري ليه دنياك لخابيط و الغلب محيط
و العنكبوت عشش ع الحيط و سرح ع الغيط
يا مصري يا للي الغلا عاصرك
والنهب في عصرك حاصدك
قوم للحياة واسبق عصرك
ولا حاجة هترجع مصرك
إلا ان تكون شغال ونشيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفياك تبليط
صعبة الحياة والحل بسيط ... حبة تخطيط
دي كلمات أغنية غناها علي الحجار في ألبوم تجيش نعيش في التسعينات من القرن الماضي.. ركزي كدة في كلمات القصيدة (الأغنية) وشوفي الكلمات اللي كانت حديث المثقفين في وقتها ..
لما أصحى..هاكتب تعليق أحسن
كل سنة وانت أطيب
والمعلقين بخير
ههههههه..البوست دمه خفيف مع ان الموضوع يغم
سعدت جدا بالزيارة
عزيزى محمد:
اشكرك لتذكيري بهذه الاغنية
انا فعلا بحبها جدا وحافظاها
وكرهت العنكبوت منها
منورى يا فندم بزيارتك الدائمة وتعليقك الكريم
Human:
اشكرك كثيراا على الزيارة الكريمة
والتى اتكنى ان تتكرر دوما
تحياتى
ورمضان كريم
بس الشعب المصري
زي الفل
ما فيش حاجة تاثر فيه
ربنا يستر علينا
رد من الرئيس
بعد ما قراء مدونتك قال
أكل هذا حداث فى بلدى ؟ احرق الله جسدى
شكرا لك ع تنبيهك بصدق يا ولدى
سترى الخير غدا
( منقول من الشاعر احمد مطر )
شكرا ع تشريفك مدونتى المتواضعه و ارجو ان نتواصل بس انت منين من الدلتا ؟
اسف انتى من وسط البلد انا قرائتها من وسط الدلتا
اصلى الدلتا
el_assel:
طبعا يا فندم .. احنا من يوم ما اتخلقنا واحنا فى الغلب ده
احنا شعب نفرم الزلط ولموؤاخذة
منورنى بزيارتك الغالية يا فندم
محمد مارو:
العفو يا فندم واشكرك على ابيات سعادة الرئيس
وانا من وسط البلد الحمد لله .. بس مؤخرا بقت لينا صلة بالمنصورة :)
تحياااتى
مساء الخير عليك يابنت نص البلد والكلام الخلاصة
والله أنا متابع لمعظم المدونات في حدود الوقت المُتاح وبمجرد ما يكون عندي وقت كافي راح أعدي أشرب كازوزة (ما أشربش الشاي أنا؛ أشرب كازوزة) علشان النِشارة بتسبب القرحه في القفا وصوابع القدمين وده الدكتووووووووور مانعه علشان مافيش منه في التأميل(ل)يابُنيه ليييييييه الصحي؟؟ (قصدي التأمين الصحي) .....أنا شربت حشيش يا سعاد..الحقيني يا صفيه بشوية ميه
تحيات إسكندراني في بلاد الله الواسعة
الحمد لله ان لسه فيه ناس معاها تشترى الشاى وللا البن وللا اللحمة وللا اللبن
والله فيه ناس بتموت من الجوع
وفيه ناس بتموت من الهم
وفيه ناس بتموت من اليأس
معلش لغلاسة التعليق , بس حابب أوضح انه من الناحية العملية احنا نازلين من اعلى منحدر جامد أوى وبأقصى سرعة
وخلال فترة مش بعيدة , الناس ممكن تاكل بعضها , عشان تعيش .
الله المستعان
كل سنة وانتم طيبين
الكلام اللي كتبتيه إنتي وبيرم التونسي ده قصدك بيه مين؟ وبيحصل في أي بلد ده؟
إوعي تكوني بتقصدي مصر وبتشوهي صورتها بمعلومات مغلوطة؟
Iskandrani:
سيدى الغالى الى دايما بيوحشنا كده
لو مش عايز شاى فى سحلب وقرفة ؟؟
وممكن نوصى على طبق كشرى من على الناصية
نورنا بس والحشيش وكوباية المية جاهزيين
بس على الله الحشيش ما يكونش مغشوش هو راخر ومحطوط مكانه ملووووووخية
:)
تحييياتى من بلاد الله الجوانية
البرديـــــة:
يا سمسم .. حضرتك منورنا فى مدونتنا المتواضعة
واذا كان على الناس بتاكل بعضها .. فا احنا بناكل فى بعضنا فعلاا واحنا بننحدر من فوق اعلى قمة الجبل الى انت حكيت عليه
بس اكيد في امل .. مع انى شايفة ان ما حدش بيموت من الجوع ..
كله بيموت من السرطان
ربنا يرجمنا من عنده
وانت طيب بالف صحة وسلامة
يا مراكبي:
يا اهلا يا اهلا يا فندم
الى انت اتكلمت عنه انا وبيرم ده عندك هناك مكان ما انت قاعد
شوفلكوا واسطة بقى علشان تعرفوا تشربوا كوباية الشاى
وبالشفا يا فندم
واستحالة اشوهه صورة مصر حبيتشى ام الدنيا
هو اصلا فيه صورة ؟؟؟؟؟؟؟
اه يا بلد..
بيسو:
اه يا قلبـــــي .. للمطرب الشعبي حكيم
:)
وحشتيينى ومنورانى
تحياتى
انا لا هفتى ولا هتكلم انا هسيب احمد فؤاد نجم يقول رايه وكفايه رايه
سيدي الرئيس
في عيد ميلادك الكام وسبعين
كل سنة وأنت طيب
واحنا مش طيبين
كل سنة وأنت حاكم
واحنا محكومين
واحنا مظلومين
واحنا متهانين
ويا ترى يا حبيب الملايين
فاكرنا ولا احنا خلاص منسيين
فاكر المعتقلين
فاكر الجعانين
فاكر المشردين
فاكر اللي ماتو محروقين
فاكر الغرقانين
الله يكون في عونك - هاتفتكر مين وللا مين
في عيد ميلادك الكام وسبعين
بقول لك كلمتين
الأوله
شيلتنا طين
وهل تعلم أن النيل بقى رشاح
والجو أصبح بيئة والعيشة ولعة
والشرفا قلوبهم عالبلد والعة
وانت عاملهم مذبحة ولا بتاعة القلعة
والاقتصاد سداح
والسرقة بقت كفاح
ومصر متاحة بس للسياح
وعرض البلد بقى مستباح
والتانية
ورتنا الويل
دا الخطوة في عهدك بقت ميل
والضحك بقى نواح وعويل
والكوسة
عارف الكوسة
ممكن أقولك فيها موواويل
والجامعة بقت يا إما كباريه أو دار مسنين
والشباب معظمهم من غير خمرة سكرانين
والعلم عز على المتعلمين
والأساتذة بقم دجالين
والقادة بقم طبالين
واديني في الهايف يا حبيب الملايين
والتالتة
عارف اليابانيين
زمان في سنة اتنين وخمسين
كان عندنا تروماي وكان عندنا علم ومتعلمين
وثقافة ومثقفين
وأدبا وعلما وفنانين
وكانو اليابانيين
بالنووي لسة مضروبين
وللصدقة مستحقين
دلوقتي إحنا فين وهما فين
هما فوق واحنا في أسفل سافلين
والرابعة
أمن البلد بقى تنين
والمحاكم اتملت مظالم
والعدالة بقت كمالة
وكلمة الحق في الزبالة
وأصحابها في الزنازين
والخامسة
القطاع العام…. عام
والفساد…. ساد
وفي جتة بلدنا بيرعى
أفتكر لجنابك إيه وللا إيه
وكل ذكرى ليك بدمعة
آآآآآآآآه آآآآآآآآه
أنا كنت حالف ميت يمين
أكملهم لك تمنية وسبعين
بس هاكفيهم ورق منين
وكل سنة وأنت
واحنا طيبين
Alaa Mahmoud:
اهلا بيك يا بشمهندس .. نورتنا وشرفتنا يا فندم
واشكرك على هذا الاهداء الغالي
وما نجيلكش فى حاجة وحشة يا خويا
وكل سنة وانت طيب
واحنا طيبين
والبعدا بعيد عنك مخفيين
تحياتى
ايه ده انا معرفش انك موهوبة كده!!!!!
حلوة قوى بجد
كل سنة و انت طيبة
Paky:
وانتى طيبة يا حبيبتى وبالف صحة وسلامة
ويا بنتى بمنتهى التواضع ومن غير تناكة .. دى اقل حاجة عندى :)
نوررانى حبيبتى وعيد سعيد يا رب ان شاء الله
طيب ايه الغريب فى كده بجد كلامك حلو قوى
رئيس جمهورية نفسك
:)
بجد سعيدة جدا بزيارتك الغالية
منورنى يا فندم
وكل سنة وانت طيب
أولا كل سنة وانت طيبة
وثانيا
احترمتك جدا ..لاني بأحب بيرم قوي ،
وبأحترم كل من يحترم بيرم
وثالثا
حسبنا الله ونعم الوكيل
تحياتي يا بنوتة
اكتب بالرصاص:
اولا وثانيا وثالثا:
زيارتك الغالية علينا يا فندم تزيدنا شرف وسعادة
وحضرتك طيب وبالصحة والسلامة
واللهــــــــــم أمين
أنا دخلت المدونة دى من فترة كبيرة
وطبعا عجبتنى
وحطيت لنك عندى ليكى
بس للأسف كنت مشغول أوى الفترة اللى فاتت
بس بجد مدونة هايلة
وموضوع هايل
وكمان موضوع التاج
ردك جميل حقيقى وروحك حلوة أوى
تحياتى ليكى والمدونة
وعادى بقة
أودى
ody:
انا سعيدة جدا بزيارتك الغالية ومرورك الدائم علينا
وربنا ما يقطعها عادة يا اخويا يا رب ان شاء الله
انا متشكرة اوى لذوقك
تحياتى الغير عادية
اصل هو مش عادى بقى
:)
و الله اما انكم مساكين
من امتى كان الشاى ياربى مشكلة
و لا الزبالة و التعابين
انا شاب متخرج بقاله كام سنة
حتى ما فاكر بس بستنى فى يوم تعيين
مع ان باين انى زايد عن حاجة البلد
اما اللى بالك بالك
فمش زايدين
..
ماليش فى العامية بصراحة
بس اهداء لبنوتة وسط البلد
مع ان مشاركتى رقم واحد
وتلاتين
:D
Rain man:
اهلين ومرحبتين يا جاييين
شرفتوا القاعدين والموجودين
ودايما بينا كده منورين
ولا تكونوا عننا غايبين
وتكون مشاركتك من اول عشرين
:)
تحييياتى وانا سعيدة جدا بتعليقك
ودايما ختامها مسك وفطير ومنين :))
كلام خلاصة كلام جميل ... تحياتى
Salolo:
انا متشكرة اوى يا فندم
وكفاية علينا زيارتك الغالية
تحيياتى ونتمنى ان نراك دائما
Post a Comment