مئوية اسم النبي حارسها .... جامعة القاهرة

مئوية اسم النبى حارسها - جامعة القاهرة

تحتفل جامعة القاهرة اليومين دول بالمئوية .. يعنى ان مر على انشائها 100 سنة بالصلاة على النبي ... من سنة 1908 لسنة 2008

وطبعا لا يخفى على احد اليفط والاعلانات والتهانى الى مغرقة ابواب كليات جامعة القاهرة من اول كلية الهندسة لحد كليه الزراعة

طبعا هو حدث عظيم .. 100 سنة برضة دول مش شوية .. وهو الواحد يعنى عمره فيه كام 100 سنة علشان يحضر احتفاليه زى دى .. بس طبعا خطر على بالى خواطر كتيير جدااا وانا اعايش هذا الاحتفال الكبير

من اهمها سؤال فرض نفسه وهو يا ترى جامعة القاهرة والقائمين على جامعة القاهرة .. بيحتفلوا باية بالظبط بعد مرور 100 عام ... ؟؟ هل مجرد مرور 100 عام على انشاء مبانى وقبة وساعة ومدرجات الجامعة يستحق هذه الاحتفالية .. ؟؟؟ ام هناك انجازات اخرى تدخل فى هذه الاحتفالية ... ؟؟

وطبعا تبادر لذهنى فى الاول ان صاحبه هذه الإحتفالية هى وزارة الثقافة .. او الهئية العليا للاثار ... وذلك لمرور 100 عام على مبانى الجامعة وبالتالى تدخل فى عهده هيئة الاثار وانها ممكن تكون مزار سياحي ... متناسيين ان فى حاجات تانية برضة المفروض تتكهن وتدخل فى عهده قطاع المتاحف باعتبارها تحف (وذلك طبعا مع كامل احترامى للدكاترة والعمداء ورؤساء اقسام الكليات)

لكن بعد كده اكتشفت ان الفيلم ده طلع يخص وزارة التعليم العالي (ولا اعلم حتى الان لاى موصوف تنتسب الصفة (عالى) ؟؟

ومن هنا تبدا الوكسة التقيلة ... موجهه كلامى لما تسمى بجامعة القاهرة ووزارة التعليم المقبول .. لانها ما حصلتش تكون مرتفع حتى... يا ترى يا هل ترى .. ايه بقى تحديدا الى بنحتفل بيه بعد 100 سنة تعليم جامعي ؟؟

هل نحتفل بكم الانجازات العلمية والبحثية الى اكتشفتها و حققتها الجامعة فى اخر 50 سنة وتقدمنا بيها ما بين الدول الاوروبية والامريكية ولا حتى الصومالية ؟؟؟

هل نحتفل بكم الكوادر العلمية الى اتخرجوا من الجامعة وتبنتهم علميا وثقافيا ومعرفيا ... وافادوا البلد فى اخر 40 سنة وصدرنا خبراتهم واكتشافتهم للدول الأجنبية والعربية والرواندوتشيكية ؟؟؟

هل بنحتفل بكم الاكتشافات والابحاث الى تبنتها الجامعة وصرفت عليها واستثمرتها فى اخر 30 سنة واشتريتها اى دولة افريقية حتى .. ؟؟؟

هل بنحتفل بالترتيب العالمي الفائق الى حصلت عليه الجامعة ما بين جامعات العالم الى ما حصلوش يمكن ربع عمرها وتصدرنا بيه قائمة احسن جامعة فى العالم ؟؟؟ ... وهنا تذكرت التلميذ الخايب الى كان ممكن يكون الاول لولا وجود الاخريين ؟؟؟

هل بنحتفل فى المئوية بامتلاك احدث المعامل والمختبارات والاجهزة الطبية والعلمية ومراكز التدريب ومراكز البحوث التى تستقبل الوفود من الباحثين والطلاب للعلم والتعلم ؟؟ (وفود الطلاب من نجع حمادى .. علشان بس ماحدش يفهمنا غلط)

يا ترى الجامعة بتحتفل فى مئويتها بانها خرجت كام جاهل من حملة البكالريوس والليسانس الى بيكتبوا اساميهم بالعافيه والى مناظرهم واشكالهم لا تصلح غير للعرض فى فاترينه متر x متر على رصيف الازبكية ؟؟

يا ترى الجامعة بتحتفل بكام عاطل تخرج منها ولسه قاعدين على القهاوى واقصى طموح اى حد فيهم انه بشتريله توك توك ولا كشك سجاير ولا يشتغل باليومية مع سواق ميكروباص .. ولا يروح يركبله القطر ويبقى كسيب .. واهله داعينله ان القطر ما يولعش بيه ولا يتقلب فى اول مزلقان

يا ترى الجامعة بتحتفل بالانجازات العظيمة الى حققتها فى المستوى التعليمي الراقي للطلاب وتكافؤ الفرص بين المتفوقين (من ابناء الدكاترة بس طبعا) فى الحصول على مصطبة فى هيئة التدريس ؟؟

ولا الجامعة بتحتفل بالمراجع والكتب العلمية لجهابذة الدكاترة فى الكليات ... الى بتتباع فى مكتبات شارع بين السرايات .. والى لما الطالب بيشتريها بيعلموا على اسمه .. والقائمة تروح للدكتور علشان يبقى معروف مبدئيا مين ناجح ومين ساقط فى المادة قبل حتى ما يكتب اسمه فى ورق الامتحان ... ؟؟؟

ولا يمكن بتحتفل بعدد الاكشاك والموزعين الهائل لسجاير البانجو ولفائف الحشيش داخل الحرم الجامعي .. وما خفى كان اعظم ... ؟؟؟

يا ترى فى 2008 جامعة القاهرة بتحتفل بايه ولا ايه .. ؟؟
بالتقدم الهايل الى حصل فى ال100 سنة الى فاتوا .. ؟؟؟
فى الطلبة بتوع زمان والطلبة بتوع دلوقتى .. ؟؟
فى الدكاترة بتوع زمان وبتوع دلوقتى ... ؟؟؟
فى مناهج زمان ومناهج دلوقتى .. ؟؟؟
فى خريجين زمان وخريجين دلوقتى .. ؟؟؟

يا اختى ادارى على جمب ...
وغطى على خيبتك التقيلة ... واتلمي هنا جنب الحيط
هى طالباها جوراس وفضايح
ما احنا عارفين الى فيها و لفينوا سوا
(الكلام هنا موجهه لبنت اختى)