من غير كلام ولا سلام ...
اسراء رمز الحرية ... باعت القضية
طبعا البونية لازم تبيع القضية وتبيع الى خلفوها كمان .. وتطلع فى كل الدنيا وقصاد التخين تقول انها كانت بتتعامل احسن معاملة وان ما حدش لمس طرطوفة من جزمتها...
ووجههت الشكر للواء فلان والعميد علان والمامور ترتان ..
كما وجهت الشكر لماما مش عارفة مين والست منين والدكتورة عين .. الى كانوا مشرفيين معاها فى التخشيبة ريزورت Resort
طبعا انا شخصيا لو مكانها هعمل كده وزيادة .. مش بعيد اجيب جزمة البيه الباشا اللواء الوزير ونبوسها ادام الشاشة
وتقدم الشكر للوزير كمان ورئيس الحي على الاستضافة والاقامة الرائعة التى قضت فيها النزهة الاستجمامية بعيد عن النت والشات والفيس بووك والياهو والـICQ ودياولوا فى قرية لومان طرة ولا منتجع القناطر السياحي
البت اتخطفت فى يوم وليله
وراحت اتنفخت وطلع عين الى خلفوها
وشافت العين الحمرا وابو رجل مسلوخة وام سحلول
وفى الاخر غصبن عن عين الى جابوها
لازم تنادى
فالتحيا الديموقراطية ... ولتحيا الحرية ... ولتحيا النزاهة والشفافية
وليسقط الانترنت ... وليسقط الفيس بووك
وليسقط الاستقلال
وانا من موقعى هذا
انقل كامل تقديري واحترامى
لكل من ساند اسراء من اللواءات ومامورى السجن وحتى نزلاء التخشيبة
الى ارجعوها الى رشدها والى صوابها
وصصحوا اى مفهوم خاطئ لديها عن الحرية والتعبير عن الراي
وهو فى حد ذاته كفر وفسوق عن فروض الولاء والطاعة
والاهى يحرق اى حد بيطلع اشاعات مغرضة
ولا بيحرض على اضراب ولا بينادى باعتصام حتى لو كان للصم والبكم
انا لا اقصد باى شكل من الاشكال اطلاقا مطلقا انعدام الوطنية عند اى حد فينا ... ولا لان
نسكت عن المنادة بالحرية .. ولا عن التصدى للفساد ...
نسكت عن المنادة بالحرية .. ولا عن التصدى للفساد ...
بس طول ما انا اشجب واندد واشتم سلسفين الى مطلعين عنيينا
وانا تحت البطانية ... ولا وانا مأنتخة قصاد التليفزيون ... ولا مع احلى دماغ متسلطنة على القهوة
وانا احب الحرية
واحب امشى فى شواريعها واشرب من نيلها
واموت فى تراب مجاريها
لكن اقرب من مظاهرة .. ولا اعرض نفسى للضرب والاهانة .. ولا انام لنص ساعة على البورش .. طبعا فكرة اى حاجة زى كده فى ثقافة اى حد فينا ...
اروع من ما يحدث فى سجن ابو غريب ولا جوانتناموا
ويكون اى منا على استعداد لبيع اهله كلهم من اول قلم
وطبعا ضربوا المربوط .. فخاف اسمه ايه ده البعيد .. السايب
فلتحيا سياسة الحرية ...
فلتحيا صفحات الانترنت الى عملت من كل واحد فينا مصطفى كامل واحمد عرابي وسعد زغلول
فليحيا العيش المدعوم ومش موجود ..
فلتحيا الكهرباء والمياه المقطوعة
فلتحيا المواصلات
ولتحيا الاجور والمرتبات
ولتحيا وزارة الصحة والمستشفيات
فلتحيا الساقية والطاحونة والجاموسة والحمار
وفليحيا حسن شحاتة والمنتخب الوطنى
وليعيش ابو تريكة
ومنك لله يا حضري
31 comments:
سمحوها يا سيدنا سمحوها....حي
de misr de om el donia , w e7na bn7b el rys w wzir el da7'lya w el beh el m3mor w basha el lwaa w Israa brdo w kol el nas ,, :D
bs el 7dry daa ebn 60X70 , w 7'lyy syon ynf3oo :P
معلش يعني مع احترامي للجميع
مين اللى قال ان اسراء رمز وطني ولا رمز الحرية والكلام ده كله
اللى عملها رمز هو اللى خدع الناس وضحك عليهم
لااعتقد انها كانت تسعى وراء زعامة ولا تقصد ان تصبح مجاهدة وطنية ولا كل الخزعبلات دي
كل مافي الامر انها عملت الجروب واتفاجأت هي واصحابها بانضمام الاف وتصوروا انهم ح يغيروا وجه مصر
وباقي الكلام الفارغ ده
من امتى وجه مصر ممكن يتغير وحاله يتحسن من وراء الشاشات؟؟
المسالة اعقد بكتير من حكاية اسراء وغيرها
الكبار باعوا القضية بداية من الاحزاب التي اعلنت تنصلها من الاضراب وكل حسب الصفقة التي عقدها مع الحكومة
ماذا تنتظروا من بنت لم تكن اصلا تنوي عمل هالة حول نفسها ولا حتى قيادة تنظيم ولا تبحث عن زعامة
الحكاية ومافيها ان الغالبية تحب ان تخوض معارك بالوكالة
يعني اغلب من عمل من اسراء رمز ونصبها زعيمة للفيس بوك ورئيسة اول حكومة الكترونية وباقي اللى سمعناه ده كله كلهم كانوا مختفيين خلف شاشاتهم وهي بين انياب الذئاب وهي تلك الفتاة اليتيمة التي اقتحمت قوات الامن مقهى في مدينة نصر لتسحبها منها
تصوري مدى الرعب والفزع الذي تعرضت له
ولا نعرف على وجه الدقة كمية التهديد التي تعرضت لها
ناهيكي عن تصورات الناس حول ماحدث لها حتى وصل الامر بالبعض على موقع مصراوي بالتعليق على اخبارها أن قال احد المعلقين انها تعرضت للاغتصاب
يعني حتى بفرض انها لم يحدث لها كل هذا فالناس تكفلت بنسج سيناريوهات تبين المصير المنتظر لها
الا تتوقعي ان يقوم النظام بتلفيق تهمة اخلاقية لها كما فعلوا مع زوجة عبد العزيز مخيون لتحطيمه معنويا؟؟
كل شيئ وارد
علينا ان نلتمس لها الاعذار ولا نلقي بها في اسفل سافلين كما رفعنا في السموات العلا
لم يكن ذنبها ان الجميع صنع منها رمزا يحارب بالنيابة عنا ونحن في بيوتنا وبين اهلنا
من يريد ان يناضل فمفروض ان عنده مبادي لاتتزحزح اذا باعت اسراء القضية او حتى الف اسراء
اليس كذلك؟؟
ومن يهزه تغيير اسراء لرايها فهذا يعني انه لم يكن مقتنعا بما كان يفعل او كان كالعادة ينتظر ان يتحرر الوطن ولكن بجهود الآخرين
Ahmed Refaat:
دستوور يا اسيادنا دستوور
انا بعت اجيب البخور
Enass:
هو المشكلة يا بنتى فى الحضرى اساسا من الاول .. وبعدين الى يجيي على الاهلى ما يكسبش حتى لو راح اى سى ميلان :)
Bella:
عزيزى
دعنى انحنى احتراما لما ذكرت
فقد اكملت الصورة والتى ما دومما اتركها لتكتمل بتعليقات قرائى الاجلاء
لقد صنعوا من اسراء بطله وكله متخفى وراء الشاشات ومانتخ فى البيوت
ولتكتمل صورة البطولة لابد من نسجها بالقصص الخيالية عن التعذيب والاغتصاب والارهاب مثل ما شبهت فى موضوعى بسجن ابو غريب او حونتناموا
وفى الاخر كله قاعد فى بيته وفى ايده مج النسكافيه ومانتخ على الكنبة
وارجوا الا يكون فهم من موضوعى التشفى من اسراء ولا لومها على انها باعت القضية وخذلتنا
الى خذلنا الى رسموا حواليها الصورة للمتاجرة بفساد النظام حتى لو كان على حساب اسراء نفسها
تحياتى وانا فعلا تشرفت بالزيارة الكريمة
اسراء بنت عادية جدا كل ما في الموضوع انهم لقوها كدة وبمحض الصدفة تنفع علشان يطبقوا عليها المثل اياه ده الي هو اضرب المربوط يخاف السايب الي هو باقي النلس يعني خصوصا العيال ولاد الناس الطيبين بتوع الفيس بوك دول والاوشاعات المغرضة
يلا ربنا ينتقم مننا ياشيخة
ياريتهم ضربوا المربوط
ده مجرد انتظارها للضرب والأهانه والبهدله لتى لم تأتى موتها من الرعب
بجد الله يكون فى عونها
طبعا دا رد فعل طبيعي للي حصلها محدش يتيخيل اد اية بنت تتسجن وتعقتل وتشاف ايام خروب بجد ربنا يكون في عونها دي ممكن تدخل محصة نفسية تتعالج من الصدمة دي
موضوعك جميل اوي تسلم ايديكي
وأنا من موقعي هنا كواحد من السايبين ومش عايز في يوم أكون مربوط بأحيي المسؤلين على المعاملة الرائعة اللي إتعاملتها إسراء
أي خدمة
بيسو:
اهوا انتى جبتى الى فيها .. هيقولك بقى يسيبوا البونية وهى بقت رمز شعبي وخصوصا بعد ما اتعكشت .. فقالك وقفوها ادام التليفزيون وقدام الناس تبوس رجل ابو سحلول وتشكره ... فاالى فاكر نفسه بورم بقى ولا عاملى فيها عرابي .. يدخل فى العشة جمب الكتاكيت الى بتنام بدرى
يا شيخة الاهى نولع ببنزبن من ابو 2جنية ونص .. واهوا يبقى موت وخراب ديار :)
محمد عبد الغفار:
ويكون فى عونا جميعا يا فندم .. انا شخصيا قبل كل بوست بودع العيلة والعيال واوصيهم على ابووهم من بعدى
بس فعلا طول ما انا فى السليم وانا احب عيشة الحرية
بنات صاحبة الجلالة:
منورنى يا بنات .. وانا معاكوا الله يكون فى عونها .. ونعذر اى حد يكون فى مكانها .. وما يكتبه علينا يا رب فى يوم من الايام
الدور والباقى على الى عاملين عنتر .. ومن اول سلام ميري .. وانتى عارفة الباقى بقى :)
منوارنى
يا مراكبي:
ايوا يا اخويا .. ما انت من السايبيين والى ليكوا ضهر كمان .. انا مش ناسية صاحبنا بتاع امن الدولة .. بس ما تخافش .. انا شايلاكوا انتوا الاتنين لوقت العوزة
وربنا يكفيكوا شر الحوجة يا اخويا
منورنى يا مراكبي :)
...وتطلع فى كل الدنيا وقصاد التخين
----
بتجيبي سيرة التخين ليه دلوقتي؟؟؟
وكتاب الله ماعرفها ولا شفتها
بريء يا خواننا والله برييييييء
----
المشكله مش في اسراء لوحدها على فكره
المشكله فينا احنا كمان
احنا بندور على رمز
بندور على علي الزيبق اللي شحور سنقر الكلبي
مع ان الكلبي كان بعد كل مهموز من الزيبق ينزل يفلقط الشعب ويفرض عليه ضرايب جديده
لكن الشعب برضه كان بيدفعها بايد .. ويسقف للزيبق بالايدين مع بعض
او بيسقف عن طريق اللطم عالخدود
----
دلوقتي بقى وبعد آخر مهموز خدنا من الكلبي
هل هنستنى الزيبق .. ولا هنبقى كلنا الزيبق
؟؟؟؟؟
سلاموووووووووووز
Soooo:
منورنى بزيارتك يا غالي
جميل اوى تشبيهك بعلى الزيبق
النظرية ان احنا كلنا بقينا فى الهوا والسوا ... واذا طلع فينا زيبق يباخد المهموز التمام وقصاد التخين برضة وعيني عينك
والكلبي بقى ورجالته متخصصين فى المهاميز وقبل ما تفوق من المهموز الاولانى تكون لطشت فى التانى
اوووووف بقى
سيبك انت من مدينة الانتاج الاعلامى
انت منورنى يا باشا
:)
البت شكلها مش حمل تعب برضه
شكلها بس كوتة
Anonymous:
لعلمك بقى لو ما كنش الحضرى راح
سيون من الاول
كان زمان الاهلي بقى غير كده خالص
والاهلى هيفضل الاهلي والكبير هيفضل الكبير برضة ولمؤاخذة
وكانت كوتة هتشوفلها صرفة تانية فى الوضوع
حضرتك كنت تقصد كده برضة مش كده :)
منورنى يا فندم
لا يا أفندم
أنا كنت أقصد حاجة شبه كدة
أقصد إن البنت بس كويتة
:)
Anonoymous:
اكييد احنا مش هنختلف يا فندم
بس كوتة
او بس كويته
المهم بقى ما الاقيكش مع جنابك فنجان شاي نبلع بيه البس كويت
:)
منورنى يا فندم .. بس مش نتعرف على اسم الكريم
للأسف يا افندم
من غير ما تيجي في بالك أغنية ليلي نظمي
فأنا مابشربش الشاي
فطبيعي مش محتاج "بسوكيت" خالص وربنا يرزقنا إن شاء الله
أما بخصوص العزومة تحت أمرك أبعتلك نيكسافيه بالكريمر؟؟ حلو
منور بوجودك طبعا يا افندم
أما اسم الكريم فا أنا مش فاهمك يا افندم تقصدي إيه
يمكن تقصدي الحضري
!!
Anonymous:
والله يا فندم مدام ليلى نظمى بعتالك سلام كبير جدا وبتقولك لو ما بتشربش الشاى هتجبلك اازوزوة انا
ومن الفريزر .. وده ما بيطعلش الا للعزيز الغالي
والحضري برضة باعتلك السلام وبيقوك ابعد عن طريقه اليومين دول
وانا قلتها حكمة ... خلى سيون ينفعه
و(الكريــم) راح يجيب بس كويت من مدغشقر
:)
منورنا يا فندم
Anonymous:
نسيت اقولك .. فيه بطيخ ساقع فى التلاجة .. ما تغبش انت والولاد
اوعدك هنشيلك البذر تحمصه :)
ماشي يا افندم
سقعتي البطيخ.. وهاتديني اللب.. طيب والشمام والكانتلوب.. اللب بتاعه فين مش هاهبعتلكم شمام وكانتلوب تاني
إسراء عندها مانجة.. والحضري دخل في قاموسه التفاح الأمريكاني أبو كتير قوي
عموما يا فندم أنا حزين لرفضك عزومة النيسكافيه.. هاشوف بقى يمكن الكوبايات مش غاسلينها كويس
يلا سلام بقى
أحسن دايما باروح شغلي متأخر.. ولدي ما أنجزه اليوم.. يقول أبوسفيان..........................................................
يوووه ما شوفتش التعليأ الأولاني.. بتاع الحاجة ليلى مراد.. قصدي ليلى رسمي.. نظمي.. حسني
مين حسني ده.. لا يطلع ليه علاقة بعبعال.. ساعتها ريا وسكينة هاقتشعوني.. حتشة حتشة
بس برضه مش هانسى انك نسيتي النيسكافيه
محدثكم
Anonymous
بجوار تلاجة بيبسي
كشك عم حسني
يووووووه حسني دي بتطلع وحدها من القلم
كنت قاصد كشك عم عبده
ربنا يستر علينا احنا كمان لان من قبل القلم ميطرقع هنبيع القضيه على طووول
بس انا اتصدمت فى اسراء بجد
تحياتى
ابوالعربى
على فكرة من رأيي البنت مغلطتشي أنها سحبت كلامها يا خلاصة لاصة
كان لازم تعمل كدة لحسن الطوربيني ييجي ويشيلها هي وقرايبها وعيلتها والتخين اللي يتشددلها كمان
دا الطوربيــــــــــــــني بجلالة قدره
وربنا يبعدنا عن الطوربيني
قولوا آميـــــــــــــــن
على فكرة مدونتك دي عجباني جدا جدا جدا وكان نفسي أعلقلك عليها من زمااااااااااااااااان
يالاااااااااااا
مجتشي فرصة
Anaonymous:
ما خلاص بقى اتهرشنا :)
محدثكم بنوتة من جوار تلاجة البيبسى
الدور السادس :)))
ضد الظلم:
لا ما تتصدمش فيها يا ابو العربي .. مش هى الى عملت فى نفسها كده .. المشكلة فى الى تاجروا باسمها وقضيتها .. البت اغلب من الغلب وبتقعد على كافيهات مدينة نصر .. ولا ليها فى الطور ولا فى الكابتشينو
سلام بقى قبل مج النسكافيه ما يبرد :))
Anonymous:
هو انت انونيمس تانى غير الاولانى؟
ع العموم انت منورنا يا فندم
وانا متشكرة على تعليقك الكريم
وابقى شرفنا دايما بالزيارة
وينفينا شر الطوربينى وامثاله اللهم امييين
هو فى أية بالصلاة على النبى
انا شايف ان الأحزاب باعت الأضراب والأخوان باعوا الأضراب
واللى طلعم رجالة صح بتوع المحلة بس زودوها شوية بموضوع التكسير والعنف اللى حصل
ولو أنى متأكد ان مش هما اللى عملوا كدة
الاباصيري:
والله يا اباصيري يا اخويا لولا ان اناا خايفة على المج النساكفيهي بتاعى لا يبرد ولا يتكسر فى المظاهرة .. كان زمانى هناك من زمان
ومش بتوع المحلة الى كسروا .. ده فيلم قديم حمضان ... بيقولك يا سيدى بتوع الكذب الوطنى يروح يبجلك كام مسجل خطر من الاقسام فى المنطشقة ويسيبوهم فى الشوارع زى الكلاب السعرانة ... تنهش فى الشوارع وفى الناس ... ويشاروا من بعيد ويقولك شايفين العمال الوحشيين بيعملوا ايه
ناس قليلة الادب ومش متربية
حسبي الله ونعم الوكيل
سلام بقى علشان معاد المسلسل العربي :P
:)
مننورنا يا فندم
حمد الله على السلامة
خرجت من جوانتناموا امتى ؟؟؟ :))
تسلم ايديكي
كل كلمة في الموضوع دا كانت في خاطري من جوات قلبي
اكتب بالرصاص:
حمد الله على السلامة يا فندم وحشتنا والله
ونفس الكلام بذات نفسيته ؟؟!! يا محاسن وعدلات الصدف
تصدق يا فندم
انا قلت برضة من الاول
هو الحضرى اخرته هتكون سوده ان شاء الله :)
منورنى يا غااااالى
يا بنوتة البنت عندها حق
يرضيكي بردة تتبهدل في الأقسام والذي منه وضرب بقي يا جميلة وعينك ماتشوف إلا النور
عندها حق
وبصراحة عاذراها
ومن الآخر
منك لله يا حضري
كله منك
Nobil Princessa:
----------------
عزيزتى الغالية
منورانى والله بتشريفك لينا
وانتى عندك حق .. وهى عندها حق .. واى حد مكانها هيعمل كده وزيادة .. وانا لو مكانها هعمل زيها
بس ربنا ما يحكم على حد فينا .. اللهم امين
:)
المشكلة فى الى كبروا الحكاية وتاجروا باسمها علشان يعملوا منها بطلة فى وش الحكومة .. والنظام .. وهى فى الاخر طلعت غلبانة يا ولاداه
تحياتى
Post a Comment