الجنية المصري .. يا عين أمة

طبعا كلنا عارفين وكسة الجنية المصري ومش محتاجين نتكلم عليه كتير ولا هنعيد ولا هنزيد .. ولا هتكلم على اقتصاد ولا سياسة ولا وعاء مالى ولا ميزانية ولا اعباء ولا ديون ولا اى بطيخ حتى .. وتحيا الوحدة الوطنية ... على الفول والطعمية ... !!!

(هو البيه فى الاتحاد الاشتراكى؟؟؟)

لسه سامعة امبارح فى حديث المدينة انهم هييعوا جبل اسمه السكري موجود فى مرسي علم وبيقولوا مليان دهب .. وبعد ما يتباع هنبقى كلنا شعب متريش ... لا لا .. مش هيطلعلنا ريش .. اقصد يعنى هيبقى معانا فلوس وهنبقى متسيغين وهنبقى وهنبقى .. ده كلام الناس اصحاب المشروع ... على العموم ما احنا بنسمع كتير هى جت على دى يعنى ... برضة ما عاااالينا

طيب برضة مافهمناش مال عين ام الجنية .. ؟؟

النهاردة وانا جاية فى المواصلات وانا راكبة المايكرو - باص (الميكروباز يعنى) واحد بيه محترم باعت للواد التباع الى مش محترم ورقة بخمسة جنية ... الواد التباع رجعهاله وقاله غيرها .. التانى قاله مافيش غيرها .. ايه مش عاجباك .. قاله لا مش عجبانى وهتغيرها ..؟؟ !!!

الكلام ده كان ورايا بصراحة فا مش عارفة الراجل غيرها ولا عمل ايه .. بس انا استغربت .. ورقة بخمسة جنية ومش عاجباه وعايزه يغيرها ؟؟ ليه يعنى ؟؟ .. قمت بصيت على باقى الفلوس الى فى ايدى .. كان شكلهم يقرف صحيح .. وريحتهم مكمكمة ومهلهلين .. وحالهم يصعب على اليهودي .. وقلت فيها ايه يعنى ما انا اخدت منه فلوس معفنة .. ما ياخدها هو كمان من الراجل التانى .. ايه يعنى ؟؟؟

وافتكرت برضة مرة تانية .. لما الفلوس قعدت تروح وتيجي 4 مرات من عند السواق لحد الكنبة الاخرانية علشان الهانم الى قاعدة ورا ماكتش عاجبها الجنية الى بعته السواق

ومرة غيرها لما واحدة غلبانة طلعت للواد جنية وربع الأجرة اخد منها الجنية ومارضييش ياخد الربع جنية علشان كان بريزة وشلن ورق .. وهى ما كنش معاها غيرهم .. فقمت اخدتهم منها وجمدتهم بورقة ربع جنية علشان الجنرال محافظ البنك المركزى الى قاعد معانا فى الميكروباص يرضى ياخدهم

نستنتج من الكلام ده كله ايه .. ؟؟ غير ان انا بركب ميكروباصات كتير ... :) .. انا احنا شعب فقري وما يملاش عنينا غير التراب وما نستاهلش النعمة

يعنى لما ورقة بخمسة جنية مش عاجبة الافندى ... يبقى لما تغور من وشه يبقى احسن له .. ما هو ايه الى عمل فى الخمسة جنية كده .. غير ان هو ماسكها بايديه الى زى الطين طول النهار بعد ما مسح العربية وغير العجلة وشحم الموتور وشرب وطفح وواقف فى الحر والشمس طول النهار وهو مطبق الفلوس فى ايده ... ما هو وامثاله الى عدموها العافية .. وبعد كده نقرف فى خلق الله

وهو يعنى علشان الورقة بقت حالتها كرب .. مااقدرش ابيع ولا اشترى بيها .. وفقدت قيمتها .. مش كفاية انها ناقصة قيمة فى الدنيا كلها .. هنيجي احنا كمان ونطنطط عليه

والجديد بقى كمان فى المترو ما يرضاش ياخد البريزة والشلن الورق .. يعنى انا لو نشفت دماغى واخدت الراجل ده من قفاه وطلعنا على اول قسم .. واخليهم يحلفوه بقى اذا كان الورقة دى معتمده من الدولة ولا لا .. ساعتها هياخدها وهو جزمتة فوق رقبته ؟؟؟

الى خانقنى .. ان احنا بنخنق بعض ليه .. ؟؟ هو الواحد ناقص .. ؟؟ يعنى لا هنقول الدولة تحسن الخامات المستخدمة فى الورق .. ولا هنقول استبدال العملات الورقية باخرى معدنية .. ولا هنقول الدولة تعدم كل الاموال المهلهلة وتصدر مكانها ورق تانى نضيف .. ولا علشان السياحة ولا السياح ولا صورة مصر ولا صورة احمد زويل ونجيب محفوظ ولا حتى سعد الصغير لاننا لو اعتمدنا على الحكومة هنعمل فلوسنا قراطيس ونقعد نصفر جمبها زى المعاتيه .. يبقى انسسسسسسسسى يا عمرو الموضوع ده خالص (وعلى فكرة عمرو متراقب) ...

احنا بس نهون على بعض ووالله الدنيا هتمشى ...

وانا بدعو كل الجهات المختصة من وانا فى هذا المزنق (على راى عمو اللمبى) تدشين حملة اعلامية واسعة المدى على كل الجهات المعنية والى مش معنية .. بتوعية المواطنين فى جميع انحاء الجمهورية وفى كل المدارس والجامعات والهيئات الحكومية والخاصة والقطاع العام قبل ما يخسخسوة ... والقطاع الخاس ... على ان يكون شعار الحملة:

ابقوا اغسلوا ايدكوا .... قبل ما تطلعوا فلوسكوا

على ان يأخذ الحزب الوطني توكيل الصابون

ودمتم

والسلام علبكم ورحمة الله وبركاته