ان فاتك الميري .... ولا يهمـــــــــك

ان فاتك الميري ... ولا يهمك

منذ نعومة اظافرنا واحنا بنسمع هذه المقولة الماثورة عن جدى
وعمي الكبير وستي وكل من عاصروا زمن الجنية الجبس ايام ما كان الجبس بخيره مش مخشوش ببودرة العفريت زى دلوقتى .. وهى "ان فاتك الميري .. اتمرمغ في ترابه"

حيث تنبض كل كلمه بل وكل حرف من هذه المقولة بحتمية الوظيفة الحكومية والعمل فى القطاع العام والمصالح الحكومية وذلك لما لها من مزايا لا تعد ولا تحصى .. وهى الاحتماء فى كنف الحكومة .. ومش هتلاقى حد يخاف عليك اد الحكومة ... غير ان عمر ما حد هيحركك من مكانك .. كل اول شهر هتلاقى مرتبك فى جيبك .. صندوق العاملين ومزاياه من مصايف وعلاج صحى واجازات حكومية وغير حكومية .. العلاوات والمنح والمعونات والمكافات .. مواعيد العمل الثابتة .., وفوق ده كله المعاش فى نهاية المطاف .. ده غير اللوكشة الكبيرة الى هتاخدها وانت خارج معاش علشان تشتريلك تاكسي ولا تاجرلك كشك تقف فيه بعد المعاش

وابعد عن القطاع الخاص الى بيمص دمك والى فى يوم وليلة ممكن يرميك فى الشارع .. وبينهب الحقوق

من واقع تجربتى القصيرة اقدر اقولكوا ان كل ده كلاااااااااام فارغ ,,الحقيقة بقى هى ان ما فاتكش الميري هتتمرمغ فى طينه وزفته وهبابه ...

الحمد لله ربنا تاب عليا بعد العمل لمده 4 سنوات فى احدى المؤسسات الحكومية لاحد اكبر الصحف القومية فى مصرنا المحروسة وانتقلت للعمل باحدى شركات القطاع الخاص .. وضربت بعرض الحائط هذه المقولة الانهزامية وهحكيلكوا بقى
يعنى ايه قطاع عام ...؟؟

قطاع عاام يعنى فساد وظلم بين ما بعده فساد .. قطاع عام يعنى وانا مالى ما تخرب ولا حتى تولع ,,, قطاع عام يعنى اشتغل على قد فلوسهم وهو انا باخد من ابوهم ايه .. ؟؟ قطاع عام يعنى مصمصة شفايف وطرقعة صوابع من الصفوة والاظرف ام اساتيك تدخل مكاتبهم كل شهر ,,, وموظفين شقيانين ليل ونهار ويترميلهم فتافيت وملاليم اخر كل شهر

قطاع عام يعنى اساسي مرتب 200 جنية ,, ويوم ما ناخد مكافاة بمناسبة دخول المدارس ولا ليلة القدر تتسمي معونة ومنحة زى ما نكون شحاتين

قطاع عام يعنى مدير عام مركز او ادارة وهى دماغه ما تفرقش كتير عن الى انت لابسه فى رجلك من جهل وبيروقراطية وتعسف اعمي وغبي

قطاع عام يعنى واحد مش بيفهم اى حاجة فى شغلك ولا عارف انت بتعمل ايه اصلا وفى يوم وليلة تلاقيه مديرك

قطاع عام يعنى مشروعات ستعود على المؤسسة والعاملين بالملايين غير السمعة والصدي الذى سيتحقق عند القراء تتلغي بالكامل بعد الانتهاء منها لمجرد
انه هتأثر على مبيعات حاجة هى مالهاش بيها اى علاقة اساساااا

قطاع عام يعنى لا شغل محترم ولا ادارة محترمة وفساد وشلالية فى مجالس الادارة والهدايا والعربيات ام ملايين والحج والعمرة لاصحاب الصوت العالى ,,, وباقى الموظفين يولعوا بجاز

قطاع عام يعنى مجلس ادارة اعضاءه كلهم فوق سن الستين ومن اصحاب مدارس فكر التعلب فات فات .. يعنى لا فكر ولا روح ولا دم جديد .. قطاع عام يعنى شيخوخة فى الفكر وفى الادارة وفى التخطيط

قطاع عام يعنى ديون متلتله بالمليارات تتسدد من ارباح الموظفين الغلابة لكن الهدايا والمكافات وارباح البشوات الكبيرة لسه ماشية زى ما هيا

قطاع عام يعنى علاوة سنوية 40 جنية للمعينين اقل من 5 سنين و41 جنية للمعينين اكتر من 5 سنين و42 جنية للمعينين اكتر من 10 سنوات

يعنى اشتغل 15 سنة وافرق عن الى متعين حديث ب2جنية بس .. متخيليييييين ...؟؟؟؟؟؟؟؟!!!!

قطاع عام يعنى لا تعليم ولا تحديث ولا تطوير ... ده غير السرقة عيني عينك وما تقدرش تفتح بقك

والى بيقول ان القطاع العام استقرار ده كلام اكتر حتى من فارغ .. لان اصلا مافيش تعيين حكومى ولا بعد 10 سنين .. وممكن تترمي فى يوم وليلة فى الشارع برضة .. وذلك لان اغلب ان لم يكن كل المصالح الحكومية الان بتعمل بنظام
العقود السنوية

يبقى ان فاتك الميري ,,, اكسر وراه زييييييييير وما تزعلش انت اكيد الكسبان

كتير هيسالونى وايه هو البديل .. البديل هى صحتك وعمرك الى هتشتريه بدل ما يدفن 40 سنة فى مكاتب ودفاتر الحكومة وهترخج منه عندك سكر وقلب وضغط وروماتيزم وروماتويد وتصلب شرايين وانسداد فى شرايين القلب وووووو ... والاعمار بيد الله

وحسبي الله ونعم الوكيل

على فكرة بقى القطاع العام ده
جزء صغير وبسيط من منظومة كبيرة تسير على نفس المنوال

وبس خلاص
وفى الاخر مش هقدر اقول غير
الله يرحمك يا جدى ويرحمك يا جنية يا جبس