مصرنا المخروسة بتتقدم بينا
اى حد بيتفرج على تليفزيونا المصري وبرنامج البيت بيتهم .. اكيد هيكون زهق واتخنق ومرارته اتفقعت من اعلان (مصر بتتقدم بينا) والى اتعمل منه حلقات مختلفة لكل قطاع من قطاع التطوير والتقدم الى حصل فى مصرنا المخروسة خلال سنوات الازدهار فى العهود البائتة
واسعدنى الحظ انى اتفرجت على تقريرين منهم, واحد بتاع قطاع الاتصالات والتانى بتاع قطاع النقل.
قطاع الاتصالات وعديته, ... برضة الواحد ما ينكرش بقى عندنا القرية الذكية و3 شبكات مختلفة للمحمول وجيل ثالث وشركات انترنت وهواتف ثابتة وبرمجيات والرقم القومي وافلاام يعنى.. صحيح هو كله بفلوسنا ومن افانا بس طب ماشى وبعدين .. يعنى فلوسنا وطوروا بيها والحمد لله وشوفنا حاجة جديدة .. مع ان مش كلنا فارق معانا
ندخل بقى على تقرير النقل ... وهو ده بقى الفقع بعينه, مصوريين المطارات وخطوط السكك الحديد ومترو الانفاق والعربيات الى زى الفل والمواني .. وايه ده كله ايه ده كله .. وايه الحلاوة دى يا جدعان زى ما بيكونوا مصوريين حتة من اوروبا
اول خاطر خطر على بالي, هما حبايبنا دول شايفنا قصادهم هنود مثلاا ولا هما بيذيعوا الاعلان ده لناس قاعدين فى جزر البطيخ
اذا كنا احنا ده كله ... امال مين الى عنده قطورات بتدخل فى بعضيها وتهرس الى قاعدين جواها زى الكفته, ومين الى عنده عبارات بتغرق فى عرض البحر وتغدى وتعشي السمك والحيتان من ركابها , .. ومين الى عنده طيارات تولع فى الجو وتخلي ركابها كباب وطرب ,, مش هى دى مصر برضة ولا ده فيلم كرتون
مين الى عنده مطارات زى الزفت, مافيش حد بيدخل مطار القاهرة وهو جاى من اى دولة برة سواء كانت عربية او اجنبية الا و بيحلف بالطلاق على مطار القاهرة والمعاملة والنضافة والاستقبال والخدمة المقدمة فى مطار القاهرة
مين الى عنده موانى مهببة وفى منتهى القذارة والرسائل الى بتيجى من بره الى بتترمى على الرصيف بالايام لحد ما تاخد الافراج عليها والى اصلا ممكن تقع من الاوناش وتنزل تفتت 100 حتة, والرشاوى والعمولات الى عينى عينك على الأرصفة
مين الى عنده سفن وعبارات منتهية الصلاحية ولا تتوافر فى اى منها شروط الامان ولا الضمان والشي الطبيعي جدا لاى سفينة انها تعطل فى البحر فى وسط الرحلة ان ما كانتش بتغرق طبعاا
مترو الانفاق وقذارته وزحمته الغير طبيعية بسبب قلة عدد القطارات فى وقت الذروة, ومعاملة موظفين الشبابيك الطين, وتمن التذاكر والاشتراكات الى بتضاعف بطريقة مهولة.
الغريبة بقى فى التقرير انهم ما جابوش ولا عربية من عربيات المايكروباز والسرفيس و اتوبيسات علب السردين بتاعتنا ولا حتى مينى باصات ارز لبنان ام جنيه وبريزة والى بندفعها جنية وربع الى مالية الشوارع
والسؤال الذى يطرح نفسه بشده .. وهو ده كله اصللااااااااااااااا ليـــــــــــــــــــــــــــــــــــه ؟؟؟؟
ويا ترى البريزة بتروح فيييين .. ؟؟
ويا ترى البريزة بتروح فيييين .. ؟؟
23 comments:
بقى لنا كتير ما شوفناش بعض، ما سلمناا اا ااش على بعض، وما سهرنا اا ااش من زمااااااااان مع بعض
محمود سعد: النهاردة معانا تقارير مهمة جدا وهناقش قضايا كتير زميلي تامر هيديكم فكرة
تامر أمين: شكرا يا محمود احنا هانتكلم فعلا عن النقل والاتصالات..
محمود سعد: ومعانا الفنانة الجميلة(...)
أيام ما كنت باشوف البرنامج كانت البداية بتكون كدة، بس لجهلي بقيمة البرنامج مش بشوفه دلوقت
أنا من المعجبين بقطاع الاتصالات يعني هوه الحاجة المنورة في مصر, ولما كتبتي حضرتك بقى عندنا 3 شبكات مختلفة متهيألي قصدتي متخلفة، يعني أنا كنت متصل من الشبكة بتعتي بصاحبي في شبكة تانية وردت عليا النجدة بفضل الله، بس ده ما ينفيش إن الاتصالات من المجالات المتقدمة في بلدنا
أما النقل بقى... فإحنا فعلا فعلا محتاجين شبكة نقل جديدة، إحنا معندناش قطورات، لو جربتي السفر بالقطر لغاية الصعيد كدة ولا منه هاتشوفي العجب، في المكيف والفاخر والأسباني، التأخير، والتكييف اللي دافعين تمنه إما شغال بزيادة أو مش شغال خالص، أنا عادة باسافر بالمكيف، والسنة اللي فاتت ماكنتش حاجز ركبت قطر مميز، هوه اسمه مميز بيدلعوه بدال ما يقولوا عادي، القطر بيكون شبه علبة البولوبيف، وخناقات، ومعاكسات، وطلبة الجامعات وشهامتهم مع البنات والعكس، الشهامة اللي من نوع إن واحد يدخل يحجز لواحدة أو العكس، وشاي شاي حاجة ساقعة بيبس والعيش والطعمية،
والأوتبيسات نقول ايه ولا ايه
أما النقل البحري، متهيألي كدة ماشي كويس معندناش عبارة غرقت ومعندناش اسمه ايه ده اسماعيل اللي خلاص مش عليه أي ذنب واللي حصل حصل في دولة تانية مش صح كدة؟؟
بالمناسبة منى الشرقاوي لسه قاعدة ولا لأ؟؟
هي يعني جت علي دي
طب حضرتك ممكن تعدي كده علي مدار العام كم فرصة عمل بيتوفروا علي مانشيتات الجرايد ؟ اتحداكي والله لو جمعتيهم يمكن يطلعوا اكتر من عدد سكان مصر
بلاش
هاتي جرايد السنة اللي فاتت واحسبي عدد المليارات والملايين اللي بتخصص لتطوير مش عارف ايه .. جمعي كده واحسبي علي صوابعك.. هتلاقيها اكبر من ميزانية اميركا
بلاش ده وده
هاتي تسجيلات الخطابات القديمة واسمعي كده واشجيني عن عام الرخاء وعنق الزجاجه ومشروع الالف يوم والاغاني والاسطوانات اللي نافست سعاد حسني في بمبي بمبي بمبي
واهي الناس مبسوطة وبتسقف
يعني هي جت علي التقارير
أحط الشندوشتات دي فين؟ وبعدين مين شابشتيكو ده؟ دي كلمة ابيحة يعني؟
طبعا طبعا مصر بتتقدم بينا
بتقدم دماء ابنائها لقضبان السكة الحديد وبتقدم اجاسمهم وجبه شهيه للسمك والحيتان مكفهاش كدا دلوقتى بتقدمهم خدامات يعنى البونية تدخل الجامعه وتدرس لغه وتطلع تشتغل خدامة قد الدنيا
هى مصر حتعمل لكو ايه اكتر من كدا يا شعب سكك حديد وحرقناكم وقتلناكم بحر واكلناكم للسمك احمدوا ربنا بقا
انتى عايزه الحاجات دى تطلع على اللافزيون يا اوختشى يا فضيحتنا اكتر ما احنا مفضوحين
عظيمه يا مصر ياصلاه النبى احسن اعلان موجه الى حد تانى خالص مش مصرى والله لما بشوف الكلام دة بقول ياسلام احنا ظلمنهم والحياه حلوة ومنعشه واحنا بس الى قفشين
anonymous:
كاتبى وزميلي الغالي
انا متشكرة اوى لتعليقك على مدونتى والى بتعتبر شرف ليا وانا عارفة ان مالكش فى موضوع التعليقات
انت كده كملت الصورة معايا, يعنى بغض النظر عن زهق ارواح البشر الى ليست لها قيمة عندهم, الوسائل دى من جوا شكلها عامل ازاى ووالتى اجتمعت كلها على انها لا تصلح اساسا لاستخدامنا الأدمي
وما خفى كان اعظم
نظرية وسبب كتابة هذا البوست ان احنا عارفين كل الهم وده ساكتين لكن ما يجييش شوية عالم رايقة يعملوا اعلان شيك من ماركة شباب النيل وفيه حقنة بنج ويقنعونا بالهبل الى هما بيقولوا
ربنا يرحمنا من عنده,
فى الاول لما سالتنى عن منى الشرقاوى عملت بحث على جوجل علشان اعرف انت تقصد مين :)
وفى الاخر عرفت وايوا هى لسه هنا
قاسم أفندى:
سيبك بقى من شرايط الأنفتاح وسعاد حسنى وسمعنى احلى سلام لكامننا
والكاتش كادر فى الأالوولوو
يعنى بقى معقولة مش عارف الكابشتيتو, انت روح بس الصيدلية واسال عليه وهما هيظبطوك :)
Desert Cat:
قطقوطة .. مش ناقصك مروحة تكييف اى حاجة .. اؤمرى وكل على خساب صاخب المخيل
ولا يا اختشى ما تطلعش فى الفليفزيون, ادينا مداريين على خيبتنا وساكتين
لكن كمان مفضوحيين وعيني عينك والى ما يشترى يتفرج
سيبك هى جت على دى اذا كانت ناس عملوها فى حاجة شبه كده وسموها انتخابات رئاسية, هتيجي على النقل
غطيينى وصوتى او بلاش غطى مااحنا ما بقناش مستوريين خلاص
ضد الظلم:
منوورنى بزيارتك الغالية يا فندم
والى انت قلته بالظبط هو الى انا عايزة اقوله, الدنيا حلوة والمواصلات سهلللللة والرغيف كبيييير وكل شوية تقولوا فكوا الحزام فكوا الحزاام .. تعيش الحكووووووومة
هو انا اسمى مكتوب ...
ده انا غلبااااااااااااااان
والان مع فاصل اعلانى ... مصر بتتقدم بينا
:)
حرام عليكي انا كنت قربت اصدق و معشم نفسي الاجازة الي جاية اوصل مصر بالباخرة علاشان اتفرج علا المواني و بعدين اركب قطار مكيف يوديني القاهرة علاشان اخد اتوبيس مميز يوديني اسكندريةو اشوف تاكسي يخدني على البيت
بس على كلامك الجميل دة لو حصلت المعجزة و وصلت بيتنا حاخد اول صاروخ يرجعني مطرح ماكنت
عارفة اكبر نصبة في التاريخ المعاصر!!؟؟؟ اهو الاعلان ده اكبر منها
هذه الإعلانات تحمل بصمات الدكتور سامي عبد العزيز..
لا خلاف على أن سامي عبد العزيز أستاذ دعاية شاطر ، لكنه ليس نابليون بونابرت الذي يستطيع فعل عدة أشياء في نفس الوقت بنفس الكفاءة ، فهو "لا يطاق" عندما يكتب مقالاً صحفياً في الجامعورية ، ولا يمكن وصفه بعبارة مهذبة إذا ما قرر أن يخرج إعلاناً أو تنويها.. هذا أمر يفوق قدراته كما أرى..
نار شريف روبي الشهير بشريف صبري خير من جنة الدكتور سامي عبد العزيز ، شريف على الأقل خرج الكل ساخطاً على فيلمه الروائي الوحيد 7 ورقات كوتشينة لكنهم أعجبوا بتوزيعه للإضاءة واهتمامه بالصورة ، أي أن الرجل قادر على تقديم "صورة حلوة" في الإعلان أو في الفيلم وعلى توظيف الموسيقى و..و..إلى آخره من الأمور التي لا يجيدها الدكتور الموقر ، والذي آخره أن يرص عدداً من الناس بشكل مسرحي أبله يشدون علم مصر دليلاً على المشاركة في بناء مصر على طريقة مصر بتتقدم بينا!
عذراً للإطالة..
اسكندرانى فى الغربة:
لا لا ابدا يا فندم حضرتك تيجي بالف سلامة, بس يا ريت وانت جاى ما تركبش لا طيارة ولا مركب ولا عبارة, ولما توصل ما تركبش ولا اتوبيس ولا مينى باص ولا ميكروباص ولا تاكسى
يعقوب:
لا لا نصبة ايه وبتاع ايه, امال الديموقراطية والاصلاح نقول عليهم ايه ... نكسة !!!!!!!!!!
قلم جاف:
انا سعيدة جدا بزيارتك يا فندم والى ارجو ان تتكرر دوما
بس هو مين سامى عبد العزيز :), انا اول مرة اسمع الاسم ده بصراحة وكنت فاكرة ان القطعية كلها بتاعة شريف صبرى
ع العموم ما كله زى بعضه, غثاء اعلامي لغثاء الشعوب
يا سيدى ده احنا وصلنا ان رئيس دولة بقى بيعمل فيديو كليب,, شفتوا خيبة اكتر من كده
تفتكر سامى عبد العزيز مناخيرة فى الموضوع ده برضة
منورررنى يا باشا
سلام الله عليكم ورحمته وبركاته
بنوتة.. مصر بنا تتقدم وبنا تتأخر، الأهم يا أستاذة ما تحمله تدويناتك من لمحة سياسية ساخرة جعلتني أطالبك بالمزيد نحن دولة بها حرية رأي، ولا تسمح بإعتقال البنات حسب علمي
مؤكدا التحية
انسان خاصمته ابتسامة الدنيا
انسان خاصمته ابتسامة الدنيا:
زميلي الفاضل والذي اسعد دوما بحضوره والذى ارجوا الا ينقطع ابدا
انا متشكرة اوى على كلامك الذيذ يا فندم. بس والنبي ما تودونا فى داهية انا لا ليا فى الاسقاطات ولا التلميحات واحنا فى بلد ديمئراطي وعندنا حرية فى التعبير وكله عال العال
وانا ورايا عيال عايزة اربيها :)
السؤال الاهم
ولو حتى كل حاجة كويسة وجميلة ومفيش فيها اي مشكلة
ودة طبعا مش حقيقي بس افرضي جدلا
هو دة مش حقنا ولا ايه؟
يعني طرق ومطارات والمواني والكلام دة هل منحة من الحكومة ولا واجب وفرض عليها انها تعمله؟
حاجة في منتهى الغرابة....بيمنوا علينا بفلوسنا
تحياتي ليكي
a.samir:
حق مين يا فندم , ده مافيش اى لقاء صحفى لاى مسؤول كبير الا لما نطلع احنا الى ولاد قطط وكلاب علشان احنا الى بنخليهم يصرفوا ويصلحوا
واحنا الى عددنا كتير واحنا الى عاملين ازمات
واحنا واحنا ...
خلاص كفاية بقى
عمرك شفت حكومة بتكره شعبها .. والله الى بيكرهنا يحل عننا ويريح نفسه
حورس:
الف حمد الله على السلامة يا فندم ومنورنا
وكلنا بخير الحمد لله
وولكم باك ان ايجيبت :)
أول مرة ...دمك خفيف قوي ...والمدونة دمها خفيف
..........
اما تعليقا على المدونة
..
اولا الإتصلات ...الإتصلات دي ولا تقدم ولا نيلة ..
لأنها ببساطة صناعة إستهلاكية قائمة على مجموعة من الشركات الخاصة والتي لا تعود على المواطن الغلبان بأي شئ
...وزي مانتي قولتي كل على قفانا
أما عن المواصلات فلا تعليق لأني شفت الإعلان أو الدعاية بنفسي
............
مجرد دعاية وإعلان لسعادة الباشا
هو دا الكلام الخلاصة
تحياتي
اسمحي لي ان اشارك بالراي ...
اولا انا أري ان هناك بعض الإنجازات...لكن هذا لا يعني انها منه علي الشعب من الحكومة....لان عمل الحكومة الاساسي هو تحقيق إنجازات تيسر الحياة لشعبها.
كما أنني أري ان كم الانجازات لا يليق بمصر بما تملكه من علماء و خبراء...في الطرق...و في الانفاق...و في الطب...و الطيران و الهندسة...و كل المجالات...
مصر بما لها من تاريخ و حضارة.
أتمني ان نري حكومة لها إسترتيجية شاملة للتنمية في مصر...واضحة المعالم و معلنه لكل الناس....و تقوم كل وزارة بتنفيذ مهامها ...و لا يأتي وزير يغير
البوصلة 360 درجة...كما نري الان و نعيد من أول وجديد.
تحياتي و تمنياتي لك و للجميع بموفور السعادة.
بنوتة
سلام الله عليكم ورحمته وبركاته
(F)
أستعير خاتمتك في التدوينة الأخيرة
وأقدم سؤال يطرح نفسه بشدة
أين الجديد؟؟؟
كالعادة أؤكد التحية :)
إنسان خاصمته إبتسامة الدنيا
human:
انا سعيدة جدا بزيارتك والتى اتمنى ان تتكرر دوما
ما هى الاتصالات دى وكسة ع فكرة بنصرف عليها ملايين فى كلام فاضى
بس بغض النظر عن سوء الاستهلاك فدى فعلا مشكلتنا احنا علشان نقص الوعي
بس تقدر تقول فعلا ان احنا ولا حاجة .. ما ننكرش ان فى حاجات كتير فى مصر اتغيرت بس مقارنة بناس كانوا بعدينا ومتاخريين عننا بسنيين شوف هما فين دلوقتى واحنا فين
وفلوسنا فيييييييييين ؟؟؟؟
الربان:
اوافقك الراى فينا ذكرت
ولازم كل وزير يجيي يهد المعبد ويبنيه من اول وجديد علشان المصاريف تزيد والخير يزيد
وكل وزير يغرف بالكبشة م وش الحلة
حسبنا الله ونعم الوكيل
انسان خاصمته ابتسامة الدنيا:
الجديد قادم عن قريب جدا ان شاء الله
وانا متشكرة كده على سؤالك الدائم
ومنورنا يا فندم
امال مدونتك فين :) ؟؟
ندعوكم للمشاركة معنا فى
الملتقى
ملتقى ابداع المدونين
واراءهم ومواضيعهم
تسعدنا مشاركاتكم
يا جماعة خطوة خطوة و لا انتوا عايزين في يوم و ليلة نلاقي نفسنا دولة عظمى
اعتقد ان ده مش من العفل ياريت نكون صرحى مع نفسنا على الاقل
هنل
اقدر أقولك تقييمك للتقرير اللي إتكلمتي عليه صح وعشره على عشره
وبعدين لو سمحتي ماتقوليش شايفنا هنود الهنود متقدمين عنا بكتير في علوم كثيرة جداً وفي إمكانيات علميه عندهم فظيعه وبيطوروا مش قاعدين حاطين غيديهم على خدهم والنبي ماتخليناش نقعد نعيط على حالنا الله يجازيهم اللي كانوا السبب
مجهول:
اهلا بزيارتك يا فندم
انت عندك حق .. نصبر عليهم ونديهم وقتهم مافيش حاجة بتتغير فى يوم وليلة وخطوة خطوة وتاتا تاتا
بس ما تجييش تانى يوم تعملى فيلم طويل وعريض وتقولى احنا عملنا وسوينا
يا فندم التقرير بيعرض حاجات المفروض انها حصلت مش لسه هتحصل
يبقى ده نسميه ايه بقى ان شاء الله ؟؟؟
شفافية ولا نزيهة ولا ضحك على الدقون
تحيااتى
حسن ارابيسك:
يا فندم دول كانت متاخرة عنا بعشرات سنين بقو سابقنا دلوقتى بمئات السنين
المشكلة مش فى الامكانيات ولا التكنولوجيا ولا الماديات
الماساة عندنا فى المنهج وطريقة التفكير واسلوب الاداء
ومش عارفة ده ممكن يكون حله ايه :$
تحيااتى
هههههههه خسارة فاتتك الحلقة بتاعة التعليم و هم جايبين كل عيل قاعد على ديسك لوحدو في فصل حوالي 25 تلميز و قال ايه كل واحد قصاده لاب توب!!!!ولا الزراعة جيبين فلاح بيزرع منتهى السزاجة ولا الطب جابو واحده بتولد شوف اد ايه احنا متطورين ههههههههههههه ولا الابداع و جايبينلك يحيى الفخراني ولا مكتبة الاسكندرية اللي عمالين يتفشخروا بيها ناسيين ان التصميم و التنفيز و التمويل اجنبي و حتى الكتب كلها تبرعات!!! انت قولت كلمة فعلا الحملة دي موجهة لمين بالظبط زي ميكون احنا مش مصريين و مش عايشن في مصر
عزيزى
شكرا للزيارة الغالية
وبعدين كل ده فعلا يا فندم موجود
بس احنا الى مش واخدين بالنا
ومش شايفيين غير الزبالة والقرف والمشاكل والفساد الى ماليين البلد
انا عارفة يا اخويا بيجيبوا الشعوب دى منين :)
منورنى
Post a Comment