ماجاش مرة على بالك انا هنا دلوقتى ليه وازاى وامتى ؟ عمرك ما حسيت انك نفسك تقول حاجة مش عارف تقولها مع انك سامعها جواك بصوت عالى وبيصرخ
عمرك ما بصيت على اديك الاتنين وتفاصيلها الغريبة وخطوطها الى رايحة وجاية زى ما يكون طريق حياتك الى اكيد هيخلص فى يوم من الايام وتبصلها وانت مستغرب تكوينها وشكلها وهى ليه شكلها كده اصلاا
عمرك ما حسيت ان حياتك كلها شريط سنيما ولو غمضت عنيك لحظة وسرحت بخيالك هتشوفها كلها وبكل تفاصيلها قصاد عنيك اكنك فى اوضة ضلمة ومافيش فيها حد غيرك ومش شايف غيرها
عمرك ما حسيت انك ماشى فى الشارع وسامع صوت موسيقى لعمر خيرت فى ودانك ورجليك شايلاك وبتمشى براحة .. والدنيا فجاة تلف وتدور بسرعة وفجاة تقف عنيك على وش اسمر لطفل صغير وتاخدلك جمب كده وتبص على شكل عنيه الصغيرة وهى بتلمع وسرحانه هى كمان فى دنيا البراءة ... وانت باصصله بهم على الى هيشوفه لسه فى الدنيا الى مخبيا جواها كتير
عمرك ما شفت راجل كبير ماشى على عكاز عجوز فى الشارع وحسيت فى لحظة انك هتكون زى الراجل ده في يوم الايام واليوم ده انت شايفه دلوقتى وبرضة بكل تفاصيله
عمرك ما حسيت انك عايز تكون شاعر علشان توصف الام والاب والحبيب والحبيبة والابن لما حد يسالك عن معنى كل واحد فيهم يبقى ايه فى حياتك
عمرك ما حسيت انك عايز تكون رسام علشان ترسم صورة حلوة لبلد هى احلى بلد فى الدنيا حتى لو كانت غير كده لما يسالوك وانت فى الغربة .. انت بلدك ايه ؟؟؟
عمرك حسيت انك بلياتشو فى سيرك وماشى على حبل وخايف تقع .. ؟؟ او عمرك حسيت انك حتة من فيلم شفته قبل كده 50 مرة ... او ان حياتك كلها فيلم تسجيلي مدته بالكتيير 15 دقيقة بس شايليين جواهم سنييين طويلة
عمرك ما حسيت ان الناس والعربيات الى فى الشارع كلها بتمشى لورا وانت الوحيد الى ماشى لقدام .. والناس كلها باصالك ومستغربة انت ازاى ماشى كده
عمرك وانت جوا عربيات المترو وانت شايف الرصيف الصغير وهو بيقرب من بعيد وبيكبر شوية شوية وتلاقى الناس حجمها بيكبر وعددهم بيكتر وهما مستنين على الرصيف وفجاة عنيك تلمع على ايد ست كبيرة بتسند على كتفك علشان تنزل على الرصيف
عمرك ما حسيت ان نفسك تكون كاميرا تلقط بيها مشاهد حياتنا الى تنفع كلها نرصها جمب بعضها وتعمل منها فيلم خيال علمى لان كلها مشاهد حلوة والسيئ الى فيها طالع شكله حلو برضة
عمرك ما حسيت انك مش قادر تتكلم ونفسك تتكلم بالاشارة وكل الدنيا تفهمك .... او تتكلم بنظرة من عنيك والناس كلها تسمعك
عمرك ما حسيت انك صاحى من النوم مخنوق ومش عارفة ليه وان روحك مش قادرة تستنى جوا ضلوعك وعايز تزعق ووتصرخ وتتخانق وتلعن سلسفين الى جابوا اى حد يقابلك فى وشك .. واول واحد يقابلك تهب فيه وفى الاخر تلاقى انه ده يبقى اعز صحابك
عمرك ما كنت موجود فى مكان ولفترة طويلة لدرجة ان وشوش الناس الى حواليك بقت مألوفة بالنسبالك وحاسس ان الزمن معاهم بقى ولا حاجة وعايز تدردش معاهم وتشوفهم كلهم تانى
عمرك ما دورت على الامان ..؟ عمرك ما هربت من الخوف .. ؟؟ مش خايف من بكره .. ؟؟ مش خايف من النهاردة ... ؟؟ مش خايف من كمان شوية ... ؟؟ مش خايف على الى حواليك والى هما منك وليك ؟؟
عمرك حسيت انك حتة من فيلم لخيري بشارة .. الدنيا بتاخدك والناس تشدك والظروف تهدك وانت لسه قاعد بين الكراسى فى سنيما اوديون بتتفرج على الى بيحصل فيك زى ما يكون مش انت؟
وفى الاخر تلاقيك ماشى بضهرك ومدي قفاك للمشاهدين زى ما يكونوا مش هامينك وتطبع صورتك بوسترات على ابواب السنيمات وانت لسه برضة واقف بضهرك وماشى بعيييييييييييد وضاربها ميت صرمة قديمة
وفجأة وانت خارج من باب السيما تلاقى واحد وققفك وسالك الا هو كيلو الخيار بكام اليومين دول ؟
يالا واهوا كله فى الاخر بيطلع فى الغسيل .. بس لو كان المسحوق ماركة نضيفة
14 comments:
البنوتة الكريمة..عفوا الأخت الكريمة
كالماء أجمع الكلمات بين كفيَ وأحتفظ بها، فتتسرب سريعا ولا يبقى منها ما يروي رغم الحاجة للمزيد، (جربتي تحتفظي بشوية مية في إديكي عشان كل ما تعطشي تشربي منهم، أنا حسيت كدة استمتعت كالعادة بأسلوبك والكلام جري بسرعة وخلص الموضوع) أحب أن أقترب من التعليق على تدوينتك، ولكني أجدني أبتعد، ولكن ربما نسير في إتجاه واحد، أحبطني جدا ما شاهدته من لحظات على اليوتيوب عن الطفل الذي عذبته الشرطة بسادية شديدة، أحاول أن أجد الكلمات التي تنقل بشاعة المشاهد بشكل واف ولا أجدها، لم ولن أجد ما يصف ما حدث، وأنت، وكل من يستطيع كتابة حرف في هذه الدنيا، وأسألك وأسأل أي بشر في الدنيا حتى وإن نزع الرحمن من قلبه الرحمة، هل يستطيع أن يعاقب عدوه بهذه السادية، فما بالك بطفل، للحظات شعرت بأني أقحمت نفسي في مشهد سينمائي بالبعد الثالث، وبعدها وجدتني لا استطيع اكمال الفيديو، شعرت بأني في حاجة إلى الصراخ، والبكاء على الآدمية المنتهكة والمنتهية، تذكرت مقولة كنت اسمعها في طفولتي على لسان عبد الله غيث في مسلسل موسى بن نصير عندما قال: حبيبي يا رسول الله أقبل وضع يمناك بين المسلمين.. وذكر يا حبيبي من جديد لأننا نسينا ما ذكرت.. ورحنا نستبق حول السراب.. ونسينا أن مثوانا التراب وأن الباقيات الصالحات خير.. الباقيات الصالحات خير، يااااااااااه يا كل من يشعر ويمتلك نعمة الإحساس في هذه الدنيا أخرجوني من هذا الفيلم، يااااه تمنيت أن يكون ما شاهدت جزء من فيلم لخيري بشارة، أو صلاح أبو سيف، أحاول أن ألخص مفردات الحدث الفعل والفاعل والفعلة، وهذه المفردات كلما جمعتها لا تسعفني لتلخيص واف، قولي مالي وما تقول، وليقل من يكتب بعدي مال هذا التعليق وما تقولي، أو قولي كما قال لي أحد أساتذتي أن كثرة حبي في العقاد أورثتني تعقيدات في اسلوبي وميزاني للأمور، ولكن يبقى السؤال الأهم سمعتك تقولي مالي وما تقول، وأقول بأن ما قرأت لمسني بشكل كبير، وجعلني انفثأ، وأتنفس، لكن والله لمسني من العنوان ومن البداية
وعذرا للإطالة تخيليني بالون انتفخ غيظا وانفثأ، لأنه والله والله والله العنوان وحده يعد السبب الأكبر لتعليقي العقيم
والله وحده حسبي وحسبك وحسبنا جميعا وكلناه وهو نعم الوكيل
تحياتي وتقديري
سبق صحفي
انفردنا في تعليقنا على التدوينة السابقة بالكتابة عن موضوع هذه التدوينة وعنوانها
لذا وجب التنويه
وللبنوتة وقلمها وكيبوردها أعمق التحية والتقدير
واضح انك مهييسة على الاخر
بس ايه السبب ؟
ايه كمية الاحاسيس دى يا بنوتتنا يا قمر
بص بصراحة مش لاقيه اى كلام اعبر بيه عن مدى جمال التدوينة
دمتى لنا بابداعك
كلام جميل وأسلوب رائع بس كان ناقص أسم الفيلم "يوم مر ويوم أمر" على العموم مش مهم هننزل من المترو فين المهم هننزل ازاي دعاء أقوله دائما "اللهم لاتقبضني إليك إلا وأنت راضي عني " وسلام
عزيزى :
اشكرك على المبادرة فى التعليق
واشكرك على الاسلوب الادبي الرائع للتعبير عما بداخلك
ولنا الله من قبل ومن بعد
والله يسامحك قلبت علينا المواجع :)
منورنى قلمك دايما يا فندم
ومش هقولك على حاجة تانى بعد كده :))
اكتب بالرصاص:
اهلا بأبو البنات
والله يا باشا انا ما اعرفوش
ولا عمرى كلمته ولا جيت جمبه قبل كده
ومهييسة دى ولا ليا بيها اى علاقة اساساا
الا هو حضرتك بتتكلم عن مين؟
منوررررررنى جداا جداااا
ديزرت كات:
يا مراحب يا مراحب بالغاليين
انا يا سيتى الى متشكرة على زيارتك الغالية
الا اخبار الواد حموءه ايه :) ؟
كبرتش:
الى حضرتكك قلته بالظبط ده كلمة كلمة وحرف حرف هو الى انا عايزة اوصله فى النهاية
تسلم يا فندم .. جبت من الاخر خلاصة الكلام
اللهم لا تقبضنا الييك الا وانت راضى عنا
منوررررنى ...
الا هى شيريين لسه بتغنييلك :))
بنوتة
البوست بتاعك جميل جداً وأسلوبك هايل
بجد مش مجاملة
بس ليا سؤال صغير هو اللي سأل كيلو الخيار بكام حد رد عليه ولا لا ؟؟؟
تحياتي ليكي
Nosha:
والله يا فندم نحب نطمنك ان الى سال على الخيار واحد اين حلال دله على سعر الخيار وعلى الراجل الى بيبع الخيار
اى خدمة يا باشا
فيه طماطم وخرشوف
تحب اوزنلك ؟؟؟
ياه يا بنوتة
أنا طول الوقت حاسة إني في فيلم
آخر واحد
كنت واخدة فيه دور الهبلة
lllloooooooolll
كان فيلم جامد أوي
كوميديا سودااااااا
تحياتي عزيزتي
على فكرة
ماعادش في محمد
لقيتك متضايقة من وجوده
شلته خالص
تحياتي يا سكر
منى
منى المحمودى:
اهلا بيكي عزيزتى ودايما منورانى
احنا كل يوم فى فيلم جديد
بس المهم بعد الافلام دى كلها ما تخلص
هنروح فين
وعملنا حساب لمشهد النهاية ونزول الافيش ولا لسه
يالا ما نجلكيش فى حاجة وحشة
انتى اتخانقتى انتى ومحمد ولا ايه ؟؟؟
بس السؤال الى محيرنى لحد دلوقتى
هو مين محمد اساساااااا :)))
انتى منورااااانى
تحياتى
كلها احاسيس جايزه جدا
كلنا مر بيها
بس اللى غامض عليه فى الموضوع هو الفيلم بتاع خيرى بشاره انا معرفوش ومشفتلوش افلام قبل كده
عشان كده مش قادره احكم عالموضوع
بس انا فهمت من كلامك والله اعلى واعلم على راى مفتى الجمهوريه سامحه الله او بالاحرى ربنا ياخده
الاحساس بانك غريب فى وسط ناس اكثر غرابه
عارفه؟
ساعات الناس تبصلك على انك غريبه رغم انك فى منتهى الطبيعيه
هم اللى اغراب مش انتى
فهمتينى يا بنوتى؟؟؟
كرانيش:
انا سعيدة جدا انك لبيتى الدعوة وزرتى البوست المتواضع
غاليتى: خيرى بشارة هو مخرج كما يطلق عليه اسم مخرج الواقعية او من مدرسة الواقعية
ومن افلامه الشهيرة فيلم اشارة مرور وغيرها الكثير .. وفى الحقيقة لم تجدر الاشارة هنا فى هذا الموضوع الى فيلم بعينه ... ولكنها لاسلوب الحياة والذى نعتبره كالافلام التسجيلية القصيرة
والتى يخرج فيها المخرج فى عرض الاحداث عن المألوف وعن النطاق المعروف .... فتلاقى روحك زى ما دخلتى الفيلم زى ما خرجتى منه مش فاهمة حاجة غير شوية احاسيس مفصصة
حاجة زى افلام يوسف شاهين .. بس عند شاهين السايكو عالى حبتين :)
والمهم وانتى ماشية فى الاخر ما تلاقيش حد بيسالك كيلو الخيار ولا الطماطم بكام اليومين دول ولو ما عرفتيش تردى تبقى انسانة غريبة :)
فهمتى حاجة يا كرنوشتى :)
منورانى دايما
تحيااتى
انا مش فاهم الفيلم ده مش فى فلوس واية يعنى
Love:
لا هو بص حضرتك .. انا اخر حاجة سمعتها ان كيلو الخيار ب 3 جنية 75 وقرش
:)
شرفتنا يا فندم
Post a Comment