حسرة عليها يا حسرة عليها
---------------------------
امبارح الى هو يبقى (يااستر-داي) لطشتنى الغزالة انى انزل اعمل (شوبينج) في المدعو(ء) هيلتوم رمسيس الى فى ميدان التحرير ...
ومش عارفة الى حكم الغزالة انها لازم تروح هيلتوم رمسيس ما انا كنت قاعدة مكلكعة فى بيتنا ومعنوياتى مرتشفعة وفل الفل .. صحيح من خرج من داره اتقل مقداره الى هو اساسا
فى الحضيض وافتكرت ايام زمان لما الواحد كان (بيمبرومبوا) المثل وكان ليه شنة ورنة .. يا حسرة دلوقتى بقينا شمة ورنة و(ميسد كول)
بداياً وبعد غض النظر عن قمة التناقض والفجوة الأنسانية السحيقة بين موقف عبد المنعم رياض من جانب وفندق هيلتوم رمسيس ومول هيلتوم رمسيس من جانب اخر والي بيفصل بينهم كخيط رفيع مجرد شارع التحرير ..
وبغض النظر تانى عن موقف عبد المنعم رياض ومافيه من اتوبيسات وميني باصات والكراسى البرتقانى والناس الى مستنية والناس الى بتجرى والدرة المشوى واللب والسكر النبات والجرايد وكشك ناظر المحطة والزحمة والحر ...
لو بصينا بقى للجانب التانى عند مدخل الفندق صاحب الارتفاع الساحق الى بنكون تحته زى الاقزام الحقيرة .. لوجدنا غزو واحتلال عربي خليجي لهيلتوم رمسيس وكل ما هو حول هيلتوم رمسيس ولكل منطشقة وسط البلد بمعنى اصح
هذا الغزو العربي الخليجي الذى تجسد فى الكم الهائل من العربيات الجيب شيروكي والعربيات السبور والعربيات الاخر موديل والى اول مرة أشوفها في حياتي .. والكم الهائل من الشباب العربي الشقيق (المتروشن) والكم الهائل من الحريم والستات والبنات الشقيقات ام روايح مهفهفة
وبغض النظر بقى عن الكم .. نبص على الكيف والمنظر والهيئة والاشكال الى ما يعلم بيها الى ربنا. احنا ما ننكرش ان الاخوة الاشقاء منورنا ومصر منورة بيهم وبانوار عربياتهم الحقيقة, وما ننكرش انهم عاملين حالة رواج لاقتصادنا الملقح فى العناية المركزة, بس برضة المصريين رجالة ووقفوا وقفة رجالة ولا مؤاخذة
ما يلفت الانتباه فعلاا التبرج الصارخ بين الشباب والبنات العرب , وبقى معروف ان كل الى بنشوفه منهم ده من الكبت الى بيشوفوه في بلادهم .. و ده على اعتبار ان مصر مرتعة لكل مكبوت ومخنوق ومش عارف يعيش حياته
فبقى شئ طبيعي انك تشوف الصبيان والبنات لابسين لبس غريب وعاملين فى نفسهم عمايل اغرب , والمحزق والملزق وكل ده بيبان بقدرة قادر من تحت العباية .. ولا الفل ميك اب والعيون المرسومة والرموش الى مش عارفة ايه وده بقى بيان من تحت النقاب .. والراويح المهفهفة والدلع وده بقى على عينك يا تاجر
والشباب بقى الى راكبين العربيات ونازليين يروشوا فى الشوارع ويعاكسوا ويظبطوا فى البنات ... مش المصريات لا سمح الله ... هما بيظبطوا منهم فيهم بس ...
ولا الكافية الى فى الدور الارضى فى المول الى مهفهف بدخان الشيشة والسجاير من الستات قبل الرجالة
محلات الكاسيت الى بقدرة قادر كلها اغانى خليجي ومحلات الخردوات الى معلقة اعلام السعودية والكويت والعراق على ابوابها علشان كل مجموعة شباب يرفعوا علم دولتهم. واتقلب المول لجامعة الدول العربية
طبعا هما حريين يدللعوا مش ناس جاية تتفسح .. بس الى صعب عليا ان ده بقى معنى مصر عند الاخوة العرب, هى دى مصر فى نظركوا .. هى دى ام الدنيا عندكوا .. العيب مش فيهم .. العيب فى الى فتح الدنيا على البحري .. ويرجعوا يقولوا مصر بلد الاهرامات والحضارات .. حضارات مين بقى.. قولوا مصر بلد المولات والكافيهات .. وعمار يا مصر
انا بصراحة صعب عليا حال شباب وشابات العرب واهتمامتهم ومناظرهم وتصرفاتهم .. وانا الى كان مقطع قلبي حال شبابنا التعبان !!! .. تخيلوا بقى هيافه وفلوس ممكن يعملوا فى مخاليق ربنا ايه .. ؟؟
وفى الهلمة دى كلها افتكرت الست المصرية الشقيانة .. الى بتصحى من النجمة وتصحى العيال وتودي المدرسة وتروح شغلها وتطبخ وتغسل وتمسح وتروح السوق وتدبأ فى مصروف البيت وتظبط الجمعية علشان اول الشهر وفى الاخر تهنن وتدلع ويبقى شكلها حلو .. وبعد ده كله ما تنفعش وتتقارن بمفعوصة من بتوع الكليبات ولا بنساء الخليج الى كل اهتمامتهم احدث خطوط الموضة والفنانين والافلام والاغاني والشوبينج (شوفوا اعلانات روباتا وانتوا تصدقوا)
افتكرت الناس الى قاعدين على محطة الاتوبيس وبيكلموا نفسهم فى العيش والعيشة والى عايشنها ... وعلى بعد كام متر على الرصيف التانى تنتقل لعالم اخر وكانك فى فيلم هندى
هتقولوا ده حقد وغل وكلاكيع سودة .. ايوا كلاكيع سودة اذا كان ده هيبقى حالنا وهتبقى دى اهتمامتنا وهى دى مناظرنا
والله شباب مصر الى مش عاجبنا اكتر مرجلة من المناظر الى شفتها ... ومنه لله الى كان السبب
وواحد اتنين .. الجيش العربي فين
الجيش هنجيبه منين ؟
وكتنا نيلة فى حظنا الهباب
27 comments:
اولا حمد الله على السلامة
ثانيا بما ان الموضوع دخل في كلاكيع
فكنت عاوز اقولك ان مصرنا المحروسة بالنسبة لاخوانا في الخليج بتيجي في الترتيب الرابع للاجازات بعد
1- اوربا
2- جنوب شرق اسيا
3- المغرب و سوريا
يعني حتى الي بييجوا خليجيين فرز رابع
المشكلة انهم من زمان بيجوا عندنا و مكناش بنحس بالفرق دة علشان كنا لسة عايشين زي البشر
.
منة لله الي كان السبب
الحسرة عليها وعلينا أيضا
يسير الاحساس بالمراراة والابتسامة في خط متوازي واحد في تدوينتك الأخيرة، يبدو أن مصرنا في نظر غالبية العرب كما أسهبتي، مرة يتيمة ساقتني الأقدار أن أجتمع في تاكسي واحد مع 2 عرب وفور وصولهم للأهرامات، أحدهم قال للآخر شوف بنات مصر، فقلت له: دول بناتكم، وعلى رأيك، ينعشوا الاقتصاد، ويعطروا البلد، أما حكاية العيون المرسومة والرموش (مش يمكن كله أورجانيك.. ولا إيه؟؟) عشان الناس دي صحتها حلوة، لا عندهم وزير يستورد مبيدات مسرطنة ولا بذور ملعوب فيها من إسرائيل، الأهم صورتنا أمامهم، فهم متخيلين أن مصر وبناتها تحت أمرهم، وللأسف هناك قلة تساعدهم على الاقتناع بهذه الفكرة، أنا اقتربت وحاورت فئة منهم مقتنعين بهذه الفكرة تماما،،، (هيلتوم رمسيس) سامحك الله على ما حركتيه في نفسي عن هيلتوم رمسيس، وفي شهر يوليو تحديدا، الأهم، روعة إحساسك بما يجري في مصرنا تستحق التقدير والتحية، وبصدق تمنيت أن تكون التدوينة أطول، ولنترحم جميعا على المأسوف على شبابه وشيخوخته الجنيه المصري، ولنسأل الله أن يزيد من اهدارهم للدرهم والريال والدينار والدولار في مصرنا، ورحم الله زعيمنا خالد الذكر جمال عبد الناصر، تذكري بالطبع كيف كان حال الجنيه في عهده أيام الدولار...
سمعت مع هذه التدوينة أغنية وطني حبيبي وطني الأكبر
مش صح كدة..
المهم جبتي ايه بس من الهيلتوم
؟
مساء الفل يا استاذتون نصف البلدون العبوبيوين؛
معلهش لسة راجع من اجازة الصيف للبيت وكنت كل ما ابص حداكون الاقيقون كووووووورةةةةةةةةةةةة وان ماليش خالص في الكووووورة انا لي بس في الاكل - طبيخ ايديه يا بنية علشان ماليش في الهامبورجر كمان- ... انا حارجع تانني اعلق بس قميصي علي الباب وارجع البنطلون لزوم الروشة للواد المكوجي - وآجي اكتب علي رواقة ...ماشي؟
تحيات إسكندراني في بلاد الله الواسعة
يا بنتوتة
ما تعمليش في نفسك كدا وماتكليش في روحك..
انا لي صديق خليجي ..هو نفسه مش بيرتاح من زحمة الخليجيين في مصر،
الماريوت والهيلوتون وحتى حياة
بيقولي
الهووول فيهم بيكون عامل زي سوق الغنم
من الزحمة
يالا..حصل خير
هما العرب احتلوا مصر كلها ولا ايه
اصل نفس المناظر ده شوفتها من فترة قريبة جدا فى ستى ستار
وبعدين قولت زى ما قولتى كدا من خرج من داره اتقل مقداره
وبعدها واول عربية على الشرقية وبينا يا اسطى
ما لها بلدنا يعنى مفيهاش عرب خلينى قاعده فيها اكرم لى
بصى ابقى تعالى اقعدى عندنا فى الموسم اللى زى ده مش عزومة مراكبية والله
والله أنا مش عارف أعقول إيه ولا أعبر إزاي واقع حقيق كلنا عايشينه ولكن هنقول إيه بقى هي دي بلدنا وأمهاتنا كلنا بتتعب علشان خاطر تربينا وتربي إخواتنا وأولادنا كمان لأن هي دي رسالتهم في الدنيا
أما بقى بالنسبة لإخواتنا الخليجيين مفيش عندهم الكلام ده أصلاً تربية إيه ووجع دماغ إيه المهم الحياة المرفهة اللي مفيش فيها إلا اللي هما عاوزينه بس
وآخر كلامي لازم نعرف إن الناس دي عندهم كل حاجة علشان كده مش فارقة معاهم حاجة أصلاً
أما إحنا يا غلابة معندناش أي حاجة فعلشان كده لازم تفرق معانا أي حاجة
تحياتي
اولا قبل اى حاجه انتى فين من زمااااااان
وحشتنا كتاباتك البهيه
من يوم بوست الاهلى ده وانتى اختفيتى كويس انه ماكنش مقال سياسى كنت افتكرتهم اعتقلوكى ولا حاجه
المهم بالنسبه للموضوع ده جميل
انا عاوز اقولك ان مصلر مش بلد المصريين دى بلد السياح والاجانب واى حد بيدفع فلوس
وكمان مصر مهاش مصر المحترمه اللى فى دماغك دى بتاعة اعلان يبقى انت اكيد فى مصر
وليكى منى احلى تحيه
وحمد الله على السلامه
عندك حق فعلا يابنوتة
مجرد مالصيف يهل بتلاقي الدنيا اتملن خليجيين بعربياتهم وعوايلهم ويملوا البلد كلها
لا ودلوقتي روحي شوفي سيتي ستارز واللي فيه
دي اول زيارة
مدونتك لذيذة اوي وشكلي هكون ضيف دايم
تحياتي
محمد سمير
و الله يا بنوتة انا ساكنة فى احمد عرابى ، و ده طبعا بجانب شارع جامعة الدول العربية،
هناك بقى فى كام فندق بتوع العرب اكيد،واحد منهم اهلى و هما نازلين الشغل الصبح بيبقوا لسه بيطلعوا من النايت كلوب،
و طبعا الاسعار فجأة تلاقيها بقت ازيد تلات مرات،
و الشارع كله زاحمة و حاجة بجد صعبة
اسكندرانى فى الغربة:
الله يسلمك ويبارك فيك يا فندم وانا متفقة معاك على كل الى ذكرته .. ان مصر تاتى فى عداد دول السبنسة بالنسبة للاخوة العرب .. وزمان مكناش بنحس بالمشكلة لان لا احنا ولا هما كنا كده ... الله يلعن ابو الى كان السبب
كاتبى الغالى:
اشكرك يا محمد على كل ما ذكرت والى دايما بيبقى كتير علينا واذا كان على الاورجانيك فهو اكيد اورجانيك هما فاضيين غير لكده .. وبالنسبة لموضوع بناتنا تحت امرهم فدى حقيقة للاسف .. وبقت هى دى سمعتنا فى كل دول الخليح ... وزاد وغطى كمان بنصدر بناتنا لحد عندهم وخدامات كمان
يعنى تيجي الاسرة من دول تتفسح فى مصر ومجرجرة معاها الخدامة المصرية علشان تصرب بالجزمة على ارض بلدها ... شفت اهانة اكتر من كده
حسبى الله ونعم الوكيل .. والف حسرة عليكي
اسكندرانى فى بلاد الله الواسعة:
الف حمد الله على السلامة يا فندم واجازة سعيدة, وخلاص سكيينا على الماتش وولعنا على براد الشاي .. مستنينك معانا على القهوة ... ليك فى الشيشية :) ؟؟؟
اكتب بالرصاص:
يا هلا والله يا فندم بها الزيارة .. البلوج كله منور ... وبصراحة انا ما بقتش عارفة اكل ايه ولا ايه خلاص مابقاش فاضل غير دراع وحتة من المناخير :)
يالا حصل خير
Desert Cat:
قطقوطة .. ازيك يا كميلة عاملة ايه .؟؟ يا بنتى انا شفت منظر على كوبرى قصر النيل مجموعة من شباب السعودية الفل واقفين على كبوت عربية سبور يا اختشى ورافعين علم السعودية وهاتك ظيطة وظمبليته قال علشان خير اللهم اجعله خير منتخب السعودية بيلاعب مش عارفة مين فى بطولة مش عارفة ايه ؟؟
يالا .. خلي الشعب يهيص وهييييييييههه
واكيد جاية ان شاء الله .. المهم عاملين ايه على الغدا ؟؟ :))
نوشا:
احنا مافيش فى ادينا اصلاا حاجة .. تخيل انك تتعامل زى الشحات او الخدام جوا بلدك .. فعلا حاجة تقرف
وما تعرفش ليه الاخوة بيبوصلنا هذه النظرة الدونية ... ربنا اداكوا بترول قاددر كريم ياخدوا منكوا
يالا قول اميييييين :)
محمد جادو:
الله يسلمك يا غالى .. والله وليكوا وحشة .. هو بعد ماتش الاهلى انشغلت فى كذا بطولة ودورى عالميين واشتركت فى الاولمبيكيات .. فا ما كنتش فاضية الحقيقة
وما ودناش فى داهية غير اعلان انت اكيد فى مصر .. الى مطلع البنات الحلوة ام بكيينى والرقاصات الى فى الديسكو
كنت عايزة ابعت اعتراض لوزارة السياحة واقولهم يا كدابين بقى المناظر دى فى مصر
حتى فى المواضيع دى هتغشوا كمان .. امال القشف المصرى راح فين .. اه افتركت ده الى بنصدره مع الخدامات
حسبى الله ونعم الوكيل
غمض عنييك :
منورنى يا محمد اتمنى تتكرر الزيارة
ومش هروح سيتى ستارز .. ده من غير عرب وبحس انه عايز يتولع فيه بجاز .. امال دلوقتى بقى عامل ازاى ..؟
لا ياعم مش لاعب :))
باكي:
فعلاا الله يكون فى عونك
يعنى هما ينزلوا عندنا وسط البلد يتفسحوا .. دول بقى ساكنين عندك
صعب اوى الواحد يصحى الصبح يصتبح على المناظر دى
صباح الفل علي عيونك يا أُستاذة و بنوتة من وسط البلد؛
اللي حضرتك كاتباه وكمان ملاحظاتك الدقيقة عن الاخوة الاعداء سليمة وفي محلها وكمان ملاحظات الاخوة والاخوات البنين والبنات والستات في التعليقات "الكومنت" كمان . انا استحملت العمل عندهم في بلادهم فقط لسبعة أشهر لا غير وبعدها انهيت كل علاقة بي وهؤلاء القوم للاختلاف الشديد في العقلية وطريقة التفكير والحمد لله ربنا اكرمني بعيد عنهم وتصرفاتهم المُشينة.
أتمني ان تسمح لك الظروف وتريهم وهم يأكلون علي راحتهم ؛ فسوف تتمني ان يكون هناك حائط حاجز ليمنع التقزز من مناظرهم وهم يأكلون أو تتمني ان يقوم تحتهم زلزال ياخدهم وياخد قرفهم معهم
عزيزتي بنوتة من وسط البلد؛
ان ماليش لا في الكورة ولا في الفرجة علي التليفزيون ومابه من فضائيات ولا الدخان ولا حتي الشيشة أو الطاولة معلش بقي - تربية قديمة متطورة بُنيت علي القراءة- المرة دي انا ممكن اتفرج عليهم بس وهم بيدخنوا بشرط ان يكون هذا في الهواء الطلق يعني في حديقة أو علي النيل في كازينو أو علي البحر علشان ما أتخنقش من الدخان وانا باخد القهوة بكثرة يعني مرتين تلاتة وحتي اربعة في القاعدة الحلوة ومايهمكيش الحساب كا العاده بيدفعه الواد حسين من حصيلة مكسب "النوبايل" بتاع البنت صفية أصل هو أكتشف ان فيه كاميرا ديجيتال وبيشتغل مصوراتي للاخوة الاعداء امام فندق "هاملت النيل" وبيبيع الصور لهم بعد مايغسلهم بمياه النيل علشان تطلع نظيفة شوية - رغم تلوثها درجة خيالية وارقام قياسية - ولكن قذارتهم تفوق كل الحدود .. يا للا بقي ، رزق الهبل علٌيٌ المجانين وسلامي لكل الطبقة المُمنتفعة من الاخوة الاعداء
وخاليني نشوفك دائما حتي ولو اني ماليش في الشيشة ، ماشي ؟ ماهو كده تبقي انت في مصر فعلاً حيث نسبة الُمُدخنين بارقام قياسية عالية و ولا يهمك مُش راح تفرق كتير !! موت بسبب التدخين أو الموت كمداً وغيظاً بسبب رؤية الاخوة الاعداء وهم عاملين من مصر زريبة لهم ولاولادهم والمصري يموت من الحسرة لاشغل ولا إدارة ولا خدمات ولا بيئة ولا تربية - طربية - ولا تعليم ولا تطور... كله محلك سر كما كانت من ثلاثين أو أربعين أو حتي خمسين سنة فاتت وهي فعلا موش فارقة؛ كله اصبح متطور؟؟!! ومتقدم في الهبل والاستهبال مع الدش والفضائيات و"النوبايل بالديجيكام" ...ويالا بنا نغني في برامج العبط ومين يكسب قفاه من الضرب المُقرر في المنهج الجديد للمصريين و الهري ومناقشة مُهاترات وكلام عبيط قُيل في اي محطة إذاعة أو تليفيزيون ويللا .. هوبا... نضيع وقتنا واحنا عاملين إننا مُلمين ببواطن الامور وخفاياها!! مأهمية هذا؟ لا أعلم؛ واصبحنا علماء فكل شئ واي شئ .. نناقش ونستهبل وننسي الاساسيات ونمسك بجوانب الامور ونتشعب الي مالا هدف منه
أأسف جداًَ للإطالة ومش راح أعمل كده تاني .. دي آخر مرة اكتب كتير كده
تحيات إسكندراني في بلاد الله الواسعة
هو حد قالهم ان مصر هي المرقص اللي ممكن يتبرجوا فيهم بس العيب مش عليهم
العيب علينا احنا
اسف لاندفاعي بس بوست لذيذ
اسكندرانى فى بلاد الله الواسعة:
الف حمد الله على السلامة ويا فندم البلوج كله تحت امرك واصحاب البلوج كمان .. حضرتك تأشر بس واحنا نلم القشر على طول
وايه ده يا فندم حضرتك جبتنا من الشرق للغرب ولخصت مصر وبلاويها السودة فى الكلمتين بتوعك
مش عارفة اقول لحضرتك ايه بس ... حالنا وعارفيينه وعايشيينه .. لكن كمان ريحتنا فايحة لبلاد الله الواسعة .. وفضيحتنا بقت بجلاجل
ربنا يستر علينا
وتحياتي الغالية يا فندم
Shams:
لا داعي للاعتذار يا فندم
منورنااا
ومصر هى المرقص والكافية والمول والملاهى والصحبة الروشة والسهرة الحلوة
يا حسرة علينا .. امال احنا مش بنشوف الحاجات دى فى بلدنا ليه ::؟؟؟
اسلوبك فى الكتابه بيقول أنك فعلا من وسط البلد :)
مقارنه جميله فعلا بين عالميين ميفصلش بينهم غير 200 متر
مناظر منفره لناس شكلها غريب ومناظر مؤثره لناس بتكلم نفسها
حكمه ربنا .. ربنا يعادلها من عنده ويصلح حال الناس كلها .. احنا وهم
pleased to meet u
ihapoof:
عزيزى ايهاب
انا سعيدة جدا بالزيارة الغالية
والى اتمنى انها تتكرر دوما
انا فعلا من معاميق معاميق وسط البلد ومن سنيين اكتر من سنيين عمرى .. ولو اتزنقت فى اى مشوار او سبوبة فى وسط البلد انا تحت امرك يا باشا
عجبنى او موضوع الصلاة فى مارينا الى عندك :) ربنا يرحمنا من عنده ... هو احنا لسه شفنا حاجة
واهو يا سيدى العرب جم كمان وكملوا علينا
منه لله الى كان السبب
طبعا يا بنتي ضفر شبابنا برقبتهم
الا من رحم ربي طبعا
نفسي في حاجة واحدة بس يا بنوتة من شعبنا الغلبان و حكومتنا العظيمة
يرفعو من كرامة شعبنا و نحسسهم ان احنا اللي كتر خيرنا مستضيفنهم في بلدنا و مستحملين زحمتهم و قلة ادبهم
مش معقول نبى متبهدلين برة و جوة
و سلام مؤقت
SHAH:
ايه ده ايه ده
حكومتنا الرشيدة ؟؟
طب نسيت خالتى نزيهة وعمتى شفافية قالوا ايه ؟؟؟
الى بيقولوا ان دول سياح وبيدخلوا للبلد عمله صعبه واحنا بناكل ونشرب ونتنفس الهوا على حسهم وعلى حس روايحهم المهفهفة
ده بدل ما نوطى نبوس ايديهم وجزمهم
صحيح شعب ناكر للجميل
الا هو مين العبيط الى بيحاول يفهمنا الكلمتين الى فوق دول ؟؟ :)
مافيش غيره .. منه لله اصل طلع ان هو الى كان السبب
أولا شكرا على الزيارة ولو ماكنش قصدك ومعلش ياستي الورور بكره يكبر
وثانيا مدونتك لذيذة أوي جدا خالص وياريت تعمليلي عندك ابونيه هنا
ثالثاموضوع الخلجيين بيجوا مصر لأن لبنان مش أمان وسوريا شرحه ودبي حر جدا وأوربا غاليه جدا وأمريكا حدث ولاحرج ومصر أقرب وأرخص وأسهل في الذهاب والعودة
أما بخصوص السلوكيات انا واحد مقيم في السعودية واقدر أقولك أن هنا أصبحت الصورة ذي مصر نفس المشاهد اللي بتحكيها بقت هنا ويمكن السنه الجاية يفتحوا سينما سبحان الله بعد ما كانت النخلة اللي تتهز يقطعوها لكن نقول ايه في النظام العالمي الجديد على العموم الفرق مش كبير بين هنا وهناك
ونعيب زماننا والعيب فينا وما لزماننا عيب سوانا
تحياتي ليكي
Dear All
Sorry for Writing in English .. as My PC that am using now is not supporting the Arabic Language now
Kabrtsh:
Thanks a lot for your Visit .. that i do really appreciate a lot .. and it would be my Honor ya Fandem to be my permenant Vistor .. and to have (Eshtrak) u have to pay 1.75 (Ersh) + el Dam3'a + Photocopy from ur (Beta2a)
:)
Horas:
Ya Welcome Back ,, i do really miss your visit and i hope that everything is ok with you
and best regards from me too
جانا الآن ما يلي
علمت مصادر مطلعة بمحتوى التدوينة القادمة لبنوتة وسط البلد، هذا وقد صرح مصدر مسئول بأن التدوينة الجديدة سوف تتناول .......و ......و..... أما عنوان التدوينة فسيكون ..... وبناء عليه فقد قررنا نحن كقراء مناشدتها الإسراع في التدوين حرصا على تأكيد تواجدها بقوة بين المدونين، ومن المعروف أن بنوتة وسط البلد (بتجيب الكلام من الآخر) ولهذا وجب التنويه ومن جانبنا نتمنى لها ولأسرتها كل الخير
وفي هذا الصدد صرح الأمين العام لجامعة الدول العربية السيد عمرو موسى بــــــــــ كما صرحت كوندليزا رايس بـــ هذا وأعربت مجموعة من سفارات وحكومات الدول العربية عن قلقها تجاه ما نشر في التدوينة الأخيرة، خوفا من توتر العلاقات بين حكومات الدول العربية من تصرفات بعض العرب الغير مسئولة
على فكره انا مررت عليكى تاج
ماتبقيش تهربى منه وجاوبى عليه
وسلام
محمد باشا:
كده يا فندم تفتن عليا .. ع فكرة مصاردك دى نص كم :) واوعى تصدقها تانى
جايين يا فندم على طول .. مسافة السكة ان شاء الله .. بس انت قول للناس الى بالى بالك يخفوا عليا شوية علشان الاقى وقت :)
محمد جادو:
ايه ده تااج ؟؟
وده اخدوا فى رغيف ولا فى كوز:)
طب اوعدك انى مش هشووووووووووووووفه :)
تحياتى وشكرا على الاهداء الغالي
يا رب حد يعبرنا ويسأل فينا
حورس:
تحياتى
وصدقنى يا فندم
والله بحاول الاقى رد
ع العموم دايما منورنى بهللتك الغالية
Post a Comment