ايه الحلاوة دى .. ؟؟ ايه اللعب ده ... ؟ اهى هى دى الروح وهى دى الكورة ...؟؟؟ الله عليك يا متعب .. الله عليك يا ابو تريكة .... الله علييك يا اسامة يا حسنى
ايه يا رجالة ده ... الكورة مالهاش كبير يا اخوانا ... والله الكورة ماليها كبير ... شايفين الجماهير فى المدرجات .. الناس مش مصدقة نفسها .. الناس بتنطط من الفرحة
شايفين الاجوان ؟؟ شايفيين اللعب ..؟؟ شايفيين الترقيص .. ؟؟ فعلااا حاجة تجنن يا جماعة ... مش ممكن .. مش ممكن ... مش ممكن
مبروك عليكوا الكاس يا اهلاوية ... تستاهلوا والله يا رجالة ... ماتش ما حصلش وماتش جمييل وماتش ما اتكررش من سنيين .. فعلا الكورة اجوان ... و هى دى روح الفانلة الحمرا ... والملعب الاخضر ... وليللتنا البيضة ......
وانا وانت ...... ورقصنى يا حضري
--------------------------------
والى هنا مشاهدينا الاعزاء انتهت احداث مبارة الديربى بين القمتين الأهلي والزمالك فى ماتش نهائى كاس مصر
والى اعتلى عرشه فريق القرن فريق النادي الاهلى
ونقول لجماهير النادى الأهلي الف مبروك على الكاس
ونقول لجماهير نادى الزمالك (هارد لك)
وكان معاكوا على الهوا مباشرة معلقكوا الرياضى ..
سيكي بيكي سيكي بيكي
(معلق أهلاوى)
-----------------------------------------------------------
النهاردة كلنا شفنا ماتش .. اقل ما يقال عنه انه ماتش ما اتكررش من سنوات
فعلاا الواحد وهو بيتفرح على الماتش نسينا انتمائتنا وتعصبنا الكروى
وما بقتش عارف انا اهلاوى ولا زملكاوى
كلنا ما نقدرش نقول ان فى فريق خسران وفريق كسبان ..
الفريقين ادوا مبارة متكافئة وكلنا بننحنى لفريق نادى الزمالك
الى قام بماتش رائع
وهى دى الكورة
وكان لازم يبقى فى حد كسبان وحد خسران
وكفاية علينا احساس المبارة واحنا عندنا 22 لاعب بيأدوا لعب بمهارة وحرفنة
وروح رياضية
وكفاية على الزمالك شرف الحصول على اللعبة الحلوة وهارد لك يا زملكاوية
(معلق زملكاوي)
-----------------------------------------------------------------------------------
النهاردة حققنا التارجت يا جماعة وحققنا ارباح خيالية من المسجات والمكالمات طول فترة الماتش ومع كل جول وبعد المباراة
يا رب ما يحرمنا من ماتشات الأهلي والزمالك
ولا من هبل الشعب المصري
جو اون يا رجالة
وعقبال الماتشات الجاية
وبالمناسبة العظيمة دى هنصرف نص شهر بونس لكل العاملين فى الشركة
(مدير فى احدى شركات المحمول)
-----------------------------------------------------------
بييب بيييب اهههههللللللييي
بييييب بييييبب اهلللللللييييييى
تييييت تيييييت ... تيييت تيييييت
ترابرا تاتاات تييييي
اهلللللللى اهلللللى ... ارقص يا حضررررررري
ارقص ياا حضرررررررييي
(الشارع المصري)
-----------------------------------------------------------
معلش معلشش معلششش
سد يا حبيبى سد
ومبروك للاهلي
هييهيهيهيهههه هييههي هييهي ههييي
خلاص بقى ما تفتحوش بقكوا مرة تانية
معلش هى دى روح الفانلة الحمرا
لازم يبقى فيه تحدى
مش معقول يعنى ننزل كل مرة نكسبكوا كده ونطلع
(واحد اهلاوى لواحد زملاكاوى)
-----------------------------------------------------------
مافيش اهلاوي يفتح بقوا
والا هلم حاجتى واقوم امشى
ما تنكروش ان احنا الى كنا بنجيب الاجوان الاول
وانتوا الى كنتوا بتقلدونا
يالا اهو ماتش من نفسكوا
ولا انتوا نسيتوا برشلونة
واذا كنتوا نسيتوا نفكركوا
(واحد زملكاوى لشويةأهلاوية)
-----------------------------------------------------------
عدد حالات الاصابة بالسكتات الدماغية وصل حوالى 20 مع نهاية الشوط الثاني
والمصابين بالجلطات ترواح بين 50 - 80 ما بين الشوط التالت والرابع
وحالات الوفيات حوالى 40 مع نهاية المبارة
وتراوحت انتماءات المصابين ما بين اهلاوية وزملكاوية
على ان اكثر حالات الوفاة كانت من بين الاهلاوية من صدمة الفوز
وكثرت الجلطات والسكتات الدماغية وارتفاع ضغط الدم بين الزملكاوية من صدمة الوكسة
(مدير مستشفى عام)
-----------------------------------------------------------
اهلي وزمالك ... كاس ودورى
والعيش والعيشة والى عايشنها
منه له .... منه له
وهذا كان نقل حي لاحداث ما قبل وما بعد المباراة
والى سمعته بعد ما صحيت من النوم
وده لانى ما اتفرجتش على الماتش من اساسه :)
(انا بنوتة)
28 comments:
ده انتى معلقه رياضيه هايله
وعلى فكره انا وجهة نظرى من وجهة نظرك ومدير شركة المحمول
ربنا ما يحرمن من هبل الشعب المصرى
وانا مابشجعش حد بس لو شجعت بشجع الاهلى لان بحس انه دمه حر وانه الاصل
لكن انا مش مع التشجيع ابدا ومش مع اللى بيحصل ده خالص
من الدين ان انا العب كوره ورياضه
لكن مش انى اسيب مصلحتى واعد ع القهاوى واراهن واشاكل واتعصب واهتم باخبار الرياضه للدرجه دى لدرجة انه فى ناس كتير بتشترى الجرايد كل يوم عشان صفحة الرياضه
وهو ده المطلوب من الجهات العليا
احبك تطبل تهلل تهبل
عشان مطش كوره
وعلى فكره لو لاحظتوها هتلاقوا انه فى اغلب الاحيان الدوريات والنهائيات والحاجات دى بتبقى متزامنه مع احداث سياسيه هامه لكن بيلهوا بها الشعب
رائعة كعادتك
ومتألقة دوما بإذن الرحمن
لم أشاهد المباراة حاولت أن أنام وقتها لكن النوم عاندني، وسافرت إلى دنيا تحملني إليها أغنيات جارة القمر فيروز، وبينما إنشغلت الناس بالتشجيع فشلت في معرفة كاتب تلك الكلمات التي غنتها فيروز، جائت معذبتي في غيهب الغسق
كأنها الكوكب الدري في الأفق
فقلت نورتني ياخير زائرة
أما خشيتي من الحراس في الطرق
فجاوبتني ودمع العين يسبقها
من يركب البحر
لا يخشى من الغرق، وبينما كانت تغني فيروز لأجلك يا مدينة الصلاة أصلي سمعت ضجة خفيفة عرفت أنها هدف للزمالك، وعندما كانت تعاتب عاقد الحاجبين على تجاهله زادت الضجة، وكما قال الأخ محمد جادو نقلا عن القصيدة التي تنقالتها الأوساط الأدبية مؤخرا أحبك تطبل تهلل تهبل عشان ماتش كورة، هكذا أغلبية الشعب المصري، أما عن حكاية شركات المحمول نقلتي الأمر بسيناريو رائع، ووووو
تحية تليق بتفاصيل روعة أشعارك وقصائدك
عفوا أسلوبك
انتى كنتى غايبة فين يا جميل طول الفترة اللى فاتت دى
المهم
طبعا يا كابتشششششششن نقلتى المبارة وروح الشارع المصرى من مشجعين لفئات لصنايعيه
وسبع صنايع والبخت ضايع
الاهو الناس اللى بتعمل خناقات وبيجى لها هوس والشباب اللى بيجروا فى اشلارع بالعربيات ويصدعوا دماغ اهالينا دول بيكسبوا ايه يعنى ده لو حد قالهم اسراتئيل احتلت البلد حيقولوا عقبال المانيا
زملكاوي :الي حصا في الماتش دة محصلش قبل كدة انا مشفتش كورة مصرية بالمتعة و الاثارة دي
اهلاوي : بس احنا كسبنا
زملكاوي : اللعيبة دي لو كملوا على كدة حنشوف الموسم الي جي ملهوش حل
اهلاوي : بس احنا كسبناكوا
زملكاوي : دا غير انهم لو لعبوا كدة في المنخب يبقا حنعمل حاجة في الامم الافريقية الي جاية
اهلاوي : بس احنا الي كسبنا
---------------
لما فاق الاهلاوي مجبس في المستشفى
كل الي قالة :برضوا احنا الي كسبنا
أكتر حاجة قرأتها عن ماتش امبارح بصراحة في الجووووووووون
انا بأه شفت الماتش.. بس كنا في البيت بنكسر حدة التوتر بإننا نحول على العاشرة مساء او اي حاجة كل فترة كده.. أصل مش معقول يعني نفضل ساعتين في شدة أعصاب.
بس براوة عليك يا اهلي.. و برافو عليك يا زمالك.. بجد لعبوا بجدية الناس دي.
محمد جادو:
بغض النظر عن الأهلي والزمالك
كلهم حبايبنا وفوق عينا وراسنا
وبغض النظر عن الكورة الى ستنا وتاج راسنا برضة
بس تقول ايه ؟؟ على شوية شباب ورجالة وستات ينزلوا الشارع يتحزموا ويرقصوا علشان فريق بغض النظر هو مين اخد كاس بغض النظر هو ايه ؟؟؟؟؟؟
:)
تحياتـــي
كاتبي الغالي:
اشكرك على روعة اسلوبك الادبي فى التعليق
والكلام الجامد اوى علينا يا فندم
انا برضة كنت نايمة ورحت فى سابع نومة بس كنت كل شوية اقلق على الدوشة والزعيق الى فى الصالة :)
وزى ما قلنا ان الكارثة مش فى الماتش .. ولا فى الكاس
وجميل ان فى الزمن ده يكون لسه فى حد بيسمع فيروز
منورنى متالق دائما
Desert Cat:
قطقوطة .. اهوه هو ده الكلام الخلاصة
الجماهير الغفيرة - مع الاعتذار للغفير - لو طلبنا منهم يتجمعوا كده ويتلموا لتحرير القدس مثلاا
هيعبروونا ؟؟؟!!
مع انهم لو خرجوا من الاستاد بربطة المعلم كده واتمشوا بس من غير ولا صوت ممكن يرجعوا الملك فاروق للحكم تانى :)
اسكندراتي فى الغربة:
شكلك كده زملكاوى يهودى دسيس :)
ايوا الاهلى اخد الكاس
اووووه اوووووه
وكمان اخد 3 مليون جنية
اوووه اوووه
وحسبى الله ونعم الوكيل
اوووه اووووه
:)
علا:
حبيبتى وحشانى وحمد الله على السلامة للبلوج سبوت تانى :)
انا كمان من كتر شدة الاعصاب والى كان حصلي فى كاس الامم الافريقية الاخراني
اخدتها من قصيرها ودخلت نمت وريحت دماغي
اصل انا ما عنديش غير مرارة وقلب وطحال وكبد واحد :)
أهنيكي جداً على تعليقك على الماتش
وأهنيكي أكتر على المواقف بعد الماتش اللي ممكن تكون منها جزء كبير جداً من الحقيقة
وممكن كمان تكوني مزيعة بعد كده في مباريات الدوري
لكن الأهلي بصراحة يستحق الفوز مش الزمالك
وعموماً هارد لك للزمالك ولاعبيه وجمهوره
وانا اللى فكراكى اهلوية وعمالة اقول انتى مية مية تعملى زيى وما تتقرجيش على المطش لالالالالالالالالالا بس احنا بردة اهلا وية وجمدين اوى
المقالة جميلة جدا و خفة دم رائعة و ناقشت اوضاع كتير في حياتنا
وجالك قلب تدخلى تنامى والماتش شغال
دا انا مطحون فى الشغل بس كنت هصورلهم قتيل علشان كانوا عايزنى اشتغل وقت الماتش
الواحد كان زمان مدمن كورة جدا لكن اما اشتغلت الموضوع خف شوية
لكن ساعة ماتش زى ده مش ممكن الواحد يفوته
الحمد لله
كان صابح عندى امتحان اطفال
وزملكاوي
:)
بس كنت بعرف الاهداف من صراخ الناس في الشوارع
صرخات رفيعه طويلة قليلة نوعا ما
يبق جول للزمالك
صرخات طويلة كثيفة ربما سبة او سبتان
جون للاهلي
صرخات من الجانبين
فرص ضائعة
سباب من الجانبين
فاول
:)
الحمد لله اني كان عندي امتحان
Nosha:
انا متشكرة اوى على زيارتك الغالية يا نوشا
ويا سيدى
الاهلي عمهم وحابس دمهم :))
Mariamagdolen New:
اصل انا عملتها قبل كده فى ماتش مصر بتاع كاس افريقيا الاخراني ده .. قعدت اقول انا وطنية وبنت نزيهة وشفافية ولازمن ولابد اقعد اتفرج على الماتش
فضلت مستحملة مستحملة وجت على ضربات الجزاء ودخلت نمت .. قلت اعصابى مش قادرة تستحمل ..
والحمد لله قمت بعد اخر تسديدة الى اخدنا فيها الكاس
وسالت نفسى احنا ليه بنعمل فى الى جابوا اهالينا كده :) ؟؟؟؟
Shams:
منورنى يا فندم .. وانا متشكرة جدا على الزيارة والمرور الكريم
مصر هى امي:
ما انا لو كنت قعدت علشان اتفرح على الماتش كان قلبي ده هيقف .. وبعدين ده بقى كان تحدى للارادة ان انا بنوتة كوول وعادشى جداا وممكن انام والاهلي بيفرفر علشان ياخد الكاس
الا هو احنا بقى اخدنا ايه :) ؟؟؟
أحمد سلامة:
ايه ده زملكاوى
وجالك عين تقولها :)))
انا تانى يوم بقول لزميلي فى شغلي القديم ده الزملاكاوية والاهلاوية هنا فى الشغل مقطعين بعض
قالى ليه هو لسه فيه زملكاوية :)
سيبك انت انا بموت فى حازم حسن .. الا اخبار الامتحان ايه ؟؟
كده كده
الاهلى عمهم وحابس دمهم
ههههههههه
تحيا تى
جميل جميل جميل
ياااه
كل البوست الطويل دا علىالاهلي
اينعم انا أهلاوي
بس لازم برضه نراعي شعور اخوانا في الانسانية الزملاكاوية
كل عام وانت بخير
وفعلا
كلام خلاصة
الجحيم هو الحقيقة:
كده كده
زى ما انت قلت كده بالظبط :)
نهى محمود:
مش قادرة اقولك انا اد ايه مبسوطة لزيارتك الغالية
ويا ريت ما تنسيناش ابدا :)
طهقان زهقان مضايق:)
اهلى .. زمالك .. اسماعيلي .. موزمبيقى
كلهم مخاليق ربنا
وبعد ما ثبت انك من بنى جنسيتنا العظيمة الاهلاوية الحمراوية
تحب تشرب ايه قبل ما المدام تيجي :)؟؟؟
شاهد ماشفش حاجه
هههههههههههه
مالكيش فى الكوره ورغتى الرغى ده كله
امال لو اتفرجتى على الماتش
وشجعتى الاهلى
هنلاقيه بتخدى مكان احمد شوبير فى قناه دريم؟
البوست حلو اوى مع انى اتصدمت فى الاخر
بس والله جميل
تحياتى
momken:
يا سيدى انا متشكرة على زيارتك .. بس ايه ده انا رغاية ؟؟
انا رغاية ؟؟
بالذمة انا رغاية ؟؟؟
بزمتك شفنى قبل مده برغي رغي على الفاضى
ولا برغى فى كلام مالوش لازمة
انا مش قادرة اصدق
انا رغاية
يا عم طب قول كلام غير ده
:)
كفاية عليك كده
بس انت اتصدمت ليه :$
مستنين البوست الجديد بقالنا فترة
فرحة الاهلي نستك التدوين
Shams:
انا جايية فى السكة ان شاء الله :)
انا متشكرة اوى على السؤال والاهتمام الكريم يا فندم
جامده جدا
:):)
الاهلى اجمددددد :)))
والله يا بنوتة
إنتي قطعة سكر
: )
تعليق جميل و بوست ملوش حل
أنا كمان مش اتفرجت على المباراة دي
لكني سمعت عنها سمع خير إنها كانت جامدة
ربنا يديم المعروف يأى
تحياتي
منى المحمودي
"لسه عايزة تعرفي مين محمد "
; )
wa7dina:
عزيزتى منى
منورانى ومنورانى زيارتك الغالية
افضل تصرف انك اقلبي الزبون اقصد التليفزيون وادخلى نامى
بس اوعى تسيبى محمد لوحده ؟
الا هو مين محمد بقى :)
مدونة لطيفة
تحياتي
Hook:
اشكرك عزيزى على زيارتك الغالية
واتمنى اشوفك دايما عندنا
تحيياتى
أنا بقول انك تنضمى لفريق مودرن تى فى وتريحينا من المعلقين التعبانين قولتى ايه ...وبصفتى مشجع أهلاوى اقول لو لم تكن أهلاويا فحاول أن تكون
Chetos:
يا فندم ده انا اشكر الفرصة السعيدة الى خلتك تنورنا واشكرك على هذه الثقة الغالية
طب ما عندكش واسطه بقى مودرن تى فى ؟؟
تحيااتى :)
Post a Comment