للى مش عارف يقرا ... كلام خلاصة
مرة شفت عربية مكتوب على ضهرها "انا واد خلاصة لاصة" وساعتها الاسم نخشش فى نافوخى .. لذلك قررت اعمل مدونة واسميها كلام خلاصة لذلك من وانا فى هذا المزنق احب اوجه الشكر لصاحب العربية
هل فكرت فى اغلاق مدونتك ؟ ولماذا ؟
كتيييير .. لما بكون مش فاضية .. او زهقت من شكلها
فيعنى عادى جدا فى اى يوم لو دخلتوا ولقيتوا شاشة سودة
صورتك فى المدونه ورمزيتها ؟
مافيش صورة .. دى صورة ورقة وقلم علشان تمشى مع الكلام... وبالمناسبة رمزية بتسلم عليكوا
لما دخلت عالم التدوين اساسا ؟
علشان العربية الى كان مكتوب على ضهرها واد خلاصة
وكمان من باب النقد اللاذع والتورية فى التعبير والاستعباط فى الاداء
جمله قيلت فى وصف مدونتك ؟
اكتب بالرصاص اول ما بدأت التودين قالى:اهنئك على افتتاح هذه المدونة واللي شايف فيها ذوق عالي قوي وحس اعلامي مبشر
ومن بعدها وانا قررت اكمل
التعليقات بالنسبه لك ؟ واهميتها ؟
لولا التعليقات كان زمانى قفلت الدكان من زمان .. يعنى بقاء التعليقات بالنسبالي كالانسولين بالنسبة لمرضى السكر
وتكمن اهميتها فى اهمية ما احاول ان اعبر به فى سطورى
احلى بوست كتبته ضع اللينك ثم اذكر لماذا ؟
بحب اوى جابولى ورقة وقلم
واشمعنى وسط البلد
ومش عارفة ليه ؟؟
افضل مدونه قراتها ؟
مدونات الى انا مازلت حريصة على متابعتها وباخد معايا كيس برتقان وجوافة وانا رايحة .. تعتبر بالنسبالى افضل المدونات
اسوا مدونه ؟
مع انى عارفة انه غير لائق اذكر اسم المدونة ... وكتير هربوا من السؤال ده بمنتهى الذكاء .. لكن انا هقول وانا مش بيهمنى حد واحنا كنا رجالة ووقفنا وقفة رجالة ولمؤاخذة
مدونة ما يدعى :Malcom X
هيحصل ايه لمدونتك لما تموت ؟
هخلى الورثة يتبرعوا بيها
اديت الباسورد لحد قبل كده ؟
كتيييييييييييييير ... اصل مش اسرار حربية يعنى
ده كله هاتش فى الكلاتش
كانت ايه طبيعة علاقتك بيه ؟
حبة كتير من صحابي على شوية كتير من العيلة
اسمك ؟
ان ان ان اان ااااااااااااااااااه
المشهور بيه وسط اصحابك ؟
والله صحباتى بيقولولى يا دوووووووووو
عمرك ؟
بتاع 25 يعنى حوالى 18 سنة
دراستك مجالك ؟
الدراسة غير المجال
شخصيتك نوعها ايه ؟
بمبة بكرانيش فحلووؤى
السفر بالنسبه لك ؟
زى السفر بالنسبة لاى حد معدى فى الشارع
وقت فراغك بتعمل ايه ؟
يعنى ايه وقت فراغ ؟؟؟؟
الاكله المفضله ؟
كافيار .. والسيمون فيميه .. والفواجرا
يعنى من الاخر الفول والطعمية والعجة
الصفات التى اخذتها من بابا ؟
مناخيره والبساطة
الصفات التى اخذتها من ماما ؟
البساطة برضة وافتكر الصوابع
اكتر ست حاجات بتكرهها ؟
الكدب
النفاق
النفساويات السودة والصفرا
الحقد والغل
التليفون والموبايل
اطلع ورقة من مصلحة حكومية
اكتر ست حاجات بتحبها ؟
البحر
الهدوء
الأنتخة
النظام
كل احلامى تتحقق
والمحشى
الشغله بالنسبه لك ؟
بسببه الوقت الفاضى بيبقى مليان وخنييييق
الانترنت بالنسبه لك ؟
اكل عيشى
امرره لمين ؟
لاول خمسة هيدخلوا ويعلقوا على البتاع ده
تحيييييييييييييييياتى .. والان مع فاصل
حالوا يا حالو
14 comments:
الظاهر ان انا اول واحده من الخمسة الى هيعلقوا
لولولولولىىىىىىى
بس تصدقى انا اتفاجأت اننا متشابهين فى حاجه
اصل انا كمان العنتر نت هو برضه اكل عيشى والفاكهه بتاعتى كمان
كل سنة وانتى طيبة يا جمل
ورمضان كريم
إلى الكريمة أن أن أن أأأأأأأأه
ولو إن اللي عدت دي موسيقى تصويرية
وجعتي عنيا باللون مش عارف إيه اللي قلتي عليه
طيب كدة بقى أنا مش هاعرفك
لأني ولو مؤاخذة لا أجيد تمييز الألوان
يعني معوق في الموضوع ده
إلى دو
تحية إلى ما وصفتيه بالـــ
النقد اللاذع والتورية فى التعبير والاستعباط فى الاداء
تحية إلى إبداع القلم والكي بورد الذي وصفتيه بهذا الوصف
تحية إلى هذا التواضع
تحية إلى هذه التدوينة وصاحبته أن أن أن أأأأه
أنا فاكر أغنية زمان بتقول أنا واد خلاصة لاصة لاصة ومية مية
هل ليها علاقة بالموضوع واسم المدونة يعني
أنا هربت من الموضوع ده عشان ماليش مدونة
بس يالا حصل خير ان شاء الله
تقديري
اهديتيه لاول خمسة يعلقوا يابنوتة
شاطرررررةةة
طب انا بقا جاوبته قبل كده
:P
بس على فكرة انتي شخصيتك زي شخصيتي تمام..بمبى بكرانيش بردو
اجاباتك لذيذة ودمها خفيف اوي
كل سنة وانتي طيبة
محمد سمير
هههههه
هي المناخير من الصفات .؟؟
بقا واخدة من والدك مناخيره
ومن مامتك صوابعها
وطبعا واخدة من اختك الكبيرة الجيبة والبلوزة الكحلي
يا ستي
كل سنة وانت طيبة
وشفتي إزاي صدقت نبوئتي
اصل الواحد عنده حس فني صحفي ويقدر يشم الصحافيين عبر الشاشات
رمضان كريم
مساء الخير
وكل سنة وانت طيبة
تحيات إسكندراني في بلاد الله الواسعة
Desert Cat:
قطقوطة .. انتى اول واحدة من الخامسة وشربتى خلاص التاج :)
النت كان زمانى بالنسبالى عالم مجهول اسمع عنه من بعيد .. بعديها كان حاجة حلوة بعمل عليها شات واتعرف على ناس كتيير .. بعديها وواحدة واحدة بقى حياتى الى ما اقدرش اعيش من غيرها وفى الاخر بقى اكل عيشى وفولى وطعميتى :)
وانت طيبة وبالف صحة وسلامة
والله اكرم
عزيزى الغالى:
اشكرك على تعليقك الدائم والمتميز .. وبرضة هتاخد التاج وابعتهولى فى ورقة وانا هتصرف
كل سنة وانت بالف صحة وسلامة
وترجعلنا من البلد بالسلامة :)
غمض عينيك:
محمد اشكرك على الزيارة الغالية
وانت طيب وبالف سلامة
ورمضان كريــــــــم
أكتب بالرصاص:
يا فندم المدونة كلها منورة بزيارتك الغالية ..وفعلا تعليقك على اول الموضوعات الى كتبتها كان سبب رئيسي فى انى اكمل
اشكرك فعلا
وع فكرة واخدة كمان من اختى الصغيرة الطرحة المشمشى :)
سلامي للبنات ومامتهم
ودايما طيبييين وبخيير ومباركييين ان شاء الله
Iskandrani:
اسكندرانى فى بلاد الله الواسعة .. مصر واسكندرية كلها واقفة طابور وبيقلولك كل سنة وحضرتك بمليون صحة وسلامة
يا ترى فى بلاد الله الواسعة فى فانوس ؟؟ :)
تحيااااااااتى .. وحشتنا يا فندم
خساااااااارة
انا مش من الخمسة
بس يلا اهى جت ف التاج احسن ماتيجى ف العيال
انتى عثولة اوى :D
كل سنة وانتى طيبة
بعد السلام عليكم
دي زيارتي الاولي لمدونتك الجميلة
وأول ماجيت جيت علي تاج لذيذ
تحياتي
وكل سنة وانتي طيبة
Rana 3amra:
عزيزتى
انا سعيدة جدا بزيارتك الغالية
ويا سيتى ما تزعليش هلفلك التاج فى ورقة وانتى ماشية
الا قوليلي انتى صحيح عندك 16 سنة ؟؟؟؟
وانتى (عثل) برضة والله :)
وانتى طيبة وبالف صحة وسلامة
Abo Salah:
ابو صلاح منورنى وشرفتنى زيارتك الغالية
والمرة الجاية لما تيجي هتلاقى جاتوه وبسله
هشيلك منابك :)
ورمضان كرييييم
كل سنة و انت طيبة و رمضان كريم
معلش متأخرة شوية
علشان كنت مستني لما يخلص اول خمسة كومنت
:)
اسكندرانى فى الغربة:
وانت طيب وبالف صحة وسلامة
والله اكرم
طب طلاما مافيش تاج .. فين القطايف والكنافة ؟؟
:)
منورنى
رمضان مبارك علينا جميعا ان شاء الله
كل سنة وانتي طيبة يا قمر
عجبتني جدا اجاباتك
تحياتي
منى
wa7dina:
Monmon
وانتى طيبة وبالف صحة وسلامة يا قمر
وان شاء الله تكونى دايما بخير
bamoooot feeky ya DooOooo kikowam
Post a Comment