Monday, May 5, 2008

ريـــــــــــــــــــا وسكينـــــــــــــــــــة



خرجت علينا بالامس ..

ريـــــــــــــــــــا وسكينـــــــــــــــــــة ..

فى وسط اندهاش واذبهلال الجميع الذي قد يصل الى حد الشلل التام امام جميع المحافل الاعلامية والتليفزيونية

معلنين امام الجميع
وبمنتهى البجاحة والجرأة
مكممين افواه الجميع بفوطة متغرقة مية مبلولة
لحد ما الكل قطع النفس
ومع موسيقى تصويرية تجرى فى الخلفية


(يا اختى عليها يا اختى عليها .... يا اختى عليهاااااااااااااااا ...
ما جت رجليها ما جت رجليها ما جت رجلييييييهااااااا )


معلنيــــــــــــــــــــــــــن


زيادة موارد الغرزة بزيادة اسعار البنزين


( ...... ما جت رجليها ما جت رجليها ما جت رجلييييييهااااااا ...... )


وذلك بعد ان اعلن عبد العال اهداء جميع العمال بالغرزة علاوة 30% ...
مما جعل كل من المعلمة ريا والمعلمة سكينة يصوتولوا فى وشه ..
منيـــــــــن يا عبـــــ عاااااااااااال ؟؟؟
ما انت عارف الى فيها يا سيد المعلميييييين ؟؟


( .... الدورر الدوورر الدوووررر الدووووورررر ... موعودة يااالللى عليييكي الدورررر ...... )


عليكوا وعلى حسب الله عزو يا اختى انتى وهي ...
هو انا كل حاجة هقلوكوا تجيبوها منين ...!!!!!!!
ما تعرفوش تعملولكوا سبوبـــــــــة ولا ايه ؟
انما انا كلمتى ما تنزلش الارض ابداااااااااااا قدام الرجـــــــالة ...


( .... يا اختى عليـــــــهـــااااااااا .... ما جت رجلييييييهااااااا ...... )


مما اضطر كل من ريا وسكينة اللجوء للعقل الجهبز حسب الله بيه عزو ومجموعة من معاونيه مما اشار عليهم بحل المشكلة فى لمح البصر وجمع الاموال المطلوبة وزيادة, من نفس العمال (هما هما نفر نفر) وده حتى قبل ما يشموا ريحة علاوة عبـــــ عـــــــــــــاال


( .... يا حسرة عليها .. يا اختى.... يا حسرة عليهاااااا...... )


و بس خــــــــــــــــــــــــلاص


------------------------------------------------------------------


ردود فعل بعض العاملين بعد سماع الخبر


البنزين غلي
يعنى ولامؤاخذة التواليت الى بنعمله هيبقى بفلوووس

------------------

يعنى دلوقتى يوم ما نفكر نولع فى الى جاب ابووهم
هنفكر مليون مرة
لانهم ما بقووش يسووا تمن لتر البنزين
أو بمعنى اصح مش هنلاقى فى جيبنا تمن لتر البنزين

------------------

وهو عبـــــــ عال بيتفشخر علينا من جيب الى خلفونا ..
ما بناقصها علاوة ولا زفت


------------------

خلاص بلاااها بقى المارلبوررور .. ومن هنا ورايح نقضيها كيلوباترا فررررط

------------------

شعب صحيح فقرى ومش وش نعمه
الاهى يحرقكوا بجاز .... ده ان ما كنش غلي هو راخر

------------------

منقوووووووووول
من موقع اخبارى صيــــــــــــني او هندي

46 comments:

Unknown said...

الله يخرب بيت حسب الله زفت على حبة الحوش اللي لاممهم حواليه.
احنا مش عايزين ام الزيادة اللي زودها دي.
حسبى الله و نعم الوكيل

Anonymous said...

لا تعليق

لو أني لو تحدثت عن ردود الأفعال، وما سمعت، سأكتب مفردات لا يصح أن تكتب هنا

تحياتي لأسلوب العرض

الميكروباص said...

ولله ان الاسعار تعلى ده شيء عادي واحنا معتادين عليه، لكن المفاجأه أن الموضوع جاء بعد قرار العلاوه، ما ان نزلت العلاوه يوم الخميس حتى فرح الناس لأنه أمر هم غير معتادين عليه، لكن الصدمه كانت بالامس، وياعيني جت الصدمه قبل صرف العلاوه!!

Anonymous said...

وقال مصدر امنى رفيع المستوى: كل دى اشاعات وكلام ملوش اساس من الصحه من اللى قال انى البنزين بقى 185.... وعلشان الناس تعرف انى دى اشاعات وافتراءات ... من موقعى هذا اقدر اكذب الافتراءات دى واقول لكم البنزين مش 185 البنزين حيبقى ب 2 جنية حته وحده ... و الفرق يستاهل

مصر هى أمى said...

بنوتة

طب يعنى الريس ادا علاوة وبعد كده رجع خدها تانى من الناس
طب الغلابة اللى زينا اللى فى القطاع الخاص اللى مزادوش ولا حتى تعربفة وسمعنا الجملة المشهورة
الريس اما يحب يفنجر يفنجر من جيبه مش من جيبى

يعنى الاسعار زادت علينا ومخدناش زيادة

ثم التحف اللى كانوا مستضيفنهم عماليين يعللوا الزيادة انها مش هتأثر على الاسعار ولا حتى هتأثر على المواطن
العالم ديه بتكلم ناس فى دولة تانية ولا الحكومة ديه حكومة دولة تانية

فعلبا ديه هدية الريس للشعب فى عيد ميلادة

محمد عبد الغفار said...

المشكله الحقيقية فى السولار والأستفزاز الذى يحمله توقيت القرار

Soooo said...

لا حول ولا قوة الا بالله
حتى المواقع الصينيه ولا الهنديه بتنقل كلام بغرض زرع الفتنه وقلب نظام الحكم
؟؟؟؟
لا لا لا
احنا المفروض نبعتلهم مندوبين من الحزب الوطني المبارك يفهموهم اصول اللعبه صح
-----
الناس عارفه من ريا وسكينه ومين حسب الله وعبعال كويس
بس مستنين العدرا تطلع في صفط اللبن عشان يبدأو يتحركو




سلامووووووووووووز

Desert cat said...

طول ما احنا مكتومين
يبقى
يحيا حسب الله زفت وعبعال قطران
ويلعن ميتين اهل ده شعب

حاول تفتكرنى said...

حقيقى مدونة مزاجها عالى

احيك على تناول الموضوع بهذا الربط الفريد ، فى الهدف والمضمون ، وطريقة الفانتازيا الاعلامية التي لا يستطيع كثيرون التعبير بها الاحوال العامة

وكي لا اخرد عن السياق العام أؤكد من هذا المقام ، أن ريا بنت الكرام ، وسوكيننة ست اللئام ، لو كانتا حيتين حتى هذا العام ، لحكمتاعلى رجال الحكومة الهمام ، بالاحالة للمفتى والاعدام


تحياتي

اسكندراني في الغربة said...

علشان كدة احنا اخترناة

بكيزه و زغلول said...

يا جماعه انتو ليه متحاملين على الناس ( الشعب جعان و الحكومه مش لقيه تاكل )اينعم الاسعار زادت 100% بس ده طبيعى احنا 30% و هما 70% هيعملوا ايه اكتر من كده يقطعوا نفسهم ؟؟!!
واصبر على جارك السو ليموت لتجيلو مصيبه من عند ربنا تاخدو قولو امييييييييييين

momken said...

والله انتوا ضالمين ريا وسكينه
دول قطط اليفه بالنسبه للموجودين دلوقتى

ريا وسكينه كانوا بيقتلوا علشان جعانين ومش لاقين

لكن القطط السمان بتقتل وهى شبعانه
بتقتل للمتعه والاستمتاع
حرام كده دى حتى سميه الخشاب قمر وعبله كامل سكر
يوة اقصد ريا وسكينه

تحياتى

بنوتة من وسط البلد said...

enass:
لاااااااازم هتااخدى
شديلك نفسين وانت تهدى :)



المصطفى:
مهما عملت هجيبك هجيبك وهعرفك هعرفك
:)


لورنس العرب:
والله يا فندم الى احنا متعودين عليه .. ان كل شهر 7 مع العلاوة بيزيد البنزين وبتزيد الاسعار .. الجديد فى الموضوع الطبخة الحمضانة الى عملووها بدرى بدرى

يا خسارة مافيش بورتو مارينا بقى السنة دى وامرنا لله
:)



Ahmed Refaat:
وتعالى اشترى من عندنا .. مافيش احسن من هنا



مصر هى امى:
منورنا يا فندم . الغلابة الى زى حالتنا الى فى القطاع الخاص الى ما اخدوش العلاوة وبتدفع ضرايب 20% كل شهر .. وفى الاخر ناخد بالجزمة ما نفتحش بقنا

والى اصلا مفروض ياخدوا العلاوة وما اخدوهاش .. اساسى اتخن تخين فيهم كام .. يعنى كل واحد فى الاخر هيبيع عياله
اوفرر .. بس على الله يلاقى حد يشترى



محمد عبد الغفار:
يا فندم عينى عينك وبجاحة وان كان عجبك .. ده عبــــــ عال

بنوتة من وسط البلد said...

Soooo:
لعلمك بقى فى اشاعات بتقول ان العدرا طلعت فى الزيتون .. لان اللبن خلص من الصفط
:)



Desert Cat:
والميتيين ذنبهم ايه بس .. هو يبقى دنيا واخره .. بس اكييد اكييد عب عال وحسب الله ليهم اااااخرررررر




حاول تفتكرنى:
يا سلام يا سلام يا سلاااام
واحد شيشة هنا يا تفاحة عند البيه

واحلى شاندوشت فول من ع العربية .. صدقنى يا فندم لو ريا وسكينة كانوا
لسه موجودين .. كان زمانهم فى الحزب الوطنى :)




اسكندرانى فى الغربة:
لا وحياتك هو الى اخترنا ... وهو هيلاقى شعب اهبل زى كده فين ... ده مش بعيد يصدر مننا لدول عربية شقيقة



بكيزة وزغلول:
اميييييييين ... وبعدين جار سو مين .. ده صاخب العمارة خضرتك ... يعنى غالبا مفروض احنا الى هنبقى بالسلامة
منورانى يزارتك الغالية :)



Momken:
هتوقلى بقى ممكن ولا يمكن وان امكن ... هو لا يمكن لا يمكن لا يمكن ...
مع تحيات سمية وعبلة :)

Eric Matt said...


ربنا يرحمنا

تحياتي

مواطن زهقان said...

بجد بجد اسلوب المقال جاااااااااامد
وحسبى الله ونعم الوكيل

بنوتة من وسط البلد said...

Eric Matt:
انا سعيدة جدا بزيارتك الغالية
ويا رب امييييين
ان شاء الله



مواطن زهقان:
انا متشكرة اوى يا فندم .. بس ده احنا ما عملناش حاجة وما لحقناش نقدم الواجب

واللهم امييين يا رب

محمد العدوي said...

ومن هنا لحد يوم الاتننين نكون عرفنا هنجيب الاتناشر مليار اللي هندفع بيهم العلاوة منين ..



يا سلام .. وزير المالية بذات نفسه احتاس .. اظن والله العليم هيطبعهم على ورق سجاير ..



الحمد لله انا في الجيش .. واكل شارب نايم لابس على حساب القوات المسلحة ..


درع مصر بنت الأكابر

Iskanderani said...

مساء الفل عليك وعلي عببببب العااااااااال المتولي؛

أنا راح أروح زنقة الستات في المنشية وأشوف رايا وسكينة "حامية" (هي حامية علي عب العااال كدة لية؛ هو عمل لها أيه... هه؟؟).

بصي ياعروسة بقي الراجل ماعندهوش عيب:! وذلك للأسباب التالية:

1. علاوة من جيبه وجيب اللي خلفوه - ماهو صاحب العزبة وهو حر فها - وفرق
علي الملاء والسمع وأعلنها بصوت ملعلع يسمعه الاطرش والقرد في حديقة حيوان سيدني في أستراليا .... أستر يارب علي الولاية.

2. العيب مش في عب العاااال ؛ لأ...لأ... العيب فيكوا وفي أهاليكم واللي... علشان قاعدين علي قلبه في العزبة وبتتريقوا كمان عليه!! بالذمة ده كلام؟؟ قايميين ... قاعدين .... نايميين في عزبة أبوه ومش عاجبكم ؟؟؟

3. شعب فقري مابيسمعش الكلام وبنقولوا علاوة.... علاوة....مش حلاوة... ياعالم ياهو تقولوا البنزن غللا ؟ طيب هو ماله بالبنزين ؛هو عايز ولع فها؟ لأ... هو عليه بس يفرق الحلاوة من العزبة علي العيال اللي ماشيين حافي

4. الناس الهبلة فرحت علشان بتفكر في البطيخ ونسيت الباذنجان مع إنه بييجيي قبل البطيخ

5. كل واحد ياخد نفس واحد فقط لاغير علشان الجوزة تكفي المساطيل كلهم.... خخخخخخخخخخخ ... هات ولعة ياولد ياعبده ومعاها جوزين حجر معسل قطع ... كاتنا نيله في حظنا الهباب

تحيات إسكندراني في بلاد الله الواسعة

كوارث said...

يا قلبي لا تحزن
كما قال الشيخ عائض القرني
الشعب الوحيد اللي بيسخر من مشاكله احنا
يمكن عشان كده ما بنحسش بيها قوي .. بكون الواحد طلع اللي في نفسه بالسخرية ده
خاصة انها بتنفس عن الم شديد فعلاً
لك الله يا مصر
قصدي يا ريا وسكينة
وعبعال!

بنوتة من وسط البلد said...

محمد العدوي:
ايوا يا دكتور وحد يلاقى دلع وما يتدلعش

الا اخبار العدس عندوكوا ايه ولا غلي وبقى كتير عليكوا .. ؟؟؟ :)

وبعدين هو البيه فنجر والحكومة احتاست والشعب حط الجزمة مكان دماغه

حسبنا الله ونعم الوكيل يا اخوييا



Iskandrani:
ع فكرة بقى واضح ان الصنف كان مضروب ومش مظبوط النوبة دى

لانه لو كان عدل ماكنش كركر فى الجوزة ولا كان خلى عبـ عال طلع قال الكلمتين المهاطيلي دول قصاد الناس


ما الاقيش مع جنابك تعميرة زيادة :))

منورنى يا غالي يا كريم


كوارث:
انا هقولك يا فندم ان ما عرفناش نصبر روحنا على ما بلانا كان زمانا دلوقتى ولا اعصار مينامار ولا تسونامى وفى الاول وفى الاخر مافيش فى ادينا حاجة

وكنت قريت ان السخربة من الظروف والمصايب سمة غالبة فى الشعب المصري من ايام الفراعنة

انا هقول لحضرتك شدلك نفسين من الجوزة الى هناك مع اسكندرانى فى بلاد الله الواسعه وانت هتبقى ولا عبــ عاال فى زمانه فى مؤتمر عيد العمال :)


منورنى يا فندم بزيارتك الغالية
تحياتى

Iskanderani said...

مساء الفل عليك ياأستاذة الأساتذة بنوتة من وسط البُلَد؛ كلام خلاصة؛

بين السطور في تعليقي السابق بعض من ملاحظاتي البسيطة علي الوضع في المجتمع المصري والذي أصبحت أنا بالطريقة دي مثل مُشجع لفريق كروي يري الفريق الذي يعشقه ويكن له كل الحب يترك الدرجة الاولي في طريقه للإنحدار للدرجة التانية أو الصعود للهاوية ... فقط كزائر ولا يعلو لمرتبة مُدرب ... وهذا تُلَخص في كلمات بسيطة جداً:

الناس لازم تفوق من الخمل والسُطل والنوم وتبتدي تضع لنفسها أولويات في الحياة وتضع لتنفيذ لهذه الاولويات ميكانيكية تنفيذ بدل ماهم قاعدين شاغلين نفسهم بكلام فارغ في منشور الجرايد وكمان يغيروا من السُطل الدائم في المناقشات الهبلة.وتضييع الوقت في العبط الغنائي والتلفزيوني

في آخر زيارة قصيرة لي للمحروسة صُدمت من آراء وأقوال صادرة من ناس المفروض إنهم يكونوا علي مِقْدار من الوعي والفَهْم ؛ آراء فاشية وتعصب ديني لا ينُم ألا عن جهل في العقل وظلام في القلب.لذلك حاولت في تعليقي السابق ألا أكون مباشر في وضع الصباع علبي الجرح.

عب العاااال قادر يعمل كل ده - من لعب الحاوي وهات منده وأدي ده ولعب التلات ورقات- لان الناس في حالة ضياع فكري ونفسي

وآسف للإطالة والرخامة وعلي تضييع وقتك

وتحيات إسكندراني في بلاد الله الواسعة

بنوتة من وسط البلد said...

Iskandrani:
اسكندرانى فى بلاد الله الواسعة
استاذى الغالى

كل ما ذكرته حضرتك وبحاذفيره صحيح .. لقد اصبحنا شعب مغيب وفاقد للوعى وحتى الثمالة يا فندم وذلك من كثرة الهموم وحمل هم لقمة العيش والطاحونة الى كل الناس مربوطة فيها

واتجاه الشباب للشم والسف للهباب والتراب والجوزة ليس الا هروبا من واقع اليم

وبقى الرمز لاى احد منا هو اللمبي وازازة البيرة

الحكومة سطلتنا بالمشاكل وهبلتنا على العيش والميه


اشكر اضافتك العزيزة سيدى الفاضل

والحجر والمعسل جاهزين يا فندم :)))

ihapoof said...

أتفضلى يا شابه

دحنا هنريحوكييييي :)

بنوتة من وسط البلد said...

ihapoof:
الدور الدور الدور الدور موعوده يالي عليييكي الدور

الف رحمه ونور عليكي يا شابة

ده احنا هنولعوووووكي

:)

منورنى يا فندم

ody911 said...

إنتو مش فاهمين حاجة


دى

.................


بس

مش كدة والنبى


وعادى بقة
يختى عليها ويختى علينا
يختى علينا

أودى عادى خالص

ody911 said...

يووووووووووووووه نسيت أقولك

وحشنى كلامك الجميل دة والله
بجد بجد يعنى


بس بكرة تفرج

عادى بقة
أودى

بنوتة من وسط البلد said...

ody:

يا فندم انت منورنا
بس ع فكرة بقى انا ما فهمتش تقصد ايه اوعى تكون (مش) حاجة ابيحة
اصل العالم دى ما بنفعش معاهم غير العين البنفسجى

:)

واكيد هو كده وحياتك

يا سيدى متشكرييين على البوقيين الجامدين دول .. بس يعنى ابقى هات معاك بعد كده بطيخة وانت جاى للعيال

:)

تحييياتى

استراحة محمد said...
This comment has been removed by the author.
استراحة محمد said...

المصدر الصينى بعد كده هيطلعنا بلابيص فى الأخبار
مدونتك دمها خفيف ، حتى ردودك على التعليقات دمها خفيف
تحياتى

ابو العربى said...

هههههههههههههههههههه
هتحبيسيناااااااااااا
ربنا ينتقم منه حصب الله وشله
ياريتو كان خصم 40فى الميه
تحياتى
ابوالعربى

بنوتة من وسط البلد said...

استراحة محمد:
انا متشكرة اوى لزيارتك الغالية
والمصدر الصينى ده انا ما اعرفوش ولا عمرى شفته

هو شكله كده قريب ريا وسكينة من بعيد وكان بيصيفوا سوا فى بلطيم ومارينا

ده باعتبار انه هيطلعنا بلابيص بعد كده

:)

منورنى يا فندم



ضد الظلم:
انا برضة الى هحبسكوا . ولا انت وعملتك المهببة

اهو هو ده يا بيه الى واقف هناك ده ..هو الى قال على كل حاجة وهو الى كان بيدفن الميتيين يا بيه

بالشفا يا ابو العربي :))
هفتكرك بشقة بطييخ

الإتربي اللولبي said...

طول ما الشعب ماشربش من نيلها ولا فكر يغنيلها يبقى احنا أكيد في مصر

بمعنى آخر طول ما بنطبطب و ندلع في حزب ريا و سكينه عب عال هايفضل يبوس لنا ...... الواوا

أتمنى تشريفي بزيارتك و تعليقاتك

سلام عليكم

el_assel said...

هههههههههههه

اعتقد ان دي ردود الافعال المحترمة
او ردود الافعال اللي ينفع تتقال

والله فعلا ربنا يكون في عون المصريين
ربنا يكون في عو الموظف الغلبان الذي يريد الستر ليه ولعياله



هما قالوا اضراب وكده
لا لازم نهديهم شوية
خدوا علاوة يا حلوين



في نفس الوقت
واحنا ليه نخليهم مبسوطين
بللي الفوطة يارية
اتحضري يا سكينة علشان تخدي الدهب بتاعهم

الناس خلاص مش بتستخدم العربيات
شوية شوية حتلاقي الشوارع مافيهاش الا عجل


انتي ما تعرفيش
كل اللي عملوه ده علشان يحافظوا علي البيئة

علشان بيئتنا تكون نظيفة جميلة متطورة





سلاماتي

موناليزا said...

ماهو مكنش معقول الناس تفرح اسبوع على بعض حتى يبقى فال وحش عليهم

دعاء مواجهات said...

هههههههههههههههه

دمك زى العسل بجد


شر البلية ما يضحك صحيح

عجبتنى مدونتك اوى

انتظرك عندى عزماكى ع العصير الى تحبية

سلاااااموووز

حسن ارابيسك said...

احنا والنوبايل
مصر بتتقدم بينا
تعمل ايه لو صحيت النهارده ولقيت نفسك امبارح
عمرك حسيت انك حته من فيلم لخيري بشارة
يامصري انت اللي هاممني
توك توك صباحك
قاهرة المعز بقت بنت عز
مئوية اسم النبي حارسها
واحد ميكروباص وحياتك
تحالف قوى الشعب الترزية
من غير كلام ولا سلام
زيادة موارد الغرزة بزيادة اسعار البنزين

كلها بوستات تحمل قيمة واحساس ونبض
الكثير من هموم هذا الوطن المسكين لم أكتفي بقراءة
دبوست واحد فقط حينما دلفت لمدونتك المخلصة والخالصة لله
تجاه هذا البلد وأهله لذلك طلبت واحد كماله ولم أشبع
وظللت على هذا الحال واحد كماله واحد كماله
هكذا هو حال أبناء هذا البلد المهمومين بوطنهم
وهذا هو حال المصري في أشد أزماته نجد روح
الفكاهة الساخرة التي لا خلو طعمها من مر العيش
تحت وطأة من أهانوا هذا تراب هذا البلد
كل التقدير والاحترا م لمدونتك القوية الجريئة المحترمة الساخرة
حسن أرابيسك

في حب مصر said...

بنوتة

عجبني التعليق ده
يعنى دلوقتى يوم ما نفكر نولع فى الى جاب ابووهم هنفكر مليون مرة لانهم ما بقووش يسووا تمن لتر البنزين

انا بتفق معاكي في انهم ما يستهلوش تمن لتر البنزين، واعتقد الاسلوب اللي ماتت بيه شجرة الدر احسن بكتييييييييييييييير

تقبلي مروري وتحياتي

بنوتة من وسط البلد said...

اللولبي الاتربي:
يا فندم فيه ناس مش لاقيه مية نيلها ومش بتدخل بيوتهم غير مرة فى الاسبوع .. واكلها وخيرها بقى مسرطن ومتسمم وكله بلاوي زرقة

مابقالناش وحياتك غير ترابها الى نسفه

واحنا مش بنطبطب وندلع خالص ده احنا بيتعمل فينا حاجات وحشة ....
ولا بلاش :)

منورنا يا فندم بزيارتك الغالية



El-Assel:
للاسف هو ده الى نفع فعلا يتقال .. لكن كان فيه غيره كتيير بس اتحذف لزوم الادب والرقابة على المصنفات البنزينية :)

الى يغييظك بقى يا اخويا ان عدد العربيات الزيرو لسه زى ما هو فى ازدياد مستمر ... ليها حق بقى الحكومةتولع فى الى جاب ابونا بالغاز الاسرائيلي ولا لا

انت عارف التناقض فى تصرفاتنا واستهلاكنا وفى دخولنا وفى الى مش لاقيين ياكلوا عايز يتعمله حلقات منفردة

الله يكون فى عونك يا ريا يا اختى



Monaliza:
انت بتقولى فرح !!!!
يعنى الحكومة تفرح الناس وتبقى قلبها عليهم ... با ينتى انا مشفقة على الى افتكر لحظة انه ممكن يكون فيه علاوة

الله يخرب بيتك يالى فى بالى انت وهو وهو وهو ... مش كفاية عليكوا كده بقى


والنبي يا بابا حسنى شوفلنا صرفة فى الموضوع ده


منورانى يا فندم :)

بنوتة من وسط البلد said...

دعاء مواجهات:
انا متشكرة اوى يا دودو على الدعوة الغالية
وان شاء الله يشرفنى زيارتك
بس مش مهم عصير .. المهم تكونى شايله بطيخ ساقع فى التلاجة :)


حسن ارابيسك:
سيدى الفاضل
والله يا فندم عجزت الكلمات على انها تكون جملة شكر تكفى احساسى بالسعادة الغامرة لراى حضرتك الكريم
فى معالي جلالة شخصى المتواضع :)

بجد ان متشكرة اوى ..
وصدقنى انا قريت تعليق حضرتك اكتر من مرة .. وتصدق يا باشا .. وان شاء الله هتصدق .. :) .. لولا وجود قراء محترمين لما كانت هناك اى قيمة لكلمات ولا مدونات ولا دياوله

هااه .. الزبادى فى الخلاط سكره مظبوط يا فندم ؟؟؟

:)



فى حب مصر:
والله الاشكال دى يا اخويا محتاجه قبافيب خرسانة علشان تحوق فيهم .. بس هنجيب الخرسانة منيين دلوقتى بعد ما احتكروها ولاد البعدا


فكرتنى بايام جهاد وسلامة .. احنا محتاجين جهاد .. والسلامة والستر يا اخويا ان شاء الله :)

منورنى بزيارتك الغالية

تحياااااااااااااتى

Soooo said...

لعلمك بقى فى اشاعات بتقول ان العدرا طلعت فى الزيتون .. لان اللبن خلص من الصفط
:)
------
اسكتيييييي
مش كنت النهارده في صفط اللبن ورحت لسوبر ماركت بقوللو عايز كيلو لبن .. قاللي مافيش لبن
افتكرتك ساعتها وجاتلي هيستيريا ضحك


بس ايه ده .. فين جديدك يابنتي
ولا هو وكالة الاخبار الصيني اتقفشت ؟؟؟




سلامووووووز

Yasser Hussein said...

يا خبر
أنا أفتكرت ريا وسكينه رجعوا تاني بجد
:)
مع الأسف اصبح الآن ما يثير القلق والرعب أكثر من ريا وسكينه
احييكي على أسلوب العرض

خالص تحياتي

بنوتة من وسط البلد said...

Sooooo:
تصدق وانا كمان فطست لما قريت الى كتبته .. :)

بالشفا ان شاء الله .. ابقى خلى بالك منى بقى ... اصل انا وخالتى نوسة اخوات فى الرضاعة

المهم ما عرفتش ايه بقى الاخبار فى الزيتون :) ؟؟؟
والجديد جاى فى الطريق استنااااااانى



ياسر حسين:
انا متشكرة اوى يا فندم على زيارتك الغالية .. ولعلمك ريا وسكينة اتعلموا الفضيلة من الى بيحصل دلوقتى


ربنا قادر يلمهم كلهم فى تربة واحدة .. الى بالى بالك طبعا :)


منورنى يا فندم
تحيـــاتى

نعكشة said...

متخافييش

دة حسب الله جوزي


يابنتي ماهم مننا و علينا برضو :D

ربنا يسترها علينا و منلاقيش الخمسين جنية = خمسون قرشاً و طبعا الخمسون
قرشاً دية هتبقي في المتحف

هيا الخمسين قرش بتجيب اية دلوقتي
10 لبان
او 2 طعمية
او 1 رغيف محترم
او 2 رغيف فينو
او 2 كيس كلبظ
1و 1 ايس كريم حد اكلو قبل كدة :D

يعني هيا في طريقها للمتحف اصلا

يلا ربنا يستر

RANDA said...

كلامك جه عالوجع دا فعلا كلام خلاصة
فكرتيني بالنكتة اللى بتقول
واحد اتحشر في زحمة المرور فلقى واحد بيخبطّله على شباك السيارة
فتح الشباك و سأله: عايز ايه ؟
قاله :الرئيس خطفوه والفدية 5 مليون دولار و لو الفدية مااتدفعتش .. الخاطفين هددوا يدلقوا عليه بنزين و يولعوا فيه..واحنا بنجمع تبرعات .. تحب تشارك ؟
الرجل سأل: و في المتوسط الناس بتتبرع بكام ؟
الرجل الثاني : من 5 الى 10 لتر بنزين

بنوتة من وسط البلد said...

نعكشة:
فييين يا بنتى ايام زمان لما كان مصروفى ربع جنية وابويا كان بيحكيلي ان مصروفه فى الجامعة شلن

دلوقتى العشرة جنية مالهاش قيمة مش تقوليلي 50 قرش

زمان كانوا بيقولوا لازم نتحاسب بالمليم .. دلوقتى المثل اتغير وبقى لازم نتحاسب بالعشرة جنية :)

الا اخبار الامتحانات ايه ؟؟
:) منورانى



حكايتنا:
حلوة اوى النكتة دى ..
وعلشان كده بقى البنزين سلعة استراتيجية وعمالين يغلوا فيه علشان ما يبقاش الحصول على البنزين بعد كده مطلب شعبي وثورى


بس ربك قادر يولع فيهم بميه من الحنفيه مش بنزين

تحيياتى وانتى منورانى
وجميل اوى البلوج بتاعك ع فكرة :)