Sunday, June 8, 2008

الجنازة حارة ... والميت ولمؤاخذة كلب

من حوالى اسبوعين بعد ما ابتديت اتعالج من فقر دم والرعاش من القنوات الارضية المصرية (المنيلة على عينها)
وانا صامده ومستحملة .............
مستحملة ............
مستحمـــــــــلة ...............


فى النهاية طقيت واستسلمت واضطريت اضطرارا مضطرا
انى ادخل الدش (المنيل على عينه) بيتى

فى البداية كان احساس رائع انى احول بين مئات القنوات وأأنتخ واختار الى يعجبنى .. واتحسر على ايام ما كنت احول بالريموت بين 10 قنوات كلهم ما يفرقوش عن بعض اسيب القناة الاولى على حالة حوار .. الاقى التانية على تامر امين .. والتالتة على حاجة غريبة .. والنايل تى فى الى دايما واقفة على نشرة الاخبار الى بالفرنساوى .. ولا مسلسل خالتى صفية والدير على الدراما .. او شريف مدكور على الاسرة والطفل .. يا لهوووي ياابــا ... لا ما يغركوش المنظر .. العبدة لله استحملت كتيير برضة .. كان مافيش مفر بعد ما حوشت القرشين غير انى اشترى الدش وامرى لله


بس بعد ما حالة الانبهار راحت .. ابتدت تتملكنى حالة القرف واحساس مستمر بالقيئ
فى الاول قلت يمكن برد فى المعدة ولا حاجة
وبعد كده اكتشفت انه الاكذوبة الكبيرة الى اسمها القنوات الفضائية



طبعا بعد يوم طويل من الشغل ووجع القلب ... راسى بتبقى عاملة زى الصفيحة المخرومة .. ما عنديش استعداد اركز فى حاجة ولاحتى اقري ترجمة .. فا مفيش حاجة بتلبي رغباتى واحتياجاتى غير قنوات الافلام الى بتعرض الافلام التيك اواي .. الى وشها بيبقى زى قفاها مش فارق اولها من اخرها .. مجرد حاجة بتساعد مخى البشري الضعيف انه يخرج من حالة التركيز والعصبية والتنشنة لحالة من البلاهة والعبط .. الى بتكون مررريييحة جدا بعد يوم طويل من التلطيش


وابتديت اتابع غصب واقتدار اعلانات افلام موسم الصيف السنة دى .. والمنافسه الحااارة بين الافلام والمنتجين على تربع عرش شبابيك وبلكونات الايرادات


ولقيت مخى مش مفرق بين كل الافلام الزبالة المعروضة غير انهم بتركز على مضمون واحد ... على انها مبدئيا كلها مصنفه لتكون افلام للكبار فقط .. وركزت قضاياها على الجنس والدعارة والقمار او الشرشحة والصياعة


واعذرونى على الفاظى .. فانا بحاول اختار الفاظ مؤدبة عن التى تعرض لحظيا على شاشات هذه الفضائيات على مراى ومسمع من الاطفال والشباب والبنات والامهات والاباء والكهول


ولو مسكناهم كده لكشة واحدة


ونبتدى بافلام المعلم الكبير ... منتج البهايم والجواميس
الى نازل مكتسح بفيلم الموسم (كباريــــــــــــــــــة)
يا لهوى يا خالتى ... كبارية .. وده بيناقش ايه ده ان شاء الله
واذا كان ده اسمه وده اعلانه .. امال هو من جوا شكل امه ايه

وطالعة الاخت فى الاعلان تقول كان "جايبلي تلاتة صحابة يناموا معايا "
والله المعبود ده من الاعلان مش من عندى

لما المحروس ابنك كده وهو قاعد جمبك ويسالك يعنى ايه يا بابا .. هترد تقول ايه !!!!



فيلم تانى للبتاع حسن حسنى
وبطولة واحدة متهيالى من بتوع ...... احم احم ..... الكليبات .. وجايبين طفلة ومطلعينها رقاصة وشرشوحة ... الى هو المفروض دى كوميدية ساخرة ودمها خفيف ... ومفروض احنا نقتنع بيها ونحبها بقى ولا ايه ...؟؟
والسؤال محيرنى من ايام المدعوءه خالتى فرنسا ... هى ايه علاقة الشرشحة بالكوميديا !!!!

وبرضة المحروسة بنتك لما تقلد الننوسة بطلة الفيلم وتكلمك زى العوالم .. مفروض تعمل معاها ايه ؟؟؟




اعلان تانى لفيلم مصطفى قمر ..
الاخ ابو اتب الى طالع بستظرف ويقول كلام مش مفهوم على اساس انها فهلوة وخفة دم وهى فى الحقيقة شغل صياعة ومقاطيع برضة

وطالع فى مشهد يقول (لادوارد) يا حبوء ... والتانى واقف جمبه زى صفيحة الجبنة البراميلي يقوله يعنى ايه حبوء .. يقوله يعنى حبووء .. والتانى ينهق ويقول اااااااااااااااااااه

حبوء ايه يا ابن الحبوء انت وهو
هو احنا ناقصييييييييييين اشكالكوا انتوا كمان



ولا فيلم سيدة الشاشة الفضية ليلي علوي
(من ايام الابيض والاسود يعنى) ..
وعن الفيلم ده الحقيقة انا مش عارفة اقول ايه ... يعنى برضة خلاص !!! انحصرت مشاكلنا فى مضمون المشاهد الى عرضها الاعلان الى بحاول حتى هذه اللحظة افهم ايه علاقتها بالراجل الى بيلف بالتنورة ودماغ امه هربانة منه

مش كفاية بقى انها عجزت على الادوار دى ... ولا ايه الى انتوا عايزين توصلوه من قصة الفيلم ولا ايه علاقة اسم الفيلم بابطالة ومشاهده

ده باعتبار ان خلاص الاباحة بقت عادى اليومين دول


ويجي الى بعده .. فيلم خالد يوسف ...
والى جت كملت بصالة قمار ... يعنى كبارية وصالة قمار ... وقال بنت بتجرى على امها الى طالعة فى الفيلم اصلا سيكو بيكو .. وبتقولها
"ما تخافيش يا ماما ما عرفش يعمل معايا حاجة .. انا لسه بنت زى ما انا"


الاهي يخرب بيتكوا والبيوت الى جمب بيتكوا


و(ليلة البيبي دول) ..
حرب وفلسطين ولبنان وماساة 60 عام من الحروب ومش عارفة كام مليون من ضحايا المش عارفة ايه برضة ..

وفى نفس الوقت لا يخلوا الفيلم فيه من البوكسر الاحمر وكام مشهد ساخن على اسم تجارى للاستهلاك المحلي ...



على اساس ان هى دى بقت هى دى تعريفة الدخول لجيب المواطن
الافيشات الساخنة على المشاهد المولعة
على كام منظر رقاصة وداعرة على كام سكران ومسطول وما يضرش نحط طفلة شرشوحة برضة لجذب المشاهدين


زى ما تكون الاباحة والدعارة هى سمة الشعب المصري وانه بقى شئ عادى اننا نسمع الكلام ده قدام عيالنا واهالينا كل لحظة وكل ثانية



هى العالم دى مش عارفة ان الافلام القذرة دى كل العالم العربي بيشوفها
مش عارفين ان الافلام دى هى انعكاس لصورة المجتمع المصري
مش عارفين العرب والخليجيين للاسف بيبصوا لمصر والمجتمع المصري ازاى
ونيجي نلاقى واحد طالع زى الـ ....... (تيـــــــــــت) ...
ويقول حرية التعبير عن الراى والجراة فى مناقشة قضايانا
وده بدل ما ندفن راسنا فى التراب


تراب يتاويهم نفر نفر ان شاء الله


خلاص انتهت كل قضايا الفساد بقى مش ناقص غير اننا نناقش فساد الكباريهات وصالات القمار
خلاص اختذلنا مشاكلنا اليومية فى عيشة الشراشيح والصيع وقاع المجتمع
وحتى الافلام العائلية التى تعرض ... لا تخلو من التلميحات القذرة والملابس الساخنة والمايوهات البكيني
ما هو صيف بقى والدنيا حرر !!!!!!


هو ده الى احنا عايزينه ؟ ... هو ده الى محتاجة الجمهور ؟
هو ده الى احنا محتاجين نغرق فيه شبابنا
الشهوات والنزوات زى الحيوانات
سعار الشوارع والتحرش الجماعي
الادمان والبلاوي الزرقا
الانحلال وانعدام الاخلاق عند اطفالنا
ما حد ربع عاقل يرد علينا .. ويقول الناس دى عايزة مننا ومن عيالنا ايه ؟؟؟؟


دعوة وجهتها منذ عام


ارجوكـــــــــــــــــــــــــــــم قاطعووووووووهم


وبعد هذه الحرب الشرسة فى الاعلانات
تذكرت المثل الى قال
صحيح الجنازة حااااااااارة
والميت ولمؤاخذة فى الأخر طلع كلب جربان واعور وحزين على عمره

25 comments:

محمد عبد الغفار said...

الدش ليه ريموت فيه زرار اون واوف وزراير كتير بتنقل من هنا لهنا ، والسينما لها تذكرة

ومحدش ضرب حد على ايده عشان يدوس على زرار معين فى الريموت وكمان محدش غصب حد عشان يقطع تذكره

بنوتة من وسط البلد said...

محمد عبد الغفار:
هى المشكلة مش فيا ولا فيك يا فندم
ما انا ممكن ادعء التليفزيون خالص

انا بتكلم على الاطفال الى قاعدين طول النهار قصاد التليفزيون واهاليهم ولا هما هنا

على الشباب والبنات الى ماليين السنيمات فى الصيف مع اصحابهم وبيدخلوا الى هما عايزنه من ورا اهاليهم


انا بقول على الطبقات الاجتماعية البسيطة الى بتتاثر باى حاجة تتعرض قصادها


يا ريت يا فندم الموضوع كان اقتصر على تكة على زرار الريموت كان زمانا ارتاحنا من زمان

تحياتى واشكرك على الزيارة الكريمة

ihapoof said...

مبروك عالدش .. خلاص عدينا الفقر أهه
:)

على فكره فيلم "كباريه" تحفه .. رغم أنه بتاع السبكى .. بس أيه حته من بيت اللوح .. تستاهل الفرجه فعلاَ

هو دش ولا وصله ؟ ;)

الشنكوتي الكبير said...

انتي فقريه خالص
ههههههههههههههههههه

حرام عليكي فطست منك
اقولك بقى على السر يا غلبانه
زمان قوي محمد صبحي لمح لفكرة ان ال...اللي ما يتسموا شجعوا الكوره قوي وخلوا الناس تهتم بيها علشان يشغلوهم عن قضايا البلد وبدل المظاهرات والجماعات السريه والحاجات دي بقى الكل بيركز بس على الماتشات وكل الصراع اللي في دماغهم هو الفانله الحمراء تغلب البيضاء وبالعكس
وبقت هي دنيا الأزمه الكبرى عندنا المهم بعد كده لقوا برده لسه في ناس مالهاش في الرياضه والكلام ده طيب احنا داخلين على مرحله صعبه ومش عايزين حد يهمبك في السياسه بقى
ثوره قامت والبلد على المحك طيب نلهي الناس ازاي قالك خش على السيكو سيكو
ركز عينهم على العري على الممثلات الفاتنات العاهرات بمعنى اصح
على جيل اتربى ان المايوه والميني جيب هي نوع من العفه وان الأدب مش في اللبس لا في العقل اصل الأخلاق انتهت وبقت موضه قديمه

وشويه يا ستي
والناس بدأت تزهق من القلع ولقوا نفسهم كل عيله فيها مصيبه اغتصاب بنتهم
او بنتهم بمزاجها هربت
او بنتهم صاعت خالص
او او او....بلاوي لا تحصى نتيجه طبيعيه للأنحلال
وبدأت الناس ترجع تدور على بقايا الدين عند اي مشايخ
طبعا نتيجه لكده انفتحت السكه مش بس للمشايخ الكويسين لا ده فيه ناس دخلت كده جهجهوني في النص وبقت عامله نفسها مصلحه وخربت الدنيا ذياده
وهوووووووووووووووب
اللي بالي بالك رجعوا يفكروا في الحركه القديمه
اديهم سيكو سيكو
خلاص نبتدي بعيونهم في التلفزيون
فرجهم ليل نهار على افكار تقول ان ده مش عيب
ده عادي خالص
خليهم يتربوا على كده
واهلهم يرجعوا بفكرهم لزمن قديم
ايام ما كانت امهاتهم بتلبس ميني جيب
وكان عادي خالص
يبقى فيها ايه لما نلبسه دلوقتي تاني
والقذاره تبقى للركب
المهم تخلي عينك بعيد عن اللي هم عايزينك تبعد عنه
ركز يا واد انت وهو في الأجسام المباحه
بص وبحلق عينك
مش هتقدر تغمض عينيك
يعني احب اهنيكي ان من بكره خلاص
هتبقى ميغه
هلاقي العاهرات في كل حته وببلاش
من غير تمن
كلنا هنبقى قوادين
وعاهرات
وانا بقى استعدادا للعهد ده
هانزل اشتري قميص كاروه احمر
وبنطلون ابيض
وسيجاره رفيعه كده
وسلسله طبعا
واقف على ناصية عماد الدين علشان اسرح البنات بتوعي
دي هتبقى ايام فل الفل
وربنا يلعن كل من نشر الفساد في الأرض

سلاااااااااااااااااااااااااام
موضوع جميل قوي

.:.-=- ELGaZaLy-=-.:. said...

هههههههههههههههههههههههههههههه

بصى انا عايز اقولك على حاجة اولا انا ضحكت على تحليلك للافلام جداا بس انا فى اختلاف معاك يا استاذ محمد لو هانقول كدة يبقى احنا بنساعد فى بوظان الجيل الى هو متنيل بايظ اصلا

هقولك بقى يا بنوتة .. ليلة البيبى زفت دة طبعا لا جدال عالية...

بس الريس عمر حرب قصة حقيقية جداا واخو نجمة تلفيزيونية مشهورة..
يلا ربنا يحرقهم بجاز

Desert cat said...

وانا قاعده عندى عمال انوح واقول العيال والكبار بتقل ادبها علينا فى الشارع
للاسف الاخلاق بقت بح
مفيييييش
المهم الجنيه يجى ازاى
والشعب المصرى مفضوح بين الدول العربية انهم كلهم شارع الهرم واحنا بنثبت لهم باعلامنا كدا

ربنا يتولانا

دعاء مواجهات said...

ولا ازيك ياقمر

ثانيا من وجهة نظرى المتواضعة الموضوع كلو يتلخص فى كلمتين

الmoney

بس كدة خلصت

الربح والفلووس بينسوا اى حاجة واى زوق وقيم واخلاااق
وبيلعبوا ع وتر الكبت عند الشباب

تحيااتى

نورتينى بجد

blue-wave said...

يا بنتى انتى بتقولى على الإعلانات امال لو شوفتى السيناريوهات بتتضرب ازاى؟
انا على ايدى احد ابطال الورق دول طلب ان الفيلم يكون فيه على الأقل اربع بوسات سخنين
شوفتى الفضيحه؟

كاتب مصري said...

هل يسمح لي صاحب هذه المدونة بدعوته لزيارة مدونتي المتواضعة جدا على العنوان التالي وترك لمساته هناك
http://kanyatklam.blogspot.com/
تحيتي

الإتربي اللولبي said...

الأخت البنوته

البلد كلها بقت أبيحه مش الأفلام بس ..

و الله العظيم البلد ما خربت من شويه

أتمنى أشوف لك جديد و شكرا على زيارتك الكريمه و تعليقك الموجز الرقيق

سلام عليكم

موناليزا said...

معاكى حق جداااااااااااا
واسمحيلى اوجه كلامى للمنتجين بالذات
اتقوا الله فانتم اول المحاسبين على هذا
ربنا يكرمك وتوصل رسالتك للجميع

حاول تفتكرنى said...

قليلون هم من يملكون اسلوبا راقيا من اساليب الفانتازيا الساخرة
السينما ورقة دعم اعلاني أتحرقت من زمان

استمتعت جدا بالاسلوب البسيط العفوي ، واستمتعت اكتر لما افتكرت الجبنة البراميلي اللى مش موجودة هنا


تحياتي

ياسر حسين said...

بصراحة
كلامك كلام خلاصة
أنتي قلتي كل اللي الواحد كان نفسه يقوله
أنا شخصيا باشمئز من العبارات الغير محترمة اللي بتتقال في الاعلانات
وعلى رأي المثل
العينة بينه
اذا كان دي جمل من الحوار فما بالك بالحوار كله

خالص تحياتي

بنوتة من وسط البلد said...

ihapoof:
--------
اهلا يا باشا .. لا والله دش دش .. كورى على ابوه من ابو 500 جنية .. معاه قمر اوروبي كمان .. بس ده طبعا تم تشفيره من اول يوم ... وبعدين بقى خلاص ما بقى عندنا كل حاجة فى المحلي .. وتسلم الصناعة المصرية ... والبقر البلدى مش الفريزاين :)



الشنكوتى الكبير:
----------------
تحياتى وشكرى العميق جدا على تحليلك يا فندم وهى دى حقيقة فعلا .. وشباب اليومين دول مستنى اى فلاشر وهو بيسمع الكلام على طول ... كورة .. افلام زبالة .. قصة شعر جديدة .. بنطلون وقميش مش عارفة شكلهم عامل ازاى ... بنات شكلها ولمؤاخذة ... رنات ولوجوهات ... وادينى فى الهايف وانا احبك يا فنانس .. وانا الى كنت محتارة مظاهرات الجامعة راحت فين ...!!!!



El Gazhaly:
------------
الاهى وانت جاهى يحرقهم ببنزين 95 من ابو 2 جنية ونص واهو يبقى موت وخراب ديار :) منورنا يا فندم



Desert Cat:
-----------
بصى يا قطقوطة .. هو عمك اللمبي كان قالها حكمة .. الجنية غلب الكارنية .. والاهى يولعوا ما طرح ما هما قاعدين :)
منورانى يا جميلة



دعاء مواجهات:
-------------
انتى الى منورانى بزيارتك الغالية عزيزتى ... وزى ما قلتى الفلوس والسياسة يعملوا فينا اكتر من كده

ماسكينا بالسرطان والبلاوى من ناحية .. وبمسح وغسل النافوخ بالقرف الى احنا بنشوفه من الناحية التانية
ربنا يتولااااناا



Blue-Wave:
-----------
:S
واضح ان الصناعة دى كل الى ماسكها جزارين وتجار جواميس وبقر

انا دايما عندى تصور ان السيناريهوات دى بتتكتب يا اما فى شفخانة يا اما فى غرزة .. والفيلم كله يتضرب فى نص ساعة

منورنى يا فندم بالمرور الكريم



كاتب مصرى:
----------
اكيد يا فندم يشرفنى زيارتكم
بس كنا احب نسمع راييك فى الموضوع
ونورتنا الشوية الصغنين دول

بنوتة من وسط البلد said...

الإتربي اللولبي:
--------------
يا فندم فقدان القدوة والمثل الاعلي .. والشحن الاعلاني المثير للنزوات والسعار ... وانعدام اى مبادى واى قيم .. وسرقة وتوريث... دى ايه البلد دى !!!

الموضوع مش مقتصر على فيلم ولا قصه ولا غيره .. التوجيه الاعلامي الصهيونى الى كلنا وقعنا فريسة تحت انيابه .. واحنا الى بنبيع روحنا ليهم

الموضوع كبير والكلام فيه اكبر ولا ينتهى
منورنى يا فندم


موناليزا:
---------
صدقينى عزيزتى .. منتجين بيصرفوا .. ومؤلفين بيكتبوا ورق .. ومخرجين بيصنعوا العمل .. والممثل الى بيرضى بتقديم هذه النوعية .. وفى الاخر الجمهور الى ارتضى لنفسه سماع ومشاهدة هذه الافلام
كلهم لازم يتقوا الله
منوارنى عزيزتى


حاول تفتكرنى:
------------
اشكرك يا فندم على كلامك الرقيق
ولو فى مافيش براميلي .. نجيب لحضرتك استطنبولى :)
منورنا


ياسر حسين:
---------
انا متشكرة اوى يا فندم لمرورك الدايم والغالى علينا

وزى ما ذكرت .. العبارات الى بتتقال عادى كده .. واحنا بنسمعها برضة عادى .. وتتعرض جوا بيوتنا عادى .. وعيالنا يسمعوها عااااادى .. يرددوها عااادى عاااادى

السؤال الذى يطرح نفسه ... امال الموسم الجاى هيقدموا افلام شكلها ايه بقى واسمها ايه !!!

حسبي الله ونعم الوكيل

حسن ارابيسك said...

ياسلاااااااام..ايه ده
ماشاء الله ده مش لسان دي كرابيج بتلسوع..بس هيهات..هيهات دول ناس مابتحسش..ودائما تحت ستار أكذوبة الفن وتحت شعار مخادع ان ده الواقع وتحت تزييف حقير الوصول للعالمية معناه الغوص في المحلية
وحاجه كده زي ماتقولي سمك لبن تمرهندي
يعني ماتعرفيش تستطعمي حاجه شوية قذارة على سخافة على ناس مش متربية.زصحيح مش متربيين
لذلك فكرتيني بالمحترم جداً والموزون أخلاقيا وفكريا
أحمد المسلماني في برنامجه الرائع الطبعة الأولى حينما أمسك خالد يوسف في العاشرة مساءً بمناسبة فيلمة حين ميسرة المهم احمد مسكه وفين يوجعك بس مش بقلة أدب أبداً.. بالفكر المستنير والمنطق الذي يضع الأشياء في نصابها ..وبعدين انتي ياست البنات مدوخة نفسك ليه م معقول سايبه نفسك للدش كده
اعملي زي هما كام برنامج محترم اللي بشوفهم على مدار الاسبوع وعامل بيهم نوووت صغير على مكتبي لتذكر مواعيد اذاعتهم نظرا لإنشغالي
ولا بلف ولا بدور على القنوات واتعب نفسي من السخافات والقذارات
لازم تقنني مشاهدة التلفزيون بقدر ما
لكن واللهي اسمحيلي احييكي على تناولك الذي أطفأ ناراً في داخلي تجاه تلك النوعية من البشر
ستي قالت زمان
صحيح اللي إختشوا ماتو
تسلم ايديكي
حسن ارابيسك

ادم المصرى said...

انتى بقه القمر الى عندك ايه نيل سات ولا هود برد ولا عرب ولا ايه بظبط وعمتا مهما كان الال بى بتاعك الف مبروك على القمر الصناعى والبث المباشر كلو ومن نحيت الفلم انا مبحبش السبكى بحس انو فلاح ما علينا... انا بدعوكى دعوه عامه لجميع من اجل نشر ديننا نجعل يوم واحد ندون فيه لله عن طريق تدويننا تعالو شركو معنا عندى والزياره عامل بللليز لله الواحد

كيكى said...

هههههههههههههههههه.. لابجد انت عسل اوووووووووووى
بصى عندك حق فى ساعات كتيررررر مناظرررررررررر اوفر اووى بس ساعات كتير بيقبى ليها مضمون بغض النظر عن المنظر زى...سهر اليالى....اوقات فراغ..الساحر...عمارة يعقوبيان..الا فى كتر قصتهم جامدة...بصى همة بيعملوا المناظر اللعرض التجارى وكدة يعنى..
بس على فكرة نسيتى حاجة مهم الكليبات بجد...الى ولا اغنية ولا شكل ولا منظر..غير بس سورى فى لفظ ..قمصان نوم وسرير...واتنينى مش كويسين..ومناظر بجد قذرة ومش محترمة تقفلى او تحولى تلقى الجيران تنزلى تلقى بتاع الفول مشغل القرف دة..اة والله مش بتريق..
لا بجد انتى دماغك علية اووى
تحياتى ياقمر

كيكى said...

واية حكاية ريا وسكينة دى
هاروح اشوف

محمد العدوي said...

ههههههه

هو للأمانة أحيانا بحس فعلا ان 300 قناة .. كلها تجمع في فنجان ..

ودا من اعلانات الافلام .. بالك بقى بالأفلام ذاتها ....


عمار يا مصر يا مهد المعرفة الإنسانية ..


انا شفت ليلة البيبي دول .. كنت هطق

شفت الريس عمر حرب .. طقيت فعلا ..

أظن فيما أظن سأحجم عما سوى ذلك .. كفاية عليهم كدة ..

بيسوو said...

والله مش عارفة فيما يخص الفيلم اللي اسمه كباريه ده والفيلم اللي اسمه الريس عمر حرب...هو على رايك يعني خلاص احنا حلينا كل مشاكلنا وفاضل بس نحل مشاكل الناس بتوع الكباريهات وصالات القمار...

بلا نيلة على صناعة السيما

Tamer Nabil said...

الناس دى مخعا بقت زبالة

لما مثلاا واحدة ليها ملف فى الاداب وتبقى فنانة يبقى على الدنيا السلام

انا معاكى فى كل كلمة لازم يحصل مقاطعة لاافلام الزبالة دى وياريت لو تعرفى تعملى بنرات ونعلقها فى المدونات والمواقع

تحياتى

كوارث said...

الفلوس
اهم حاجه الفلوس حتى لو كان اللي هيجيبها كباريه او اني اقلع خالص او اني استهيف زي الشباب الهيبز ولا مؤاخذه او غير او غيره بس في الآخر كلاب فلوس
وكلاب الفلوس تمنهم فلوس مش اكتر ولا اقل ممكن تلاقي واحد فقير معدم وقيم عنهم
بنضملك في المقاطعة
بس اعفيني لو كانت عزومة السينما تدبيسة !

بنوتة من وسط البلد said...

حسن ارابيسك:
------------
انا متشكرة اوى يا عزيزى على اضافتك الغالية وعلى نصيحتك القيمة .. والحقيقة ده الى ابتدى يحصل فعلا .. انا مش متابعه اى قناة بعينها وبعد ما ارجع البيت بكون مشغولة فى 6000 حاجة الماساة دى بتحصل فى الويك اند وزى ما حضرتك عارف علشان الدش لسه جديد العهد عليا .. فنقوم حاليا بعملية الفلترة وانتقاء ما يستحق فقط :)
تحياااتى




ادم المصري:
-----------
الدش يا فندم نايل سات وهوت برد .. الهوت ده بوظنا الشفرة بتاعته .. والنايل سات شكله كده قريب هيحصله :)

ع العموم شكرا على الدعوة وانا رزت مدونتك وهكتبلك تعقيبى ورايي هناك اكييد قريب :)

شكرا على المرور الكريم



كيكي:
-----
انا متشكرة اوى لمرورك .. وبالنسبة للكليبات دى بقى موضوع مفروغ منه وعايز مجلدات تتكتب فيه .. ومن غير ما نكتب هو كله على عينك يا تاجر واكيد مش هنلاقى كلام نقوله .. فخلى دول على جنب .. ولله الحمد انا مش بتفرج اى قناه منهم .. بعيد عنك اصلى مش بحب الكليبات والاغانى اصلاا


منورانى عزيزتى



محمد العدوى:
-----------
ياااه على قلبك وقدرت تستحمل تدخلهم كمان .. ده انا مش بطيق اشوف الاعلان نفسه

حضرتك انا مقاطعة السنيمات من ايام فيلم ابو على ومن قبيله صعيدى فى الجامعة الامريكية وهمام فى امستردام
ودى حقيقة ع فكرة

:)
تحيياتى

بنوتة من وسط البلد said...

بيسو:
------
نيلتين تلاتة كمان على دماغهم
اتغظت من ابطال فيلم كبارية فى العاشرة مساءا لما استضافوهم .. وهما بيمجدوا فى قصة الفيلم واخراجة والادوار الى فيه وقال يا فرحتى جامعين العراقى والمصري والخليجي ومش عارفة مين (الامم العربية) من الاخر فى صالة الكبارية

يعنى خلاص مابقتش فيه حاجة تجمعنا احنا العرب غير النجاسة والقرف

حسبي الله ونعم الوكيل



Tamer Nabil:
-------------
اشكرك وبشدة على الفكرة الرائعة وانا هعمل على تنفيذها فى اقرب وقت بمشيئة الرحمن

خلى العالم دى تفهم بقى ان الناس خلاص قرفاانة



كوارث:
------
انا معاك ان الموضوع فلوس .. بس الماساة ان ما بقاش فيه وعي ولا قيم خلاص ... مش عندهم .. عند الشباب الى بيدفع من جيبه ويديهم

المشكلة صدقنى فينا .. احنا الى لازم نحترم روحنا ونحترم دماغنا وعنينا

ونحاول نحمى اطفالنا وعيالنا

لازم يكون فى توعيه بخطورة هذة النوعية داخل كل البيت واحنا الى نقاطعهم .. لكن هما عمرهم ما هيتغيروا ولا واحد زى البهيمة الى اسمه السبكى هيكون عنده اخلاق ومبادئ فى يوم وليلة


ارحموووووووونا