Thursday, June 19, 2008

الثـــانوية ... وأبو رجل مسلوووخة ؟؟


الثـــانوية ... وأبو رجل مسلوووخة ؟؟؟؟

المشهد الاول

الثانوية .. حلم عمر تجسد فى وجدان كل شاب وفيتاة ..
الثانوية .. التحدى والمذاكرة واكل الكتب اكل ليل ونهار ...
الثانوية .. احجز للدروس فى كل المواد فى كل السناتر وعند احسن المدرسين فى اى مواعيد وطول النهار وطول الليل لو امكن ...
الثانوية ...تصوير كل الملازم والمذكرات والمراجع من كل منطقة فيكي فى مصر ...
الثانوية ... حل جميع الامتحانات والكتب الخارجية وكتب المدرسة والنماذج ...
الثانوية .. تثبيت الاهالى .. يا بابا لازم احجز فى كل الدروس وانا مش هجيب اقل من 93% السنة دى ..
الثانوية ... السراب الى بنزود بيه الهم همين واتنين وتلاتة على مدار سنتين من العذاب المتواصل كما فى سجون ابو غريب و جوانتناموا


المشهد الثاني

ماما .. انا نازل الدرس الفيزياء .. هاتى خمسين جنية علشان هصور ورق وادفع تمن الحصة .. واكل حاجة قبل ما اطلع على درس التفاضل ودرس العربي

بابا عايز فلوس الشهر بتاعة درس الاحصاء والانجليزى والفرنساوى والفلسفة والجولوجيا وهات كمان
مصروفى بالمرة


يا ابنى قوووم ذااااااااكر وافتحلك كتاب ...
ذاكرت الى اخدته فى الدرس الصبح وخلصت واجب درس بعد الظهر ... وراجعت لامتحان الدرس بتاع بليل؟؟

ماما ... يوووووه بقى انا لسه راجع من درسين ونازل كمان شوية المراجعة
سبيينى اريح دماغي شوية


المستر مش جاى النهاردة ... طب قشطة يالا ناكل حاجة وندخل سنيما على ما يجي معاد الدرس التانى

الووو .. ايوا يا ابنى .. فاتح كل الكتب قصادى اهو ومش فاهم حاجة .. انا زهقت .. بقولك انا هقوم العب جيم فيفا وبعد كده ارجع اكمل .. يمكن افهم حاجة

فاضل نص ساعة على ما انزل .. ايه ده صحيح ده كان فيه واجب ... طب هقعد اضربه على السريع قبل ما انزل

بابا .. ما تنساش النهاردة معاد الدرس الساعة 12 بليل فى طريق مصر الاسماعيلية .. وهخلص الساعة 2 ... علشان بس تعمل حسابك تستنانى

يا حبيبى فاضل شهر على الامتحان ...
دروس وما قصرناش .. وملازم وكتب خارجية ومتاخرناش .. هااه ايه النظام نطمن ؟؟
!!! اطمن يا بابا مش اقل من 90%

او
غيرهم الى بيبقى قاعد بيحرت فى الكتب حرت .. من الجلدة للجلدة ... زى ما يكون هيألف نظرية جديدة .. وهو فى الاخر المسكين حافظ مش فاهم


المشهد الثالث

امام لجان الامتحانات

الامتحان ززفت زفت ززززززززززززفت

عاااااااااااااااااااااااااا عااااااااااااااااااااااااااااااا

حسبي الله ونعم الوكيل ... الى حاطط الامتحان ده اكيد ابوه وامه مجانين رسمي

هاااااه يا ابنى عملت ايه ... ؟؟
ماحدش يسالنى عملت ايه .. انا عملت الى عليا


لجنة مقرفة وامتحان زبالة و فوق مستوى الطالب الفائق
(هى مصر فيها طلبة فائقين اصلاا ؟؟!!)

عرفت تحل السؤال
C فى السؤال الرابع ..
ايه ده انا مش شفتش السؤال ده
........
ده كان فى انهو حتة

انا سمعت انهم سربوا الامتحان والواد حموءة كان معاه نسخة منه والامتحان بيتباع
بـ300 جنية ... عالم ظلمة .. منهم لله .. منهم لله



المشهد الرابع

وحيـــــاة قلبي وافراحة وهناه فى مساه
وصبااااحه


الحمد لله حمادة جاب 92% و 7 من عشرة .. (قال يعنى)

ارفعى يا سها سماعة التليفون .. مش عايزين حد يشمت فينا .. كفاية الى الواحد فيه

الاب: يا خسارة الفلوس والمرمطة الى ضاعت على الدروس ... وانت عيل بهيمه ما تسواش

ايوا يا حبيبتى .. انا بتصل بيكي علشان اقولك ان فوفا جابت 98% الا هى جيجي عملت ايه (طبعا جيجي منهارة تحت البطانية) ؟؟؟؟

انت كنت بتستخفلنى يا ابن الـ ..... تاخد فلوس الدروس وتروح تقعد بيها على القهوة وتاكل كنتاكى


المشهد الخامس

نتائج مكتب التنسيق

كلية الطب
98,8%
كلية الصيدلة 98,7%
كلية العلاج الطبيعي 98,3%
كلية الهندسة 96,8%
كلية حاسبات ومعلومات 96,9%
كلية التجارة 93%
كلية الحقوق 89%
كلية التربية 90%
سياسة واقتصاد
96%
اعلام 97%


ولا عزاء
لمن دون ذلك .. هش يا واد منك له علشان
الدبان


عيطنا .. واتخربت بيوتنا ... وباظت اعصابنا .. واسودت ايامنا .. وجالنا قلب وسكر من المدعوءة الثانوية وامتحانتها

زعلانين ليه .. علشان ما عرفتش تدخل طب .. الى فيها الـ 45 بنى ادم حوالين جثة فى معمل .. ولا 7 سنين الطالب يتنفخ فيهم .. ولا تكليف فى الارياف ولا مجاهل الصعيد .. ولا تترمى فى عربية اسعاف .. ولا فى مستشفى حكومى واخرك 120 جنية


زعلان علشان ما دخلتش الهندسة .. الى بتدفع تقلك دروس وادوات .. وفى الاخر الدكتور ينجح الى على مزاجه ويسقط على مزاجه ومناهج عقيمة ومعامل متكهنة .. وفى الاخر هتقعد على القهوة برضة لان العشرة منكوا بقوا بقرش

زعلان على السياسة والاقتصاد ولا كليه الاعلام الى ما لحقتهاش .. ليه يا عين والدك ووالدتك .. كنت متخيل هيشغلوك سفير فى الخارجية ولا يمسوك السلك الدبلوماسى .. ولا هتخرج تشتغل فى القنوات الفضائية


زعلان على ايــه !! ولا ايه... ؟؟ وهى الجامعة هتفرق عن الى انت فيه دلوقتى فى ايه .. ؟؟


الحكومة ريحتكوا .. مش كل واحد عايز شهادة يتمنظر بيها على خلق الله .. ولا تزعل نفسك يا معلم .. بس ابقى قابلنى لو عرفت تحط رجلك فى حتة .. ولا قابلنى اذا كانت شهادتك هتسوى قرش صاغ بعد كده .. ولا اساسا هتخرج من الجامعة فاهم حاجة وتسوى حاجة


ماله التعليم الصناعى والفنى .. على الاقل هتبقى كسيب والعشرة منكوا يتاقلوا بالدهب لانهم مش موجودين .. فرحت بالشهادة العليا وانت قاعد فى الكوفى شوب او لسه بتاخد المصروف من ابوك


كله محصل بعضه .. والتعليم من ساعة ما كنت فى اللفة يا ضنايا لحد ما تتخرج من الجامعة .. ده اذا شفت تخرج .. واذا شفت شهادة وهو قطعية واحدة ومخك هيتحول ولمؤاخذة لحزمة البرسيم


فعلا صعبان عليا الاهالى وصعبان عليا العيال الى كل لحظة تعيط وتنهار ويغمي عليها و تتحرق فى دمها .. على اييه .. ؟؟ اذا كنت طالب خايب ولا طالب شاطر ده مش ذنبك ... طالب بتذاكر ولا طالب بتلعب ده مش ذنبك .. لا انت عملت فى نفسك كده ولا اهلك عملوا فيك كده .. الواحد كان ضحية من اول يوم تخطى رجليه فيها التعليم المصري .. ما ينفعش نلومه ونستنى نجنى ثمار تعليمه وقت الثانوية
ونرمي عبء كل السنين الى فاتت على كتفه هو لوحده .. لا نقدر نلوم دماغه ولا تربيته ولا ثقافته ولا فهمه ولا بيئته ولا شكل مدرسته


اكيييد ما كنش ذنبه انه يكون ضحيه لمؤامرات من ايام ما كان العجل فى بطن امه ...


لا مش ذنبـــــــــــــــــــــــه


بس هو يعنى مش من حق الطالب يحلم ... مش من حق اهله يفرحوا بيه .. مش من حقه يكون بنى ادم محترم فى نظر المجتمع ... مش من حقه يعمل زى غيره ويلاقى فايدة

من حقك .. من حقك


بس اكيييد مش فى بلد زى بلدنا


ارتحتى يا حكوومة .. خليتى الناس تكلم روحها .. خرجتولنا طلبة فاشلة من نظام تعليم فااااشل .. خليتى الناس تجرى ورا السراب .. طلعوا كل الى فى جيبوهم علشان خاطر الاكذوبة الى اسمها الثانوية .. مرمتطى الناس على الدروس والمدرسين والسناتر
لهيتى الناس فى الامتحانات الى بتتسرب ولا تنسيق الجامعة ولا المجموع الى
هيساوى ولا مش هيساوى


اطمنوا يا شعب ... اطمنى يا حكومة
ويا هلا بالاحتكار ويا هلا بالضرايب ويا هلا بالتوريث

وهشتكنا وبشتكنا يا ريس ... ده انت زعيم والنعمة كويس


34 comments:

Anonymous said...

يبدو أن الأخت الموقرة كانت هارية نفسها مذاكرة في ثانوي وفي الآخر معرفتش تدخل اللي هي عايزاه.. أيها السادة إحنا في بلد (ديمؤراطي) وده يخليني أقول رأيي ليها بصراحة.. يبدو أن البنوتة لما جابت مجموعها ده بعد ما لبست نظارة من كتر المذاكرة معرفتش تدخل اللي هيه عايزاه.. وده يعبر عن حقد تعليمي مدفون في اللاوعي.. واللاشعور طلعه هنا.. وإني من فوق هذا المنبر أناشد حضراتكم ألا تغضبوا مما كتبت.. وارحموها في التعليقات ما تجوش عليها قوي.. وبالمناسبة حضرتك خريجة كلية إيه وسنة كام .. وبتشتغلي إيه.. أكيد أكيد لسة بتعيدي ثانوية عامة.. ومبروووك ع الدش.. ومحدش يشتم الوزير كفاية اللي هوه فيه.. وتحياتي لما يحدث في محافظة المنيا على يد الناس اللي ماسكة البلد هناك.. وكما يقول فلاح كفر الهنادوة .. ويجعله عامر

الإتربي اللولبي said...

معلش يا بنوته

الأخ المبجل صاحب أول تعليق باين عليه عنده عقدة نقص عشان عديم الفهم و الإدراك و باين عليه حفيظ و فكيك و فتك و من النوع اللي مقضيها حشو في مخه ليل و نهار

بس ده ما ينكرش إن الموضوع نفسه اتهرى من كتر الكلام فيه .. و إن كانت طريقة عرضك له جميله و عالية قوي

أتمنى لك الاستمرار

و سيبك من أي كلام فارغ .. إنتي فعلا بتجيبي الخلاصه

سلام عليكم

استراحة محمد said...

الله يخربيت الثانوية العامة على بيت اللى اخترعها
ذاكر واحفظ ودش ، واصرفى يا اهالى وفى الاخر على ما فيش
تلاقى كل واحد فى الكلية الغلط بأوامر مكتب التنسيق
اموت واعرف مين العبقرى اللى اخترع الثانوية العامة ده ، تقريبا والله اعلم انه كان جاسوس اسرائيلى
تحياتى دائما

Soooo said...

يخرب بيت ده موضوع

قلتي كل حاجه بجد
طب احنا نعلق نقول ايه يعني؟؟؟

----

كنت شغال في مصنع في شق التعبان .. مصنع بتاع رخام
وانا الاسم مهندس والحمدلله فاهم شغلي
لما كنت باطبق ورديتين ماكانوش بيدوني ضعف المرتب في اليوم ده
بينما الصنايعي لو اشتغل تلات ساعات بس زياده .. كانو بيدوله ضعف اليوميه بتاعته
لدرجة اني كان نفسي ابقى صنايعي

منهم لله اللي زرعو في دماغنا شوية مفاهيم غلط في دوله ماشيه غلط



سلاموووووووووز

حاول تفتكرنى said...

لا شك أن قرأءة الموضوع فادتنا كثير

حتى صرنا نبحث عن حلول لجزئيات لم نتخيل التفكير فيها من قبل

احييك على اسلوبك الذى يجبرنا على الاستمرار فى القراءة - بشغف - رغم طول الموضوع

تحياتي

arsenalwy said...

والله ربنا يقوييهم بجد

اللى بيحصل فيهم صعب

بنوتة فكك من اى كلام وبالذات لو كانوا من اشخاص مجهولة دول زى الكائنات اللى بيطلعوا فى الشات وهدفهم الشتيمة بجد ولا تحطيه فى دماغك

وبالعند فيه سيبى التعليق اوعى تحذفيه

تحياتى ليكى

ketchup said...



مش عارف ليه دايما اوقات ثانوي لما بفكر فيها
بقول انها كانت اجمل ايام

يمكن عشان دخلت الكلية اللي انا عاوزها و ربنا وقفني

يمكن يو كنت اخدت صابونه و اتزحلقت على اي كلية تانية
كانت هتبقا اسوء الايام و احزن الايام

النظام في مصر كله فاشل
تعليم كله فاشل

حفظ و صم و ادخل ياواد ابصم و اطلع

اللي بيجيب مجموع عالي في ثانوي هو الطالب اللي له القدرة و الصبر
انه يحفظ
و يذاكر كتير
و يراجع كتير
و في الاخر يقدر يحافظ على اعصابة التلات ساعات بتوع الامتحان عشان مجهود السنة ميذعش اونطه

يعني مصيرك يا طالب يا غلبان مرتبط ب ثلاث ساعات

مصير حياتك كله مرتبط ب تلات ساعات

Iskanderani said...

مساء الفل علي حضرتك؛

ده كمالة الفشل والتهريج في المحروسة
لا هي شهادة ولا ده اصبح تعليم وكلهم مشغولين والسلام وصاحب العزبة حدانا والعائلة الكريمة طايحيين في الخلق

دُمت بخر وحاولي تنسي علشان ضغط الدم عند حضرتك ما يرتفعش

تحيات إسكندراني في بلاد الله الواسعة

بنوتة من وسط البلد said...

Anonymous:
----------
بص انا مش هكتب اسمك علشان الناس كل الناس الى زعلانة ما تلبدلكش فى الدرة
:)

ومعلش يا جماعة بجد ماحدش يزعل .. اصل البيه كان بيهزر :)
ويالا المسامح كريــــــــم



الاتربي اللولبي:
--------------
انا متشكرة اوى يا عزيزى الغالى على تعليقك الكريم .. وصدقنى فعلا الموضوع الكلام خلص فيه .. مع انه لسه كلامه كتييير وكتتييير اوووى
وما بيخلص ولسه هنشوووف
ربنا يرحم الاهاااالى
اصلها كانت ناقصه



استراحة محمد:
-----------
الله يخرب بيت الثانوية على المجتمع على نظرة الناس الى بقت بتعمل فينا كده

ده غير الكوسة والفساد حتى فى التنسيق .. والى يحزن الفساد الى بقت فيه كليات القمة .. يا فرحتى بالطب والهندسة ووحياتك هما اغلب من الغلب
منورنى اوى يامحمد



Sooooo:
--------
طب انت عارف ان فعلا يومية الصناعي وسواق التاكسي احسن من مية دكتور بشهادات اد كده .. بس سبحان الله .. الطبقة دى الى طاحنها .. انه يا اما مخلف كتيير .. يا اما بيبقى عائل لعدد مهول من البشر ملهمش غيره .. علشان كده بيفضل غلبان

وفى ناس بتثتمر الغلب ده علشان يكسب اكتر ... بس الى كان بيقول ان دى بلد شهادات .. طلع ابن كدابة
:)

منورنى

بنوتة من وسط البلد said...

حاول تفتكرنى:
-------------
اشكرك على المتابعة فى قراءة وجهة نظرى المتواضعة واعتذر عن طول الموضوع واذا كان اخذ اكثر من حقة
تحيياتى



Arsenalwy:
----------
الله يبارك فيك يا عزيزى .. والله يكون فى عونا جميعا ان شاء الله

ويعينا على امثال الكائنات المجهولة :)
ع العموم حصل خير .. الراجل طلع معرفة وكان حابب يهزر :)



Ketchup:
--------
اشكرك يا عزيزى على المشاركة وفعلا ما ذكرته صحيح .. الموضوع يكمن فى ان المجموع لا يعكس باى حال من الاحوال قدرات الطالب فى الشطارة والفهم .. بالعكس كل ما على المجموع كل ما دل على ان الطالب صميمم وحرييييت .. واصلا لو رجعنا للحق ما ينفعش حد يجيب 100 %
ازاى يعنى العيال الجهابزة خلاص .. مؤلفين الكتب

فين ايام زمان لما كنت اسمع ان الطب ده بيتدخل ب70 و60 فى المية

ربنا يهونها علينا وعلى عيالنا ايام

المهم بقى ما الاقيش معاك مسطردة بالمرة
منورنى :)



iskandrani:
-----------
وانا يا فندم ما تاعبنى غير الضغط .. والواحد ما بقاش ناقص لا دوا نافع ولا البعد عن الغنيمة نافع

وكلاب صاحب العزبة الى حدانا فى البلد مش سايبنا فى حالنا .. وهاتك يا نهش فينا من كل ناحية

والله الواحد ما عارف يرفع راسه من ايه بس ولا ايه

حتى نضر عين الواحد .. ضناااه .. مش مهنينا نفرح بيهم ولا نطمن عليهم


حسبي الله ونعم الوكيل .. ده احنا عايزين يجي 100 سنة علشان تقوملنا قومة .. ده ان قاااامت !!

منورنى يا فندم بتشريفك الغالي

انا مش سلبى said...

ولسه

اكتشفوا ان امتحانات الثانويه كانت بتروح لولاد المسئولين من 20 سنه
واحنا اللى كنا فكرنها ثانويه وهى فى الاصل تقلية

ااااااااااااااه
ياميت خساره على التعليم

كيكى said...

عووووووووووووووووووو
انا جيت ةةاتخديتى..
عاملة ايييييييييييية
ههههههههههههههههههههه
ياهلا يا هلا
......................
مش لقية كلام تانى
دومتى بخيررررررررررررر

اسكندراني في الغربة said...

يعني هي جت على التعليم
شعب مش لاقي رغيف العيش
عوزاة يحل مشكلة تعليم جيل

قولي يا باسط ..حتلاقيها هاسط

تحياتي

عًٍمًرٌٍوٍ آلنْوٍبٌَِى said...

والله معاكى حق فى كل كلمة قولتيها
البلد دى بقت فلة اوى اوى يعنى هى جت على الثانوى ولا غيرو ياستى دى الخلق للخالق
انا فى ايام ثاوى الحمد لله ولا كانت فارقة معايا ادخل كلية ولا ادخل السجن حتى ههههههههههههههه
دى كانت ايام مهببة ربنا لا يعودها
هههههههههههههههههههههه
تحياتى ليكى وبجد موضوعك جميل والمدونة بشكل عام ممتازة

nour shahen said...

ههههههههههههه
معلش يا بنتى بكره تتعدل الحكايه
او يمكن يعدلوا التعليم او يغيروا الوزاره ابعد من كدا صعب اقول يتغير اتمسك تحرى علي طول هههههههه
واهى كلها احلام يقظه اعزرينى اصلى الاحلام هوايتى ودنيتى
بوست رائع وشكل الثانويه العامة هتبقى من اسلحة الدمار الشامل
او تتحط في قايمة المخدرات لأنها بتؤدى الي الوفاه في النهايه
بس للحق يعنى في ناس بتعدى وتطلع يمكن مش بتخرج بكامل عقلها وفي عباقره كتتير في بلدنا الجميله برضوا
يلا انا هسكت اهو وكفايا كدا
تقبلى تحياتى بقى بقى

بنوتة من وسط البلد said...

انا مش سلبي:
-----------
وعلى كده ولاد المسؤلين الى اخدوا الامتحانات من 20 سنة .. مكانهم فين دلوقتى !!!

واحد قريبنا كانوا بيسفروه الصعيد فى بلد ابوه فى الثانوية .. علشان يمتحن هناك ويدخلوا واحد تانى مكانه :)))
الراجل الى انا بحكيلك عنه ده .. لسه ما اتخرجش من المعهد لحد دلوقتى وافتكر انه بيلعب فى التلاتينات

هو لكل مجتهد نصيب وانا مقتنعه اذا كانوا هما ظلمه .. فربك عز وجل مش ظالم
سيبهم منهم لربنا
وحسبي الله ونعم الوكيل



كيكـــــي:
----------
عو ايه بس يا شيخة .. خليكي انتى على جمب .. واحكيلنا عملتى ايه فى الامتحانات
شرفتينا ورافعتى راسنا ولا ايه سيستيمك ؟؟
:)

منورانى يا قمراية .. وانا مش هفتح البلوج تانى فى الضلمة :P



اسكندرانى فى الغربة:
------------------
فكرتنى بكلام اغنية المطرف الشيعبي بعرور افندى الله يحرسة من العين وهو بيقول

منغير ما اتكلم و لا اسلم طرابيظة و فيها كذا معلم و هيصة
أسمع يا معلم بتكلم لا ترد عليا ولا تسلم و هيصة

أومرنى يا غالى يا مزاجك العالى
هنستنوك على القمة نظبطولك العمة
أومرنى يا غالى يا مزاجك العالى
أومرنى يا غالى


يسلم فوممك يا بعرورررتى ..
ظبطولنا كلنا العمة يا معلم .. ولا عزاء للشهادات :)

منورنى



عمرو النوبي:
-------------
انا متشكرة اوى لزيارتك يا عمرو وفعلا منورنى .. وانا كمان ايام الثانوية الهباب لا كان فارق معايا برضة .. بس مش لدرجة السجن يعنى :)

انا كان عندى امل اجيب مجموع للعباسية :)

منورنى ومدونتك حلوة ع فكرة




Nour Shahen:
-------------
قوليها انتى خايفة ليه .. عقبال يا رب وانت جاهى ما يتغير الى فى بالى اكبر راس وتقوملنا قومة يا رب
وناخد كاس العالم ان شاء الله :)

وبلا ثانوية بلا زفت .. فى اتنين انتحروا النهاردة واحد فى الجيزة والتانية فى بورسعيد

اصل التنسيق فى جهنم احسن من تنسيق جمهورية مصر العربية


منورانى يا غالية .. وطنش تعش تنتعش
وماحدش واخد منها حاجة

ياسر حسين said...

لا أملك سوى أن أقول
كالعــــادة
ده كلام خلاصة
وفي نفس الوقت أنا شايف إن النجاح هو النجاح في مجال العمل وليس النجاح الدراسي هو المقياس
ولقد تعرضت لهذا الموضوع من خلال موضوع حول ذكرياتي عن الثانوية العامة بمدونتي على هذا الرابط
http://cartoonya.blogspot.com/2008/06/blog-post_11.html
عنوان الموضوع
قلبي معاكم

خالص تحياتي

ليكوريكا said...

اجمل حاجه انك مقربتيش من صيدله

ايوه دي وطننا التاني ولايونكن اسمح بالاقتراب او التصويييييير

استني بس اطلع ممن الكليه دي علي خير

وانا هعملها مزار سياحي

ومصر كلها هتيجي تقترب وتصوووووووووووور

متحطيش في نفسك اوي كده ... المستقبل بايد ربنا

وربنا عالظالم والمفتري

ليكوريكا

بنوتة من وسط البلد said...

ياسر حسين:
----------
عزيزى الفاضل
والله يا فندم انا مش عارفة اقولك ايه على ذوقك وجمايلك علينا .. ولازم المرة دى تاخد الواجب بتاعك .. الزبادى فى الخلاط مع شاندوشت الفول :)

وزى ما حضرتك قلت .. المشكلة مش فى الدرجات ولا المجموع خالص .. المهم انتهى بيا المطاف لحد فين وعملت ايه علشان اكمل فيه صح .. وانا كمان عندى نفس التجربة ونشرتها فى بوست قبل كده .. ويشرفنى لو حضرتك برضة قريته
كان اسمه
"مستقبلي رسمته بالصدفة"
http://kalam-kholasa.blogspot.com/2007/02/blog-post_19.html

وتخيااااتى



ليكوريكا:
---------
تصدق بعد ما نشرت البوست قلت ازاى انسى كلية الصيدلة .. :)

ما انتوا برضة يا ضنايا بتدخلوا الكلية من دول ب98% وبعد كده يا شغاليين داكترة تخاليل فى معامل .. يا مندوبين مبيعات فى شركات ادوية تلف على العيادات ليل وتهار .. يا اما لو ربنا كرمك واشتغلت فى صيدلية او حتى فتحتلك واحدة .. بيبقى اخرك دوا اسهال او دوا كحة .. او لمؤاخذة بامبرز وحاجات تانية :)

انا بس احب اطمنك واقولك خليك متفائل :)

منورنى بزيارتك الغالية

momken said...

بصى بصى بصى

احترسى نفسك.....انا بقولك اهو احترسى نفسك

مالكيش ده ببتوع سياسه واقتصاد
ماهم زى الفل ومرمين فى انضف شوارع البلد
ومش قعدين على قهاوى ولا حاجه قاعدين فى كافيهات محترمه
هههههههههههههه

بلا نيله

بعد ماقر يت البوست قلت الحمد لله انى مش فى ثانويه عامه
لسه قارى امباره عن بنت فى بور سعيد انتحرت من الكيماء
وولد من القلوبيه انتحر بسبب التفاضل

قلت فى قراره نفسى داحنا كنا معندناش دم

بس قلت كمان لو موضوع تسرب الامتحانات ده وحالات الانتحار دى فى اليابان
كان وزير التعليم عمل فى نفسه ايه؟؟؟

واحنا مالنا ملناش دعوة بالسياسه بس الى عنده دم احسن من الى عنده فدان طين

واضح ان السيد الاستاذ الدكتور الى بيحط الامتحان داخل منافسه مع الطالب
ومش عاوزين نقول مركبات نقص ولا عقد مترسبه ولا نيله
احنا مالنا
المهم بدل مطلع من مدونتك على وزاره التعليم اتعذب هناك

البوست بتاعك حلو انا اصلا بعشق اسلوبك وطريقتك فى الكتابه
هو انتى كاتبه كبيره ومتخفيه فى صوره مدونه ولا ايه الحكايه

تحياتى

كوارث said...

نقلاص عن الدستور
انتحار اربع طلبة الاسبوع اللي فات من صعوبة الامتحانات !
وتعليم الفيزيا اثبت نجاح 5 %
صباح الفل
لو فتحت في موضوع التعليم مش هسكت
فخليني ساكت احسن
قال تعليم قال

بنوتة من وسط البلد said...

Momken:
يا فندم انا متشكرة اوى على الكلام الجامد ده .. اخجلتم تواضع معالينا الكريم :)

وبعدين بالنسبة للتعليم والى بيتعلموه .. فده وكسة تقيلة بعيد عنك وبجميع المقاييس .. وعايز نفردله حلقات ومجلدات من اول تعليم الصنايع لحد تعليم الجامعة والمدارس الخاصة والحكومية والمعاهد الخاصة ومناظر الطلبة

ربنا يكفينا شر التعليم وبلاويه يا رب
منورنا يا فندم


كوارث:

وانا كمان خلينى ساكتة .. ونقلبها بقى صم وبكم احسن .. اصل بعيد عنك لا بقى فى حد بيسمع ولا حد بيفهم واحنا بقينا بنهههق فى مالطا

حسبي الله ونعم الوكيل
ده انا قلبي وجعععععنى

بس انت منورنا والله :)

Desert cat said...

انا كتبت تدوينة على نفس الموضوع والعيال الى طول السنة مقضيينها خروج وهدايا اعياد الحب
وفى الاخر يعيطوا ويلولو
ومنه لله المراقب مش غششنا
وتحيا جمهورية البامية المهلبية

محمد العدوي said...

مش عارف ليه بحس ( رغم قناعتي بالأخطاء الفادحة من المسؤولين على التعليم كله ) انه احنا بنكبر الليلة قوي ..


قوي الأهالي مثلا بما انهم اتفحتوا صرف فلوس يبقى ولادهم لازم يجيبوا مجموع .. هيعملوا بيه ايه مش مهم المهم يجيبوا مجموع .. مهو انا منطحش الحيط طول عمري والحيطة متتكسرش ..

الطلبة بقى بيعيشوا على الليلة دي ..

في حسي ان المذاكرة طول غمرها فن .. كونها تحولت في منطقنا إلى صنعة ومولد وكيف تهبش درجات اكتر .. فمن الطبيعي ان اللي بيفكر كدة ميصمدش امام اي ضغط عصبي او خروج بسيط عن النصوص في الامتحانات ..

اظن انه من المنطقي ان نفكر في الموضوع بمنطق اكثر هدوء .. علشان نقدر نبقى احنا ( الطلبة يعني ) الكسبانبن ..


معاكوا ان الحكومة مش مخلية حد يقدر يرفع راسه .. لا الطالب ولا أبوه .. بس أظن فيما اظن ان تغير معرفي بسيط في ثقافة أي حد هيخليه يتعمال مع الموضوع بصورة ألإضل ..


( طبعا دي نظرة واحد خلص ثانوية من تسع سنين . تقريبا
:D

عروسة ننوسة said...

ضحكتينى جدا.......البوست دمه خفيف

Soooo said...

عارفه
في صنايعي اعرفه يوميته ميتين جنيه
ومش متجوز
كان بيصرف فلوسه كلها في المخدرات
ولما جيت مره زنقته قلتله انت بتشرب ليه يقولي عايزني اعيش في البلد دي من غير ما اخد حاجه تنسيني الخنقه .. لقيتني اتحمقت مره واحده وقلتله انت يوميتك قد ربع مرتبي طول الشهر .. خنقة ايه وزفت ايه .. ياشيخ روح في داهيه الله يخرب بيوتكم

الناس دي بجد بتستعبط
دول لو ظبطو نفسهم بجد هيعيشو احسن مننا احنا حملة المؤهلات
بس هنقول ايه ونعيد ايه

وانتي ازيك وايه اخبارك؟؟؟
طيب الحمدلله تومام تومام




سلامووووووووووز

بنوتة من وسط البلد said...

Desert Cat:
-----------
منورانى يا عزيزتى
واما قريت البوست وكتبتلك تعليقي
واذا كانت على البامية فاافتكر انها تقيلة فى الحر .. خلينا فى المحشي :)


محمد العدوي:
-----------
تحياتى لكل كلمة قلتها
وبرضة ده الكلام الخلاصة
وعارف المصيبة فين يا محمد .. ان الواحد ما بيعرفش الخيبة التقيلة غير بعد ما بتخرج من الثانوية بـ9 او 10 سنين وويقول انا ايه الى كنت عاملة فى نفسى ده :)

احنا محتاجيين نظرة المجتمع تتغير ... واكييد حاجاات كتيير اوى فى حياتنا هتتغير


منوررررررنى :)


عروسة ننوسة:
------------
انا متشكرة اوى يا عروسة على زيارتك الغالية .. وهنستناكى المرة الجاية انتى وكوكو :)



Soooooo:
--------
انا قلتها حكمة .. احنا كشعب عايزين نتربي من اول وجديد :)

والله كله تومام توماام

اخبار اللبن حداكوا ايه .. ؟؟ اصلى نفسى فى طبق رز بلبن بالايس كريم والمكسرات :))


منورنا يا فندم

Amr Fekry said...

أنا إز معاكى

بنوتة من وسط البلد said...

Amr Fekry:
-----------
انت مين يا اخويا :) ؟؟

soska said...

والله انتي عندك حق المدرسين لامؤاخذة نظام اللي عايز الدح ميقولش 00000اوالاهالي اللي باع اللي وراه وقدامه واللي باعت صيغتها على عيالها واللي ماتوا من الجوع واللي ارتشوا وبرضه مش مكفي والعيال ايشي بارد وياخد الفلوس بتاعه الدروس يقابل بيها البت بتاعته فالسينيما والا فالكافيه واللي يجيب بيها بنجو واللي فاحت نفسه دروس ومعندوش دقيقه يذاكر فيها وكل يوم ينام يحلم انه فالامتحان او سقط واللي فاكر ان كليه السياحه والفنادق هتخرجه بسم الله ماشاء الله واد بتاع سياحه وهو اصلا معهوش لغه وابقي قابلني على رأي روبي يطفح الدم ياعين امه مذاكره وملازم ويطلع فالاخر شغال شيال شنط في فندق اسكتي ياختي بلى واكسه داحنا في نكسه وعجبي

بنوتة من وسط البلد said...

Soska:
-------
اهلا يا جميلة منورانى .. وانتى عندك حق واهو النتيجة طلعت والناس اتمنظرت واتشفت فى بعض .. وكل عيل من دول يدخل الى يدخله .. وكله بيتنسى ويطلع فى الغسيل

احلى حاجة قريتها امبارح بيقولك .. نقابة الاطباء تحذر الطلبة من دخول كلية الطب لانها لا تضمن لهم المستقبل المهنى


:)

كان خبر فى الجون .. ويا ريت الناس تفوق بقى

منورانى عزيزتى

islam said...

http://2ade.blogspot.com/
عاوز رئيك

بنوتة من وسط البلد said...

Islam:
-------
اسعدتنى الزيارة الكريمة
منورنا يا فندم
تحياتى

Unknown said...

.
.
.
.
.
.
.
.
.