Wednesday, July 2, 2008

لما عنيا بتشووووووووفه


لما عنيا بتشوووووووووووفه

لما بشوفه واعدى من قصاده ... بحس ان يومي النهاردة اكيد هيكون مختلف
لما بشوفه .. بنسى كل مشاكلى وهمومى
لما بشوفه .. بتحول لشاعر ورسام وفنان
لما بشوفه .. بحس انى فى احلى مكان واحلى لحظة فى الدنيا
وخصوصا لما بشوفه الساعة 7 الصبح قبل الزحمة وقبل الحر

واعذرنى يا حياتى .. ما هو اصل انت اساسا مش فى طريقي
ولو كان بايدى كنت فضلت جنبك ع طول
بس هجيبلك 5 او 6 مليون جنية منين
كفاية عليك جنية ونص تمن قرطاس الترمس
أو الـ3 دقايق الى بشوفك فيها مرة فى الاسبوع او حتى كل اسبوعين
وصدقنى بشتقالك .. وصدقنى بحبك
بس يعنى ما اهو انت موجود .. ووقت ما احتجالك اكيد هجيلك
بس اصل انت بتبقى احلى لما بتظهر فى حياتى من غير معاد
ومن بعيد لبعيد يا نجم فى سما حياتى علشان بتبقى اجمل
لانى لما بقرب منك بتبقى ريحتك لا تطاق ومنظرك يقرف الكلب الجربان

وكفاية عليك كده بقى النهاردة

---------------------------------------
خواطر واحدة راكبة تاكسى معدى على كورنيش النيل
---------------------------------------

تحديـــــــث
16-07-08

تحديـــــــث
27-07-08

44 comments:

ketchup said...

عووودي يا هاااااميس

ايه رأيك نعملك عروسة النيل و نرميكي في احتفال النيل اللي جاي و اهو تبقي مع حبيبك على طول


فكري و قوليلي عشان اتصل برشدي


اه اه برافو عليكي
رشدي اباظة

المُهاجر said...

خواطر واحدة راكبة تاكسى معدى على كورنيش النيل

دي خواطر واحدة ماشية في الصحرا وفي الحر بقالها 4 ساعات :)

أشكرك على الابتسامة اللي منحها لي موضوعك

وتقبلي مروري

Anonymous said...

أممممممممممم

هيه ألغاز الثانوية العامة خلصت.. طلعتيلنا انتي بألغاز تانية؟؟

بحاول أفهم م الصبح مش فاهم حاجة :(

م المرة اللي فاتت عقد الثانوية طلعت عليكي

إحنا جايين نقرا تفاضل هنا

ولا دي فيزيا واستاتيكا سوا

بس قوليلي تعرفي إيه عن المنطق ؟

سمراء said...

مصر هبة النيل
يعني لولا النيل كان مفيش مصر الفرعونية
تخيلي ان احفاد الفراعنة اللي لسة بياكلوا من الورثة الكبيرة اللي سابهالهم اجدادهم هم اللي لوثوا المصدر بتاع الهبة ( مصر )
وا حسرتاه يا نيل
ووا اسفاه يا مصريين

سمراء

بيسوو said...

ربنا يا اوختشي يهنيكي بيه مع انه بقى اخضر من كتر المجاري اللي فيه..بس شغال برضو وماله
:)

محمد العدوي said...

ههههههههههههه


هتبقى نغسله ..


مظلوم قوي ويانا والله ..


بس مترميش قشر الترمس على الكوبري ..


:)

بنوتة من وسط البلد said...

Ketchup:
----------
فكرتنى بكاريكاتير لمصطفى حسين الاسبوع الى فات وجايبيين فيه عروسة النيل بتبوس ايد الفرعون انه ما يرميهاش فى النيل علشان بقت ريحتة مقرفة ومليان حشرات :)

ابوس ايدك ارمينى فى احتفال ترعة الزمر وبلاش النيل .. اكيد الترعة هتكون انضف :) .. منورنى



المهاجر:
--------
انا متشكرة اوى لزيارتك الكريمة .. وعلى الابتسامة الى منحها لى تعليقك :)

واستحملوا بقى .. الحر لسه بيقول يا هادى :)



الأخ المجهول:
------------
ده انت مصمم بقى .. ؟؟
ع العموم الى اعرفه عن المنطق الى هو لما حد بيتخبط على نافوخه بيقع من طوله وما يحطش منطق !!!!!!!

فا ستخبي منى بقى اليومين دول



سمراء:
------
يا عزيزتى كل النيل هبة كل الدول التسعة الى بيعدى عليهم النيل قبل ما يوصلنا

اول ما يوصل لنا بقى بنجيب اجله ونرميه بعيد عنك فى البحر .. وفراعنة مين واهرامات ايه بس .. ع راى صاحبنا الى فوق .. احنا نعرف ايه عن المنطق ؟؟
:)

منورانى يا جميلة



بيسو:
------
ما هو شغال وزى الفل .. بس من بعيد لبعيد ... :) ..

انت عارفة لو بعدنا عنه صحيح .. هتقومله قومه .. ده احنا بنستلمه من افريقيا قشطة .. نرميه فى المتوسط خردة .. لحد ما المتوسط نفسه جاب جاز وبترول
:)

منورانى يا كميلة



محمد العدوي:
------------
اوعدك ما ارميش الترمس .. ولا اللب والسودانى .. ولا حمص الشام ولا الدوم والنبأ

بس اوعدنى ما ترميش قشر الحرنكش فى المية

.. صعبانة عليه الى نازلة تدلع تملى القلل .. ده كان فى القرن الكام ده ؟؟!!!

منورنى :)

كيكى said...

عوووووووووووووووووووووووو انا جيت اتخدتى
..............................
والله يابت فى بالى من امبارح....
وقت اخش اخدها لكن لقتك
سبقتنى ..
.......................
على العموم وحشتينى يا مضروبة
..............................
لية بتعدى من لسنة لسنة كدة فى البوست
............................
اةةةةةةةةةةةةةةةةةة
بتكلمى عن حابى
يا بنتى راح دة
راححححححححححححححححح
فى الوباء يا امنة
.........................
ويك ويك
فين هنادى ياخال....
............................
متغبيش كتير
علشان والله اشربك منة واسممك
عووووووووووووووووووووووووووووووو

حاول تفتكرنى said...

مسكين النيل

النيل موجود من دهور ، أحنا اللي مستجدين عليه

النيل مش غلطان

التاكسي هو اللى غلطان


تحياتي

لورنس العرب said...

هو قرطاس الترمس بأه بجنيه ونص؟
صحيح
ما البنزين غلي

بس مال الخاطره صاحبتها قرفانه كده من الراجل
كلب جربان؟
ينهار اسود
لا وكفايه عليه؟
طبعا كفايه عليه
ده كده كفايه - الكلمتين دول يكفوه لغاية لما يموت
هو لو عاش مهما عاش هايسمع ايه تاني بعد كده

Anonymous said...

إنما ما هو تعليقك على ماشربتش من نيلها.. وما هي وجهة نظرك في العصافير اللي بتبقى على كوبري قصر النيل بتزقزق صيف وشتا ولا بيهمهم صيف ولا شتا.. أنا مرة شفت عصفورة مككانش معاها عصفور وكانت بتبص ع النيل وتكلم نفسها.. بصيت كدة قلت يمكن عصفورها في النيل ولا حاجة لقيتها بتكلم نفسها.. أكيد دي بتحب النيل بس أكتر منك، لأنها عبرت عن حبها ده وكلمته.. إنما انتي لأ

وبالمناسبة تعرفي إن الفنادق العايمة دي الصرف الصحي بتاعها في النيل.. رمضان اللي جاي أكيد بكار هايحل المشكلة دي

على فكرة أنا بحب النيل قوي بس بيحزني اللي بيحصل فيه

شكرا لكلماتك

عبد من عباد الله said...

النيل دا ايام الفراعنه كانوا بيقولوا عليه هو اللي عمل الحضاره دي لدرجه انه عملوه إله ولكن دلوقتي الحمد لله بقى ملجأ لينا بنروح له وقت الازمات ( يا شيخ روح كدا اتنيل ) و بقت مراته ( مرات النيل ) بنتمنى انها تزرنا ( جتك نيله يا بعيد ) الحمد لله النيل في قلوبنا دايماً و لا ننساه .

maioya said...

انا قولت يالهوي
هيا كانت ماشيه حلو
في الاول
ايه اللي حصل:))

بنوتة من وسط البلد said...

كيكي:
------
اهلا بعم المرعبين كلهم
يا بنتى اطلعي من فيلم دراكولا الى انتى فيه ده وتعالى اعزمك على كوباية حمص الشام على الكورنيش وانتى تبقى ابو دراكولا نفسه :)

عملتى ايه في قميص اخوكى صحيح .. كوتيه ولا لسه :) ؟؟؟



حاول تفتكرنى:
-------------
منورنى يا فندم بزيارتك الكريمة
والتاكسى سحبنارخصه خلاص ما تقلقش :)



لورنس العرب:
-------------
:)
والله يا فندم انت فهمتنى غلط خالص
انا كنت اقصد المنيل على عينه النيل وكورنيشه

ده انا لو قلت للراجل الكلمتين دول .. كان زمانى ببعتلك ايميل دلوقتى من ترب الغفير :)


Anonymous:
-----------
بقولك ايه .. انت تاخد العصفورة بتاعتك على بكار وتطلع على كوبرى اكتوبر واستنانى هناك على الساعة 2
الظهر كده .. وانا هجبلك معايا الحنطور علشان
تتحنطر
وذلك عملا بنصيحة المطرفة الشيعبية أمينة حدوة الحصان



عبد من عباد الله:
---------------
تصدق بالله .. لا اله الا الله .. انا ما كنتش واخدة بالى من هذا الربط التاريخي والتاثير العظيم للنيل فى حياتنا

وهل ده ينطبق على (جتنا نيلة فى حظنا الهباب ) ؟؟

انا سعيدة جدا بطللتك علينا يا فندم وبعتنا نجيب كوباية الحمص من ع اول الكورنيش :)



maioya:
-------
اصلى اتزلحقت وانا ماشية فى السكة :)
منورانى يا كمييلة

Anonymous said...

رأيت فيما يرى النائم إناس شكلهم مريب.. يرتدون قلنسوة صغيرة فوق الرأس.. ويعبثون بهذا الذي تحدثتي عنه.. بعضهم يشرح لأهل الدول السمراء كيف يشيدون مشاريع عملاقة من هذا الشاب الفتي حتى يأتي إلينا شيخا وكهلا.. كما رأيت بعضهم يمد الود حتى يسكن مجاورا لما تحدثتي عنه.. خير اللهم اجعله خير

اسكندراني في الغربة said...

راكبة تاكسي مرة واحدة
اية الاسراف دة
امال لية بتشتكي من الفقر و تقولي معكيش كام مليون تجيبي شقة على النيل
:)
--
متبقيش واثقة أوي كدة و انت بتقولي ( ما اهو انت موجود .. ووقت ما احتجالك اكيد هجيلك )
مفيش حاجة مضمونة اليومين دول
واديكي شايفة الاحتكار شغال على ودنة



تحياتي

البت قباحة said...

تفس الاحساس عندى بالبحر بس نظرا للظروف الاقتصادية بركب الترام و بقيت مشفش البحر

برضو بلاش بزخ دا الواحد بيمشى جنب الحيط من ساعة البنزين ما غلى

حلو الموضوع دة فكرنى بالذى مضى
سلامى

mostafa rayan said...

مصر هبة النيل

كوارث said...

هههههههههههههههههههه
النيل
النيل ده اتشرد خالص يا عيني والله
صعبان عليّا
لنا الله

كيكى said...

عووووووووووووووووووووووو
..........................
ليكى تاج عندى
.....................
عووووووووووووووووووو

يا مراكبي said...

هههههه

صح كده .. كفاية عينيكي تشوفه .. علشان لو قربتي أكتر ساعتها مناخيرك هي اللي هتشوفه على حقيقته

هههههه

بسنت said...

حلوه بجد
بس لعلمك بقى انا بشوفه وبستمتع بيه مش كل يوم بس اهو بقف قدامه كمان
بس فى محافظتى شكله جميل ويشؤح القلب فعلا
بتاع مصر او القاهره بقى انتى ادرى بيه
شوفى احنا ممكن نخلى اى حاجه حلوه فى عنينا
لما نبصلها بنظره حلوه بردوا

سلمتى

استراحة محمد said...

مصر هبة السيد احمد
مصر هبة عاطف فرغلى
مصر هبة الكلور
اه افتكرت
مصر هبة المنيل

بنوتة من وسط البلد said...

Anonymous:
-----------
خير اللهم اجعله خير .. ابقى اتغطى بس كويس قبل ما تنام .. وع فكرة نفس الناس هى هى .. فى كابوس بقى بعيد عنك .. شفتهم واخدين انابيب جاز

افرحى واشمتى فيا يا ست كوريا
ويا ام المطاهر رشى الملح سبع مرات

:)
منورنى يا فندم


اسكندرانى فى الغربة:
-------------------
يا فندم انا ما ادعيتش الفقر ولا حاجة .. هى كل الفكرة ان كل فلوسى مرمية فى السوق ومافيش سيولة

وما افتكرش النيل ممكن يحتكروه .. هو ممكن يخصصووه .. او يخليلوووه

:)
منورنا يا باشا


البت قباحة:
-----------
يا ست الكل انتى منورانى .. وانا بحسدكوا على البحر وعلى الكورنيش .. ده هواهم يرد الروح .. عندنا لو فكرتى تاخدى نفس عميق شوية .. هتعملى دماغ ولا كانك فى غرزة :)


Mostafa Rayan:
--------------
(مصر هبة النيل )
انا سمعت الكلام ده فين قبل كده .. سمعته فين .. ؟؟ خير اللهم اجعله خير
ااااااه
كان مكتوب على جدران معابد الفراعنة .. بس افتكر اتمسح مع عوامل التعرية :)

منورنى بزيارتك الكريمة



كوراث:
-------
احنا يا ابنى سرنا باااااتع .. مافيش حاجة ما شردناش الى جابوها

حتى النيل ما عتقنهوش فى حاله .. ولسه بقى لما يجي موسم زيارات العرب والخليجيين

ابقى تعالى اتفسح عندنا فى مولد سيدى المبلوولى على كورنيش قصر النيل :)

بنوتة من وسط البلد said...

كيكي:
------
تاج !!!
مع انى والله لسه متغدية وماليش نفس خالص .. ع العموم انا تاجاتى بحبها بالشيكولاتة والفراولة وتكون كاروهات وبفيونكة حمرا من فوق :)


يا مراكبي:
----------
منورنى يا فندم بالزيارة الغالية
وبما انك مراكبي .. فا انت اكيد ادرى :)

.. انا شخصيا مش هقدر اقرب من النيل علشان بيجيلي دوار البحر :)


بسنت:
-------
عزيزتى الغالية . والله لولا ان احنا بنشوف كل حاجة حلوة بعنينا .. وشايفين النيل احلى من المسيسيبي .. والاهرامات احلى من برج ايفل .. ومستنقعات الزبالة احلى من غابات استراليا .. كان زمانا طقينا من زمان

امال الناس بقت ماشية تكلم روحها فى الشارع ليه .. وهو من شوية :)


استراحة محمد:
والاسامى دى بقى علمى ولا ادبي :) ؟؟؟
ع العموم النتيجة الواحدة بخمسة واربعين جنية لو عايزها
:)

وهبة المقدم احمد عبد السلام طلعت اخت هبة عبد الحفيظ محمد .. والاتنين طلعوا صنايع قسم تبريد تلاجات :)

mohamed said...

ولا تزعلى يا ستى شوفى انتى طريقك فين وخلى وزير النيل يجيبلك النيل فى طريقك

تايه في وسط البلد said...

هاهاها
ايوه صحيح هتجيبي خمسة ستة مليون جنيه منين؟
عموما اللي بيحب لازم يضحي

ولو حتي بخمسة مليون جنيه!!ه

Nobil Princessa said...

يا جميلة
دا النيل بردة ومحدش يقدر يستغني عنه
بس الغريب في الموضوع في أغنية الست شيرين ماشربتش من نيلها .. إنها لو شربت مش هتلاقي اللي بتقوله دة
لأنها في الأصل مش هتشرب

تقبلي مروري

الشنكوتي الكبير said...

هههههههههههههههه

جميل قوي الفكره دي
تصدقي لما زرت واحد عيان في المستشفى وكانت حالتها يرثى لها كمستشفى حكومي طبعا والمكان كان مقبض قوي
لكن فجأه اكتشفت ان الشباك بيطل مباشرة على النيل في مشهد خرافي ولكي ان تتخيلي ان كم البؤس داخل المستشفى لاغي تماما اي فكره ان بره فيه نيل ومنظر يساوي تلاته مليون جنيه بصيت عليه كده من الشباك واتعجبت من المشهد الخلاب اللي مفيش حد حاسس بيه من كتر الحاجات الصعبه اللي منسيانه جماله

هي بلدنا كده مليانه حاجات جميله قوي لكن الهم فوق راسنا تقيل قوي خلانا ننحني من تقله وراسنا بقت في الرض دايما من تقل الحمل طبعا بالتالي مش هنشوف جمال بلدنا ولا نستمتع بيه ابدا
ربنا يفرج همنا وكربنا
سلاااااااااااااااااااااااااااام

ليكوريكا said...

ههههههههه

من الاول وانا حاسس

بس فعلا النيل هوا اجمل حاجه في كايرو دي

ربنا يخليهلها ويخليهولنا يارب :)

بنوتة من وسط البلد said...

Mohamed:
----------
فكرتنى بمحمد هنيدى فى مسرحية الابندا تقريبا .. لما كان قاعد تحت الهرم ومدلل رجليه فى النيل :)

تفتكر وزير الري ممكن يكون ليه فى القصة دى ؟؟؟

منورنى يا فندم



تايه فى وسط البلد:
------------------
اضحى بخمسة مليون جنية !!!!
عارف لو كان الجنية بتاعنا ليه شمخة زى زمان .. كنت هقول اكيد تقصد اضحى بخمسة مليون جنية سوداانى

ع العموم لومافيش سودانى فيه لب سوبر وفيه حمص لو تحب .. :)

انت منورنا يا فندم


Nobil Princessa
----------------
لا سيبي الله يكرمك شيرين دى على جنب .. ما شربتش من نيلها ما سفتش ترابها .. ماجربتش فى عز الزحمة تجرب وتمشى فى حواريها

وفى الاخر راحت خلفت بنتها فى امريكا
واحنا الشعب مالناش غير فقع المرارة وخلاص

منورررانى يا ست الكل :)


الشنكوتى الكبير:
----------------
عم وكبير كفر الشناكوة كلهم :)
فى حاجات كتييلا عندنا شكلها حلو ومش شايفنها من الغلب

وحاجات كتيير معفنهوقت ما الواحد بيفيض بيه بيشوفها حلوة

واهو كله فى الاخر سكلانس من المشاهد كل واحد بيايفها على حسب حالته .. والا كان زمنا هجينا من زمان :)

الحمد لله على نعمه الصبر وكفانا بها نعمة :)

منورنا وربنا يصبرنا كلنا على ما بالانا

تحيياتى

بنوتة من وسط البلد said...

ليكوريكا:
---------
يخلييه اه .. ويحمييه اه .. ويبارك فيه ويفيض اه

بس من بعيد لبعيد :)

منورنى يا فندم

Desert cat said...

بالرغم من انه منظره يقرف وريحته وحشه لكنه برضه يظل يحتفل بمكانة عاليه الى اخر المطاف

بنوتة من وسط البلد said...

Desert Cat:
قطقوطة .. بقاءه يعنى ان فيه امل ان شاء الله :)

ربنا يديمه علينا نعمه

منورانى عزيزتى

كيكى said...

عوووووووووووووووووووو
...........................
يابت تعالى خدى التاج خلل خلااااااااااااااص
عوووووووووووووووووووووووو

shabfa2re said...

جميلة اوى الرومانسية دى
بس ابعدى عنى التاكسيات
انا خلاص قاطعتهم

بنوتة من وسط البلد said...

كيكي:
-------
هو انت تااانى ؟؟ :)

ما قلتلك تاجى بحبه بشاليمون بس يكون قبل الغدا علشان مش بقدر اتقل اوى بعد الاكل :)

تسلم ادييكي يا قمر
ومن عنيا نشوف امكانية توصيل التاج هود ديلفيرى ايه وهرد عليكي اكيييييييد :)


منورانى يا كميييلة



شاب فقرى:
----------
والله لولا الحوجة كان زمانى قاطعتهم من زمان .. ووحياتك ما انا راكباه الاطة .. بس اصل مافيش ميكروباصات من وسط البلد للدقى :)

ربنا يكفينا شرهم كلهم

منورررنى يا باشا

Iskanderani said...

مساء الفل علي بنوتة 2/1 البلد؛
أجمل مافي البلوج ليس الموضوع في حد ذاته وإنما التعليقات وردك علي التعليقات والتي تمنحني البسمة وأحيانا كثيرة الضحكة والقهقهة العالية ولا أستطيع تركها إلا بعد قراءتها ... ضحكتيني والله ... روحي ربنا يجعل أيامك سعيدة وبها المرح والضحك ... فشر البلية ما يُضحك

تحياتي الي النيل واللب والدرة المشوي والترمس والفول المفلفل وسلامي لبين السرايات وحدائق شُبرا فقد كان لي فيهم أصدقاء أعزاء أيام ما كنت في مصر أعيش


إسكندراني في بلاد الله الواسعة

دعاء مواجهات said...

ههههههههههههههههههههههههههههه

أخرتها كفاية عليك كدة

مااشى ياجميل كفاية كفاية

بوست عسوول اوى زى صاحبتة

اتمنى التواصل


بيس

Ahmed Al-Sabbagh said...
This comment has been removed by the author.
بنوتة من وسط البلد said...

Iskanderani:
------------
سيدى واستاذى الفاضل
مش قادرة اقول لحضرتك اد ايه اسعدتنى بتعليقك الكريم على بلوجى المتواضع

والله يا فندم خفة الدم فى الردود على التعليقات بتمنحها لى التعليقات واصحابها انفسهم

وسلام كبير واصل لحضرتك من الحاج شبرا وبيقولك فين العشرين جنية الى عليك الى استلفتهم منه قبل ما تسافر ؟
وهوووب كرسي كبير فى الكلوب :))



دعاء مواجهات:
-------------
سعيدة جدا عزيزتى بزيارتك الغالية
وانت الى عثوولة اوى والله

وانا اكييييد يشرفنى التواصل
منورانى عزيزتى



Ahmed Al Sabbagh:
-----------------
عزيزى
انا متشكرة اوى لزيارتك ومرورك الكريم وعلى رايك الذى اعطانى اكثر من حقى بصراحة

واكيد شي يشرفنى يا فندم التواصل والتراسل

تحييياتى ومنورنا يا فندم

Anonymous said...

حلو الكاليكاتيل


بس هاميس اللي خايفة من الكاكا دي

تقصد الكاكا بتاعة السمك مش حاجة تانية


وبمناسبة الكاويكاتيو


يجعله عامر

Anonymous said...

بمناسبة المباريات والأهلي والزمالك

مش ضحكوا علينا وعملولنا لو سألتك انت مصري تقولي إيه عشان ننسى كارثة العبارة

موضوع العبارة ده مش هاتكتبي فيه حاجة

هازعل قوي لو جيتي بكرة وكتبتي ع الماتش والزحمة وابوتريكة وعبد المنصف


المهم المهم المهم

بفكرك بس بالعبارة

وزيارة اوباما لاسرائيل

وموضوع عقد الجواز ده والناس تكشف قبل الجواز ازاي يعني

وكل الحاجات السودة اللي شايفينها دي

لما يصدروا الفول لاسرائيل ارخص من سعره هنا مش مشكلة يصدروه بس ازاي يصدروه من غير ما يدمسوه.. هيه دي المخططات اللي ممكن تفسد عملية السلام


بالمناسبة اجريوم ده ايه

وثيقة البث الفضائي

التوريث سعادتك..


موضوع التوريث ده مهم جدا


وكل الناس بتتكلم فين


والكلام كتر

واحنا عايزين نعرف

فيه توريث ولا مفيش
ناوية تورثي المدونة لبنتك؟؟


نتايج الثانوية العامة


مهرجان الرقص الشرقي


المهم المهم المهم ان صاحبنا فتح السمكة مالقاش الخاتم


انتي ايه اللي جابك هنا

بنوتة من وسط البلد said...

Anonymous الاولانى:
----------------
يا سيدى واضح ان التشكيل عندك غلط
هى تقصد الكاكــــاااا
الى شبه الطماطم دى وبتتباع عند الفكهانى ومن غير بذرررر
:)



Anonymous التانى:
-----------------

يا لهووتى يا امااا
فيه واحد تايه هنا يا اخوانا بقاله 3 ايام .. من يجد بطاقته نرجو تسليمها فى قسم البطانية كفر اللحاف


وبعدين شكلك كده حزبي وطنى ديمؤراطي زملكاوى معارض ولاياعوذ بالله

انا ماليش دعوة بالى انت بتقوله ده با بيه .. ده انا غلبان وعندى كتاكيت بربيها


واذا كان على الى جابنى هنا .. فا انا مستنية اتوبيس يكون طالع على الاباجبية

الى هى فين دى ؟؟؟؟ :)

منورررررررنى يا باشا
ما تجييش هنا تانى بقى :P :))