Monday, July 28, 2008

الشكارة فى العبـّــــارة

الشكارة فى العبـّــــارة


العبارة طلعت فولالى .. ومطابقة لجميع المواصفات الفنية وذلك طبقا لتقرير اللجنة الفنية التى اعدتها النيابة العامة - ودى غير لجنة تقصى الحقائق بتاعة مجلس الشعب الى مطلعة تقرير تانى خاااااالص -


الباشا ممدوح اسماعيل طلع صاحب أجانس عربيات .. ومالوش دعوة بالسواق الى طلع بالعربية وراح داسله 3 تنفار وغار فى داهية معاهم .. يبقى صاحب الاجانس فى السليم لان مافيش منطق يقول انه يتحبس علشان كان مشغل عنده سواق حمار البعيد واعمى القلب والبصيرة راح داس الى داسهم وغار فى داهية


طلع ممدوح اسماعيل فى راى المحامى الاول على قناة فضائية انه بيتعالج فى الخارج وفور اكتمال شفاءه هيرجع بالسلامة لاراضى الوطن .. مع ان المحامى التانى على قناة فضائية تانية خالص . قال انه هربان فى لندن بيعانى من الاكتئاب يا عين امه .. وخايف يرجع لاهالى الضحايا يقتلوه
فاصل من الضحك والنبى


وفى الاخر طلع ولاد الكلب الى كانوا راكبين العبارة هما السبب .. لانهم لو ماكنوش ركبوها اكيد ما كنوش ماتوا .. وايه الى يخليهم يتنيلوا يركبوها من اساسه .. ماركبوش طيارة وكانت ولعت بيهم ليه وكان البيه كمل نوم عادى


الناس بقى المكلوبة والمكلومة وكلام الجرايد الخايب ده .. وجع قلب وتهيؤات خير اللهم اجعله خير وطلع اثارة للراى العام على الفاضى ... والناس الكوبرات مش ناقصيين وجع قلب ..


والقضية برضة طالعة فلللة بسم الله ما شاء الله عليهم من غير مذنب واحد وكله براءة كده فى عين العدو .. ومتهم واحد بس واخد 6 شهور ومع ايقاف التنفيذ كمان


تذكرت بالامس لما قال الدكاترة الافاضل على قناتين منفصلتين فى برنامجين منفصليين وهما بيدعوا ان لو عندك سواق وراح خبط واحد تتحبس انت مكانه .. باى منطق نقول كده .. تذكرت مقولة سيدنا عمر بن الخطاب

لو تعثرت بغلة في العراق لسئلت عنها ياعمر لم لم تمهد لها الطريق

وعايزين يقابلوا ربنا .. لا خليكوا هنا مخللليين احسن ..
واهو رمضان جاى والعيد جاى
وفات تلات سنين والناس هتنسى
زى ما نسينا الطيارة المصرية وزى ما نسينا قطر الصعيد
وزى ما نسينا مسرح بنى سويف
وزى ما نسينا التوريث .. وزى ما نسينا روحنا


بس الحمد لله الحمد لله رب العالمين ..
ان الاهلى اخد السوبر فى الاخر


ولا عاقبة عندكم لا فى السرات ولا فى الضرات
شعب مقشف صحيح
وجتنا نيلة فى حظنا الاهبب من الهباب

29 comments:

Anonymous said...

عزيريتي

ليته جرح يداوى بالماء واليانسون

بأي وجه سيلقى الله كل من شارك في هذه الفعلة

من يرد حق الطفل الذي فقد اسرته

او الاب الذي فقد الزوجة والابناء

وهذه الأم الثكلى

تحياتي ولتبقي في رعاية الله

محمد عبد الغفار said...

يعى هما اللى افتكروا عملواايه
مصمصوا شفايفهم ، اتحسروا وضربوا كف بكف ، حسبوا عليهم ودعوا

ثم ماذا بعد

لا شئ

كلبوزة لكن سمباتيك said...

اسلوبك ساخر زي الكرابيج براوة عليكي
بس تعرفي
الراجل ده اكسبله انه يسيب العبارة تغرق لان بياخد تعويض كبير قوي من شركة تامين عالمية حتى بعد ما يدفع ملاليم التعويض لاهل الضحايا و يدفع اجرة المحامين حيطلع كسبان فلوس
بس خسران الجنة

تحياتي
سمباتيك= طهقانة

Enass said...

ana b2ol keda bardo el 3eeb 3ala el nas wlad el TeeeeeT :D ely rkboo el 3baraa el TeeeeT f om el youm el TeeeeT daa :D

lakn lw kan fihom Ibn wazer wla safer aked brdo makanosh hy3mlo 7aga ;) kolk mfhomiaa b2a !

hwa eah f om el balad bnt el TeeeeT dee 3dl .
ya rab ltfk w satrk 3alinaa

Desert cat said...

اه طبعا غلطانينن ونص كمان
هما لا وش عبارات ولا طيارات
وركبوا عبارة الراجل الشريف العفيف النضيييييييف وغرقوها له
وشوهوا صورته وسؤا سمعته وسمعه نجله
المفروض يرفع على اهالي الغرقى تعويض
مادى وادبى علشان يتعلموا الادب ومش يسفروا اولادهم تانى
يلا مش مهم 1033 واحد فداء ممدوح اسماعيل وابنه
مش مهم الغرقى المهم العبارة
المهم الراجل الكوباره ده ونجله
ربنا يرحمنا

ياسر حسين said...

تحية خاصة
للقضاء المصري النزيه
النزيه جداً
وفي انتظار عدالة السماء

خالص تحياتي

حسن ارابيسك said...

احكي وقولي يا بهيه على اللي قتل ياسين
بس نقول لمين ونعيد لمين
عاوزين للنظام مش ليتر واحد ولا ليترين ولا جركن دم لا محتاجين نيل يجري فيه دم مش ميه عشان يحسوا شويه
تحياتي حسن أرابيسك

Ahmed Al-Sabbagh said...

رائع

ody911 said...

تعرفى إنك فارسة نفسك وعمالة تهرى وتنكتى وصدقينى هوة دة العادى بتاعنا

ولغاية ما يتعدل هنفضل نقول عادى بقة

هيه دى مصر


عادى بقة
أودى مشغول

بس أنا كنت معدى قلت أمسى

سمراء said...

احنا مش ناسيين
احنا في غيبوبة
موت اكلينيكي


كل ليل وله آخر
اشكرك على الزيارة والتعليق الواعي
سمراء

كلام وخلاص said...

فيه قصيدة حلوة اوى لاشرف توفيق فى بلوج اخف دم اسمها كله قابض اقريها حتعجبك
ماعنديش كلام
حسبى الله ونعم الوكيل
سلام

عروسة ننوسة said...

منهم لله وان شاء الله ربنا يقتص منهم فى الاخرة
تحياتى لبوستك الجرىء

بنوتة من وسط البلد said...

Anonymous:
------------
ضيفي الغالى
باى وجه سنلقى نحن الله بعد ما اصبح أقصى ما نفعله وهو البغض بالقلب وهذا اضعف الايمان .. واصبح هذا حالنا جميعا

فماذا نحن فاعلون ؟؟ وماذا هم بنا فاعلون ... ؟ رحم الله شهداء العبارة ورحمنا الله معهم


محمد عبد الغفار:
----------------
واخدنا مج النسكافية وانتاخنا على الكنبة وشتمنا قصاد 90 دقيقة والعاشرة مساءا والحقيقة .. وجينا هنا كتبنا الكلمتين
وكان الله بالسر عليم
وصبح صبح يا عم الحج
ولا شـــــــــــــــئ


كلبوزة لكن سمباتيك:
-------------------
مش قادرة اقولك انا متشكحة اد ايه بزيارتك الغالية .. والاهى ما يقطعهالك عادة :)

وبالنوسبة للبعيد ابن البعدا .. فده خسران ان شاء الله دنيا واخره .. وان شاء الله ليه اخر .. دول فوق الـ1000 بنى ادم وليهم قصاص .. مش هيروح عند ربك الكريم العادل

بجد منورانى .. وبقى انتى طلعتى هى وهى طلعت انتى .. حمد الله على السلامة :)



Enass:
-------
Teeeeeet TEEEEEEEEt TtEEEEttt TEEEETtt tTeEETTT Weladdd el TEeyeeett tTeEETTT

والان مع فاصل اعلانى
منورانى يا غالية :)



Desert Cat:
------------
قطقوطة .. ما بقاش فى اى حاجة فى الزمن ده تسوى

علشان نيجي نزعل دلوقتى على 1033 بنى ادم ونتحمق عليهم .. كل يوم وكل لحظة بتموت فينا حاجة
يا ترى كل ده فى رقبة مين ؟؟

واذا كان على ممدوح بيه اسماعيل .. فامش عارفة اقول ايه .. على راى ايناس .. تيييييييت تييييييت تراباتا تيت



ياسر حسين:
---------
منورنى يا فندم بالزيارة الكريمة
وكمان سلامين وحتة للقضاء النزيه ولخالتى شفافية وعمتى نزاهه
وعمهم كلهم سيد معلمين الحتة بمناسبة خروجه من السجن وللاولاد والاحفاد ولا عزاء لمن دون ذلك
تنتاتاتنتن بم بم

:)

بنوتة من وسط البلد said...

حسن ارابيسك:
--------------
تحية خاصة لاستاذنا الفاضل وامتنانا بالزيارة الكريمة .. واذا كان على لترات الدم .. هو حضرتك ما درتش .. وما عرفتش .. مش الدم طلع فاسد بعيد عنك .. وبنجمع دلوقتى تبرعات من البنزين 80
:)



أحمد الصباغ:
------------
يا الف سهلا ويا الف اهلا ومرحبا
متشكرييين يا باشا على الواجب الغالى
تحيياتى



ody911:
-------
يااا الف حمد الله على السلامة .. انا قلت الراجل راح مع الى راحوا فى البعبارة ولا ايه ؟؟

بس تعرف المصيبة فين ...؟؟؟
فى الى خلونا نشوف كل حاجة على انها بقت عااادى
حسبي الله ونعم الوكيل


سمراء:
------
اشكرك عزيزتى على زيارتك الكريمة
واحنا متنا فعلا اكلينيكيا
ابلغ تعبير

شيلوا بقى الميتين الى هنا :)

منورانى غاليتى



كلام وخلاص:
----------
متشكرة اوى للدعوة الكريمة .. واوعدك انها اكيد هتعجبنى :)

منورانى عزيزتى
وحسبنا الله ونعم الوكيل .. واللهم اميييييين .. ونفر نفر يا رب




عروسة ننوسة:
-------------
اهلا بيكي يا عروسة .. وان شاء الله كل ليل اخره فجر ونهار ... وكل ظالم وليه اخر .. وهنشوفه .. بس لازم احنا كمان نتغير الاول

منورانى .. واخبار حماتك والفسيخ ايه :) ؟

كلام على بلاطة said...

يا عم ليه محبكين القصة
مع الراجل طيب الذكر
اللى عمل فينا معروف وحدد
لنا النسل وكمان عطانا فلوس
وبعدين ثبت ان الناس اللى ماتت
لم تمت بسبب غرق العبارة
ولكن بسبب التهابات الحلق وملوحة المية
طيب الراجل يعمل ايه
اكتر من كدة
ارحمو عزيز قوم قتل 1034
مش كفايه ساب لنا البلد وقاعد يا عينى فى الغربة
طيب يعمل ايه اكتر من كده
يروح فين
وبعدين ربنا هيحاسبه
نيجى احنا كمان نحاسبه
وهم يبكى وهم يضحك

فتوح أبو المفاتيح said...

هذه هي بلدنا
عشان احنا سكتنا على اللي بيحصل فينا
فضلو يركبونا الهموم والمشكاكل
لحد ما بقا الحصول على رغيف عيش او ملاليم تعويض
هو منتهى الأمال
و مقصد الطالبين
بقا الانتصار الخطير الجبار اللي نقدر نحققه في حياتنا
اننا نشجع فريق كورة
ونفرح ونزيط لما ينتصر
وهيييييه
ياحضري
هو فيه حضري ؟؟
بقا ابو تريكة
وبقت فرحة لا توصف كان المسكين أتى بقاتل ابيه و سلمه للقصاص
أو انتقم لشرفه ممن هتكو عرضه
خييير
زي ماقلت وهفضل اقول
وزي ما حبيبتي حبيبة قالت
كن كما يريدك الله لا كما يريدك الآخرون
خير
محدش عارف الخير فين

islam said...

الاخت العزيزة \ بنوتة

ان بعد العسر يسر
صدقيني

اخوكي اسلام

soska said...

ياساتر يارب
طب انا بقى هضحكك على قصه سمعتها عن طيران اسمه طيران اسكندريه تقريبا

حاجه كده متفرقش كتير عن شرق الدلتا
بيقولك الطياره طلعت راح عم السواق نزل اقرب مطار عشان الازاز القدماني البرابريز يعني اتشرخ
ويعوض الله يعوض الله يعوض الله

momken said...

اه مقشف مقشف عجبنى

وانت مالك

العباره ال
المهم الاهلى اخد السوبر

الا يعنى هو ايه محكمه؟؟؟
ويعنى ايه قضاء؟؟؟؟

اه تقصد قضاء وقدر

طايب
يا بخت من قدر وعفى


وسلميلى على الملوخيه

تحياتى

حاول تفتكرنى said...

مش بعيد يطلب تعويض من اهالي المفقوديين
أليس برئ

والعبارة غرقت

زي ماالكل براءة
لازم نتوقع تأكيد البراءة

Anonymous said...

نفسى تفتحى الايميلات وتقريها

:)

بنوتة من وسط البلد said...

كلام على بلاطة:
-------------
منورنا يا فندم والله
واذا كان على سبب الوفاة .. فده علشان الركاب ماكانوش لابسين مايوهات حضرتك :)
وعلى رايك هم يضحك وهم يبكي
منورنا يا باشا



فتوح أبو المفاتيح:
------------------
ونعم بالله سيدى الفاضل
وبعدين كل الى بيحصل ده ما هو لازم يحصل

قال رسول الله صلى الله عليه وسلم: "يوشك الامم ان تداعى عليكم كما تداعى الاكلة الى قصعتها" فقال قائل: ومن قلة نحن يومئذ؟ قال: "بل انتم يومئذ كثير، ولكنكم غثاء كغثاء السيل، ولينزعن الله من صدور عدوكم المهابة منكم، وليقذفن الله في قلوبكم الوهن" فقال قائل: يارسول الله، وما الوهن؟ قال: "حب الدنيا وكراهية الموت

احنا بقى الغثاء ..
سبحان الله العلى العظيم




islam:
------
زى ما قلت فى ردى السابق احنا كالغثاء ومستنين الشجر ينطق
بس ربك كبير
ولكل ظالم اخر
ربنا يجعلنا من اهل الدنيا ونشوف اخرتهم نفر نفر يا رب ان شاء الله
منورنا يا فندم



soska:
-------
فكرتينى بطلعت زكريا فى فيلم هو فيه ايه لما كان بيمسح التابلوه بالفوطة الصفرا وكان هيقوم يلم الاجرة

انا سمعت بلاوى قريبة من كده برضة بس كان فى رحلة لقطر تابعة لمصر للطيران

تحسي ان عندهم اسطول ميكروباصات مش طيارات :)

هنلاقيها منين ولا منين بس

بنوتة من وسط البلد said...

momken:
--------
الملوخية بتتسخن على النار
والكوسة بقت موضة قديمة خلاص

واذا كان على القضاء والمحكمة ما لقيتش ليهم توصيف ولا معنى لا فى اى قاموس ولا معجم

منرونا يا فندم :)




حاول تفتكرنى:
------------
اكيد هيطلب تعويض مدنى عن الضرر النفسي والكابة يا عنيا الى اصابت نفسوياته

والتكاليف الى اتكلفها علشان يروح يتعالج فى لوندن .. مش بعيد يتعالج كمان على حساب الدولة

ااه لو البلد دى من غير شعب .. كانت تبقى نغنغه .. ده احنا زى الهم على القلب

ما يخصخصونا طيب ويبعونوا لاى حد .. اكسبلهم واكرملنا

حسبي الله ونعم الوكيل




Anonymous:
----------
اى ايميلات وعلى اى اكوانت
وانا تحت امر السيادة ؟؟

:)

منورنى .. بس مش كنت تقول انت مين ؟؟!!!

الشنكوتي الكبير said...

ايه يا بنت الياس والبؤس ده
ده انا صعبت عليا نفسي
اقولك ايه يعني
هي دي مصر يا فوزيه
بلد جمييييييييله
وشعب رااااااااايق
وحكومه رشيده
ايوه بجد رشيده
مش بتاعة بكار
لا رشيده فعلا حكومه قدرت تنسي المظلوم حاله
وتنسي اللي دمه سايح وتنسي اللي ابنه مات منه
وتنسي اللي اهله راحوا منه وتنسوا اللي مش لاقي ياكل وتنسي اللي مدبوح من الظلم والمرار
مفيش حد مبينساش
لو اتعمل فيه ايه برده بينسى
ناس حلوين قوي
عباره قطر مش فارقه برده هينسونا
هيسيبونا نتفرج على الدش
ونرقص ونهيص والبنات في الشوارع زي الرز
والراقاصات في التلفزيون اكتر من الرز
والشباب الصايع في كل حته يعاكس في نات الناس وبنات ولاد الكلب برده
والرجاله الكبار حتى دول مبقاش في نخوه ولا ادب ورجوله بقوا اموات او كلاب يعني يا اما مفيش منه امل يا اما كلب برده وماشي يتسافل على الستات والبنات
كل واحد مشغول وملهي في حاجه الحكومه عرفت تظبطنا كلنا
عايزين مخدرات خدوا
عايزين دعاره بقت بتتوصل للبيت في التلفزيون
عايزين كوره وهبل الكوره

خدوا على الأخر
عايزين اي حاجه تتوهكو خدوها المهم العبوا بعيد عن دماغنا
مش بقولك حكومه رشيده

سلاااااااااااااااااااااااااام

دعاء مواجهات said...

على راى الشنكوتى

هو فية حد مبينساش صحيح

ربنا يقوينا بجد ونخرج منها ع خير

تحياتى ليكى

سلام

ليكوريكا said...

(وَقَالُوا حَسْبُنَا اللَّهُ وَنِعْمَ الْوَكِيلُ)

بنوتة من وسط البلد said...

الشنكوتى الكبير:
---------------
منك لله يا اخى
بقى انا برضة الى بؤس :)
قلبت علينا مواجع القلب فى اخر 25 سنة .. حسبي الله ونعم الوكيل
:)


دعاء مواجهات:
-------------
ما افتكرش هنخرج منها
احنا خلاص بقينا كده
الخير والبركة فى عيالنا وعيالهم بقى ان شاء الله
لكن احنا
عليه العوض ومنه العوض

منورانى عزيزتى



ليكوريكا:
---------
اللهم امييييييييييين
منورنا يا فندم

momken said...

حسبنا الله ونعم الوكيل

القضاء المضرى اصبح قضاء وقدر

تحياتى

بنوتة من وسط البلد said...

Momken:
-------
القضاء المصري النويه الشفاف ابو شيفون

حسبي الله ونعم الوكيل

تحياتى عزيزى ومنورنا دايما