Tuesday, August 12, 2008

فيـــــــــــلم بوهيمــــــــــي

"قضت محكمة جنح الخليفة فى جلستها المنعقدة السبت بحبس الدكتور سعد الدين ابراهيم رئيس مركز ابن خلدون للدراسات الانمائية سنتين مع الشغل وكفالة 10 الاف جنيه لايقاف التنفيذ مع إحالة الدعوى المدنية للمحكمة المدنية المختصة ، فى قضية الادعاء الكاذب وتشويه سمعة مصر المقامة ضده"


الطريف فى هذا الخبر انه جه فى نفس ذاتية الوقت الذى تنعم فيه المدعوءة هاله سرحان بالراحة فى بيت زوجها بامريكا

مع انها شوهت سمعة مصر ودلقت عليها جركنين مية نار على بنزين من ابو 2 جنية ونص .. لما اجرتلها كام بنت فى البرنامج المعتوه بتاعها وطلعونا ولمؤاخذة كلنا تراباتاتيت رجالة وستات وحكومة :)

ولحد دلوقتى ولا عارفين الموززة حكموا عليها باية ولا القضية وصلت لحد فين ؟؟
وصباح الفراولة بتاع الفراولة


والاطرف والانكت انه فى نفس ذاتية الوقت برضة الذى ينعم فيه المدعوء منودح سماعين بالاستجمام والعلاج من الاكتئاب يا عين امه فى لوندون وهو طالع براءة فولالى ... مع انه السبب فى مقتل 1200 صخس على الاقل من حثالة البشر الى ما تسواش ولا تستاهل بعيد عنكوا ..

مع ان القضية هنا تعتبر قتل بييــن واداة الجريمة موجودة وفى سبب مادى وضحايا وجثث على شوية مخطوفين

لكن دكهوما ما اتشطروش غير على الراجل الى راح كاتبله كام مقالة فى صحف اجنبية زى ما بيقولوا .. وقال الى قاله .. وانتقد السياسية الداخلية .. وقالوا ان مقالاته هى سبب زرع الفتنة الطائفية .. وبقى هو السبب فى تشويه سمعه مصر

فاصل من الضوحك والنبي

واتنش الراجل سنتين غيابي
بينما ما قدروش يحكموا ولو بتلات ساعات ولو بايقاف التنفيذ حتى ضد منودح سماعين


بغض النظر عن مين سعد الدين ابراهيم واتفاقى معاه او اعتراضى .. فليس هنا المحل المنوط به ذكر تفاصيل قضيته هو راخر .. علشان مش ناقصينه .. ان شاء الله يعدموه شنقا بالرصاص فى ميدان عام


القضية فى الناس الى بيتشطروا على الحمير الى هو احنا ولمؤاخذة وسايبين الديناصورات الى هما هما ..
واحد كتب كلمتين اتنش سنتين .. وواحد قتل 1000 وشوية واخد براءه ... طب بأى منطق ... أو واحدة زى هللوووله هانم .. طلعتنا ولمواخذة .... ولمؤاخذة ..... وخرجت بره وما حدش برضه قربلها .. طب سبونا من الى اتنيل وقتل .. وهى هالولة ما شوهتش سمعه مصر برضة؟؟


طب بلاش .. ولا هو الى يقرب من السياسة الداخلية وزعزعة امن البلاد والاستقرار الداخلى للسلطة والحكومة .. هو بس الى يتدعء بجاز .. لكن اى حاجة تخص الشعب ولاد الكلب دول ان شاء الله يولعوا فى بعض


طب ولما قالوا ان امريكا بتصدرلنا المساجين من بره علشان يجيوا يقضوا عندنا السمر والويك اند فى منتجعات وزارة الداخلية السياحية .. ده ما كنش تشويه لسمعه مصر .. ؟؟


افلام السنيما زى الكباريهات وصالات الدعارة والخمارات والقمار .. ده مش تشويه لسمعه مصر


فندق حياة ريجينسى لما يتقفل سنتين وتنزل نجومه لنجمتين بدل من 5 علشان صاحبه رفض يقدم فيه خمور .. ووزارة السياحة تجبره على تقديمها علشان سمعه البلاد وسمعه السياحة والعملة الاجنبية وووو .. ده مش تشويه لسمعه مصر


لما الشعب بقى بيتخانق ويقتل فى بعضة علشان رغيف العيش .. وهو ده مش تشويه لسمعه مصر ؟؟


هنقول ايه بس ولا ايه

فكرتونى بالشاعرالثورى لما قال

رب قوم ذهبوا الى قوم
فلما القوم الاولانين ذهبوا للقوم التانين ما لقهومشى
اخدوا تاكسى ورجعوا تانى

وبس خلاص

18 comments:

كلام حسام said...

ايه ده هو بس خلاص
يعني نروح بيوتنا ولا ايه
وطب علي الطربوش لا انا قاعد لحد ما اشوف التدوينة الجديدة
احسن دي شدتني اني اشوف كل تدويناتك

كلبوزة لكن سمباتيك said...

مصر مش ناقصة تشوية الصراحة
انا عايشة برة مصر و شايفة الناس بيبصوا لها ازاي
بصراحة ساعات بتكسف اقول اني مصرية

ربنا يصلح الحال
و يسلم ايديك على المقال القوي ده

اوروفوار

هاني النجار said...

فعلاً كلام خلاصة لاصة
أجمل حاجة عملتيها هى زيارتكِ اللي عرفتني طريق المدونة التحفة دي

أما بخصوص الموضوع.. ففيه حكمة بتقول
من طلب العلا نام الليالي
وشد اللحاف وقال وأنا مالي

احنا مالنا.. ما هى بلدهم، واحنا ولاد البطة السودا
لزم نقر بالنعمة، وكفايه انهم سايبينا نتنفس الهوا من غير ما يخدوا عليه ضريبة
ربنا يعلي مراتبهم كمان وكمان لغاية ما يبقى السرير زي ناطحة السحاب
ويوعدهم بطيار أحول

والسلام ختام
ويجعله عامر

basma saghir said...

لما كنت عايشة برة المحروسة كانت الناس ولا مؤاخذة بتبصلنا بصة دونية..يعني بصة اكتر شوية من بصتهم لبرص مثلا..تصدقي مش عارفة ليه..بس هو ده اللي كان بيحصل..انا ايامها بقى كنت عيلة بريئة ومعرفش المصايب والبلاوي اللي بتحصل عندنا ولا اعرف مندوح ولا هالة

يعني هما مقدروش على الحمار بيتشطروا على البردعة...وهو كل اللي بيحصل هنا ده مش تشويه لسمعة مصر..وهي مصر سمعتها مش بتتشوه كل يوم على الجزيرة والعربية..يابنتي دي فضايحنا بتتنشر صوت وصورة ويمكن ريحة كمان على الفضائيات..احنا ربنا مسهلها معانا جدا من ناحية الفضايح ومش محتاجين حد يعمل اي حاجة زيادة لان الموضوع لو زاد عن كدة هيبقى اوفر دوز علينا وممن نروح فيها

هييييييييييييييييه
الله يرحم الشاعر الثوري بتاعك ويبشبش الطوبة اللي تحت راسه

حسن ارابيسك said...

مش بقولك بهية
احكي وقولي وفضفضي

لكن الموضوع وما فيه منظمومة منظمنها ومرتبنها ومشينها وفق برنامج القرية الذكية التي تعرف تفرق بين العدو والحبيب بين الغريب وإبن البلد وياعيني ياعيني عالولد
تحياتي
حسن أرابيسك

Abo Maryam said...

هو هالة سرحان فعلاً محدش عملها حاجة

M!DO said...

سابوا الحمير و إتشطروا على البردعة ( لا مؤاخذة يعني )
أنا حطيتك عندي في ليستت البلوجات اللي بتابعها ... بعد إذنك يعني :)

بنوتة من وسط البلد said...

شملولى بن سحلولى:
--------------
انت منورنا يا فندم فى اى وقت وفى كل وقت
والساقع والطربوش خليهم علينا :)


كلبوزة لكن سمباتيك:
------------------
تسلميلي غاليتى على زيارتك الى منورانا
وللاسف اى حد بره مصر بيشتكى من نفس الموضوع الصورة والفكرة الزفت .. وللاسف الى البعض منا بياكدها فى الغربة :(

منورانى عزيزتى


المهاجر:
--------
يا فندم مدونتنا المتواضعة بتزداد شلرف بزيارتك الغالية

واذا كان على موضوع المراتب والسراير فربنا يرزقهم بمرتبة سفنج فى عز الحر تتطلع القطط الفاطسة على جتتهم وتكون فى الصحرا الساعة 1 الضهر :)



بيسو:
------
حبيبتى .. زى ما قالت كلبوزة كده احنا صورتنا فى الخارج زى الزفت .. وخصوصا فى دول الخليج .. شوفى العرب لما بينزلوا بلدنا وعلى ارضنا وبيعاملونا ازاى وبيبصولنا من فوق لتحت ازاى .. ما بالك بقى واحنا تحت اديهم

ده احنا عايزين تقوملنا قومة
يمكن تاخدلها 100 سنة على الاقل

كاتنا القرف بره وجوا
والله الواحد زهق .. كفاية بقى قلة قيمة
منورانى غاليتى

بنوتة من وسط البلد said...

حسن ارابيسك:
------------
وحسبي الله ونعم والوكيل على الى عمل فينا كده
:)
انا ببقى سعيدة بجد لما بشوفك منورنا يا فندم


Abo Maryam:
------------
والنبي لو شميت عنها اى خبر يا ريت تطمن قلبي يا فندم :)

ومنورنا يا فندم



mido:
-----
المدونة ولينكاتها وسلطاتها وبابا غانوجها كلها تحت امرك يا فندم
:)

Iskanderani said...

مساء الفل بنوتة من 2/1 البلد؛ بنوتة من وسط البلد

يابنت بطلي بقي ضحكتيني وأنا ماليش نفس أضحك بعد قرأة الجرايد المصرية والضحك علي كمية العبط المبرمج في الموكوسة حالياً والمحرؤقة كمان .....منك لله... ربنا يوعدك بإبن الحلال

تحيات إسكندراني في بلاد الله الواسعة

محمد العدوي said...

الكيل بشوية مكايل لعبة ليست جديدة على الناس اللي فوق ..

لكن لو هنتكلم على سمعة مصر بصورة أوسع شوية فسمعة مصر يرسمها حاجات كتير نشترك فيها و نساهم في الصورة الطين .. اللي هي انعكاس حقائق موجودة ..

بس في الأساس مجرد التفكير بالطريقة دي يحملنا للسؤال هو المهم سمعة مصر ولا مصر نفسها .. يعني لو سمعتها زي البرلنت ومحدش خدش اسمها بكلمة والباوي اللي فيها هي هي . والناس طالعة من هدومها وكارهة بعضها وكدة يعني يبقى الحياة فللي ..

سمعة مصر اصلا سلاح اهبل زي ما فرعون لم الناس وقاللهم الحقوا ( إن هذان لساحران يرديان أن يخرجاكم من أرضكم ... ) دلوقتي بقت ( أرضكم ) لما حب يلم الناس .. لكن قبل كدة كان ( أليس لي ملك مصر ) ... هم أحرار كيف يفكرون .. بس احنا مطلوب مننا حيث ان مصر اصلا بتاعتنا مش بتاعتهم ان نصلح اخطاءها مش نداري عليها ..


..................
ازيك بقى
:)

momken said...

الا هما مين الناس دى

دول معانا هنا فى البلد دى

الا قوليلى صحيح هو فندق حياه ريجينسى الى هو مريديان سابقا مبقاش يقدم خمور فعلا

والله انا فخور بيه اوى

انا اصلا اصلا جاى علشان اقولك كل سنه وانتى طيبه وبالف خير

تحياتى

كيكى عوووووو said...

ازيك بجد
واحشنىىىىىىىىىىىىىىىىىى
موووووووووووووووووووووت
كل سنة وانتى طيبة يا قلبى
وتشكرين على الفيلم البوهيمى
دة
لانة شكل عرضة هيستمر علطوللللللللللللل
علشان نضحك ضوحك
عوووووووووووووووووووووو

كيكى عوووووو said...

اموااااااااااااااااااة

Ehab said...

يا بنتي حرام عليكي بقى المثل بيقول ايه
عايز تربط حمارتك جنب حمارة العمده ولا ايه
مينفعشي تقارني
وبعدين اهو رمضان جاي خلاص اهو كل سنه وانتي طيبه ادعي عليهم براحتك بقى
اقولك ايه بس هي دي مصر يا عباس
وان كان على الأسائه لصورة مصر من كتر اللي بيحصل مش عارف اقولك على ايه ولا ايه
لكن على العموم ربنا ينجينا منها على خير
وحسبي الله ونعم الوكيل في كل مفتري

سلااااااااااااااااااااااااااام

Yasser Hussein said...

مع احترامي
لابد أن نفرق بين سمعة مصر
وسمعة بعض المصريين
....
بمعنى أن مصر كمصر دولة لها تاريخها وريادتها في كثير من المجالات
سواء الفنون أو العلوم على مستوى جميع الدول العربية
أما ما يرتكبه بعض المصريين من حماقات
فهو ما يندرج تحت مسمى
سمعة المصريين

خالص تحياتي

بنوتة من وسط البلد said...

iskandrani:
-----------
يا استاذى الغالى
المدونة كلها بتنور بتعليق حضرتك الكريم .. والله لو اطول كل يوم ابعتلك قرطاس من الضوحك ما اتاخرش .. هبعت توصيه لمجلس الوزراء يزيدوا من تصريحاتهم وحضرتك هتضحك ع طول

ماشفتش حريق مجلس الشورى .. انا طول ما الحريقة مشعلله .. وصفوت وسرور مدينها فى نصريحات واحنا كنا فطسانين من الضحك زى ما اكون بتفرج على موجا كوميدى

صدقنى الضحك كتير .. بس هى النفس
منورنا يا فندم :)


محمد العدوى:
-----------
بص هو انا كويسة الحمد لله طول ما انت بخير يا اخويا اشااء الله :)

وبالنسبة لمصر او المصريين .. فهما الاتنين وجهان لعملة واحدة .. واحنا كشعب مشتركين فى المسؤولية .. بدليل شوف شكلنا ايه مع بعضنا فى الخليج والدول الاجنبية مثلا .. يعنى انت ممكن تصاحب واحد يهودى وما تصاحبش واحد مصري


ومن اعمالنا للاسف سلط علينا ... وسلط علينا حكامنا
فا احنا الى محتاجين جوانا قومة وتغيير .. واكيد حاجات كتير هتتغير
يااااااااه .. ده عايز بتكتب فيه مجلدات وانا ورايا غسيل :)

منورنا واخبار الصحرا ايه :) ؟؟



Momken:
--------
يا فندم وانت طيب وبالف صحة وسلامة .. وحياة ريجنسى الى هو كان المريديان قبل كده .. والى هو بقى رجع يقدم خمور تانى بعد ما طربقوه كذا سنة

يا ولكم يا ولكم
ويجعله عامر

بنوتة من وسط البلد said...

كيكي:
---------
يا عوووووووو وانت طيبة وبالف صحة وسلامة
ورمضان كريم .. الله اكرم
وهاتى بقى الكنافة والقطايف
بس فى السريع علشان ورايا طبيخ :)
واذا كان على البوهيمي عندنا موديل تانى تشيكي من رواندا تشششششيك رواندا تششششيك :)



الشنكوتى الكبير:
------------------
يعنى هى حمارة العمدة خريجة مدارس فرنساوى ..وحمرينا هما الى حمير بلدى .. ما هما كلهم فى الاخر حمير ولامؤاخذة .. :)

وانت طيب يا سيدى ورمضان كريم والله اكرم ويجعله عامر
منورنا يا فندم :)



ياسر حسين:
------------
مع كامل احترامى عزيزى الفاضل .. فانا اتفق معا كل ما ذكرت جملة وتفصيلا .. ولكن المشكلة والمصيبة التقيلة .. ان القرى بتؤخذ بظلم اهلها

زى ما النقاب بقى وحش بسبب تصرفات بعض المنتقبات .. والحجاب بقى تخلف بسبب تصرفات بعض المحجبات .. ومصر وحشة وبلد مقرفة بسبب تصرفات المصريين

وصدقنى يا فندم ليش بالتاريخ فقط بتبنى الامم .. اذا كان حال الامة زى دلوقتى بقى كله لولو ونونو وفوفو واخرنا الموبايل واغانى من نوع الجل اشتكى من شعرى

تحياتى ومنورنا يا فندم