جابولى ورقة
رديت وقلت مصر مرة واحدة .. قالولى ايوا مصر مرة واحدة .. ما ينفعش مصر مرتين
مع الورقة كان فيه قلم رصاص .. سألت مافيش الوان ؟ ... قالولى دلوقتى لأ .. ممكن بعدين نلون الصورة .. لكن دلوقتى مستحيل .. الصورة دلوقتى ابيض واسود وبس
قلت مش مهم .. الصورة انا هشوفها بقلبى ملونة .. مالهاش لازمة الوان مش محسوسة ولا درجات الوان بهتانة .. انا هرسم بالقلم الرصاص والونها جوايا بالألوان الى أحب اشوفها بعيني
مسكت القلم وخطيت فى الورقة خط قسمها نصين .. قلت نص الورقة التحتانى هيبقى النيل .. انا شايفة الوانه مزهزة .. بس انا لسه برسم بالقلم الرصاص .. ما قلنا مش مشكلة انا شايفاه ملون ولونه ازرق كمان .. انا شايفه لون الطمي من سطح النيل الشفاف .. وشايفة كمان ضوء الشمس وهو بيرسم لمعات بتلمع زى النجوم الذهب بترقرق على سطح النيل وقت الشروق
ورسمت كمان مركب ليها شراع ابيض طويل وجواها مراكبى بيجدف باديه الاتنين .. المراكبى كان معاه شبكة صيد كبيرة وراميها فى وسط النيل .. المراكبى كانت بشرته سمره وسماره جميل .. سمار لون النيل
رسمت شط للنيل ... على الشط كان شجر وأزهار ومشاتل ونخيل .. النخل كان طالع فوق للسما ورطبه منوراه زى ما تكون قندايل
رسمت السما فى النص التانى .. رسمتها صافية وبسحب منورة .. اشعة الشمس مختراقها راسمة صورة لشط البحر فى السما .. فعلا منظر بديع ... الوان اشعة الشروق المشمشى سايحة على بعضها .. وفكرتنى ببيرم وسومة فى شمس الأصيل
شمس الأصيل دهبّت
خوص النخيل يا نيل
في صفحتك يا جميل
والناي على الشط غنى
والقدود بتميل
على هبوب الهوا
رسمت طير طاير فى العلالي .. زئزئته طالعه بتلالى .. زى ما يكون بيغنى فى صباح كل يوم جديد
رسمت على الشط برضة اهراماتنا ورسمت برج الجزيرة .. رسمت بيوت صغيرة وفوق بعضها ورسمت برج للحمام يطير حواليه ويميل .. وكله شاهد عليه النيل وكان فى مسجد ومأذنة .. وكمان كنيسة ودير .. الاتنين جنب بعضهم .. صوت الأذان والجرس .. يوم الجمعة وصلاة العيد
رسمت على الشط ارض خضرا واسعة وكبيرة مش شايفة اخرها .. دى واصله لحد السما .. رسمت جواها ساقية يتدور وتلف وحواليها ناس بتلف معاها .. بتلف وتدور ومش عارفين هتقف امتى .. لو الساقية وقفت الارض هتموت من العطش ... انا شايفة الناس لسه برضة بتلف لونهم سمار النيل .. شاكلهم تعبان من اللف والدوران .. مش هيرتاحوا .. ويشوفوا المنظر الجميل
رسمت بنوتة صغيرة وولد صغير ماسكين ايدين بعض رايحيين المدرسة .. ومعاهم زمزمية وشنطة وبيشتروا بسكويت
رسمت عربيات وكبارى وزحمة ... واتوبيسات و ميكروباصات .. وناس بتجرى وراها علشان توصلها وتلحق تركبها
رسمت القهوة والشيشة والطاولة وراديو قديم على رف عالي بتغنى فيه ام كلثوم
رسمت مصر فى الصبحية و ساندوتشات الفول والطعمية من على العربية .. وجرنان مطبق سواء كان اهرام اخبار او جمهورية ..
رسمت كلاب سكك بتنهش فينا .. وبتاكل اكلنا .. وتموت الى ينطق فينا .. سلعوا وانفلونزا للفراخ والبط وسرطان بيهرس فى كلاوينا
الصورة بتضيع الوانها ...
خلاص كفاية
مش هقول ولا كلمة زيادة
الكلام متشال فى قلبى وكاتماه
اكيد حاسيناه
وكمان خلاص
القلم خلص والورقة خلصت
بس الكلام ما انتهاش
17 comments:
شوفت معاكى حيتان و قروش و باساريا
شوفت معاكى الطيابة و الديابة و الغلابة
شوفت الحوارى و الشوارع و المساجد و الكنايس
شوفت مصر اللى وحشانى بجد .. ورجعتينى لحضنها من جديد
كنت كاتب قصيدة اسمها مكتوب على باب بلدنا بتدور حوالين المعنى ده هاتلاقيها على الرابط ده
http://sound-of-the-nile.blogspot.com/
بعد قرائتى للصوره اللى انت بقلبك اعطيتيها الالوان شعرت ان الا حساس الرهيف بداخلك يمنحك القدره على الشفافيه فى رسم الصوره، التمنيات بداخلك للصوره المثاليه لمصر لابد وان تحاولى تحقيقها حتى لو كان عقلك بيقول والناس من حوالليك بيقولوا مش ممكن. الصوره رؤيه مستقبليه جميله.. تحيات إسكندرانى فى بلاد الله الواسعه
بجد تحفة
، بس ليه القلم خلص بدرى كدة ، كان نفسى تكملى الصورة اكتر من كدة ، اسمحيلى انا اخذت الورقة بتاعتك و قلبتها على الوه التانى و قررت انا كمان ارسم ، قررت ارسم وجوه المصريين ، اتمنى ان ترى رسمتى فى البلوج بتاعى..
ايه ده بس؟
لسة فيه كده؟
ده فعلا كلام خلاصة لاصة ومية مية
لو جابوا احسن رسام فى العالم مع احترامى ليكى والوصف الهايل اللى انتى رسمتى بيه مصر
لكن مصر فى نظرى اجمل بلد خلقها ربنا جميلة باهلها جميلة بروحها جميلة بخيرها جميلة بنيلها اللى بيجرى فى عروقنا جميلة بالمساجد والكنايس والبيوت القديمة والشوارع الضيقة بكل حاجة فيها البلد ديه جميلة جدا
حبيبتي احلى واجدع بنوتة في وسط البلد وشرقها وغربها
ممكن لو سمحتي تلزقي صورة لنفسك في جنب الورقة
مهي صورة مصر الجميلة متنفعش من غير صور ولادها اللي بيحبوها زيك كده
جميلة اوي اوي
تحياتي
شخبطة ملوكى
قرات القصيدة وعلقت عليها
اجمل من جميلة
واذا كان على الحاجات الى شفتها معايا فانا شكلى كده قطعت نفسك :)
معلش المرة الجاية هبقى أاجر ميكروباااز
iskanderani
منوررنى ومشرفنى يا فندم .. واذا كان على الصورة .. فهى صورة فى خيال كل واحد فينا نفسنا نشوفها فى الواقع .. وهتفضل الصورة دى فى خيالنا حتى لو الواقع عكس كده تماماا
Paky
انا بعت الواد بليه يجيب ورق وكشاكيل واقلام من مكتبة عم عبده الى على الناصية .. علشان ترسمي يا جميلة براحتك كل الى انتى عايزاه
عادل سلامة:
خلاصة الكلام انت منوووووورنى
مصر هى امى:
حبنا للمكان الى اتربينا فيه بيخلق من كل واحد فينا شاعر ورسام وفنان .. جرب مع نفسك كده تكتب احساسك بالشوارع والناس .. هتلاقى نفسك بقيت دشريف صبرى والدنيا بقت بمبي :)
.. بس ما تصدقش الصورة اوى علشان ما تصابش بالاستبحس .. وتلاقى الواقع غير الخيال
الخيال دى حالة بنصبر روحنا بيها بس
اعرف واحدة كانت بتوصف حبها لمصر .. قالت انها بتحبها بشكلها بزبالتها والقرف الى فيها :)
أميرة البلطجية:
لو حطيت صورتى مش هتبقى صورة لمصر .. هتبقى صورة تحري واشتباه :)
خلى الصورة كده حلوة .. الناس مالهاش ذنب
منوررراانى وايه اخبار ميتو :)
حلوة رسمتك قوي يابنوتة..نفسي الناس كلها تشوف مصر كدة..لان مصر فعلا حلوة واحلى بلد في الدنيا
مصر فعلا حلوة رغم الي حاصل ورغم الي هيحصل
بجد بجد جميلة أوي
شكلك خلاص هتعدي بقي ومش هنعرف نكلمك تاني
تحياتشي
أعتقد ان الصورة محتاجة شوية الوان
فحم اسود ومطين بهباب
وعشان خطري متنسيش تحطي ماسورتين مجاري
طافحين وستة شحاتين عشان تكمل الصورة
معلش انا شايفها كده...ولو مؤقتاً
الحمد لله
حد شايف نص الكوباية المليان في مصر
مليان من نهر النيل
اللي بقالي كتير بعدي عليه مابشوفش غير اكياس بلاستيك وقشر لب عليه مش عارف ليه ما مديتش عيني شوية لقدام وشوفت انعكاس الشروق من النيل بينور مصر كلها
شكرا ليكي
بيسو:
مصر فعلا حلوة .. والمشكلة مش فيها .. المشكلة فينا احنا
قاسم افندى:
منوررنى يا فندم .. وهعدى اروح فين انا قاعدة هنا على قلبكوا ..
بس الى عايز يكلمنى يسيب اسمه وعنوانه ورقم تليفونه ورقم بطاقته مع السويشت :)
سمسم:
انا سعيدة جدا جدا يزيارتك .. وعلشان الكلمتين الى انت قلتهم دول وبالعند فيك بقى .. انا هسيب الصورة مفحمة كده ومن غير الوان ..
على راى عمو اللمبى ...
فــــى عااااااااااجة :)
Yasser:
انا فعلا تشرفت بزيارتك .. ولازم نمد عنينا ونشوف الى احنا مش قادرين نشوفه علشان نقدر نغير من نفسينا علشان الصورة تكمل وتبقى بالالوان
العيب مش فى النيل علشان عليه أكياس زبالة .. العيب فينا احنا علشان رمينا اكياس الزبالة .. فهل ممكن نتغير علشان تكمل الصورة ؟؟؟؟؟
منورنى
طيب ..ممكن
إذا كان ممكن يعني
ترسمي لينا صورة
انا وطهقانة ؟
طهقان:
يا سلام
من عنيا التنتيين
بس هتقفولى انتوا الاتنين طهقانين كده فى الصورة .. مش هينفع كده
Say Cheese
علسان السورة تطلع هللللووووة
انا سعيدة جدا بزيارتك يا ابو العيال :)
يا سلاام
تسلم ايديكي
قولي كده بقا
انت قاعدة طول النهار في وسط البلد وعمالة ترسمي كل الصور دي في دماغك
برافو عليك
حاجة جميلة يا ريت الواحد بكون عنده إسلوب زي ده كده
اكتب بالرصاص:
يا فندم انت منوررنى وايه الغيبة الطويلة دى .. حضرتك شرفنى فى اى وقت فى وسط البلد .. بس ابقى هات معاك الوان :)
يعقوب:
يا فندم انا متشكرة جدا لذوقك
انت منوررنى
Post a Comment