كان ممكن اكون ورقة

كتير يتخيل نفسلى اى حاجة غير انى اكون بنى أدم .. ما هو كله بأيد ربنا .. ربنا زى ما خلقنى انسانة كان ممكن يخلقنى اى حاجة .. سبحان الله ..

ممكن كنت ابقى ذرة تراب .. ممكن ابقى قطرة مية .. كان ممكن ابقى شجرة .. او ممكن كنت ابقى سحاب

كان ممكن ابقى خروف .. كان ممكن ابقى حديد .. كان ممكن ابقى جبل .. كان ممكن ابقى جريد

كان ممكن ابقى سمكة .. كان ممكن ابقى خاتم .. كان ممكن ابقى شعاع .. كان ممكن ابقى عالم .. كان ممكن ابقى كوكب .. كان ممكن ابقى قمر .. كان ممكن ابقى هوا .. كان ممكن ابقى اوكسجين أو سما

كان ممكن ابقى خشبة .. كان ممكن ابقى طير .. كان ممكن ابقى نحاس كان ممكن ابقى بير .. كان ممكن ابقى غصن كان ممكن ابقى فيل

كان ممكن ابقى بطاطس .. كان ممكن ابقى مركب .. كان ممكن ابقى نيل .. كان ممكن ابقى ساقية او ترعة او سور او جردل او عود كبريت

كان ممكن ابقى نار ..أو بركان .. أو فيضان .. امطار و سيول او برميل

كان ممكن ابقى حشرة .. او طاعون او ايدز او سرطان او فيرس سى

كان ممكن ابقى شنطة ... كان ممكن ابقى شبشب او جزمة او بوت طويل

كان ممكن اكون فستان او بلوزة او طرحة او بنطلون وقميص

كان ممكن ابقى سيجارة ... بانجو .. وكان ممكن اكون حشيش

كان ممكن ابقى لون .. او موجة او نغمه او حرف او كلمة او راديو و تليفزيون

كان ممكن ابقى رصاصة كان ممكن ابقى مدفع .. كان ممكن ابقى طلقة ومسدس

كان ممكن اكون لعبة .. كان ممكن ابقى نجمة .. مجرة .. شمس او نهر او حتة من الجنة

كان ممكن اكون من الجن والشياطين وكان ممكن اكون من الملايكة والحور العين

كان ممكن ابقى لحظة كان ممكن ابقى عمر .. كان ممكن ابقى يوم وكان ممكن اكون سنين

كان ممكن ابقى ورقة .. يترسم فيها رسمة .. يتكتب فيها كلمة .. تتلحن عليها غنوة .. ورقة يتكتب فيها تاريخ .. ورقة نتحاسب عليها .. وفيها الى لينا والى علينا ... ورقة تظهر حق مش باطل .. ورقة تنصر مظلوم ومش ظالم ... ورقة مكتوب فيها خبايا وسر دفين .. ورقة تطير فى الهوا .. ورقة حتة من كشكول او من كراسة او من ارشيف .. بس فى الاخر الورقة هتتقطع من الكراسة وهتندفن جوا الأرض ومش بعيد اتحرق وأكون رماد وارجع تانى للتراب

المهم مين الى فهم ؟؟
ومن الأخر .. مين فينا يرضى يكون مين.. ؟؟

واذا ما كنتش ورقة .. ممكن اكون كيس شيبس

ووسعوا بقى عايزة فول شاندوشت

علشان حاسة انى بقيت رغيف

:)