بلادي بلادي ... يادي الخيبة

بلادى بلادي لكى حبي وفؤادي

لكل من لم يتذكر هذه الابيات .. فهذه الأبيات من المأسوف له ما يدعي بالنشيد الوطني .. فااااااااااااااااااكرينه ؟؟؟

انا بقالى سنين ناسية موضوع ان فى نشيد وطنى للبلاد .. ده انا حاولت حتى اتذكر ابياته ولحنه لقتنى ناسياهم

يا ريت لو كل واحد فينا يسأل نفسة كده .. اخر مرة قلت فيها النشيد الوطنى كان أمتى ؟؟؟؟

افتكروا كده .... حاولووووواا .. علشان خاطرى .... ؟؟ طب بلاش علشان خاطرى .. علشان خاطر مصر .. افتكروا كده قولنا النشيد الوطنى اخر مرة كان امتى ؟؟؟؟

كلنا هنقول اكيد قلناه فى المدرسة .. انا شخصيا مش فاكرة اخر مرة قلته كان حتى فى سنة كام فى المدرسة .. اصل اكيد فى ثانوي ما كناش بنقوله .. وكنا بنستهيف العيال الى واقفة طول بعرض وبتقول النشيد زى العيال بتوع حضانة

قال يعنى من رموز الروشنة وان احنا عيال كبيرة وخلاص داخلين الجامعة مش هنقول النشيد الوطنى زى العيال الصغيرة

انا فاكرة واحنا فى ابتدائى كان يطلعوا العيال بتوع الشرطة المدرسية يقولوا القسم .. القسم ...!!!!!!!!!! (فاكرريييييييييييينه)

"اقسم بالله العلي العظيم .. ان اكون مخلصا .. و ان ابذل جهدي .. لان ... لان ..."

ياااادى الخيبة مش فااااااااااااااكرة

طب مش مهم القسم ... بعد العيال بقي ما تقول القسم (الى انا مش فاكراه) نقوم مصرخيين وقايليين النشيد الوطنى بصوت عالى زى ما نكون فى مباراه مين صوته هيكون اعلي

بلادى بلادى بلاااااااااادى

لكي حبي وفؤادى

مصر يا ام البلاد ... انتى غايتى والمراد

وعلى كل ................

ايه ده .. يا لهوووووووي .. يا مصيبة سوددددددددددددددة .. ويا داهية دقي وصهللي

مش فاكرة النشيد الوطنى

عاااااااااااااااااااااااااااااااااااااااااااااااااا

مفروض يا اخوانا النشيد الوطنى ده رمز للانتماء .. رمز للاحساس والشعور بالوطنية .. نقوله كده بمنتهى الشموخ والاباء واحنا باصيين للعلم .. وقلبك حاسس بمعنى كل كلمة بتقولها

المصيبة احنا ليه بقينا مسخ كده ؟؟؟؟؟؟ ليه بقت وطنيتنا مشووهه كده ...؟؟ ليه جنسيتنا بقت مجرد بيان فى بطاقة وبس؟؟

ولما تسال واحد ايه مصر بالنسبالك ايه .. يقولك مصر هى أمى .. طب عملت ايه لأمك .......؟؟؟؟ ولا حااااااجة ... !!!!!!! ولما تسال الى جمبه مصر ايه بالنسبالك .. يقولك ماحبش اتكلم على ام صاحبي

الوطنية مش انى اكون ليا نشيد .. الوطنية انى اعتز بانى جزء من هذا الوطن .. واغير من نفسى واسعى انى اوصل للافضل .. لانى جزء من هذه المنظومة .. واذا استقمت وكان لى مبدا .. وحافظت عليه .. وعمل كده كل واحد زى .. ستنتظم سائر المنظومة .. وزى ما انا شغال غفير .. ممكن اكون وزير .. يبقى التعديل والتغيير هيبتدى من جوا كل واحد فينا .. ومن احساس كل واحد فينا بالامانة والشرف

الحقيقة سبب انى افتكرت الى اسمه النشيد ده ... ده اذا اعتبرت نفسى افتكرته فعلا ... لما سمعت نواب مجلس الشعب بيغنوا النشيد الوطنى وبيهتفوا يوم الموافقة على التعديلات فى مجلس الشعب وتحديد موعد الاستفتاء .. كان اول مرة بعد سنين طويلة اسمع النشيد .. ومن مين .. من خيرة ابناء مصر .. نواب مجلس الشعب .. وامتى ؟؟؟ يوم الموافقة على التعديلات الدستورية ... يعنى حدث عظيم من ابناء عظماء من ابناءك يا امنا يا طاهرة يا محروسة ... تخيلت كل واحد فيهم وهو بيقول النشيد .. كل واحد فيكوا فاهم معنى الى بيقولوا ... عملتوا الى يمليه عليكوا ضميركوا بعد ما (قزقزتوا) القوانين تقزيز .. وقشرتوها تقشييير كده .. لحد ما وصلتوا للى فى خدمة البلاد وشعب البلاد

بلاد تتشال وتتحط فوق راسكوا يا بعدا .. ما علينا

انا مش عايزة اغير محور الموضوع ونلاقي روحنا بنتكلم على شعارات كدابة وعلى الوطنية ومصر ونلقينا بنلطم على الفساد ... وعلى المعتقلات وعلى النظام والحكام .. ونلاقينا بنوالول على الدستور والتعديلات ..

وعلى اننا فقدنا الانتماء والولاء .. ولا ان احنا لا بقى لينا ملامح ولا هوية ... وجيل كامل طالع لا حاسس بزعامة ولاقدوة ولاوطنية .. وصباح القشطة على المهلبية ... وصبح صبح يا عم الحج ويا خالتى نزيهة وحسنية

انا مية مرة اقولكوا احنا ناس لا بتوع سياسه ولا بتاع.. ولا لينا فى الألفطة وشغل التلات ورقات .. ولا فى عيلتنا ترزية ولا مطبلتيه

وسمعنى احلى سلام للنشيد الوطنى

وعظيمة يا مصـــــــــر ... يا أرض اللواء