من غير كلام .. ولا سلام

من غير كلام ولا سلام ...

اسراء رمز الحرية ... باعت القضية

طبعا البونية لازم تبيع القضية وتبيع الى خلفوها كمان .. وتطلع فى كل الدنيا وقصاد التخين تقول انها كانت بتتعامل احسن معاملة وان ما حدش لمس طرطوفة من جزمتها...

ووجههت الشكر للواء فلان والعميد علان والمامور ترتان ..

كما وجهت الشكر لماما مش عارفة مين والست منين والدكتورة عين .. الى كانوا مشرفيين معاها فى التخشيبة ريزورت Resort

طبعا انا شخصيا لو مكانها هعمل كده وزيادة .. مش بعيد اجيب جزمة البيه الباشا اللواء الوزير ونبوسها ادام الشاشة

وتقدم الشكر للوزير كمان ورئيس الحي على الاستضافة والاقامة الرائعة التى قضت فيها النزهة الاستجمامية بعيد عن النت والشات والفيس بووك والياهو والـICQ ودياولوا فى قرية لومان طرة ولا منتجع القناطر السياحي

البت اتخطفت فى يوم وليله

وراحت اتنفخت وطلع عين الى خلفوها

وشافت العين الحمرا وابو رجل مسلوخة وام سحلول

وفى الاخر غصبن عن عين الى جابوها

لازم تنادى

فالتحيا الديموقراطية ... ولتحيا الحرية ... ولتحيا النزاهة والشفافية

وليسقط الانترنت ... وليسقط الفيس بووك

وليسقط الاستقلال

وانا من موقعى هذا

انقل كامل تقديري واحترامى

لكل من ساند اسراء من اللواءات ومامورى السجن وحتى نزلاء التخشيبة

الى ارجعوها الى رشدها والى صوابها

وصصحوا اى مفهوم خاطئ لديها عن الحرية والتعبير عن الراي

وهو فى حد ذاته كفر وفسوق عن فروض الولاء والطاعة

والاهى يحرق اى حد بيطلع اشاعات مغرضة

ولا بيحرض على اضراب ولا بينادى باعتصام حتى لو كان للصم والبكم

انا لا اقصد باى شكل من الاشكال اطلاقا مطلقا انعدام الوطنية عند اى حد فينا ... ولا لان
نسكت عن المنادة بالحرية .. ولا عن التصدى للفساد ...

بس طول ما انا اشجب واندد واشتم سلسفين الى مطلعين عنيينا

وانا تحت البطانية ... ولا وانا مأنتخة قصاد التليفزيون ... ولا مع احلى دماغ متسلطنة على القهوة

وانا احب الحرية

واحب امشى فى شواريعها واشرب من نيلها

واموت فى تراب مجاريها

لكن اقرب من مظاهرة .. ولا اعرض نفسى للضرب والاهانة .. ولا انام لنص ساعة على البورش .. طبعا فكرة اى حاجة زى كده فى ثقافة اى حد فينا ...

اروع من ما يحدث فى سجن ابو غريب ولا جوانتناموا

ويكون اى منا على استعداد لبيع اهله كلهم من اول قلم

وطبعا ضربوا المربوط .. فخاف اسمه ايه ده البعيد .. السايب

فلتحيا سياسة الحرية ...

فلتحيا صفحات الانترنت الى عملت من كل واحد فينا مصطفى كامل واحمد عرابي وسعد زغلول

فليحيا العيش المدعوم ومش موجود ..

فلتحيا الكهرباء والمياه المقطوعة

فلتحيا المواصلات

ولتحيا الاجور والمرتبات

ولتحيا وزارة الصحة والمستشفيات

فلتحيا الساقية والطاحونة والجاموسة والحمار

وفليحيا حسن شحاتة والمنتخب الوطنى

وليعيش ابو تريكة

ومنك لله يا حضري

من غير عنوان

ظهرت براءة الناب هانى سرور وكل المتهمين فى الاتهامات الموجهه اليهم

وان خير اللهم اجعله خير

مابقاش فيه قضية من اساسه

لاسمه ايه ده بعد الشر

اكياس دم ملوثة

فى نفس الوقت الى حكم عسكريا على بعض رجال الاعمال

والى اطلقوه عليهم اسم (اخوان) بالسجن

من 10 الى 3 سنوات

خير اللهم اجعله خير برضة

.........................

خلاص عايزين ايه تانى

ما هو طلع لا فيه اكياس دم ملوثة

ولا طلع فيه دم اساسااااا

واحد ميكروباص وحياتك - 3

واحد ميكروباص وحياتك - 3

واحد اجتماعيات:

عانس هو لقب قاسى تحصل عليه كل امرأة لم يشأ لها الله بالزواج والمطلقة هو اللقب الذى تحاول العانس الا تأخذه اذا حدث وتزوجت وقارنت حياتها قبل الزواج وبعده

واحد مطب صناعى:

صرح خبراء ان الماساة الانسانية اليومية فى الطرق والمواصلات يرجع لسير اكثر من مليونى سيارة فى الشوارع التى لا تتحمل سوي 450 الف سيارة فقط .. وزاد اندهاشى وسالت نفسى وقلت امال الناس مش لاقيه العيش ليـــــــــــــــــــــه ؟؟

واحد فوووول اتوماتيك:

كثير ما اتمنى لو تمكنت من عمل الامر Undo للاطباق والحلل عند اتساخها فى المطبخ ..او اذا جرحت اصبعي بسكينة .. او اذا ارتديت ملابسى بالمشقلب .. او اذا اغلقت الباب ونسيت المفتاح بالداخل

واحد رغيف عيش:

بسبب ازمة احتكار حديد التسليح واشتعال اسعار كل مواد البناء من اسمنت ورمل وزلط وتراب .. حدثت أزمة رغيف العيش .... مش علشان مش لاقيين العيش .. لان من بعد رغيف العيش .. مش هنلاقى زلط ناكله ولا تراب نسفه

واحد رابطة مشجعى سيون:

تداعت ازمة الحضري مع تداعيات ازمة ارتفاع الاسعار والسولار والبنزين وانعدام الرغيف ... والحقيقة مش عارفة حظ الحضري هو الى نحس لانه ماكنش وقتك اساساا ... ولا احنا الى شعب فقرى وحتى الحضري كنا ناقصيينه

واحد سياسية:

تطالب الحكومة المصرية الاتحاد الافريقي لكرة القدم لجعل بطولة الامم الافريقية كل شهرين وذلك حتى يتسنى لها رفع الاسعار من غير ما حد ياخد باله بينما الشعب بيرقص فى الشارع

واحد ميكروباص وحياتك - 2

واحد ميكروباص وحياتك - 2

واحد ابو تريكة:

قرر الاتحاد المصري لكرة القدم
استبدال
النشيد الوطنى بلادي بلادي

لفنان الشعب

سيد درويش

وذلك بأغنية انت مصري

لفنانة الشبــــــــــاب

نانسى عجرم

وذلك فى كل المباريات والبطولات الدولية للمنتخب

تحالف قوى الشعب من الترزية

تحالف قوى الشعب من الترزية

اجتمع عم سعيد باترون كبير الترزية فى المنطشقة بمجموعة من الاسطوات من نفس الكار لمناقشة موضوع وقضية هامة تخص جميع انفاس الشِعب .. وكان الاجتماع فى احد غرف العمليات السرية والى مايعرفش مكانها ولا الجن الازرق والاحمر

يبدا عم سعيد الجلسة وله صوت اجش نقدر نقول زى صوت اللمبي .. موجها كلامة للرجالة:

عم سعيد باترون:

بصوا بقى يا اسطوات ... الى احنا فيه كل يوم ده مش حل .. ولا هينفع كده نبقى ملطشة . وناخد على قفانا ونسكت كل يوم ونصهين .. الناس الغلابة ذنبها ايه ... والناس الى ملهاش حتة تقويها وتلمها .. نسيبهم يتمرمطوا وما نعملش عـــاجة .. ؟؟ لازم تشوفوا عــــل وناخد موقَف وسريع .... !!!! (موقف بفتح القاف)


يرد الاسطى خميس زراير : موقَف ايه يا اسطى .. نروح نحتل يعنى عبد المنعم رياض ولا عبود .. ؟؟


سعيد باترون: انت اتسطلت يا اسطى ولا ايه .. موقَف ايه الى هنروح نحتله ... هو احنا كمسرية وعايزين علاوة .. بقول موقف يعنى نعمل عــــاجة .. ونتخذ قرار حكيـــــــــم

يرد الاسطى شعبان عراوي:
هههههههه .. حكيم ده عنده نبتشيه ... عاعا عاعا .. هي هي هييي هيي

سعيد باترون:

ما هو اصلنا مش خالصين النهاردة ... ومش فاضيين غير للخفة واللطافة بتاعة .. امثالكوا ... وانا وقتى ثمين ... وبضيعوا معاكوا

شعبان عراوي:

خلاص يا عمنا حقك علي رقبتى انا ... وقولنا ايه المشكلة دلوقتى .. يعنى انا مش فاهم بالظبط هى ايه المشكلة فى حد ذات نفسيتها .. ؟؟

سعيد باترون:

خلاص كل واحد يحط لسانة جوا جزمتة واسمعوووووووووواوواوااااعععوووونى .. علشان نعرف نقول الكلمتين المنعششين فى نافوخنا قبل ما يصوصـــــوا

يكمل سعيد باترون حديثة وباقى الاسطوات بيحاولوا التركيز فيما يقول:

طبعا احنا كلنا شايفين الجو والى عامله فينا الجو .. الساقع والمتلج الهافف علينا من كل انحاء البلاد .. بقينا ملطشة من اورومــــبما وامريــــكا .. الى عاملين يحدفوا علينا الجو الممهبب ده .. واحنا غلابة وشعبنا واهل حتتنا غلابة .. فلازم نشوف صرفة فى الموضوع ده وناخد موقف ... وانا من منصبي هذااااااااااا ... اناشدكم يا اهل حتتى ودايرتى .. انكم تساعدونى وتحطوا اديكوا فى اديا

وهنا يتدخل صوت محسن مكوك: يا عم الاسطوات وجعت دماغنا من صباح ربنا يا ريت تنجز فى الوينجز وقلنا هنعمل ايه .. هو فى استنخابات قريب يا ريس ولا ايه ؟

يستكمل سعيد باترون:

اتهلي على عينك واقعد ساكت ولا هقوم اغزززك ... احمم احمم ... احنا دلوقتى اكيد سمعنا عن سؤب الاوزون والاستحباس الحراري .. انا متاكد ان هما دهووولا السبب فى الى احنا فيه ... علشان كده انتو اول ناس جيتوا فى بالي يا اسطوات .. لان السؤب ده لعبتنا لو رحنا عند السؤب وسدناه .. اكيدد هترتاح كل الشعب.. وبالنسبة للاستحباس .... هنشوف برضة الاسطوات الى شغالين فى الاستحباس وهنديهم المهمة دى .. بس لازم نبتدى بنفسيتنا .. ولما هنعمل كده ..اكيد اكيد اى حد هنكلمه هيتشجع علشان يخدم بلده واهل حتته .. مش كده ولا ايه يا رجالة

الرجالة فى صوت واحد فخيم : صح يا معلم .. براووة عليك يا اسطي سعيد وتسلم الدماغ المتكلفة

يكمل سعيد: طبعا يا رجالة احنا هنعتمد على التبرعات ... علشان نقدر ننجز مهمتنا الوطنية والنزيهة وبمنتهى الشفافية

يقطاعه صوت محسن مكوك: احممم احمم ... كلمنا عربي إحيــــات ابووووووك يا عمنا

يكمل سعيد باترون:

ما تهمد يـــــــــاض هقوم اعلمك على خلقتك وما يبانلكش وش من قفا ... شكلك هتودينا فى داهية ... ما احنا لازم نتكلم بالسيم ياااض علشان ماحدش يفهمنا ... ونبقى فى السليم .. لان لو حد شملنا ريحه .. هيتقبض علينا .. ومش بعيد يتهمونا بالجاسوسية ... ولا التخابر لصالح استخبارات دولية وشعبية

والكلام ده انا عرفته من استاذ الاانون (القانون) الاستاذ عبد الباسط القانونجى .. حاجب المحكمة الابتدشائى

شعبان عراوي: خلاص يا عمنا حقك على الى خلفونا ... كمل يا استطنا وقسم وسن مقصك وسمعنا

يكمل سعيد باترون:

كنا بنقول ياغجر هنعتمد على التبرعات .. يعنى مجموعة من اهل الحتة يتبرعوا باجرة الميكروباص للواد عبده سرفيس الى هينقلنا بربطة المعلم إشـــاء الله على السؤب .. وعايزين تبرعات تانية تمن السلم الى هنطلع بيه للسؤب وتمن الابر والخيط

هتقولوا وهنعرف مقاس السؤب اد ايه ازاى ؟؟؟ .. احنا هنروح تحت السؤب ......... ونبص عليه بعدسة مكبره .. علشان نقدر نعرف بالظبط مقاس الرقعة الى هنطلع بيها ونسد بيها السؤب

يقاطعه عرفة المكوجي .. وهنبص على السؤب الى فى السما ازاى يا ريس ... ده الشمس تحرق عنينا ؟؟

سعيد باترون والشرر يتاطير من ...... من عينه ..: انت ايه الى جابك هنا يا مكوجى ... احنا مش قلنا الاجتماع ده لاسطوات الترزية

عرفة: ايه يا عم الحج .. المكان ده مكانى وانتوا الى نزلتوا عليا بالبارشوت من طيارة هيلويكتر

سعيد: خلاص خلاص انت هتذل (انفاسنا) ... على العموم برضة رايك سديد وفى محله ... وعلشان نفسك الحلو معانا .. هنحدد معاد الخطة تكون بعد العصاري .. على ما نوصل هناك تكون الشمس غابت ونلحق تبص على السؤب قبل الضلمة

وقبل ان يكمل سعيد حديثه .. سمع صوت كركبه ودوشة خارج باب غرفة الاجتماعات ...

"اجرى يــــالا "

"ارمى الى فى جيبك يااض"

"ايوا ايوا من هنا ..""

"كبســــــــــــــــــــــــــــة يا رجالـــــــــــــــــــــــــــــــــة"

وهنا دخلت افراد من قوات الامن والشرطة .. والقت القبض على كل من المتهمين ..
سعيد باترون
وخميش زراير
وشعبان عراوى

ومحسن مكوك
وعرفة المكوجى
وعبده سرفيس سواق الميكروباص

وذلك بتهمة التعاطــــــــــــــي

واحد ميكروباص وحياتك

واحد ميكروباص وحياتك

واحد ميكروباص وحياتك

باب جديد فيه خواطر بسيطة اشاركها معكم ليس لاى غرض الا للشهرة وكسب الاموال الطائلة واستنهاز الفرص واستغلال الشعب العامل

منتهى الحب والتقدير والتواضع من معالي شخصي الجليل

منكم واليكم ... واحد ميكروباص وحياتك

واحد اجتماعيات:
العروسة .. هى الفتاة الوحيدة التى اختارها العريس من بين صديقاتها لترتدى الفستان الأبيض استعدادا للعمل كخادمة بمنزله

واحد مطب صناعي:
اذا كنت تمشى فى الشارع صباحا وسمعت صوت دق للطبول والزغاريت والافراح لا تستعجب اذا اكتشفت انه لا يوجد فرح ولا يحزنون على صباح ربنا وان هذا الصوت فقط خارج من توك توك

واحد سجل مدني:
دائما ما نحتار فى اختيار اسم جديد للمولود .. وتزداد الحيرة عندما نبحث على اسم دلع لهذا الاسم


واحد أشغال شاقة قسم احفر فى الجبل:
كابتن ... هو كل يوم شغل شغل ... هو مافيش شتيمه ولا ايه ؟؟؟


واحد عباسية نفسية:
كلما كانت الاجازة السنوية طويلة ومريحة كلما كانت سبب اكثر المعاناة فى العالم اذا ما تذكرنا ما سوف نعود اليه


واحد تكنولوبيا وزبادى فى المايكروييف:
كثير ما اتمنى ان امتلك محرك البحث جوجل او ياهوو داخل ادراج ودواليب المنزل والمطبخ


واحد سياسية:
الحزب الوطنى الديموؤراطي .... يا انبل يا اكرم يا اجمل يا اسعد يا اشرف يا محمد يا جمال يا عزمي يا اسماعيل بس اسماعيل مين ؟؟

مئوية اسم النبي حارسها .... جامعة القاهرة

مئوية اسم النبى حارسها - جامعة القاهرة

تحتفل جامعة القاهرة اليومين دول بالمئوية .. يعنى ان مر على انشائها 100 سنة بالصلاة على النبي ... من سنة 1908 لسنة 2008

وطبعا لا يخفى على احد اليفط والاعلانات والتهانى الى مغرقة ابواب كليات جامعة القاهرة من اول كلية الهندسة لحد كليه الزراعة

طبعا هو حدث عظيم .. 100 سنة برضة دول مش شوية .. وهو الواحد يعنى عمره فيه كام 100 سنة علشان يحضر احتفاليه زى دى .. بس طبعا خطر على بالى خواطر كتيير جدااا وانا اعايش هذا الاحتفال الكبير

من اهمها سؤال فرض نفسه وهو يا ترى جامعة القاهرة والقائمين على جامعة القاهرة .. بيحتفلوا باية بالظبط بعد مرور 100 عام ... ؟؟ هل مجرد مرور 100 عام على انشاء مبانى وقبة وساعة ومدرجات الجامعة يستحق هذه الاحتفالية .. ؟؟؟ ام هناك انجازات اخرى تدخل فى هذه الاحتفالية ... ؟؟

وطبعا تبادر لذهنى فى الاول ان صاحبه هذه الإحتفالية هى وزارة الثقافة .. او الهئية العليا للاثار ... وذلك لمرور 100 عام على مبانى الجامعة وبالتالى تدخل فى عهده هيئة الاثار وانها ممكن تكون مزار سياحي ... متناسيين ان فى حاجات تانية برضة المفروض تتكهن وتدخل فى عهده قطاع المتاحف باعتبارها تحف (وذلك طبعا مع كامل احترامى للدكاترة والعمداء ورؤساء اقسام الكليات)

لكن بعد كده اكتشفت ان الفيلم ده طلع يخص وزارة التعليم العالي (ولا اعلم حتى الان لاى موصوف تنتسب الصفة (عالى) ؟؟

ومن هنا تبدا الوكسة التقيلة ... موجهه كلامى لما تسمى بجامعة القاهرة ووزارة التعليم المقبول .. لانها ما حصلتش تكون مرتفع حتى... يا ترى يا هل ترى .. ايه بقى تحديدا الى بنحتفل بيه بعد 100 سنة تعليم جامعي ؟؟

هل نحتفل بكم الانجازات العلمية والبحثية الى اكتشفتها و حققتها الجامعة فى اخر 50 سنة وتقدمنا بيها ما بين الدول الاوروبية والامريكية ولا حتى الصومالية ؟؟؟

هل نحتفل بكم الكوادر العلمية الى اتخرجوا من الجامعة وتبنتهم علميا وثقافيا ومعرفيا ... وافادوا البلد فى اخر 40 سنة وصدرنا خبراتهم واكتشافتهم للدول الأجنبية والعربية والرواندوتشيكية ؟؟؟

هل بنحتفل بكم الاكتشافات والابحاث الى تبنتها الجامعة وصرفت عليها واستثمرتها فى اخر 30 سنة واشتريتها اى دولة افريقية حتى .. ؟؟؟

هل بنحتفل بالترتيب العالمي الفائق الى حصلت عليه الجامعة ما بين جامعات العالم الى ما حصلوش يمكن ربع عمرها وتصدرنا بيه قائمة احسن جامعة فى العالم ؟؟؟ ... وهنا تذكرت التلميذ الخايب الى كان ممكن يكون الاول لولا وجود الاخريين ؟؟؟

هل بنحتفل فى المئوية بامتلاك احدث المعامل والمختبارات والاجهزة الطبية والعلمية ومراكز التدريب ومراكز البحوث التى تستقبل الوفود من الباحثين والطلاب للعلم والتعلم ؟؟ (وفود الطلاب من نجع حمادى .. علشان بس ماحدش يفهمنا غلط)

يا ترى الجامعة بتحتفل فى مئويتها بانها خرجت كام جاهل من حملة البكالريوس والليسانس الى بيكتبوا اساميهم بالعافيه والى مناظرهم واشكالهم لا تصلح غير للعرض فى فاترينه متر x متر على رصيف الازبكية ؟؟

يا ترى الجامعة بتحتفل بكام عاطل تخرج منها ولسه قاعدين على القهاوى واقصى طموح اى حد فيهم انه بشتريله توك توك ولا كشك سجاير ولا يشتغل باليومية مع سواق ميكروباص .. ولا يروح يركبله القطر ويبقى كسيب .. واهله داعينله ان القطر ما يولعش بيه ولا يتقلب فى اول مزلقان

يا ترى الجامعة بتحتفل بالانجازات العظيمة الى حققتها فى المستوى التعليمي الراقي للطلاب وتكافؤ الفرص بين المتفوقين (من ابناء الدكاترة بس طبعا) فى الحصول على مصطبة فى هيئة التدريس ؟؟

ولا الجامعة بتحتفل بالمراجع والكتب العلمية لجهابذة الدكاترة فى الكليات ... الى بتتباع فى مكتبات شارع بين السرايات .. والى لما الطالب بيشتريها بيعلموا على اسمه .. والقائمة تروح للدكتور علشان يبقى معروف مبدئيا مين ناجح ومين ساقط فى المادة قبل حتى ما يكتب اسمه فى ورق الامتحان ... ؟؟؟

ولا يمكن بتحتفل بعدد الاكشاك والموزعين الهائل لسجاير البانجو ولفائف الحشيش داخل الحرم الجامعي .. وما خفى كان اعظم ... ؟؟؟

يا ترى فى 2008 جامعة القاهرة بتحتفل بايه ولا ايه .. ؟؟
بالتقدم الهايل الى حصل فى ال100 سنة الى فاتوا .. ؟؟؟
فى الطلبة بتوع زمان والطلبة بتوع دلوقتى .. ؟؟
فى الدكاترة بتوع زمان وبتوع دلوقتى ... ؟؟؟
فى مناهج زمان ومناهج دلوقتى .. ؟؟؟
فى خريجين زمان وخريجين دلوقتى .. ؟؟؟

يا اختى ادارى على جمب ...
وغطى على خيبتك التقيلة ... واتلمي هنا جنب الحيط
هى طالباها جوراس وفضايح
ما احنا عارفين الى فيها و لفينوا سوا
(الكلام هنا موجهه لبنت اختى)

قاهرة المعز ... بقت بنت عز

قاهرة المعز ... بقت بنت عز ... متمرمطة

مافيش حد فينا من سكان القاهرة والجيزة مش واخد باله ولا شاف ولا عاش الزحام الغير طبيبعي الى بنعانيه كل يوم وكل لحظة وكل فامتو لحظة فى شوارع المخروسة

قصة عذاب كل صباح وكل مساء .. حدوته الزحام والشوارع الواقفة والعربيات المتكربسة و المواصلات الى على بعضها سواء كانت ميكروباص أو مترو أو اتوبيس أو حتى تاكسي

ده حتى التاكسي بقى بيحمل طول ما هو ماشى زى الاتوبيس ... ويا ربت الشوارع ماشية ولا حتى المواصلات مكفيه .. كله واااااااقف .. والعاصمة بتتحول بقدرة قادر من الساعة 7 الصبح لحد 12 بليل لموقف او جراج كبييييييير للسيارات

والى توصلتله بعد عامبن او اكثر من العذاب .. ان الزحام ده مش عارض طارئ .. ولا تشريفه مسؤل كبير معدية ... ولا ان فى حادثة .. ولا لان اليومين دول موسم .. ولا ان القطورات بتدخل على بعضها فالناس بتركب المواصلات العادية ... الزحام ده بقى حدوته مصرية يومية

ولو انت عندك مشوار مهم اخر حاجة تفكر فيها انك تركب عربيتك او تاخد تاكسى او ميكروباص او اتوبيس .. وبصراحة ولا حتى مترو ... ولو تعبت او حد من عيلتكوا تعب ما تفكرش تطلب الاسعاف لانه اكيد المريض (هيفقس) فى السكة ... ولو وراك امتحان يا دوبك تنزل قبليها بيوم ... ولو وراك مقابلة او ميعاد مهم ... ابقى حدد معادها قبليها باسبوع وانزل قبليها بـ 3 ايام ... ولو رايح مشوار ممكن تاخدها من قصيرها وتتمشى لان اكييد هتوصل اسرع بكتييير حتى لو كنت ساكن فى أكتوبر او حلوان ورايح مشوار فى مصر الجديدة او التجمع الخامس

بحثت كتييير عن الاسباب .. لقيت اهمها ممكن يرجع لسوء التوزيع الجغرافى .. كل سكان المناطق الجديدة سواء فى 6 اكتوبر او الشيخ زايد او التجمع الخامس او العاشر او اطراف مدينة نصر هتلاقى اشغالهم ودراستهم ومصالحهم فى وسط البلد او فى الجانب التانى من الكرة الارضية ... فبقى اغلب الناس عايزة تروح عكس ما هى ساكنة .. فلكوا ان تتخيلوا المنظر ممكن يكون عامل ازاى ... يعنى دكهوما عايزين يرحوا عند دكــهيا .. ودكـــهيا عايزة تروح عند دكهـــوما ... وطبعا دى ولا ارشميدس شخصيا يعرف يلاقيلها حل

برضة كمية العربيات الجديدة الى بقت ماشية فى الشوارع ... وكمية التراخيص الى بقت بتمنح كل فامتو ثانية برضة ... وده باعتبار ان احنا من الدول الى بقينا (ور-ور) لاننا تفوقنا على لقب (نامية) مابين الدول الى مش لاقيه تاكل ... وبدون اعتراض على ان العربيات الزيرو تنزل الشوارع .. بس كل عربية تنزل نشيل قصادها واحدة من القديمة .. مش نلاقى عربيات جديدة .. وجمبها عربية من سنة 20 لسه ماشية فى الشارع .. والاسرة بدل ما كان معاها عربية .. فى اسر بقت العربيات عندهم زى الموبيلات .. كل فرد فى الاسرة معاه عربيته

طبعا ما يزيد الطين .. طين .. كل ما يمشى فى الشارع ولا يمت باى صلة لانه يكون عربية او اتوبيس او موتوسيكل او مقطورة او ميكروباص ... وده طبعا امثال التوك توك - البوكس - الكارو - اشباه الميكروباص - ويا عالم ايه تانى يجرى فى المجرة الكونية ومش عارفينه

ايضا لا ننكر التخطيط العام للطرق والمواصلات العظيم لحكومتنا المبجلة ... الى رايحة تصلح المحور مع بداية موسم الصيف ... وبتصلح فى الدائرى مع دخول المدارس والجامعات .. وغيره كتير من الشوارع الى مفتوح كرشها علشان التصليح والصيانة فى مواسم الذروة ... واكيد هناك العديد من الأسباب التى لا حصر لها ولا عدد

ومن الحلول البسيطة الى توصل لها شخصى الضعيف ... الى تنفع كبنج مؤقت ... امكانية تغيير مواعيد بعض المصالح الحكومية او المدارس او الجامعات فى الدخول صباحا .... يعنى زى ما حصل قبل كده واجازة الموظفين اتقسمت بين يوم الخميس ويوم السبت مع يوم الجمعة ... وقبل كده بعض المدارس لما كانت فيها فترات مسائية ... نحاول تانى نعيد التفكير فى حكاية مواعيد الصبح ... يعنى الهيئات الحكومية بدل ما تبتدى من 8 الصبح ممكن تبتدى 10 او 11

او المدراس بدل ما تدخل الساعة 7:30 الصبح يدخلوا 9 او 10 ... الجامعات ما تبتدى من الساعة 1 او 2 ولا حتى 3.. وهى الطلبة وراهم ايه يعنى .. واهه بدل السنكحة فى الشوارع ؟؟

لكن ان كل شعب مصر ينزل الساعة 7 الصبح وبنفس الكم من العربيات وفى نفس الشوارع .. اكيييد هنفضل فى هذه المأساة الانسانية الا ما لا نهاية .

وبعدين اخر حاجة احب اقولها ... ارحموا عزيز قوم ذل ..
وافتكروا تانــى ايام الامجاد وايام بناه الاهرام ...

والخس يا اخوانا ... الخس مهضوم حقه على السفرة المصرية .. ويا ريت نهتم شوية بوضوع الخس ... علشان الرجيم ... والاتوبيس بدل ما بيشيل 170 بنى ادم فى المرة الواحدة .. ممكن يشيل 218 سخص

تـــوك تـــوك صباحك ... ولا تويوتا مساءك

تـــوك تـــوك صباحك ... ولا تويوتا مساءك

ودى كانت اصطباحة الواد حموءة الجنتل وعبده البرنس سواقين التوك توك ... ومن هذا المزنق .. احب احيي حموءه والبرنس ... واقولهم يا صباح التكـــاتيــك

ومن مزنقى هذا برضة احب اوضح لعلية القوم والمثقفين والمفكرين ومنظمات حقوق الانسان ومواطنون ضد تعذيب وزارة النقل والمواصلات ان التكاتيك (جمع توك توك) عبارة عن صراصير تم اطلاقها فى الشوارع من غير رخص ولا ابواب ولا شبابيك ولا حتى سواقين .. مالية ضواحى ست الكل والمتصانة فى عين امها مصرنا المحروسة

فا يااخوانا الافاضل التوك توك ده بعيد عن السامعين والحاضرين عبارة عن موتوسكيل بشيزلونج يكفى لفرد ونص فقط وله تسقيفة جلد ومن غير باب ولا شباك .. وده لان هو كله على بعضه اصلا عبارة عن كرسى بعجل ... ومليان دليات وحاجات بترقص وبتلعب وجهاز تسجيل يصلح تشغيله على الاقل فى دبابة او طيارة .. وسايقة طفل لا يتعدى عمره 15 سنة وبيجرى زى الصرصار فعلا فى الشوارع الضيقة والجانبية والفرعية فى اجدع حتة فيكي يا مصر

للوهلة الاولى هتفتكر ان ده حاجة زى البيتش باجـيي بيتركب كبيره على سواحل راس البر او بلطيم ... او انه عربية هربانة من ملاهى مدينة الانتاج الاعلامى .. بس الحقيقة المؤسفة والمألمة .. ان الشئ ده بيتركب فى صباح كل يوم فى شوارع المحروسة وبقى من ضمن رؤوس الاموال الثابتة لوزارة النقل والميكروباصات

والسر والعناية الالاهية فى ان الصراصير دى مش واخدة ترخيص ... وذلك لمنعها من انها تمشى فى الشوارع الرئيسية .. وده طبعا لان المشرحة مش ناقصة ميتيـــــــــــــن

وبالبحث عن اصل البتاع ده وجد انه اصله هندى ... ويطلق عليه اسم الريكشة ... وفى احد التحقيقات الصحفية اطلقوا عليه تاكسى الغلابة .. واجرة التوصيلة تترواح ما بين جنية لجنية ونص ... وعربية التوك توك وصل ثمنها لـ19 الف و23 الف جنية من اصل ثمنه 9 الاف جنية الى هو (البوذا الهندى على ابوه) ... ده غير انى سمعت ان فى الارياف وعند بعض الناس البسيطة .. العروسة بتجيب لعريسها العاطل فى الصباحية توك توك بـ17 الف جنية علشان يبقى ليه دخل يصرف عليها وعلى العيال

الميزة طبعا فى التوك توك انه توصيلة ملوكى ... يعنى تركبه وتدلدل رجليك فى الطين .. اووه لامؤاخذة فى الهوا ... والهو بيهفهف عليك من كل ناحية .. غير انك سامع شريط كاسيت يكسر الدنيا والازاز ... غير انك راكب وعارف اخرة الاجرة كام ... ان شاء الله هتروح المريخ

وطبعا وسيلة مواصلات امنة جدا .. لان العلبة دى لو خبطت اى حد .. أخره هيتخربش فى صباع رجله الصغير .. ده غير لو السواق اتخبط فى مخه وحب يروش ولا يعمل اى حركة مش ولابد .. مد رجلك تحت عجل العربية وهى هتتقلب على وشها على طول

كما انها وفرت فرصة عمل لاسطول من الشباب ذو التعليم المتوسط وحتى العالى ومش لاقى ... والى اتحولوا كلهم بقدرة قادر لاسطول من التكاتيك فى الشوارع

لو بصينا على الجانب الغامق الى فى الموضوع ... وافتلسفنا وافتكرنا ايام الامجاد وايام بناة الاهرام وايام الميكروباصات العظيمة واتحسرنا على ايام عربيات البوكس والنص نقل واخرتها كمان توك توك .. يعنى حتى مش توك واحد .. لا اتنين

ولا افتكر لما دمى بينشف من صوابع رجلى لام رأسى لما البتاع ده يديك كتف وانت ماشى على الرصيف علشان يعدى من جمبك .. ولا الادمية والتحضر الى احنا وصلناله والشعب مقرفس جوا الكائن ده علشان يوصل لاول الشارع علشان يبتدى رحلة عذاب مواصلات كل يوم والى ابتدت باصطباحة الجنتل والبرنس

ولا لما افتكر شعار الكذب الوطنى الديموؤراطي الجديد ... مصر بتتقدم بينا ... وده بعد الشلوت للمستقبل بتاع السنة الى فاتت ... وافتكر اعلانات مصر بتتقدم بينا الى طرشناها فى التليفزيون ومش عارفين ده كله ليييه .. وادينا عرفنا .. وما لنا ان نتضرع الى الله وندعوه ان يبارك لنا فى رعاة امرنا ووزارة نقلنا والاهى يقرفسونا كمان وكمان

وادينى فى التوك توك وانا احبك يا فنانس

يا مصري انت الى هاممنى

الغش والغلا

الأكل والشرب فى إيد اللومنجية

والطماعين اللى غلوا الملح والمية

والغشاشين اللى فاقو ع الحرامية

الشاى بالمفتشر مخلوط ملوخية

والبن فيه الشعير تسعين فى المية

والعيش برمله وطينه يا مناخليه

واللحم معروض بدون أختام رسمية

والمية هى اللبن ولا اللبن هيه

افاعى متسيبه من غير رفاعية

ودنيا مترتبة ترتيب فلاتيه

"بيرم التونسى - 1976"

-------------------------------------------------------------

فييييينك يا بيرم تشوف الى جرا .. ؟؟؟

ده الى جرى لا ينشاف ولا ينقرا

الشاى خلطوه بنشارة الخشب

والشعير بقى اغلى من البن

العيش يا ريته كان برمله

ده الى يشوفه ما يقولش ده طالع من فرن

اللحمة ربنا حماها بالقلاعية

وحصلتها بالزكام كل الفراخ والبط

واللبن يا ريته كان ميه .. ده خلطوه بالزفت و الاسفلت

والافاعى هى الافاعى ومتسيبه زى ما هى

ما قدرش عليهم ولا حتى مغاربة الرفاعية

انا بنوتة ... 2007

اسم النبي حارسه وصاينه ... تاااااج

اهدالى زميلي الغالى

محمد جادو

ورطة وسماها تاج

واليكم تفاصيل هذه الورطة

تحييياتي للجميع

اسم مدونتك ؟
للى مش عارف يقرا ... كلام خلاصة

لماذا اخترته وما هى نيتك من وراء اختياره ؟
مرة شفت عربية مكتوب على ضهرها "انا واد خلاصة لاصة" وساعتها الاسم نخشش فى نافوخى .. لذلك قررت اعمل مدونة واسميها كلام خلاصة لذلك من وانا فى هذا المزنق احب اوجه الشكر لصاحب العربية

هل فكرت فى اغلاق مدونتك ؟ ولماذا ؟
كتيييير .. لما بكون مش فاضية .. او زهقت من شكلها

او حسيت انى ممكن هروح فى داهية
فيعنى عادى جدا فى اى يوم لو دخلتوا ولقيتوا شاشة سودة

صورتك فى المدونه ورمزيتها ؟
مافيش صورة .. دى صورة ورقة وقلم علشان تمشى مع الكلام... وبالمناسبة رمزية بتسلم عليكوا

لما دخلت عالم التدوين اساسا ؟
علشان العربية الى كان مكتوب على ضهرها واد خلاصة
وكمان من باب النقد اللاذع والتورية فى التعبير والاستعباط فى الاداء

جمله قيلت فى وصف مدونتك ؟
اكتب بالرصاص اول ما بدأت التودين قالى:اهنئك على افتتاح هذه المدونة واللي شايف فيها ذوق عالي قوي وحس اعلامي مبشر

ومن بعدها وانا قررت اكمل


التعليقات بالنسبه لك ؟ واهميتها ؟
لولا التعليقات كان زمانى قفلت الدكان من زمان .. يعنى بقاء التعليقات بالنسبالي كالانسولين بالنسبة لمرضى السكر
وتكمن اهميتها فى اهمية ما احاول ان اعبر به فى سطورى

احلى بوست كتبته ضع اللينك ثم اذكر لماذا ؟
بحب اوى جابولى ورقة وقلم
واشمعنى وسط البلد
ومش عارفة ليه ؟؟

افضل مدونه قراتها ؟
مدونات الى انا مازلت حريصة على متابعتها وباخد معايا كيس برتقان وجوافة وانا رايحة .. تعتبر بالنسبالى افضل المدونات

اسوا مدونه ؟
مع انى عارفة انه غير لائق اذكر اسم المدونة ... وكتير هربوا من السؤال ده بمنتهى الذكاء .. لكن انا هقول وانا مش بيهمنى حد واحنا كنا رجالة ووقفنا وقفة رجالة ولمؤاخذة
مدونة ما يدعى :Malcom X

هيحصل ايه لمدونتك لما تموت ؟
هخلى الورثة يتبرعوا بيها


اديت الباسورد لحد قبل كده ؟
كتيييييييييييييير ... اصل مش اسرار حربية يعنى
ده كله هاتش فى الكلاتش

كانت ايه طبيعة علاقتك بيه ؟
حبة كتير من صحابي على شوية كتير من العيلة

اسمك ؟
ان ان ان اان ااااااااااااااااااه

المشهور بيه وسط اصحابك ؟
والله صحباتى بيقولولى يا دوووووووووو

عمرك ؟
بتاع 25 يعنى حوالى 18 سنة

دراستك مجالك ؟
الدراسة غير المجال

شخصيتك نوعها ايه ؟
بمبة بكرانيش فحلووؤى

السفر بالنسبه لك ؟
زى السفر بالنسبة لاى حد معدى فى الشارع

وقت فراغك بتعمل ايه ؟
يعنى ايه وقت فراغ ؟؟؟؟

الاكله المفضله ؟
كافيار .. والسيمون فيميه .. والفواجرا
يعنى من الاخر الفول والطعمية والعجة

الصفات التى اخذتها من بابا ؟
مناخيره والبساطة

الصفات التى اخذتها من ماما ؟
البساطة برضة وافتكر الصوابع

اكتر ست حاجات بتكرهها ؟
الكدب
النفاق
النفساويات السودة والصفرا
الحقد والغل
التليفون والموبايل
اطلع ورقة من مصلحة حكومية

اكتر ست حاجات بتحبها ؟
البحر
الهدوء
الأنتخة
النظام
كل احلامى تتحقق
والمحشى

الشغله بالنسبه لك ؟
بسببه الوقت الفاضى بيبقى مليان وخنييييق

الانترنت بالنسبه لك ؟
اكل عيشى

امرره لمين ؟

لاول خمسة هيدخلوا ويعلقوا على البتاع ده

تحيييييييييييييييياتى .. والان مع فاصل
حالوا يا حالو

مافيش واحد خواجة يترجم الكلمتين دول ؟؟

يا مرارة الى خلفوونى
مقتطفات مما صرح به مسؤول نحيييييييف المستوى فى
جريدة الاهرام 22/8/2007

جماعات سرية تسعي لتضليل الرأي العام بادعاء وجود قمع وترهيب للمواطنين

أكد الوزير عدم التهاون مع أي حالة انحراف أو تجاوز أو انتهاك لحقوق الإنسان‏.‏

واتهم الوزير العناصر التي تنتمي لجماعات سرية باستغلال النشرات الصفراء في الترويج والادعاء بوجود أعمال قمع وترهيب‏,‏ لتضليل الرأي العام‏.‏ وقال‏:‏ إن الشعب لديه وعي كامل بالمقاصد الحقيقية والمخاطر المحيطة به‏,‏ نتيجة الأنشطة غير الشرعية لمن يروجون لهذه الدعاوي‏,‏

وأعلن استمرار أجهزة الأمن في انتهاج سياستها الحاسمة‏,‏ وعدم التهاون مع العناصر التي تسعي بإصرار إلي تعميق نشاطها التنظيمي السري‏,‏ والتستر وراء صياغات تخلط بين شعارات دينية وسياسية‏,‏ بما يخالف الدستور والقانون‏.‏

وتطرق إلي دور أجهزة الأمن وإنجازاتها في مواجهة المخاطر المتصاعدة للإرهاب‏,‏ والأعمال الإجرامية ذات الخطورة‏,‏ خاصة في مجال إجهاض البؤر الإجرامية‏,‏ وأكد ضرورة اليقظة مع تزايد التحديات الأمنية وتربص عناصر الإرهاب‏,‏ وأكد أهمية العمل علي التطوير المستمر للأداء الأمني‏,‏ والإمساك بزمام المبادأة‏.‏

تنويه هاااااام جداااا جدااااااا جداااااااااااااااااااا
الاهرام نقلت الخبر عن وزير داخلية احدى الدول الاسكندنافيه

ولمؤاخذة احنا عندنا عيال عايزين نربيهاااا

عمرك حسيت انك حتة من فيلم لخيري بشارة؟

عمرك حسيت انك حتة من فيلم لخيري بشارة؟

ماجاش مرة على بالك انا هنا دلوقتى ليه وازاى وامتى ؟ عمرك ما حسيت انك نفسك تقول حاجة مش عارف تقولها مع انك سامعها جواك بصوت عالى وبيصرخ

عمرك ما بصيت على اديك الاتنين وتفاصيلها الغريبة وخطوطها الى رايحة وجاية زى ما يكون طريق حياتك الى اكيد هيخلص فى يوم من الايام وتبصلها وانت مستغرب تكوينها وشكلها وهى ليه شكلها كده اصلاا

عمرك ما حسيت ان حياتك كلها شريط سنيما ولو غمضت عنيك لحظة وسرحت بخيالك هتشوفها كلها وبكل تفاصيلها قصاد عنيك اكنك فى اوضة ضلمة ومافيش فيها حد غيرك ومش شايف غيرها

عمرك ما حسيت انك ماشى فى الشارع وسامع صوت موسيقى لعمر خيرت فى ودانك ورجليك شايلاك وبتمشى براحة .. والدنيا فجاة تلف وتدور بسرعة وفجاة تقف عنيك على وش اسمر لطفل صغير وتاخدلك جمب كده وتبص على شكل عنيه الصغيرة وهى بتلمع وسرحانه هى كمان فى دنيا البراءة ... وانت باصصله بهم على الى هيشوفه لسه فى الدنيا الى مخبيا جواها كتير

عمرك ما شفت راجل كبير ماشى على عكاز عجوز فى الشارع وحسيت فى لحظة انك هتكون زى الراجل ده في يوم الايام واليوم ده انت شايفه دلوقتى وبرضة بكل تفاصيله

عمرك ما حسيت انك عايز تكون شاعر علشان توصف الام والاب والحبيب والحبيبة والابن لما حد يسالك عن معنى كل واحد فيهم يبقى ايه فى حياتك

عمرك ما حسيت انك عايز تكون رسام علشان ترسم صورة حلوة لبلد هى احلى بلد فى الدنيا حتى لو كانت غير كده لما يسالوك وانت فى الغربة .. انت بلدك ايه ؟؟؟

عمرك حسيت انك بلياتشو فى سيرك وماشى على حبل وخايف تقع .. ؟؟ او عمرك حسيت انك حتة من فيلم شفته قبل كده 50 مرة ... او ان حياتك كلها فيلم تسجيلي مدته بالكتيير 15 دقيقة بس شايليين جواهم سنييين طويلة

عمرك ما حسيت ان الناس والعربيات الى فى الشارع كلها بتمشى لورا وانت الوحيد الى ماشى لقدام .. والناس كلها باصالك ومستغربة انت ازاى ماشى كده

عمرك وانت جوا عربيات المترو وانت شايف الرصيف الصغير وهو بيقرب من بعيد وبيكبر شوية شوية وتلاقى الناس حجمها بيكبر وعددهم بيكتر وهما مستنين على الرصيف وفجاة عنيك تلمع على ايد ست كبيرة بتسند على كتفك علشان تنزل على الرصيف

عمرك ما حسيت ان نفسك تكون كاميرا تلقط بيها مشاهد حياتنا الى تنفع كلها نرصها جمب بعضها وتعمل منها فيلم خيال علمى لان كلها مشاهد حلوة والسيئ الى فيها طالع شكله حلو برضة


عمرك ما حسيت انك مش قادر تتكلم ونفسك تتكلم بالاشارة وكل الدنيا تفهمك .... او تتكلم بنظرة من عنيك والناس كلها تسمعك

عمرك ما حسيت انك صاحى من النوم مخنوق ومش عارفة ليه وان روحك مش قادرة تستنى جوا ضلوعك وعايز تزعق ووتصرخ وتتخانق وتلعن سلسفين الى جابوا اى حد يقابلك فى وشك .. واول واحد يقابلك تهب فيه وفى الاخر تلاقى انه ده يبقى اعز صحابك

عمرك ما كنت موجود فى مكان ولفترة طويلة لدرجة ان وشوش الناس الى حواليك بقت مألوفة بالنسبالك وحاسس ان الزمن معاهم بقى ولا حاجة وعايز تدردش معاهم وتشوفهم كلهم تانى

عمرك ما دورت على الامان ..؟ عمرك ما هربت من الخوف .. ؟؟ مش خايف من بكره .. ؟؟ مش خايف من النهاردة ... ؟؟ مش خايف من كمان شوية ... ؟؟ مش خايف على الى حواليك والى هما منك وليك ؟؟

عمرك حسيت انك حتة من فيلم لخيري بشارة .. الدنيا بتاخدك والناس تشدك والظروف تهدك وانت لسه قاعد بين الكراسى فى سنيما اوديون بتتفرج على الى بيحصل فيك زى ما يكون مش انت؟

وفى الاخر تلاقيك ماشى بضهرك ومدي قفاك للمشاهدين زى ما يكونوا مش هامينك وتطبع صورتك بوسترات على ابواب السنيمات وانت لسه برضة واقف بضهرك وماشى بعيييييييييييد وضاربها ميت صرمة قديمة

وفجأة وانت خارج من باب السيما تلاقى واحد وققفك وسالك الا هو كيلو الخيار بكام اليومين دول ؟

يالا واهوا كله فى الاخر بيطلع فى الغسيل .. بس لو كان المسحوق ماركة نضيفة

حسرة عليها يا حسرة عليها

حسرة عليها يا حسرة عليها
---------------------------

امبارح الى هو يبقى (يااستر-داي) لطشتنى الغزالة انى انزل اعمل (شوبينج) في المدعو(ء) هيلتوم رمسيس الى فى ميدان التحرير ...

ومش عارفة الى حكم الغزالة انها لازم تروح هيلتوم رمسيس ما انا كنت قاعدة مكلكعة فى بيتنا ومعنوياتى مرتشفعة وفل الفل .. صحيح من خرج من داره اتقل مقداره الى هو اساسا
فى الحضيض وافتكرت ايام زمان لما الواحد كان (بيمبرومبوا) المثل وكان ليه شنة ورنة .. يا حسرة دلوقتى بقينا شمة ورنة و(ميسد كول)

بداياً وبعد غض النظر عن قمة التناقض والفجوة الأنسانية السحيقة بين موقف عبد المنعم رياض من جانب وفندق هيلتوم رمسيس ومول هيلتوم رمسيس من جانب اخر والي بيفصل بينهم كخيط رفيع مجرد شارع التحرير ..

وبغض النظر تانى عن موقف عبد المنعم رياض ومافيه من اتوبيسات وميني باصات والكراسى البرتقانى والناس الى مستنية والناس الى بتجرى والدرة المشوى واللب والسكر النبات والجرايد وكشك ناظر المحطة والزحمة والحر ...

لو بصينا بقى للجانب التانى عند مدخل الفندق صاحب الارتفاع الساحق الى بنكون تحته زى الاقزام الحقيرة .. لوجدنا غزو واحتلال عربي خليجي لهيلتوم رمسيس وكل ما هو حول هيلتوم رمسيس ولكل منطشقة وسط البلد بمعنى اصح

هذا الغزو العربي الخليجي الذى تجسد فى الكم الهائل من العربيات الجيب شيروكي والعربيات السبور والعربيات الاخر موديل والى اول مرة أشوفها في حياتي .. والكم الهائل من الشباب العربي الشقيق (المتروشن) والكم الهائل من الحريم والستات والبنات الشقيقات ام روايح مهفهفة

وبغض النظر بقى عن الكم .. نبص على الكيف والمنظر والهيئة والاشكال الى ما يعلم بيها الى ربنا. احنا ما ننكرش ان الاخوة الاشقاء منورنا ومصر منورة بيهم وبانوار عربياتهم الحقيقة, وما ننكرش انهم عاملين حالة رواج لاقتصادنا الملقح فى العناية المركزة, بس برضة المصريين رجالة ووقفوا وقفة رجالة ولا مؤاخذة

ما يلفت الانتباه فعلاا التبرج الصارخ بين الشباب والبنات العرب , وبقى معروف ان كل الى بنشوفه منهم ده من الكبت الى بيشوفوه في بلادهم .. و ده على اعتبار ان مصر مرتعة لكل مكبوت ومخنوق ومش عارف يعيش حياته

فبقى شئ طبيعي انك تشوف الصبيان والبنات لابسين لبس غريب وعاملين فى نفسهم عمايل اغرب , والمحزق والملزق وكل ده بيبان بقدرة قادر من تحت العباية .. ولا الفل ميك اب والعيون المرسومة والرموش الى مش عارفة ايه وده بقى بيان من تحت النقاب .. والراويح المهفهفة والدلع وده بقى على عينك يا تاجر

والشباب بقى الى راكبين العربيات ونازليين يروشوا فى الشوارع ويعاكسوا ويظبطوا فى البنات ... مش المصريات لا سمح الله ... هما بيظبطوا منهم فيهم بس ...

ولا الكافية الى فى الدور الارضى فى المول الى مهفهف بدخان الشيشة والسجاير من الستات قبل الرجالة

محلات الكاسيت الى بقدرة قادر كلها اغانى خليجي ومحلات الخردوات الى معلقة اعلام السعودية والكويت والعراق على ابوابها علشان كل مجموعة شباب يرفعوا علم دولتهم. واتقلب المول لجامعة الدول العربية

طبعا هما حريين يدللعوا مش ناس جاية تتفسح .. بس الى صعب عليا ان ده بقى معنى مصر عند الاخوة العرب, هى دى مصر فى نظركوا .. هى دى ام الدنيا عندكوا .. العيب مش فيهم .. العيب فى الى فتح الدنيا على البحري .. ويرجعوا يقولوا مصر بلد الاهرامات والحضارات .. حضارات مين بقى.. قولوا مصر بلد المولات والكافيهات .. وعمار يا مصر

انا بصراحة صعب عليا حال شباب وشابات العرب واهتمامتهم ومناظرهم وتصرفاتهم .. وانا الى كان مقطع قلبي حال شبابنا التعبان !!! .. تخيلوا بقى هيافه وفلوس ممكن يعملوا فى مخاليق ربنا ايه .. ؟؟

وفى الهلمة دى كلها افتكرت الست المصرية الشقيانة .. الى بتصحى من النجمة وتصحى العيال وتودي المدرسة وتروح شغلها وتطبخ وتغسل وتمسح وتروح السوق وتدبأ فى مصروف البيت وتظبط الجمعية علشان اول الشهر وفى الاخر تهنن وتدلع ويبقى شكلها حلو .. وبعد ده كله ما تنفعش وتتقارن بمفعوصة من بتوع الكليبات ولا بنساء الخليج الى كل اهتمامتهم احدث خطوط الموضة والفنانين والافلام والاغاني والشوبينج (شوفوا اعلانات روباتا وانتوا تصدقوا)

افتكرت الناس الى قاعدين على محطة الاتوبيس وبيكلموا نفسهم فى العيش والعيشة والى عايشنها ... وعلى بعد كام متر على الرصيف التانى تنتقل لعالم اخر وكانك فى فيلم هندى

هتقولوا ده حقد وغل وكلاكيع سودة .. ايوا كلاكيع سودة اذا كان ده هيبقى حالنا وهتبقى دى اهتمامتنا وهى دى مناظرنا

والله شباب مصر الى مش عاجبنا اكتر مرجلة من المناظر الى شفتها ... ومنه لله الى كان السبب

وواحد اتنين .. الجيش العربي فين

الجيش هنجيبه منين ؟

وكتنا نيلة فى حظنا الهباب

اهلاااااااااااي أهلااااااي .. اوووووه اوووووه

ايه الحلاوة دى .. ؟؟ ايه اللعب ده ... ؟ اهى هى دى الروح وهى دى الكورة ...؟؟؟ الله عليك يا متعب .. الله عليك يا ابو تريكة .... الله علييك يا اسامة يا حسنى

ايه يا رجالة ده ... الكورة مالهاش كبير يا اخوانا ... والله الكورة ماليها كبير ... شايفين الجماهير فى المدرجات .. الناس مش مصدقة نفسها .. الناس بتنطط من الفرحة

شايفين الاجوان ؟؟ شايفيين اللعب ..؟؟ شايفيين الترقيص .. ؟؟ فعلااا حاجة تجنن يا جماعة ... مش ممكن .. مش ممكن ... مش ممكن

مبروك عليكوا الكاس يا اهلاوية ... تستاهلوا والله يا رجالة ... ماتش ما حصلش وماتش جمييل وماتش ما اتكررش من سنيين .. فعلا الكورة اجوان ... و هى دى روح الفانلة الحمرا ... والملعب الاخضر ... وليللتنا البيضة ......

وانا وانت ...... ورقصنى يا حضري

--------------------------------

والى هنا مشاهدينا الاعزاء انتهت احداث مبارة الديربى بين القمتين الأهلي والزمالك فى ماتش نهائى كاس مصر

والى اعتلى عرشه فريق القرن فريق النادي الاهلى

ونقول لجماهير النادى الأهلي الف مبروك على الكاس

ونقول لجماهير نادى الزمالك (هارد لك)

وكان معاكوا على الهوا مباشرة معلقكوا الرياضى ..

سيكي بيكي سيكي بيكي

(معلق أهلاوى)

-----------------------------------------------------------

النهاردة كلنا شفنا ماتش .. اقل ما يقال عنه انه ماتش ما اتكررش من سنوات

فعلاا الواحد وهو بيتفرح على الماتش نسينا انتمائتنا وتعصبنا الكروى

وما بقتش عارف انا اهلاوى ولا زملكاوى

كلنا ما نقدرش نقول ان فى فريق خسران وفريق كسبان ..

الفريقين ادوا مبارة متكافئة وكلنا بننحنى لفريق نادى الزمالك

الى قام بماتش رائع

وهى دى الكورة

وكان لازم يبقى فى حد كسبان وحد خسران

وكفاية علينا احساس المبارة واحنا عندنا 22 لاعب بيأدوا لعب بمهارة وحرفنة

وروح رياضية

وكفاية على الزمالك شرف الحصول على اللعبة الحلوة وهارد لك يا زملكاوية

(معلق زملكاوي)

-----------------------------------------------------------------------------------

النهاردة حققنا التارجت يا جماعة وحققنا ارباح خيالية من المسجات والمكالمات طول فترة الماتش ومع كل جول وبعد المباراة

يا رب ما يحرمنا من ماتشات الأهلي والزمالك

ولا من هبل الشعب المصري

جو اون يا رجالة

وعقبال الماتشات الجاية

وبالمناسبة العظيمة دى هنصرف نص شهر بونس لكل العاملين فى الشركة

(مدير فى احدى شركات المحمول)

-----------------------------------------------------------

بييب بيييب اهههههللللللييي

بييييب بييييبب اهلللللللييييييى

تييييت تيييييت ... تيييت تيييييت

ترابرا تاتاات تييييي

اهلللللللى اهلللللى ... ارقص يا حضررررررري

ارقص ياا حضرررررررييي

(الشارع المصري)

-----------------------------------------------------------

معلش معلشش معلششش

سد يا حبيبى سد

ومبروك للاهلي

هييهيهيهيهههه هييههي هييهي ههييي

خلاص بقى ما تفتحوش بقكوا مرة تانية

معلش هى دى روح الفانلة الحمرا

لازم يبقى فيه تحدى

مش معقول يعنى ننزل كل مرة نكسبكوا كده ونطلع

(واحد اهلاوى لواحد زملاكاوى)

-----------------------------------------------------------

مافيش اهلاوي يفتح بقوا

والا هلم حاجتى واقوم امشى

ما تنكروش ان احنا الى كنا بنجيب الاجوان الاول

وانتوا الى كنتوا بتقلدونا

يالا اهو ماتش من نفسكوا

ولا انتوا نسيتوا برشلونة

واذا كنتوا نسيتوا نفكركوا

(واحد زملكاوى لشويةأهلاوية)

-----------------------------------------------------------

عدد حالات الاصابة بالسكتات الدماغية وصل حوالى 20 مع نهاية الشوط الثاني

والمصابين بالجلطات ترواح بين 50 - 80 ما بين الشوط التالت والرابع

وحالات الوفيات حوالى 40 مع نهاية المبارة

وتراوحت انتماءات المصابين ما بين اهلاوية وزملكاوية

على ان اكثر حالات الوفاة كانت من بين الاهلاوية من صدمة الفوز

وكثرت الجلطات والسكتات الدماغية وارتفاع ضغط الدم بين الزملكاوية من صدمة الوكسة

(مدير مستشفى عام)

-----------------------------------------------------------

اهلي وزمالك ... كاس ودورى

والعيش والعيشة والى عايشنها

منه له .... منه له

وهذا كان نقل حي لاحداث ما قبل وما بعد المباراة

والى سمعته بعد ما صحيت من النوم

وده لانى ما اتفرجتش على الماتش من اساسه :)

(انا بنوتة)

تعمل ايه لو صحيت النهاردة ولقيت نفسك امبارح ..؟؟؟

تعمل ايه لو صحيت النهاردة ولقيت نفسك امبارح

ممكن اوى طبعا يحصل.. ان انا اصحى النهاردة الصبح الاقى نفسى لسه فى امبارح او الاقى نفسى اول امبارح او الاسبوع الى فات او الشهر الى فاتت .. ما هى مش غريبة يعنى .. وهو ايه الى عدل فى حياتنا علشان اصحى الصبح وما الاقيش نفسى امبارح يعنى

فى الاول اكيد مش هتاخد بالك .. وبعد كده لما تلاقى المواقف بتتكرر قصادك .. فى الاول مخك هيهنج وهتروح تغسل وشك ومش بعيد تضرب نفسك كام قلم على وشك علشان تفوق .. وبعد كده هتحاول تركز ..وتفتكر اخر حاجة حصلت قبل ما تنام كانت ايه .. او ااخر حاجة كلتها كانت ايه .. واذا كنت بتستعطى حاجة هتحاول تفتكر اخدتها من مين وبلبعت منها اد ايه ؟؟؟ وفى الاخر حتى لو افتكرت هتستلم لانك هتلاقى نفسك مش فاهم حاجة .. وممكن لو حاولت تفهم هتلاقى نفسك بتاخد تاكسى على اول دكتور نفساني مع ان مشوار الدكتور ماكنش حصل امبارح من اساسه .. ركز كده معايا وبلاش تهييس

طيب لو انا صحيت امبارح وده بقى امر واقع .. اكيد هيحصلي تاني كل الى حصل امبارح .. ما هو اصلا كان حصل خلاص .. يعنى كل الى شفته هشوفه تانى .. (هااه .. لسه مركز) يا تري هعمل ايه .. ؟؟

هل كل الى عملته امبارح سواء كان صح ولا غلط هعمله تانى برضة ؟؟؟ وهل هعمله بنفس الطريقة ؟؟ الناس الى اتخنقت معاهم ولعنت سلسفين الى جابوهم ..هلعن الى جابوهم تانى النهاردة ؟؟ الدرج الى فتحته فى المصلحة امبارح .. هفتحه تانى النهاردة .. ؟؟ وقفتى على النواصى ومعاكساتي للبنات والستات هل هكررها تانى ..؟ شفت امبارح واحد محتاج مساعده ونفضتله .. ؟؟ صلة رحم وما عملتهاش .. ؟ غيبة ونميمية وما سبتهاش .. ؟؟ صلاتى الى اتاخرت عليها ولا حتى ممكن ما صلتهاش ؟

مريض قصرت فى حقه وما زرتهوش ؟؟ صاحبي محتاج مساعدة وما ساعدتهوش ؟؟ قشر اللب الى قزقزته وفى الارض ورميته وما لمتهوش ؟؟؟ مسؤوليتى لامي وابويا ومراتى وجوزى واخواتى واولادى الى قصرت فى حق ليهم وما وفتهوش ؟؟

امبارح الى عدى عليا وكان ليا حق وما اخدتهوش .. سلبيتى فى حياتي الى سبتها زى ما هيا ولا جددت فى نفسى ولا طورت فى حياتي وحياة الى حواليا واى جديد ممكن اعمله وما عملتهوش ؟؟

امبارح الى كان زى اول امبارح وزى الى قبله وقبل الى قبله ولا فرق معايا .. واهوا كله فى الاول يوم وفي الاخر ما عشتهوش

يا ترى لو نمت احب اصحى فى انهوا امبارح علشان اغير اى حاجة نيلة انا عملتها .. اصحى فى يوم شتمت فيه حد .. ولا اصحى فى يوم ظلمت فيه حد.. ولا اصحى فى يوم سرقت ونهبت فيه حد ؟؟ ولا اصحى فى يوم قصرت فيه فى شغلي وعمل كارثة واذيت فيها حد .. ؟؟ ... ولا اصحى فى يوم قتلت فيه حد.. ؟؟؟

يا ترى احب اصحى امتى ولا امتى .. ما هى ايامي وانا عارفها ... وكلها مليانة بلاوي والى فات خلاص عدى ومش هيرجع تانى ..

طب اصحى اصلا ولا ما اصحاش .. ولو صحيت النهاردة هفرق عن امبارح ؟ .. ولو ما صحيتش النهاردة وصحيت بكره .. هل بكره هيفرق عن النهاردة وعن امبارح (هاااه ... لسه معايا .. ؟؟)

وطبعا الكلام برضة للناس الى فوق .. وهارش ولا مش هارش .. وهتعملهوملى نيلي نيلي .. هعملهوملك شريهان شريهان
وبدل ما تصحى وتلاقى نفسك امبارح ... ابقى اتغطى بس كويس قبل ما تنام

مصر بتتقدم بينا

مصرنا المخروسة بتتقدم بينا

اى حد بيتفرج على تليفزيونا المصري وبرنامج البيت بيتهم .. اكيد هيكون زهق واتخنق ومرارته اتفقعت من اعلان (مصر بتتقدم بينا) والى اتعمل منه حلقات مختلفة لكل قطاع من قطاع التطوير والتقدم الى حصل فى مصرنا المخروسة خلال سنوات الازدهار فى العهود البائتة

واسعدنى الحظ انى اتفرجت على تقريرين منهم, واحد بتاع قطاع الاتصالات والتانى بتاع قطاع النقل.

قطاع الاتصالات وعديته, ... برضة الواحد ما ينكرش بقى عندنا القرية الذكية و3 شبكات مختلفة للمحمول وجيل ثالث وشركات انترنت وهواتف ثابتة وبرمجيات والرقم القومي وافلاام يعنى.. صحيح هو كله بفلوسنا ومن افانا بس طب ماشى وبعدين .. يعنى فلوسنا وطوروا بيها والحمد لله وشوفنا حاجة جديدة .. مع ان مش كلنا فارق معانا

ندخل بقى على تقرير النقل ... وهو ده بقى الفقع بعينه, مصوريين المطارات وخطوط السكك الحديد ومترو الانفاق والعربيات الى زى الفل والمواني .. وايه ده كله ايه ده كله .. وايه الحلاوة دى يا جدعان زى ما بيكونوا مصوريين حتة من اوروبا

اول خاطر خطر على بالي, هما حبايبنا دول شايفنا قصادهم هنود مثلاا ولا هما بيذيعوا الاعلان ده لناس قاعدين فى جزر البطيخ

اذا كنا احنا ده كله ... امال مين الى عنده قطورات بتدخل فى بعضيها وتهرس الى قاعدين جواها زى الكفته, ومين الى عنده عبارات بتغرق فى عرض البحر وتغدى وتعشي السمك والحيتان من ركابها , .. ومين الى عنده طيارات تولع فى الجو وتخلي ركابها كباب وطرب ,, مش هى دى مصر برضة ولا ده فيلم كرتون


مين الى عنده مطارات زى الزفت, مافيش حد بيدخل مطار القاهرة وهو جاى من اى دولة برة سواء كانت عربية او اجنبية الا و بيحلف بالطلاق على مطار القاهرة والمعاملة والنضافة والاستقبال والخدمة المقدمة فى مطار القاهرة


مين الى عنده موانى مهببة وفى منتهى القذارة والرسائل الى بتيجى من بره الى بتترمى على الرصيف بالايام لحد ما تاخد الافراج عليها والى اصلا ممكن تقع من الاوناش وتنزل تفتت 100 حتة, والرشاوى والعمولات الى عينى عينك على الأرصفة


مين الى عنده سفن وعبارات منتهية الصلاحية ولا تتوافر فى اى منها شروط الامان ولا الضمان والشي الطبيعي جدا لاى سفينة انها تعطل فى البحر فى وسط الرحلة ان ما كانتش بتغرق طبعاا


مترو الانفاق وقذارته وزحمته الغير طبيعية بسبب قلة عدد القطارات فى وقت الذروة, ومعاملة موظفين الشبابيك الطين, وتمن التذاكر والاشتراكات الى بتضاعف بطريقة مهولة.


الغريبة بقى فى التقرير انهم ما جابوش ولا عربية من عربيات المايكروباز والسرفيس و اتوبيسات علب السردين بتاعتنا ولا حتى مينى باصات ارز لبنان ام جنيه وبريزة والى بندفعها جنية وربع الى مالية الشوارع

والسؤال الذى يطرح نفسه بشده .. وهو ده كله اصللااااااااااااااا ليـــــــــــــــــــــــــــــــــــه ؟؟؟؟
ويا ترى البريزة بتروح فيييين .. ؟؟